No Ken Lusim Tingting Long Ol Brata i No Bung Moa Wantaim Kongrigesen
1 Yu save long wanpela brata o sista husat i no bung moa wantaim kongrigesen na i lusim yumi olgeta? Ating yu bin bungim kain brata o sista olsem taim yu autim tok long ol haus. Yumi mas tingim olsem dispela man em i stap yet olsem brata Kristen bilong yumi. Yumi laik bai em i save olsem yumi laikim em tru na yumi laik helpim em long kam bek long kongrigesen na long ‘dispela Wasman Bilong Sipsip i save lukautim gut yumi.’—1 Pi. 2:25.
2 Soim Olsem Yu Tingim Ol: Yumi ken go lukim wanpela husat i no bung moa wantaim kongrigesen o ringim em long telefon, dispela inap helpim em long save olsem yumi no bin lusim tingting long em. Yumi inap tok wanem? Yumi ken strongim bel bilong em na tok yumi save tingim em. Toktok long ol gutpela samting na mekim tok i strongim bel. (Fl. 4:8) Yumi ken stori long wanpela gutpela tok yumi bin harim long miting. Yumi ken singautim em i kam long miting o kibung, na tokim em long yumi ken makim sia bilong em o yumi ken kisim em i kam long ka bilong yumi.
3 Wanpela sista i bungim narapela sista long teritori husat i no bin bung wantaim kongrigesen inap 20 yia samting. Sista hia i no laik stadi long Baibel, tasol dispela sista husat i painim em, em i go bek lukim em na bringim ol nupela magasin long em. Bihain long kibung distrik, pablisa i stori long sista long sampela bikpela tok bilong kibung, na bihain dispela sista i kirap bung gen wantaim kongrigesen.
4 Taim Wanpela i Kam Bek: Taim wanpela brata husat i bin lusim ol wok Kristen i kirap long kam bek long ol miting, orait yumi mas mekim wanem kain pasin long em? Jisas i bin mekim wanem kain pasin long ol disaipel bilong em taim ol i bin lusim em inap liklik taim? Em i mekim gutpela tok na kolim ol olsem “ol brata” bilong em na em i soim olsem em i bilip long ol. Em i givim bikpela wok long ol. (Mt. 28:10, 18, 19) Bihain liklik, ol i bisi long autim gutnius na ol “i no lusim wok.”—Ap. 5:42.
5 Paslain long yumi tok yumi ken stadi long Baibel wantaim wanpela husat i no bung moa wantaim yumi, o paslain long yumi askim wanpela husat i bin lusim wok autim tok inap longpela taim long go autim tok wantaim yumi, yumi mas kisim tingting bilong ol elda long dispela samting. Sapos yumi bungim long teritori wanpela pablisa i bin lusim wok autim tok, yumi mas toksave long ol elda bambai ol i ken helpim em.
6 Olsem Baibel i kamapim klia, ol man i ran strong i go inap long pinis, God bai kisim bek ol dispela man tasol. (Mt. 24:13) Olsem na tingim ol brata o sista husat i bin pundaun o i lusim yumi olgeta. Sapos yumi no les kwik na yumi kamapim pasin laikim bilong Jehova long rot bilong tingim tru ol dispela kain brata na sista, yumi inap amamas long lukim ol i kirap gen long mekim wok bilong God wantaim yumi.—Lu. 15:4-10.
[Askim Bilong Stadi]
1. Bilong wanem yumi mas strongim bel bilong ol brata husat i no bung moa wantaim kongrigesen?
2. Olsem wanem yumi ken strongim bel bilong wanpela i no bung moa wantaim kongrigesen?
3. Olsem wanem wanpela sista i kirap bung gen wantaim kongrigesen?
4. Yumi mas mekim wanem kain pasin long brata husat i kirap long kam bek long ol miting?
5. Stori long wanem taim yumi mas toktok wantaim ol elda long wanpela husat i no bung moa wantaim yumi.
6. Yumi inap kisim wanem amamas long wok bilong helpim ol lain i no bung moa wantaim kongrigesen?