Holimpas Bilip Long Taim Bilong “Traipela Hevi Tru”

1-2. (a) Klostu nau ol kantri bai tokaut long wanem samting? (b) Yumi mas kisim bekim bilong wanem ol askim?

TINGIM olsem nau tasol ol kantri i mekim tokaut bilong kamapim “bel isi na gutpela sindaun.” Ol inap hambak long tok olsem long nau graun i kamap ples i seif tru long stap long en. Ol i laik bai yumi ting olsem ol i gat strong long stretim olgeta hevi. Tasol ol i no gat strong long kontrolim ol samting bai kamap! Bilong wanem? Olsem tok profet bilong Baibel i kamapim, “bagarap bai kamap long ol wantu tasol, . . . na ol bai i no inap abrusim dispela samting.”—1 Tes. 5:3.

² I gat ol bikpela askim yumi laik save long bekim bilong en: Wanem samting bai kamap long taim bilong “traipela hevi tru”? Jehova bai tokim yumi long mekim wanem? Olsem wanem yumi inap redim yumi yet long nau bambai yumi inap holimpas bilip long taim bilong traipela hevi tru?—Mat. 24:21.

 3. Olsem Revelesen 17:5, 15-18 i kamapim, hau bai God i bagarapim “Bikpela Babilon”?

³ Ritim Revelesen 17:5, 15-18. “Bikpela Babilon” bai bagarap! Olsem yumi stori pinis, ol kantri bai i no gat strong long kontrolim ol samting i kamap. Bilong wanem? Bikos “God [bai] givim tingting long ol long mekim samting em yet i tingting pinis long en.” Em i tingting pinis long mekim wanem? Long bagarapim olgeta lotu giaman, na bagarapim tu lain Kristendom.b God bai putim tingting bilong em long bel bilong ol “10-pela kom” bilong “retpela wel animal.” Dispela 10-pela kom i makim olgeta gavman we i sapotim “wel animal”—Yunaitet Nesen. (Rev. 17:3, 11-13; 18:8) Taim ol gavman i birua long ol lotu giaman, dispela em stat bilong traipela hevi tru. Dispela samting bai kamap kwiktaim na pretim tru olgeta manmeri.

 4. (a) Ol gavman inap kolim wanem risen bilong soim olsem i stret long ol i birua long ol lotu giaman? (b) Ating ol memba bilong ol lotu bai mekim wanem?

⁴ Yumi no save long ol risen ol gavman bai givim bilong soim olsem i stret long ol i birua long Bikpela Babilon. Ol inap tok olsem ol lotu i save pasim rot bilong bel isi, na oltaim ol i insait long wok politik. O, ol inap tok olsem ol dispela lotu i bungim pinis planti planti mani kago. (Rev. 18:3, 7) Taim ol gavman i bagarapim ol lotu, i luk olsem i no olgeta memba bilong ol lotu bai bagarap. Ol gavman bai pinisim ol lotu. Taim ol lotu i pinis, ol memba bilong ol bai luksave olsem ol lida bilong ol i bin giamanim ol, olsem na ol bai traim long stap longwe long ol dispela lotu.

 5. Jehova i tok promis long mekim wanem long taim bilong traipela hevi tru? Bilong wanem?

⁵ Baibel i no kolim longpela bilong haptaim we bagarap bai painim Bikpela Babilon, tasol yumi save olsem dispela bagarap bai kamap insait long sotpela haptaim tasol. (Rev. 18:10, 21) Jehova i tok promis olsem em bai ‘sotim taim’ bilong traipela hevi tru na bai em inap kisim bek “ol man em i bin makim” na ol manmeri i bihainim lotu i tru. (Mak 13:19, 20) Tasol Jehova bai tokim yumi long mekim wanem long haptaim bihain long traipela hevi tru i kirap na paslain long Armagedon?

 6. Yumi rausim nem long lista bilong lotu giaman, na yumi mas mekim wanem samting moa?

⁶ Olsem yumi skelim long atikol i kamap paslain, Jehova i laik bai ol manmeri bilong em i abrusim pasin bilong bung wantaim Bikpela Babilon. Yumi mas rausim nem bilong yumi long lista bilong ol lotu giaman. Na tu, yumi mas tingting strong long sapotim lotu i tru—em klinpela pasin bilong lotuim Jehova. I gat 2-pela rot bilong sapotim lotu i tru.

