Ol Papamama—Stap Olsem Gutpela Piksa Long Ol Pikinini Bilong Yupela
1 Baibel i tokim yumi olsem “man . . . i bihainim stretpela pasin, orait papa [na mama] bilong en i save amamas tru.” (Snd 23:24, 25) Ol papamama i stap olsem gutpela piksa bilong ol pikinini bilong ol, ol i save kisim gutpela blesing tru! Wanpela brata bilong Komiti Bilong Brens i stori long papamama bilong em olsem: “Ol i givim bel olgeta long Jehova, na mi tu mi laik mekim olsem.” Ol pikinini i mas lukim wanem kain pasin long papamama?
2 Gutpela Pasin na Pasin Daun: Em wok bilong papamama long putim ol gutpela pasin i go insait long bel bilong ol pikinini bilong ol. Ol pikinini i save lain long mekim gutpela pasin, i no long ol tok yu mekim tasol long maus, nogat; ol i lain long pasin ol i lukim na ol i bihainim dispela pasin. Olsem na yu bihainim wanem kain pasin? Ol pikinini i save harim yu tok “sori,” “plis,” na “tenkyu”? Insait long famili, yu save mekim pasin olsem yu daun long narapela? Yu save putim gut yau taim narapela i toktok? Na yu save harim gut tok taim pikinini i toktok long yu? Yu save kamapim ol dispela gutpela pasin long Haus Kingdom na long haus tu?
3 Stap Strong Long Spirit na Givim Bel Long Mekim Wok: Wanpela brata i bin mekim wok painia inap 50 yia samting, em i tok: “Mama na papa bilong mi ol bin stap olsem gutpela piksa long amamas long ol miting na long givim bel long autim tok.” Yu save mekim wanem bilong kamapim long ol pikinini olsem yu save tingting tru long helpim olgeta long famili long stap strong long spirit? Yupela i save skelim teks bilong de wantaim? Yupela i save mekim famili-stadi long olgeta wik? Ol pikinini i save lukim yu kaunim Baibel na ol buk samting bilong Sosaiti? Ol i harim wanem samting taim yu mekim beten wantaim famili? Yu save toktok wantaim ol pikinini long ol samting inap strongim ol long spirit, na toktok long ol gutpela samting bilong tok i tru na bilong kongrigesen? Yu gat laik tru long go long olgeta miting na mekim wok autim tok olsem wanpela famili?
4 Ol papamama, tingim pasin yupela mekim i olsem piksa long ol pikinini i ken bihainim. Yupela i mas i stap olsem gutpela piksa tru, na ol bai bihainim gut dispela pasin i go inap long taim ol i lapun. Meri bilong wanpela wasman bilong raun em i winim pinis 70 krismas, em i tok: “Gutpela pasin bilong papamama i wok yet long helpim mi. Mi pilim tru ol gutpela samting mi bin kisim long papamama Kristen bilong mi, na mi save beten askim Jehova long helpim mi bambai mi ken mekim gutpela wok long dispela i go inap long olgeta taim bihain.”