Sanap Strong na Karim Hevi Bilong Tingting Planti

PASIN bilong tingting planti em wanpela bikpela hevi tru i stap long bel bilong yumi. (Prov. 12:25) Yu pilim olsem pasin bilong tingting planti i daunim yu tru? Yu pilim olsem yu no inap karim moa dispela hevi? Sapos olsem, yu no stap wanpis. Planti bilong yumi i lukautim narapela i sik, wanpela yumi laikim tru i dai, netrol disasta i bagarapim ol samting bilong yumi, o yumi bungim ol narapela hevi we i pinisim strong bilong yumi na daunim yumi tru long sait bilong bel na tingting. Tasol wanem samting i ken helpim yumi long sanap strong na karim hevi bilong tingting planti?a

Yumi ken kisim planti skul long hau long karim hevi bilong tingting planti taim yumi skelim stori bilong King Devit. Em i karim planti bikpela hevi long laip bilong em, na sampela taim klostu dai i painim em. (1 Sml. 17:34, 35; 18:10, 11) Devit i mekim wanem bilong sanap strong na karim hevi bilong tingting planti? Olsem wanem yumi ken bihainim eksampel bilong em?

Devit i karim planti hevi long wankain taim. Olsem, tingim samting i bin kamap taim em i ranawe long King Sol husat i laik kilim em i dai. Taim Devit na ol man i kam bek long pait, ol i kirap nogut long save olsem ol birua i bin stilim olgeta samting bilong ol, kukim ol haus bilong ol, na karim ol famili bilong ol i go. Devit i mekim wanem? “Devit na lain bilong em i krai nogut tru i go inap strong bilong ol i pinis olgeta.” Narapela samting i putim bikpela hevi moa long Devit em taim ol soldia bilong em i “tok long tromoi ston long em.” (1 Sml. 30:1-6) Nau Devit i karim 3-pela bikpela hevi long wankain taim: Ol famili bilong em i bungim taim nogut, em i pret nogut ol soldia bilong em i kilim em i dai, na King Sol i wok long ranim em bilong kilim em i dai. Ating Devit i bin tingting planti tru!

Devit i mekim wanem? Kwiktaim em “i kisim strong long Jehova, em God bilong em.” Long wanem rot Devit i mekim olsem? Devit i gat pasin bilong beten long Jehova long helpim em na em i save tingim bek ol samting Jehova i mekim bilong helpim em long bipo. (1 Sml. 17:37; Sng. 18:2, 6) Devit i lukim olsem em i mas askim Jehova long stiaim em, olsem na em i askim Jehova long wanem samting em i ken mekim. Taim Devit i kisim daireksen i kam long Jehova, kwiktaim em i kirap na mekim samting. Dispela i mekim na Jehova i blesim em na ol soldia bilong em na ol i kisim bek famili bilong ol na ol samting bilong ol. (1 Sml. 30:7-9, 18, 19) Yu luksave long 3-pela samting Devit i mekim? Em i beten long Jehova long helpim em, na em i tingim bek ol samting Jehova i bin mekim bilong helpim em long bipo, na em i bihainim daireksen i kam long Jehova. Olsem wanem yumi ken bihainim pasin bilong Devit? Lukim 3-pela rot yumi ken mekim olsem.

1. Beten. Taim yumi tingting planti, yumi ken beten askim Jehova long helpim yumi na givim savetingting long yumi. Yumi ken kamautim olgeta bel hevi bilong yumi long Em long rot bilong beten na tokim em long olgeta samting yumi pilim long bel. O yumi ken mekim sotpela beten long tingting sapos i no gat rot long mekim longpela beten. Long olgeta taim yumi beten askim Jehova long helpim yumi, yumi bilip long em wankain olsem Devit i bin mekim, em i tok: “Jehova i olsem bikpela ston na strongpela banis bilong mi na em i Man bilong kisim bek mi. God bilong mi em i bikpela ston bilong mi, mi save go long em na hait.” (Sng. 18:2) Tru tru beten i save helpim yumi? Wanpela painia sista nem bilong em Kahlia i tok: “Taim mi beten, mi save pilim bel isi. Beten i helpim mi long holim wankain tingting olsem bilong Jehova, na dispela i strongim pasin bilong mi long trastim em.” Tru tumas, beten em wanpela gutpela presen i kam long Jehova bilong helpim yumi long karim hevi bilong tingting planti.

2. Tingim bek. Taim yu tingim bek ol samting i bin kamap long laip bilong yu, yu inap tingim wanpela hevi yu bin karim wantaim helpim bilong Jehova? Taim yumi tingim bek ol samting Jehova i mekim bilong helpim yumi na helpim ol wokman bilong em long bipo, dispela i mekim isi bel bilong yumi na helpim yumi long trastim tru Jehova. (Sng. 18:17-19) Wanpela elda nem bilong em Joshua, em i tok: “Mi gat lista bilong ol beten bilong mi em God i bin bekim. Dispela i helpim mi long tingim ol taim we mi askim Jehova long wanpela samting stret na em i givim samting mi askim long en.” Yes, taim yumi tingim bek ol samting Jehova i bin mekim bilong helpim yumi, yumi bai kisim nupela strong bilong daunim pasin bilong tingting planti.

3. Bihainim. Paslain long yumi wokim disisen long stretim wanpela hevi, yumi ken skelim ol gutpela tok bilong Baibel bilong stiaim yumi. (Sng. 19:7, 11) Planti i pilim olsem taim ol i mekim wok painimaut long wanpela skripsa, dispela i helpim ol long kliagut long hau dispela ves i stret long laip bilong ol yet. Wanpela elda nem bilong em Jarrod, em i tok: “Taim mi mekim wok painimaut, dispela i helpim mi long kisim sampela save moa long wanpela ves na mi kliagut long tok Jehova i mekim long mi. Dispela i helpim mi long bilipim tru ol tok bilong em na bihainim ol stiatok bilong em.” Taim yumi painim ol tok bilong Jehova long Baibel bilong stiaim yumi, na yumi bihainim dispela tok, dispela bai helpim yumi long karim hevi bilong tingting planti.

Devit i save olsem em i nidim helpim bilong Jehova bilong karim na winim ol hevi bilong em. Em i tenkyu tru long sapot bilong Jehova na dispela i kirapim em long tok: “God i givim strong long mi, na mi inap kalapim banis. God tru em man i save strongim mi.” (Sng. 18:29, 32) Yumi inap pilim olsem ol hevi bilong yumi ol i go antap tru olsem banis we yumi no inap kalapim. Tasol Jehova inap givim strong long yumi long winim wanem ol hevi i bikpela olsem banis! Yes, yumi ken beten askim Jehova long helpim yumi, tingim bek olgeta samting em i bin mekim bilong helpim yumi long bipo, na bihainim tok bilong em. Na yumi ken bilip tru olsem em bai givim yumi strong na savetingting yumi nidim bilong helpim yumi long karim hevi bilong tingting planti!