Yu Lukluk i Go Long Husat?
“Mi lukluk i go antap long yu, man i sindaun long sia king i stap long heven.”—SNG. 123:1, NW.
OL SINGSING: 143 [32], 124 [18]
1, 2. Yumi mas mekim wanem ol samting bilong soim olsem yumi lukluk i go long Jehova?
YUMI stap long “taim nogut,” na dispela i “givim hatwok” long yumi. Yumi bai karim planti hevi paslain long yumi go insait long nupela taim na stap bel isi. (2 Tim. 3:1) Yu ken askim yu yet, ‘Mi save lukluk i go long husat bilong kisim ol tok bilong helpim na stiaim mi?’ Ating wantu yumi bai bekim olsem, “Mi lukluk i go long Jehova,” na dispela em i gutpela.
2 Yumi mas mekim wanem ol samting bilong soim olsem yumi lukluk i go long Jehova? Olsem wanem yumi inap lukluk i go long God wanpela tasol taim yumi bungim ol hevi long laip bilong yumi? Inap planti handret yia i go pinis, man bilong raitim song i tokaut olsem yumi mas lukluk i go long Jehova bambai em i ken helpim yumi. (Ritim Song 123:1-4.) Em i tok pasin bilong yumi long lukluk i go long Jehova i wankain long wokman i lukluk i go long bosman bilong em. Wokman i save lukluk long bosman long sait bilong kaikai na bilong kisim helpim. Na tu, em i save lukluk long bosman bambai em i ken save long ol samting bosman i laikim bambai em i ken bihainim laik bilong bosman. Olsem tasol, olgeta taim yumi mas skelim Tok Bilong God na painimaut samting Jehova i laik bai yumi wan wan i mekim na bai yumi ken bihainim laik bilong em. Long dispela rot, yumi ken bilip tru olsem Jehova bai helpim yumi taim yumi nidim helpim.—Efe. 5:17.
3. Wanem samting inap pulim tingting bilong yumi na yumi no lukluk i go long Jehova?
3 Oltaim yumi mas lukluk i go long Jehova, tasol sampela samting inap pulim tingting bilong yumi. Dispela kain samting i bin kamap long pren bilong Jisas, em Marta. Em i larim “ol wok i pulim tingting bilong” em. (Luk 10:40-42) Maski Marta em wanpela bilipmeri na Jisas i stap wantaim ol, em i no tingim ol samting bilong bilip. Wankain samting inap painim yumi. Wanem ol samting inap pulim nabaut tingting bilong yumi na yumi no lukluk i go long Jehova? Long dispela stadi, yumi bai stori long olsem wanem pasin bilong ol narapela inap pulim nabaut tingting bilong yumi. Na tu, yumi bai kisim save long olsem wanem yumi ken lukluk yet i go long Jehova.
WANPELA BILIPMAN I NO KISIM BLESING
4. Moses i kisim wanem ol blesing?
4 Moses i lukluk i go long Jehova bilong kisim ol tok bilong stiaim em. “Em i sanap strong i stap, na i olsem em i lukim dispela Man em ol man i no inap lukim long ai bilong ol.” (Ritim Hibru 11:24-27.) Baibel i tok, “i no gat wanpela profet long Israel i wankain olsem Moses. Bikpela i bin toktok wantaim Moses olsem tupela man i save toktok.” (Lo 34:10) Maski Moses i pas gut wantaim Jehova, em i no go insait long Graun Bilong Promis. (Nam. 20:12) Wanem samting i mekim na Moses i no kisim dispela blesing?
5-7. (a) Wanem hevi i kamap bihain long lain Israel i lusim Isip? (b) Olsem wanem Moses i stretim dispela hevi?
