‘Autim Tok na Stori Gut’
1. Aposel Pol i stap gutpela piksa long wanem samting?
1 “Inapim tru wok bilong God yu mekim.” (2 Tim. 4:5) I gat as na aposel Pol inap mekim dispela tok long Timoti. Namel long yia 47 na 56 C.E., Pol i mekim pinis namba 3 raun bilong wok misineri. Planti taim Buk Aposel i tok olsem Pol i “autim tok na kamapim gut stori.” (Apo. 23:11; 28:23) Olsem wanem yumi inap mekim wankain long taim bilong yumi?
2. Olsem wanem yumi inap autim gut tok long ol haus?
2 Long Ol Haus: Bilong painim ol man bilong haus husat i no bin harim gutnius, yumi mas go long ol haus long narapela narapela taim bilong de. Ating papa bilong haus i stap long haus long apinun o long wiken. Yumi mas wok strong long toktok wantaim wanpela man long olgeta haus, na go planti taim long ol haus we yumi no bin bungim yet wanpela man. Tasol olsem wanem sapos yu no bungim man, maski yu traim planti taim? Yu ken raitim pas o ringim man bilong haus, dispela inap kamapim gutpela samting.
3. Wanem ol rot i op long yu inap autim tok long ol pablik ples na long kain kain taim na ples?
3 Long Ol Pablik Ples na Long Kain Kain Taim na Ples: Ol wokboi bilong Jehova long nau i autim “gutpela na stretpela tingting” long olgeta man i laik harim tok. Sampela taim ol i mekim dispela wok long “ol rot na long ol maket.” (Snd. 1:20, 21) Olsem wanem? Taim yumi mekim ol wok bilong yumi long wan wan de, yumi save tingting long autim tok long ol man? Tru tru yumi save “lusim bikpela haptaim tru long autim tok”? (Apo. 18:5) Sapos olsem, yumi inapim wok bilong yumi long ‘autim tok na stori gut tru.’—Apo. 10:42; 17:17; 20:20, 21, 24.
4. Olsem wanem beten na pasin bilong tingim tingim long bel Tok Bilong God inap helpim yumi long autim gut tok?
4 Tasol sampela taim, pasin kranki bilong yumi yet o pasin bilong sem i mekim na yumi surik long autim tok. Yumi ken save tru olsem Jehova i kliagut long skel bilong yumi long mekim ol samting. (Sng. 103:14) Tasol taim rot i op long autim tok, yumi ken beten askim em long strongim yumi long autim tok. (Apo. 4:29, 31) Na tu, taim yumi stadi na tingim tingim long bel Tok Bilong God, yumi ken wok strong long pilim moa yet nambawan gutpela tok bilong gutnius. (Fili. 3:8) Dispela bai kirapim yumi long givim bel long autim gutnius!
5. Olsem wanem yumi ken insait long wok bilong truim tok profet bilong Joel?
5 Tok profet bilong Joel i tok olsem paslain long bikpela de bilong Jehova i kamap, lain bilong God bai wok i go yet na ol i no larim wanpela samting i pasim ol long autim tok. (Jol. 2:2, 7-9) Yumi mas givim bel tru long wok autim tok, long wanem, dispela wok i no inap kamap gen!