Givim Bel Long Wok Autim Tok
Namba 4 Hap: Stretim Gut Ol Samting Bambai Yumi Inap Autim Gut Tok
1 Sapos yumi laik givim bel long mekim wok autim tok, yumi mas stretim gut ol samting. Jisas i makim gutpela pasin tru yumi inap bihainim long mekim wok autim tok long nau. (Lu 10:1, 2; Ap 1:8) Yumi ken kaunim stori bilong ol disaipel bilong Jisas, em ol i bin inapim tru wok bilong ol long autim tok, na dispela samting tu inap lainim yumi. (Ap 5:42; 2 Ti 4:5) Tasol yumi mas stretim gut wanem ol samting na bai wok autim tok bilong yumi inap kamap gutpela long nau?
2 Makim Taim Bilong Autim Tok: Yumi no ken ting wok autim tok em wanpela liklik wok na yumi ken mekim long wan wan taim tasol. Nogat. Na yumi no ken ting yumi ken autim tok taim yumi no gat narapela wok bilong mekim, na em tasol. Nogat. Yumi mas stretim gut ol samting, na makim taim bilong mekim gut olgeta kain kain hap wok bilong autim tok. (Ef 5:15, 16) Planti pablisa i save makim hamas aua ol i laik winim long olgeta wan wan mun. Bilong mekim olsem, ol i mas stretim rot bambai ol inap autim tok long olgeta wik. Ol papamama Kristen i mas helpim pikinini bilong ol long makim taim bilong mekim olgeta kain kain hap wok bilong autim tok.—Lo 6:7; Snd 22:6.
3 Tingim Ol Wok Yu Laik Mekim: Sapos yu putim sampela mak long wok yu laik winim, dispela samting bai helpim yu. Taim yu winim pinis dispela mak, bai yu amamas. (Snd 13:12) Aposel Pol i tok: “Gutpela pasin yumi kisim pinis, em yumi mas holimpas strong.” (Fl 3:16) Yumi mas kamapim klia olsem yumi wok long kamap strong long ol samting bilong spirit, na i olsem tu long wok autim tok bilong yumi—yumi mas kamapim klia olsem yumi stretim gut taim bilong mekim dispela wok na yumi no mekim nating tasol.
4 Olsem wanem? Yu holim planti liklik nius? Yu kisim pinis ol nupela magasin, na ol i stap klin na gutpela? Yu save mekim wok long wanpela notbuk samting bilong raitim nem bilong man i harim tok, na raitim namba bilong haus i no gat man?
5 Paslain long taim yumi go autim tok, yumi mas lukim Stori Bilong Mun. Lukim ol buk yu laik tilim, na painim sampela tok em yu laik kamapim, na redi long mekim gut wok long ol dispela tok bilong kirapim tingting bilong man. Na sapos yu save long tok Inglis, yu ken redi long mekim wok long buk Reasoning. Taim yu lusim wanpela haus na wokabaut i go long narapela haus, lukim dispela buk bilong kisim save long sampela tok yu inap mekim. Sapos yu bihainim ol gutpela tok i stap long en, dispela bai helpim yu long mekim gut wok autim tok.
6 Yumi inap insait long wok bilong autim tok nau long dispela taim bilong pinis, na em i wanpela gutpela wok tru yumi inap mekim. (Ro 15:16) Yumi mas redi gut bambai yumi inap autim gut tok long olgeta man na inapim tru dispela wok bilong yumi, na “oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hi 13:15; lukim tu Hosea 14:2.) Olsem na yumi mas stretim gut taim bilong autim tok long olgeta wik, na gutpela sapos yumi putim sampela mak bilong wok autim tok yumi laik winim, na bai yumi inap autim gut tok na wok bilong yumi bai litimapim nem bilong Jehova.
[Ol Askim]
1. Kamapim sampela tok bilong Baibel bilong helpim yumi long save Jisas na ol disaipel ol i stretim gut ol samting bambai ol inap autim gut tok.
2. (a) Kaunim Efesus 5:15, 16. Bilong wanem yumi mas makim taim bilong mekim olgeta kain kain hap wok bilong autim tok? (b) Olsem Lo 6:7 na Sindaun 22:6 i tok, ol papamama Kristen i mas mekim wanem gutpela wok?
3. (a) Kaunim Filipai 3:16. Pol i givim wanem tok long yumi? (b) Kaunim Sindaun 13:12. Sapos yu winim mak yu putim long wok autim tok, wanem gutpela samting bai kamap? (c) Wanem samting bai makim olsem yu save stretim gut taim bilong mekim wok autim tok bilong yu?
4. Paslain long taim yumi autim tok, yumi mas skelim wanem samting?
5. (a) Yumi mas lukim wanem samting moa paslain long yumi go autim tok? (b) Olsem wanem ol tok bilong buk Reasoning inap helpim yumi long autim gut tok?
6. (a) Nau long las de i gat wanem gutpela wok yumi inap mekim? (b) Yu ting wanem samting em i olsem namba wan samting yu laik mekim? (c) Olsem Hibru 13:15 i tok, olsem wanem maus bilong yumi inap i stap olsem “ofa”? Bilong mekim wok autim tok bilong yumi i kamap gutpela moa, yumi mas tingim wanem ol samting?