5 Lain Israel i lusim Isip na i no winim 2-pela mun yet na ol i komplein long Moses paslain long ol i kamap long Maunten Sainai. Ol i komplein long wara. Ol i toktok planti long Moses na hevi i go bikpela, olsem na Moses i tokim Jehova olsem: “Ol dispela manmeri i laik tromoi ston long mi na kilim mi i dai. Olsem na bai mi mekim wanem samting long ol?” (Kis. 17:4) Jehova i givim tok bilong stiaim Moses. Em i mas kisim stik bilong em na paitim ston long Horep na wara bai kamaut long ston. Baibel i tok: “Ol hetman bilong Israel i lukim Moses i mekim olsem, na wara i kamap long ston.” Ol i dring long dispela wara na ol i no komplein moa.—Kis. 17:5, 6.
6 Baibel i tok moa olsem, Moses “i kolim dispela ples Masa, mining bilong en ‘Traim,’ na Meriba, mining bilong en ‘Kros.’ Long wanem, ol Israel i kros na ol i tok, ‘Bikpela i stap wantaim yumi, o nogat?’ Na long dispela pasin ol i traim strong bilong Bikpela.”—Kis. 17:7.
7 Jehova i pilim olsem wanem long samting i kamap long Meriba? Long tingting bilong God, lain Israel i bikhet long em, na i no olsem ol i bikhet long Moses. (Ritim Song 95:8, 9.) Ol Israel i mekim bikpela rong. Long dispela taim, Moses i bihainim stretpela pasin na em i lukluk i go long Jehova na bihainim tok bilong em.
8. Wanem hevi i kamap taim lain Israel i laik pinisim raun bilong ol long ples drai?
8 Wankain samting i kamap inap 40 yia bihain taim lain Israel i laik pinisim raun bilong ol long ples drai. Ol Israel i kamap long wanpela ples em ol i kolim Meriba. Tasol dispela ples Meriba i stap klostu long Kades, em hap i stap klostu long boda bilong Graun Bilong Promis.a Ol Israel i kirap gen long komplein long wara. (Nam. 20:1-5) Tasol long dispela taim, Moses i no bihainim tok bilong God.
9. (a) God i tokim Moses long mekim wanem? (b) Moses i mekim wanem? (Lukim piksa long kirap bilong stadi.)
9 Moses i mekim wanem taim lain Israel i bikhet? Em i lukluk i go long Jehova bilong kisim helpim. Tasol long dispela taim, Jehova i no tokim em long paitim ston. Em i tokim Moses long kisim stik na bungim olgeta manmeri klostu long bikpela ston, na em i mas toktok long dispela ston. (Nam. 20:6-8) Tasol Moses i no toktok long dispela ston, nogat. Em i kamapim belhat bilong em na i tok: “Harim. Yupela ol manmeri bilong sakim tok. Ating mipela i mas kisim wara bilong yupela long dispela ston, a?” Bihain long dispela Moses i paitim ston tupela taim.—Nam. 20:10, 11.
10. Jehova i mekim wanem taim Moses i no bihainim tok bilong em?
10 Jehova i kros long Moses. (Lo 1:37; 3:26) Ating i gat sampela risen na em i kros. Olsem yumi stori pinis, ating Jehova i kros bikos Moses i no bihainim stret tok em i givim bilong stiaim Moses.
11. Taim Moses i paitim ston, olsem wanem dispela inap mekim na ol manmeri i no bilip long strong bilong Jehova long wokim mirakel?
11 Ating i gat narapela risen na God i kros long Moses. Ol ston i stap long Meriba long Masa em ol strongpela ston. Maski man i paitim strong ol dispela ston, ol manmeri i save olsem wara i no inap kamaut long ol dispela ston. Tasol ol ston i stap long Meriba klostu long Kades em ol ston we i no strong tumas. Ol dispela ston i gat planti liklik hul long en na wara i stap aninit long ol ston. Olsem na taim Moses i paitim ston 2-pela taim, ol man inap kisim tingting olsem wara i kamaut long ston bikos ston i no strong, na i no olsem Jehova i As bilong dispela mirakel.b