 7. (a) Olsem wanem yumi inap sanap strong long bihainim ol stretpela lo bilong Jehova? (b) Olsem wanem Hibru 10:24, 25 i soim olsem em i bikpela samting long yumi mas bung wantaim, na moa yet long nau?

⁷ Namba 1: Yumi mas sanap strong long bihainim ol stretpela lo bilong Jehova. Yumi no ken bihainim pasin bilong ol manmeri bilong graun. Eksampel: Yumi mas sakim olgeta kain pasin pamuk, na abrusim tu pasin bilong man i maritim man o meri i maritim meri o mekim pasin sem wantaim ol animal. (Mat. 19:4, 5; Rom 1:26, 27) Namba 2: Oltaim yumi mas bung wantaim ol wanbilip Kristen na mekim lotu. Yumi mekim olsem long olgeta kain hap, olsem long Haus Kingdom, haus bilong yumi yet, o long ples hait. Maski wanem hevi i kamap, yumi no ken lusim pasin bilong bung wantaim long mekim lotu. Yumi mas bung wantaim “na mekim moa yet taim yumi lukim dispela de i kam klostu.”—Ritim Hibru 10:24, 25.

 8. Ating bihain yumi bai autim wanem kain tok?

⁸ Long taim bilong traipela hevi tru, ating yumi bai autim narapela kain tok. Long nau, yumi autim gutnius bilong Kingdom na wok strong long kamapim ol disaipel. Tasol long taim bilong traipela hevi tru, yumi bai autim strongpela tok; dispela tok i wankain long ren ais we inap kamapim bikpela bagarap tru. (Rev. 16:21) Yumi inap tokaut long bagarap bai painim lain bilong Satan. Long taim stret bilong en, yumi bai kisim save long wanem tok yumi bai autim na hau yumi bai autim. Yu ting yumi bai bihainim wankain wei bilong autim tok olsem yumi mekim winim 100 yia nau? O yu ting yumi bai bihainim ol narapela wei bilong autim tok? Yumi bai wet na painimaut. Maski yumi bihainim wanem wei bilong autim tok, em gutpela blesing tru long yumi bai tokaut stret long kot bilong Jehova!—Ese. 2:3-5.

 9. (a) Ating ol manmeri bai pilim olsem wanem long tok yumi autim? (b) Yumi ken bilip tru long wanem samting?

⁹ Ating tok yumi autim bai mekim ol manmeri i belhat na ol bai laik tru long pinisim lain bilong yumi. Long dispela taim yumi bai nidim tru sapot bilong Jehova long wankain pasin olsem yumi nidim sapot bilong em long nau. Yumi ken bilip tru olsem God bilong yumi bai strongim yumi long bihainim laik bilong em.—Mai. 3:8.

10. Olsem Luk 21:25-28 i tok profet long en, ol manmeri bai mekim wanem long taim bilong traipela hevi tru?

¹⁰ Ritim Luk 21:25-28. Ol manmeri i trastim sampela oganaisesen na ting ol i no inap bagarap, olsem na long taim bilong traipela hevi tru, ol bai kirap nogut long lukim olsem bagarap i painim ol dispela oganaisesen. Ol bai pret nogut tru long lusim laip bilong ol, na dispela bai putim bikpela “hevi” tru long ol. (Sef. 1:14, 15) Long dispela taim, ol manmeri bilong Jehova tu bai karim hevi. Yumi no stap wankain olsem ol manmeri bilong graun, olsem na dispela inap putim hevi long yumi. Ating yumi no gat rot long kisim ol samting yumi nidim.

11. (a) Wai na olgeta lain manmeri bai belhat na putim ai long ol Witnes Bilong Jehova? (b) Wai na yumi no gat wok long pret taim traipela hevi tru i kamap?

