“Lait Bilong Yupela i Mas Stap Ples Klia”
1. Yumi mas mekim wanem wok?
1 Kirap long taim san i kam antap na i go inap san i go daun, lait bilong san i save givim biknem long God Jehova. Tasol i gat narapela lait em Jisas i tokim ol disaipel long kisim, em “lait i save givim laip.” (Jon 8:12) Dispela “lait” i helpim yumi long kisim stretpela save long tok i tru—em gutpela presen i kam long Jehova—na i gat bikpela wok yumi mas mekim. Jisas i tok: “Lait bilong yupela i mas stap ples klia long ai bilong ol man” na bai dispela i helpim ol. (Mat. 5:16) Ol man long nau i stap long bikpela tudak bilong spirit, olsem na yumi mas helpim ol long kisim lait bilong tok i tru! Olsem wanem yumi tu inap larim lait bilong yumi i stap ples klia?
2. Olsem wanem Jisas i soim olsem em i bikpela samting long autim tok i tru?
2 Autim Tok: Jisas i yusim taim na strong bilong em long helpim ol man long save long lait bilong tok i tru. Em i toktok wantaim ol man long olgeta hap—long haus, ples bung, na long maunten. Em i save olsem tok i tru bai helpim ol man inap oltaim. (Jon 12:46) Bilong helpim planti man moa, Jisas i redim ol disaipel long i stap olsem “lait bilong graun.” (Mat. 5:14) Ol disaipel i mekim gutpela pasin, na autim tok i tru bilong Baibel, na long dispela rot lait bilong ol i stap ples klia.
3. Olsem wanem yumi ken soim olsem yumi laikim tru lait bilong tok i tru?
3 Lain bilong God i tingim tru olsem ol i mas “wokabaut yet olsem ol pikinini bilong lait,” na ol i autim tok long olgeta hap. (Efe. 5:8) Sapos yumi ritim Baibel o narapela nius bilong Baibel long ples klia olsem long lans taim long ples wok o skul, dispela inap opim rot long yumi ken autim tok. Wanpela yangpela sista i mekim olsem na em i kirapim wanpela Baibel stadi na tilim ol buk long 12-pela wanklas bilong em!
4. Olsem wanem pasin bilong yumi i stap olsem “lait”?
4 Bihainim Gutpela Pasin: Pasin yumi mekim long olgeta de em narapela rot bilong mekim lait bilong yumi i stap ples klia. (Efe. 5:9) Long ples wok, skul, na ol narapela pablik ples, ol man i save luksave kwik long pasin Kristen na dispela i save opim rot long yumi autim tok i tru. (1 Pita 2:12) Olsem: Wanpela liklik mangi i gat 5-pela krismas i save mekim gutpela pasin na dispela i kirapim tisa bilong em long tokim papamama bilong em olsem: “Mi no lukim wanpela pikinini i strong long bihainim stretpela pasin olsem pikinini bilong yutupela!” Tru tumas, wok autim tok na gutpela pasin bilong yumi i save kirapim ol man long bihainim “lait i save givim laip,” na dispela i save givim biknem long God.