MOSES I BIKHET
12. Ating i gat wanem narapela moa risen na Jehova i kros long Moses na Aron?
12 Ating i gat narapela moa risen na Jehova i kros long Moses na Aron. Moses i tokim ol manmeri: “Ating mipela i mas kisim wara bilong yupela long dispela ston, a?” Taim Moses i tok “mipela,” ating em i tok long em yet na Aron. Tok Moses i mekim i kamapim klia olsem em i no soim rispek long Jehova olsem em i As bilong dispela mirakel. Dispela i stret wantaim tok i stap long Song 106:32, 33, em i tok: “Ol Israel i stap long wara Meriba na ol i mekim God i kros, na Moses i kisim hevi bilong asua bilong ol. Ol i mekim Moses i bel nogut tru na em i mekim tok i no stret.”c (Nam. 27:14) Samting Moses i mekim i soim olsem em i no givim ona long Jehova. Jehova i tokim Moses na Aron olsem: “Yutupela i bin sakim tok bilong mi.” (Nam. 20:24) Tupela i mekim bikpela rong!
13. Bilong wanem kot Jehova i mekim long Moses i stret?
13 Moses na Aron i go pas long ol manmeri bilong Jehova, olsem na tupela i gat bikpela asua. (Luk 12:48) Pastaim, Jehova i no larim lain Israel i kisim graun Kenan bikos ol i bikhet. (Nam. 14:26-30, 34) Olsem na i stret Jehova i mekim wankain pasin taim em i kotim Moses long pasin bikhet bilong em. Wankain olsem lain Israel husat i bikhet, Moses i no go insait long Graun Bilong Promis.
RISEN NA HEVI I KAMAP
14, 15. Wanem samting i kirapim Moses long bikhet?
14 Bilong wanem Moses i bikhet? Tingim gen tok bilong Song 106:32, 33, em i tok: “Ol Israel i stap long wara Meriba na ol i mekim God i kros, na Moses i kisim hevi bilong asua bilong ol. Ol i mekim Moses i bel nogut tru na em i mekim tok i no stret.” Lain Israel i mekim ol tok i soim olsem ol i bikhet long Jehova, tasol Moses i bel nogut. Em i no bosim bel, olsem na em i mekim tok i no stret na nau hevi i painim em.
15 Moses i larim pasin bilong lain Israel i pulim nabaut tingting bilong em na em i bikhet long Jehova. Pastaim Moses i mekim olgeta samting olsem God i tok. (Kis. 7:6) Tasol bihain, ating Moses i les long pasin bikhet em lain Israel i mekim inap planti yia, na dispela i kirapim em long i no bihainim stret tok bilong God. Moses i tingting tasol long em yet, na em i no mekim gut ol samting bilong givim glori long Jehova.
16. Pasin bilong Moses i skulim yumi long wanem samting?
16 Moses em wanpela gutpela profet, tasol em i larim pasin bilong ol narapela i pulim nabaut tingting bilong em na em i pundaun. Wankain samting inap kamap long yumi. Klostu nau, yumi bai go insait long nupela taim em Jehova i tok promis long en. (2 Pita 3:13) Yumi no laik lus long kisim dispela blesing. Olsem na yumi mas lukluk i go long Jehova na oltaim bihainim laik bilong em. (1 Jon 2:17) Yumi kisim wanem ol skul long popaia bilong Moses?
NO KEN LARIM PASIN BILONG OL NARAPELA I PULIM YU
17. Wanem samting inap helpim yumi na yumi no kros taim narapela i rongim yumi?
17 No ken bel kros. Sapos yumi karim wanpela hevi inap longpela taim, “yumi no ken les long mekim ol gutpela wok, long wanem, long taim stret bilong en bai yumi kamautim kaikai sapos yumi no givap.” (Gal. 6:9; 2 Tes. 3:13) Sapos yumi bungim wanpela hevi o pasin bilong wanpela i sikirapim bel bilong yumi long olgeta taim, yumi mas bosim gut maus na no ken belhat kwik. (Snd. 10:19; 17:27; Mat. 5:22) Taim ol narapela i rongim yumi, yumi “mas larim God i kamapim belhat bilong en long ol man i mekim rong.” (Ritim Rom 12:17-21.) Sapos yumi lukluk i go long Jehova, yumi soim olsem yumi rispektim em, na yumi wetim em i bekim rong bilong ol man nogut long taim stret. Sapos yumi yet i bekim rong bilong dispela man, i kain olsem yumi no soim rispek long Jehova.