¹¹ Ol manmeri em gavman i pinisim lotu bilong ol, ol bai belhat olsem ol Witnes Bilong Jehova i wok yet long mekim lotu. Ol inap toktok planti, na yusim TV, redio, na Intenet long kamapim belhat bilong ol. Ol manmeri na bosman bilong ol, Satan, bai heitim yumi bikos lotu bilong yumi tasol i no bagarap. Ol i no inapim samting ol i bin tingting long mekim—long pinisim olgeta lotu i stap long graun. Olgeta bai belhat na putim ai long yumi. Long dispela taim, ol lain manmeri bai kisim nem olsem Gok Bilong Magok.c Olgeta bai bung wantaim long mekim pait bilong bagarapim na pinisim tru ol manmeri bilong Jehova. (Ese. 38:2, 14-16) Yumi no save yet long wanem ol samting stret bai kamap, olsem na dispela inap mekim na yumi no stap bel isi. Tasol yumi save tru olsem: Taim traipela hevi tru i kamap, yumi no gat wok long pret. Jehova bai toksave long ol samting yumi mas mekim bilong abrusim bagarap. (Sng. 34:19) Yumi bai “sanap na litimapim het bilong [yumi]” bikos yumi save olsem “taim bilong God long kisim bek [yumi] i kam klostu.”d

12. Olsem wanem “gutpela wokboi i gat savetingting” i redim yumi long ol samting bai kamap bihain?

¹² “Gutpela wokboi i gat savetingting” i redim yumi na bai yumi inap holimpas bilip long taim bilong traipela hevi tru. (Mat. 24:45) Yumi kisim helpim long planti rot, na wanpela rot em ol kibung bilong yia 2016-2018. Ol dispela program i kirapim yumi long strongim ol pasin yumi nidim taim de bilong Jehova i kam klostu. Yumi ken skelim gen ol dispela pasin.

13. (a) Hau bai yumi inap strongim pasin bilong yumi long i stap gut long Jehova? (b) Wai na yumi mas mekim olsem long nau?

¹³ Stap Gut Long God: Astok bilong kibung long 2016 em “Stap Gut Long Jehova!” Dispela program i skulim yumi olsem sapos yumi pas gut wantaim Jehova, yumi bai stap gut long em. Na tu, kibung i kirapim yumi long tingim gen olsem yumi inap i go klostu long Jehova long rot bilong beten na stadi gut long Baibel. Ol dispela samting bai helpim yumi long sanap strong long taim bilong hevi. Yumi kamap klostu moa long taim bilong traipela hevi tru, olsem na ol bikpela hevi moa inap traim pasin bilong yumi long i stap gut long God na Kingdom bilong em. Ating ol manmeri bai wok yet long tok bilas long yumi. (2 Pita 3:3, 4) Ol bai mekim olsem bikos yumi no sapotim ol oganaisesen bilong dispela graun. Long nau yumi mas strongim pasin bilong stap gut long God na bai yumi inap stap gut yet long em long taim bilong traipela hevi tru.

14. (a) Wanem senis bai kamap long ol brata husat i go pas long stiaim yumi? (b) Bihain long traipela hevi tru i kirap, wai na yumi mas stap gut long God?

¹⁴ Long taim bilong traipela hevi tru, senis bai kamap long ol brata husat i go pas long stiaim yumi. Bihain liklik long traipela hevi tru i kirap, ol Kristen em God i anointim na ol i stap yet long graun, ol bai go long heven na redi long insait long pait bilong Armagedon. (Mat. 24:31; Rev. 2:26, 27) Dispela i makim olsem lain Gavening Bodi bai i no stap moa wantaim yumi long graun. Tasol ol narapela bai kisim ples bilong ol. Ol strongpela brata long lain arapela sipsip bai go pas long stiaim yumi. Yumi mas wok bung wantaim ol na bihainim tok, na dispela bai soim olsem yumi stap gut long God. Long dispela rot tasol yumi bai kisim laip!

15. (a) Yumi ken mekim wanem na bai yumi inap sanap strong yet? (b) Wai na em i bikpela samting long yumi mas mekim olsem long nau?

