Tingim Kingdom Bilong God Pastaim—Oltaim Litimapim Nem Bilong God, Olsem Ofa
1 Ol man i tingim Kingdom pastaim, ol i save tingting oltaim long tokim ol man long Jehova na long Kingdom bilong em. (Sng 145:11-13) Long olgeta de yumi gat rot bilong litimapim nem bilong em na long autim gutpela tok bilong Kingdom. (Sng 96:2) Man i raitim Song em i amamas long litimapim nem bilong Jehova, na em i tok: “God, oltaim mipela i bin litimapim nem bilong yu.” (Sng 44:8) Sapos yumi tu i pilim olsem, bai yumi amamas long autim tok bilong Kingdom long olgeta taim.
2 Jehova i no bin tokim yumi long hamas aua yumi mas lusim long mekim wok autim tok, tasol em i kirapim yumi long litimapim nem bilong em “oltaim.” (Hi 13:15) Sapos yumi inap, yumi mas lusim sampela taim long olgeta wik bilong litimapim nem bilong Jehova, na putim dispela olsem wanpela mak bilong winim. Ol brata sista i mekim pinis dispela samting, ating ol inap stretim ol wok bilong ol na bai ol inap mekim wok painia haptaim long sampela mun o long olgeta mun. Sapos yu bin mekim wok painia haptaim na yu amamas long mekim, ating yu ken wokim pepa bilong mekim wok painia oltaim.
3 Maski yu gat wanem ol wok yu mas mekim long sindaun bilong yu, yu ting yu inap mekim bikpela wok moa long litimapim nem bilong Jehova? Sapos yumi pilim tru ol samting Jehova i bin mekim bilong helpim yumi, dispela bai kirapim yumi long givim bel long mekim wok. Stadi long Baibel bai helpim yumi long pilim tru ol dispela samting. Ol miting bilong kongrigesen i save kirapim yumi long mekim sampela samting bilong makim olsem yumi pilim tru ol samting Jehova i bin mekim. Sapos oltaim yumi bung wantaim ol narapela i save givim bel long litimapim nem bilong Jehova, dispela inap ‘kirapim yumi long mekim ol gutpela pasin long ol arapela.’ (Hi 10:24) Sapos yumi mekim wok long olgeta samting kongrigesen i mekim bilong helpim yumi, ating dispela bai helpim yumi long litimapim nem bilong Jehova moa moa yet.
4 Ana, em wanpela profet meri, em i makim gutpela rot ol narapela i ken bihainim long mekim wok bilong Jehova. Maski em i gat 84 krismas, em “i no save lusim tempel . . . , em i holim wok bilong God long san na long nait.” (Lu 2:37) Em i stap bel gut, long wanem, em i insait tru long ol wok bilong kongrigesen. Em i stap gut long mekim wok bilong Jehova na Baibel i stori long dispela bilong strongim yumi long nau.
5 Pol i tok: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol.” (Ro 15:1) Ating i gat sampela long kongrigesen bilong yu em yu ken helpim ol na strongim ol. Sapos yu askim ol long go autim tok wantaim yu, ating dispela bai strongim ol. Sapos pablisa i no gat rot long kam long grup o em i no gat poroman bilong autim tok, ating yumi ken helpim em long ol dispela samting. O sapos pablisa i bel hevi, ating yu inap strongim em bambai em i kirap gen long givim bel long mekim wok bilong Kingdom. (1 Te 5:14) Sapos yu redi long helpim “sampela manmeri bilong God i sot long ol samting,” dispela bai kamapim klia olsem yu gat bikpela laik long mekim sampela wok moa bilong litimapim nem bilong Jehova.—Ro 12:13.
6 Yumi no inap kolim olgeta samting Jehova i bin mekim bilong helpim yumi na ol samting em bai mekim bihain bilong helpim yumi. I no gat wanpela samting yumi inap mekim bilong bekim dinau long Jehova long ol dispela gutpela blesing yumi kisim. Olsem na long ol dispela as, ‘olgeta samting i gat laip, litimapim nem bilong Jehova’!—Sng 150:6, NW.