Yu Save Long Dispela?

LONG taim bilong Pol, i no gat ol sip bilong karim ol pasindia. Ol manmeri i save askim ol narapela sapos ol i save long kago sip we i laik i go long hap ol i laik go long en, na sekim sapos sip i redi long kisim ol pasindia. (Apo. 21:2, 3) Maski sapos sip i no inap i go long ples stret we pasindia i laik i go long en, sip inap lusim em long narapela ples we pasindia inap painim narapela sip bilong kalap long en.—Apo. 27:1-6.

I gat sampela taim long yia we sip inap raun long solwara, na i gat sampela taim we sip i no inap raun. Sip i no inap raun long taim bilong bikpela win na ren. Na tu, sampela seila i bihainim bilip giaman na ol i no inap seil sapos ol i lukim kotkot i kam sindaun long sip na singaut, o wanpela sip i bruk long rip na wanpela hap bilong en i trip long solwara. Ol seila i bihainim daireksen bilong win, olsem na ol bai seil sapos win i blo i go long hap ol i laik go long en. Taim pasindia i painim sip bilong kalap long en, em i save kisim kago na i go wet long haba na toksave bai kamap taim sip i redi long seil.

Wanpela saveman, Lionel Casson, i tok: “Rom em gutpela hap bilong ol manmeri long painim sip bilong kalap long en. Haba bilong en i stap long maus bilong Wara Tiber. Taun Ostia i stap klostu, na i gat bikpela ples bung we ol ofis i stap raunim. Planti ofis i bilong ol seila bilong ol narapela haba: ol seila bilong Narbonne [nau em Frans], ol seila bilong Carthage [nau em Tunisia], . . . na sampela moa. Sapos wanpela man i painim sip bilong kalap long en, em i ken i go long wanpela bilong ol dispela ofis em sip bilong ol bai seil i go long hap we man i laik i go long en.”

Sip inap bringim man i go hariap long narapela hap, tasol hevi inap painim em. Pol i bin raun long sip taim em i mekim wok misineri, na sampela taim sip i bagarap long solwara.—2 Kor. 11:25.