Yu Inap Helpim Ol Narapela?
1 Oltaim Jehova i save painim sampela rot bilong helpim ol wokman i stap gut long em. (2 Sto. 16:9; Ais. 41:10, 13) Aisaia i stori long Jehova olsem em i wanpela gutpela wasman bilong sipsip. Em i tok: “Wasman i save putim ol pikinini sipsip long bros na karim wokabaut. Na em i save wokabaut isi na soim rot long ol sipsip i gat liklik pikinini.” (Ais. 40:11) Orait, tingim sampela rot long bihainim pasin bilong Jehova long tingim tru ol man.
2 Helpim Ol Nupela Man: Yumi inap long helpim ol nupela man sapos yumi singautim ol long i kam bung wantaim yumi. (Snd. 13:20) Wanpela brata i tingim olsem wanem ol narapela i bin helpim em taim em i kirap bung wantaim kongrigesen, na em i tok: “Long sampela taim, wanpela famili i bin singautim mi long insait long famili stadi bilong ol. Taim mi kamap strong liklik, planti taim tupela yangpela marit painia i bin singautim mi long poromanim ol long autim tok long de olgeta. Long olgeta taim mipela i save toktok long ol samting bilong spirit.” Em i tok moa olsem: “Paslain long mi kamap wanpela Kristen, mi save go painim amamas long ol Fraide na Sarere nait. Tasol taim mi bung wantaim ol brata dispela i inapim laik bilong mi long bung wantaim ol narapela.” Pasin bilong kongrigesen long tingim tru dispela brata i bin helpim em long kamap strong long bilip, na nau em i wok olsem wanpela memba bilong famili Betel.—Kl. 2:6, 7.
3 Narapela i Strongim Narapela: Ating yumi lukim olsem i gat sampela rot long helpim ol brata bilong yumi taim ol i gat hevi. Olsem wanem? Yu inap stretim rot long autim tok long telefon wantaim wanpela pablisa i sik liklik, o singautim em long poromanim yu long wanpela Baibel stadi, o kisim Baibel stadi bilong yu i go long haus bilong em? Yu ting wanpela mama i gat ol liklik pikinini em bai amamas sapos yu helpim em long taim bilong autim tok? I gat sampela em ol i save pret na ol bai amamas sapos yu go wantaim ol long ol gobek o yupela i insait long sampela narapela wok bilong autim tok? Pasin bilong tingim tru ol brata bilong yumi bai kirapim yumi long painim sampela rot bilong strongim ol.—Ro. 14:19.
4 Taim yumi bihainim pasin bilong Jehova long tingim ol wokman bilong em, narapela bai strongim narapela, helpim kongrigesen olgeta long pas gut wantaim long pasin laikim, na givim biknem long Papa bilong yumi long heven.—Ef. 4:16.