Larim Pasin Laikim i Kirapim Yu Long Wok Yet Long Autim Tok!

 1. Yumi kisim wanem skul long Annual Miting bilong 2023?

LONG 2023 Annual Miting,a yumi kisim ol nupela save long sampela bilip bilong yumi na yumi harim sampela gutpela toksave long sait bilong wok autim tok bilong yumi. Yumi kisim save olsem rot inap op long sampela manmeri i joinim lain bilong Jehova bihain long Bikpela Babilon i bagarap. Na tu, yumi kisim save olsem kirap long Novemba 2023, ol pablisa bilong Kingdom bai i no gat wok moa long putim ripot long olgeta samting long wok autim tok bilong ol. Yu ting ol dispela senis i mekim na wok autim tok bilong yumi i no bikpela samting moa olsem long bipo? Nogat tru!

 2. Wai na long olgeta wan wan de em i bikpela samting long yumi mas autim tok? (Mak 13:10)

² Em i bikpela samting long yumi mas autim tok long olgeta wan wan de. Bilong wanem? Long wanem, taim i wok long sot. Tingim tok profet Jisas i bin mekim long wok autim tok bai kamap long taim bilong las de. (Ritim Mak 13:10.) Matyu i mekim wankain tok em Mak i bin mekim, olsem Jisas i tok ol bai autim gutnius long olgeta hap bilong graun paslain long “pinis” i kamap. (Mat. 24:14) Dispela tok “pinis” i makim dispela taim we olgeta samting long graun bilong Satan bai pinis olgeta. Jehova i makim pinis “dispela de na dispela aua” long ol samting em klostu nau bai kamap. (Mat. 24:36; 25:13; Apo. 1:7) Long olgeta wan wan de, yumi wok long i go klostu moa long dispela taim. (Rom 13:11) Paslain long pinis i kamap, yumi mas wok yet long autim tok.

 3. Wanem pasin i kirapim yumi long autim tok?

³ Taim yumi tingim wok autim tok bilong yumi, i gutpela yumi tingim dispela bikpela askim olsem: Wai na yumi save autim gutnius? Bikos pasin laikim i kirapim yumi long autim tok. Ol gutpela wok yumi mekim taim yumi autim tok i kamapim klia pasin laikim bilong yumi—yumi laikim gutnius, yumi laikim ol manmeri, na bikpela samting moa, yumi laikim Jehova na nem bilong em. Yumi ken stori gut long ol dispela risen.

YUMI AUTIM TOK BIKOS YUMI LAIKIM GUTNIUS

 4. Yumi save mekim wanem taim yumi harim wanpela gutpela nius?

⁴ Yu inap tingim yu pilim olsem wanem taim yu harim sampela gutpela nius? Ating wanpela insait long famili i karim nupela bebi o wanpela i givim yu wanpela wok mani em yu nidim tru. Tru tumas, yu amamas na yu laik tru long tokim ol famili na ol pren bilong yu long dispela gutpela nius. Olsem wanem? Yu bin pilim olsem tu taim yu harim nambawan gutpela nius, em gutnius bilong Kingdom Bilong God?

 5. Yu pilim olsem wanem long fes taim yu kisim save long tok i tru long Baibel? (Lukim tu ol piksa.)

⁵ Tingim samting yu bin pilim long fes taim yu kisim save long tok i tru long Baibel. Yu kisim save olsem Papa bilong yu long heven i laikim yu, em i laik yu stap insait long bikpela lain famili bilong em i lotuim em, em i promis long pinisim pen na hevi, na yu ken bilip na wet long lukim gen ol pren na ol famili bilong yu em ol i dai pinis i kirap bek long nupela taim, na planti samting moa. (Mak 10:​29, 30; Jon 5:​28, 29; Rom 8:​38, 39; Rev. 21:​3, 4) Ol dispela tok i tru i mekim gut bel bilong yu. (Luk 24:32) Yu laikim ol save yu wok long kisim na yu laik tokim ol narapela long ol dispela tok i tru i dia tumas!—Skelim Jeremaia 20:9.

