Helpim Ol Nupela Man Long Bekim Tok Long Miting
1 Taim yumi harim wanpela nupela man i mekim namba wan bekim bilong em long miting, yumi amamas tru long dispela, a? Yumi pilim olsem nau em i wok long kisim tok i tru. Ol nupela man i mas save, bekim tok long miting em wanpela samting yumi olgeta i mas mekim. Taim em i bekim tok, dispela i kamapim long ples klia bilip bilong em, na bai em inap kisim laip oltaim.—Ro 10:10.
2 Jisas i tok: “Sumatin . . . i skul gut pinis, orait em bai i kamap wankain olsem tisa bilong en.” (Lu 6:40) Dispela tok bilong Jisas i mas givim tingting long yumi olsem: Sapos yumi laik lainim ol Baibel-stadi long bekim tok long miting, orait yumi yet i mas mekim olsem. Na yumi mas helpim ol bai ol i ken save, sapos ol i laik bekim tok long miting, ol i mas kisim save pastaim. Tokim Baibel-stadi bilong yu, em i stadi na kisim save bambai em i ken mekim wok long dispela save taim em i go long miting, na long autim tok, na long wokabaut bilong em tu. Olsem: Dispela save em i kisim i mas bosim olgeta samting em i save mekim.
3 Sampela nupela man i save pret long bekim tok long miting; ol i ting ol i no inap bekim gut tok olsem ol narapela i save mekim. Tasol yumi ken stretim tingting bilong ol na bai ol i ken save, sapos ol i mekim liklik hap tok tasol, em inap. Taim yumi yet i bekim tok, yumi mas mekim liklik tok tasol na tok klia, na no ken pulim tok, na nau ol nupela man i ken harim bekim bilong yumi na bihainim dispela pasin, na ol i no ken pret na ting ol i mas mekim bikpela tok. Yu ken lainim sumatin, olsem Baibel-stadi bilong yu, long pasin bilong skelim gut askim pastaim, na nau lukim paragraf na painim wanpela hap tok i kamapim bekim bilong dispela askim, na em i ken bekim dispela askim long tingting bilong em yet, i stret wantaim dispela tok em i lukim pinis long paragraf. Na em i mas save olsem wanem tok bilong Baibel i stap insait long paragraf em i stret wantaim as tok bilong paragraf. Lainim em bambai em i ken mekim wok long ol dispela tok bilong Baibel bilong helpim bekim bilong em. Lainim em long katim ol as tok tasol bilong paragraf na raitim sampela liklik hap tok long arere. Kirapim em long toktok strong na tok klia taim em i bekim tok, na bai tok bilong em i ken helpim olgeta long miting. Sapos em i redi gut pastaim, em i no ken pret long bekim tok long miting.
4 Yumi ken mekim wanem samting moa bilong helpim nupela man long bekim tok long miting? Yumi ken sindaun wantaim em na dispela bai strongim bel bilong em. Ating yu ken tokim em, sapos em i laik em i ken sindaun long ol sia i stap paslain, na bai em i ken putim yau na harim gut ol tok, long wanem i no gat planti pairap. Makim sampela bekim bilong em i gat liklik tok tasol long en.
5 Taim brata bilong bosim Buk-Stadi em i save pinis long nupela man i stap long grup bilong em, em i ken tokim nupela man long kaunim wanpela skripsa. Taim em i kaunim pinis, brata i ken tok tenkyu na tok em i bin kaunim gut, na dispela bai kirapim nupela man long mekim sampela tok moa long Buk-Stadi, na bihain em i ken kirap long bekim tok long ol narapela miting.
6 Bekim tok long miting em i wanpela gutpela samting tru yumi ken mekim. (Hi 10:24, 25) Yumi laik helpim ol nupela man long pilim dispela samting. Dispela bai helpim na strongim ol yet na olgeta narapela long miting. Taim yumi autim tok wantaim grup, o yumi stap long miting, yumi gat rot bilong mekim olsem Hibru 13:15 i tok, yumi mas givim “maus bilong yumi” long God olsem “ofa” bilong “litimapim nem bilong en.”
[Ol Askim]
1. (a) Bilong wanem yumi save amamas taim yumi harim nupela man i mekim namba wan bekim bilong em long miting? (b) Bilong wanem em i mas mekim olsem?
2. (a) Luk 6:40 i givim wanem gutpela tok long man i gat Baibel-stadi? (b) I gat wanem 3-pela as na yumi mas helpim Baibel-stadi bilong yumi long kisim save?
3. (a) Tisa i ken mekim wanem bilong helpim nupela man long bekim tok long miting? (b) Sumatin i ken katim wanem ol tok long paragraf bilong helpim em long bekim tok? (c) Bilong wanem tisa i mas lainim sumatin long toktok strong na tok klia taim em i bekim tok long miting? (d) Sumatin i ken mekim wanem na bai em i no pret long bekim tok?
4. Bilong wanem i gutpela sapos yu sindaun wantaim sumatin long ol sia i stap paslain?
5. Brata bilong bosim Buk-Stadi em i ken mekim wanem bilong helpim nupela man long kirap na bekim tok long miting?
6. (a) Olsem Hibru 13:15 i tok, yumi mas helpim Baibel-stadi long mekim wanem? Taim em i bekim tok, dispela bai helpim em olsem wanem? (b) Bekim bilong em i save helpim yumi tu olsem wanem?