¹⁵ Sanap Strong: Astok bilong kibung bilong 2017 em “No Ken Givap!” Dispela program i strongim yumi long holimpas bilip na winim ol hevi. Yumi kisim save olsem yumi mas sanap strong yet long taim bilong hevi. Yumi inap sanap strong yet taim yumi trastim Jehova. (Rom 12:12) Yumi no ken tru lusim tingting long dispela tok promis bilong Jisas: “Man i sanap strong i go inap long pinis, God bai kisim bek em.” (Mat. 24:13) Dispela tok promis i makim olsem yumi mas stap gut yet long bilip maski wanem ol hevi i painim yumi. Sapos yumi sanap strong na winim ol hevi long nau, bilip bilong yumi inap kamap strong moa paslain long traipela hevi tru i kirap.

16. (a) Yumi mas mekim wanem na bai yumi inap strongim bel? (b) Long nau, hau bai yumi inap strongim pasin bilong yumi long trastim God?

¹⁶ Strongim Bel: Astok bilong kibung bilong 2018 em “Strongim Bel!” Dispela program i skulim yumi olsem yumi no inap strongim bel sapos yumi bilip long strong bilong yumi yet. Yumi bai strongim bel sapos yumi trastim Jehova. Hau bai yumi inap strongim pasin bilong yumi long trastim em? Yumi mas ritim Baibel long olgeta de na tingim tingim hau Jehova i bin kisim bek ol manmeri bilong em long bipo. (Sng. 68:20; 2 Pita 2:9) Taim ol kantri i birua long yumi long taim bilong traipela hevi tru, yumi mas strongim bel na trastim Jehova moa yet winim olgeta taim bipo. (Sng. 112:7, 8; Hib. 13:6) Sapos yumi trastim Jehova long nau, yumi bai strongim bel na redi long karim hevi taim Gok i birua long yumi.e

17. Wai na yumi no ken pret long Armagedon? (Lukim fran pes piksa.)

¹⁷ Olsem yumi stori pinis long atikol i kamap paslain, planti bilong yumi i bon insait long haptaim bilong las de. Yumi inap stap na lukim traipela hevi tru i kamap. Pait bilong Armagedon bai pinisim tru olgeta pasin nogut bilong nau. Tasol yumi no ken pret. Wai? Bikos God yet bai mekim dispela pait. (Prov. 1:33; Ese. 38:18-20; Sek. 14:3) Taim Jehova i givim toksave, Jisas Krais bai go pas long mekim pait. Ol Kristen em God i anointim na bikpela lain ami bilong ol ensel bai go wantaim Jisas long mekim pait. Ol bai bung wantaim na mekim pait long Satan, ol dimon, na ol manmeri bilong Satan.—Dan. 12:1; Rev. 6:2; 17:14.

18. (a) Jehova i mekim wanem tok promis? (b) Olsem wanem Revelesen 7:9, 13-17 i strongim bilip bilong yu?

¹⁸ Jehova i tok promis olsem: “I no gat wanpela samting bilong pait em ol i wokim bilong pait long yu inap bagarapim yu.” (Ais. 54:17) “Bikpela lain manmeri” tru i lotuim Jehova na ol bai “winim dispela traipela hevi tru”! Ol bai wok yet long lotuim em. (Ritim Revelesen 7:9, 13-17.) Baibel i mekim planti tok bilong strongim bilip bilong yumi olsem God bai lukautim yumi! Yumi save olsem “Jehova i save lukautim gut ol manmeri i bihainim em.” (Sng. 31:23) Olgeta manmeri husat i laikim Jehova na preisim nem bilong em, ol bai amamas tru long lukim em i stretim bek nem holi bilong em.—Ese. 38:23.

19. Yumi inap kisim wanem gutpela blesing?

¹⁹ Tingim ol tok bai stap long 2 Timoti 3:2-5 sapos em i stori long pasin bilong ol manmeri long nupela taim we Satan i no gat strong moa long kontrolim ol. (Lukim blok “Pasin Bilong Ol Manmeri Long Bihain.”) Brata George Gangas,f husat i bin stap memba bilong Gavening Bodi long bipo, em i tok: “Graun bai stap naispela ples tru taim olgeta manmeri i stap olsem brata na sista! Klostu nau yu bai kisim blesing bilong stap laip long nupela taim. Yu bai stap laip long olgeta taim Jehova i stap laip. Yumi bai stap laip inap oltaim oltaim.” Dispela em gutpela blesing tru!