Wai Na Yumi Save Go lapun Na Dai?

God i tokim Adam, “long de yu kaikai prut bilong [dispela diwai], tru tumas bai yu dai.” (Stat 2:17) Sapos God i bin wokim Adam long i go lapun na dai, orait i no gat risen bilong dispela lo. Adam i save olsem sapos em i no kaikai long dispela diwai, em bai i no inap dai.

I no olsem Adam na Iv i mas kisim kaikai long dispela diwai bilong i stap laip—i gat planti diwai i save karim prut long dispela gaden. (Stat 2:9) Sapos tupela fes marit i no bin kaikai long dispela diwai, tupela inap soim pasin bilong ol long bihainim tok bilong Man husat i givim laip long ol. Em inap soim tu olsem ol i luksave long rait bilong God long stiaim wokabaut bilong ol.

Bilong kliagut long risen na Adam na Iv i dai, yumi mas save gut long wanpela askim em yumi olgeta i insait long en. Satan dispela Devil i yusim wanpela snek long kamapim wanpela tok giaman. Baibel i tok: “Snek i gat pasin bilong was gut, winim olgeta arapela wel animal Jehova God i bin wokim. Na em i tokim meri: ‘Tru tru God i tokim yutupela long no ken kaikai prut bilong olgeta diwai bilong gaden, a?’”—Stat 3:1.

Na Iv i bekim: “Mitupela i ken kaikai prut bilong ol diwai bilong gaden. Tasol God i tok long prut bilong dispela diwai i stap namel long gaden olsem, ‘Yutupela i no ken kaikai prut bilong en, nogat. Na yutupela i no ken tatsim prut bilong en. Sapos yutupela i mekim, bai yutupela i dai.’” Na snek i tokim em: “Tru tumas, yutupela i no inap i dai. God i save olsem long dispela de stret yutupela i kaikai prut bilong en, ai bilong yutupela bai op, na bai yutupela i kamap wankain olsem God, na bai yutupela i save long wanem samting i gutpela na wanem samting i nogut.” I olsem Satan i tok, Jehova i man bilong giaman na em i pasim tupela fes papamama bilong yumi long kisim gutpela samting.—Stat 3:2-5.

Iv i bilipim tok em i harim. Em i lukluk long dispela diwai. Diwai i luk nais, prut bilong en i gutpela tru! So Iv i putim han i go na kisim sampela prut, na kaikai. Na Baibel i tok: “Bihain, taim em i stap wantaim man bilong em, meri i givim sampela long man na man i kaikai.”—Stat 3:6.

Ating God i bel hevi tru taim em i lukim olsem long laik bilong ol yet ol pikinini em i laikim tru i sakim tok bilong em! Em i mekim wanem? Jehova i tokim Adam: “Bai yu . . . go bek long graun. Long wanem, mi bin wokim yu long graun. Yu kamap long graun na bai yu go bek gen long graun.” (Stat 3:17-19) Olsem na “Adam i stap inap 930 yia olgeta na em i dai.” (Stat 5:5) Adam i no go long heven o i go stap long sampela ples spirit. Em i no stap paslain long Jehova i wokim em long das bilong graun. So taim em i dai, em i kamap olsem das i no gat laip em God i bin wokim em long en. Em i no stap moa. Sori tru!

Adam na Iv i sakim tok bilong God long laik bilong ol yet, na tupela i lusim laip i gutpela olgeta na presen bilong stap oltaim. Dispela i mekim bikpela senis long laip bilong ol; ol i kamap man i no gutpela olgeta na sinman. Sin bilong ol long sakim tok i givim hevi long ol narapela tu. Ol pikinini bilong ol tu i kisim hevi bilong sin. Rom 5:12 i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.”

Baibel i tok long sin na dai olsem “laplap i karamapim olgeta lain manmeri, na karamap em ol i wivim antap long olgeta kantri.” (Aisaia 25:7) Dispela laplap i karamapim olgeta man olsem wanpela smok nogut em ol man i no inap ranawe long en. Tru tumas, “long rot bilong Adam ol man i save dai.” (1 Korin 15:22) Olsem na dispela askim i kamap, em aposel Pol i mekim: “Husat bai kisim bek mi long dispela bodi em bilong i dai?” Wanpela man inap?—Rom 7:24.