18. Yumi mas mekim wanem samting taim yumi kisim ol nupela tok bilong stiaim yumi?
18 Bihainim gut olgeta nupela tok bilong stiaim yumi. Olsem wanem? Yumi save bihainim gut ol tok Jehova i givim bilong stiaim yumi? Sapos olsem, yumi bai no inap bihainim ol olpela pasin bilong mekim ol samting. Yumi bai bihainim kwik ol nupela tok yumi kisim long rot bilong oganaisesen bilong Jehova. (Hib. 13:17) Na tu, yumi mas was gut bambai yumi “no ken kalapim ol tok i stap long Rait Holi.” (1 Kor. 4:6) Taim yumi mekim olsem, yumi soim olsem yumi lukluk i go long Jehova.
Yumi kisim wanem skul long pasin Moses i mekim taim lain Israel i komplein? (Lukim paragraf 19)
19. Sapos yumi lukim ol narapela i mekim popaia, yumi ken mekim wanem bambai yumi no bagarapim pasin pren bilong yumi wantaim Jehova?
19 No ken larim popaia bilong ol narapela i bagarapim pasin pren bilong yu wantaim Jehova. Sapos yumi lukluk i go long Jehova, yumi no inap larim pasin bilong ol narapela i mekim yumi kros, o bagarapim pasin pren bilong yumi wantaim God. Wankain olsem Moses, ol lain i go pas long mekim ol wok insait long oganaisesen i mas lukluk i go long God. Yumi wan wan i mas ‘mekim olgeta samting yumi inap long mekim bai God i ken kisim bek yumi, na yumi mas mekim wantaim pret na guria.’ Tasol yumi mas tingim olsem, Jehova i no save putim wanpela strongpela lo em yumi olgeta i mas bihainim, na em i skelim yumi wan wan long dispela lo, nogat. (Fili. 2:12) Sapos yumi go pas long mekim planti wok insait long oganaisesen, orait Jehova i laik bai yumi mas stap olsem gutpela piksa em ol narapela i ken bihainim. (Luk 12:48) Sapos yumi laikim tru Jehova, yumi no inap larim pasin bilong ol narapela i tekewe yumi long pasin laikim bilong God.—Sng. 119:165; Rom 8:37-39.
20. Yumi mas tingim wanem samting?
20 Long dispela taim bilong hevi, yumi mas lukluk i go yet long Man husat i “stap king long heven” bambai yumi inap bihainim laik bilong em. Yumi no ken larim ol popaia bilong ol narapela i bagarapim pasin pren bilong yumi wantaim Jehova. Em i bikpela samting long yumi mas tingim skul yumi kisim long stori bilong Moses. Yumi no ken larim ol popaia bilong ol narapela i pulim nabaut tingting bilong yumi, yumi mas ‘lukluk long Jehova, God bilong yumi, i go inap long em i helpim yumi.’—Sng. 123:1, 2, NW.
a Dispela ples Meriba em i no wankain long Meriba i stap klostu long Refidim. Em i stap long Kades na i no long Masa. Dispela tupela ples i gat nem Meriba bikos lain Israel i komplein taim ol i stap long ol dispela hap.—Lukim mep long hap 7 long pes 38 bilong buklet Bilong Helpim Yu Long Stadi Long Baibel.
b Profesa John A. Beck i tok: “Ol Juda i save tok olsem, dispela bikhet lain Israel i sutim tok long Moses olsem: ‘Moses i save olsem dispela ston i no strong tumas! Sapos em i laik soim olsem em inap wokim mirakel, orait em i mas paitim narapela ston na wara bai kamaut.’” Dispela em tingting bilong lain Juda.
c Lukim Watchtower bilong Oktoba 15, 1987, long hap “Questions From Readers.”