 6. Yu kisim wanem skul long ekspiriens bilong Ernest na Rose?

⁶ Skelim dispela ekspiriens. Wanpela brata nem bilong em Ernest,b em i gat 10-pela krismas taim papa bilong em i dai. Ernest i tok: “Mi tingting: ‘Ating em i go long heven? O ating em i pinis olgeta na mi no inap lukim em gen?’ Dispela i mekim na mi save bel nogut long ol pikinini em papa bilong ol i stap laip yet.” Olgeta taim Ernest i save go long ples matmat, na em i save nildaun long matmat bilong papa bilong em na beten olsem: “Plis, God, mi laik save papa bilong mi i stap we?” Inap 17 yia bihain long papa bilong Ernest i dai, ol Witnes i askim long stadi long Baibel wantaim em na em i orait long mekim olsem. Em i amamas tru long kisim save olsem ol man i dai pinis ol i no inap mekim wanpela samting, i olsem ol i slip i dai, na Baibel i tok promis olsem ol bai kirap bek long bihain. (Ekl. 9:​5, 10; Apo. 24:15) Em i kisim bekim bilong ol askim we em i gat laik tru long save inap planti yia! Ernest i amamas tru long ol tok i tru bilong Baibel em i wok long lainim. Meri bilong em Rose tu i joinim em long stadi long Baibel na em i amamas long ol tok i tru bilong Kingdom em i lainim. Long 1978, ol i kisim baptais. Ol i amamas tru long tokim ol wanfamili, ol pren, na ol narapela long ol tok i tru ol i lainim. Long dispela rot, Ernest na Rose i helpim moa long 70 manmeri long winim mak na kisim baptais.

 7. Wanem samting i save kamap taim yumi pilim tru long bel ol tok i tru bilong Baibel? (Luk 6:45)

⁷ Taim yumi pilim tru long bel ol tok i tru bilong Baibel, dispela i save kirapim yumi long tokim ol narapela long ol dispela tok. (Ritim Luk 6:45.) Yumi pilim wankain olsem ol disaipel bilong Jisas i bin pilim, ol i tok: “[Mipela] i no inap pasim maus long ol samting [mipela] i bin lukim na harim.” (Apo. 4:20) Yumi laikim tumas tok i tru, olsem na yumi laik tokim planti manmeri moa long en.

YUMI AUTIM TOK BIKOS YUMI LAIKIM OL MANMERI

 8. Wanem samting i kirapim yumi long autim gutnius long ol narapela? (Lukim blok “Laikim Ol Manmeri—Kamapim Disaipel.”) (Lukim tu piksa.)

⁸ Yumi laikim ol manmeri wankain olsem Jehova na Pikinini bilong em i mekim. (Prov. 8:31; Jon 3:16) Yumi sori tru long ol manmeri em ol “i no save long God” na ol “i no wetim wanpela gutpela samting.” (Efe. 2:12) Ol i karim planti hevi tru, na dispela inap mekim ol i pilim olsem ol i stap insait long wanpela bikpela hul i go daun tru. Tasol gutnius bilong Kingdom Bilong God em i olsem wanpela rop em yumi inap tromoi i go daun long ol na pulim ol i kam ausait long dispela hul. Pasin laikim na pasin sori yumi gat long ol manmeri i kirapim yumi long givim bel olgeta long autim gutnius long ol. Dispela tok i dia tumas inap helpim ol long bilip na wetim gutpela samting i kamap bihain, stap amamas long nau, na opim rot long ol inap kisim “dispela laip em i laip tru,” em laip oltaim long nupela taim God bai kamapim.—1 Tim. 6:19.

 9. Yumi givim tok lukaut long wanem samting bai kamap bihain, na bilong wanem? (Esekiel 33:​7, 8)

⁹ Pasin laikim i kirapim yumi tu long tokim ol manmeri long pinis bilong dispela haptaim nogut we i wok long i kam klostu. (Ritim Esekiel 33:​7, 8.) Yumi sori long olgeta manmeri na ol wanfamili bilong yumi em ol i no lotuim Jehova. Planti bilong ol i mekim ol samting bilong wan wan de na ol i no save olsem “bai i gat traipela hevi tru. Kirap long taim God i wokim graun na i kam inap long nau, kain hevi olsem i no bin kamap, nogat, na bai i no inap kamap gen.” (Mat. 24:21) Yumi laik bai ol i save long samting bai kamap long dispela taim we God bai kotim ol manmeri—ol lotu giaman bai bagarap na pinis olgeta na bihain long en olgeta man nogut bai pinis long pait bilong Armagedon. (Rev. 16:​14, 16; 17:​16, 17; 19:​11, 19, 20) Yumi beten olsem planti manmeri moa bai putim yau long dispela tok lukaut na joinim yumi long mekim lotu i tru long nau. Tasol olsem wanem long ol manmeri em ol i no laik putim yau long dispela tok lukaut long nau, dispela i makim tu ol wanfamili bilong yumi?

10. Wai na em i bikpela samting long yumi mas wok yet long mekim dispela tok lukaut?

¹⁰ Olsem yumi lainim long atikol i go pinis, ating em laik bilong Jehova long seivim ol manmeri em ol i kirap long bilip long em taim ol i lukim Bikpela Babilon i bagarap. Sapos olsem, orait em i bikpela samting long yumi mas wok yet long mekim dispela tok lukaut long nau. Tingim dispela: Long dispela taim bai kamap, ol inap tingim bek ol samting em yumi tokim ol long en long nau. (Skelim Esekiel 33:33.) Ating ol bai tingim bek tok lukaut yumi bin tokim ol long en na dispela bai kirapim ol long joinim yumi long mekim lotu i tru paslain long pinis i kamap. Olsem dispela woda long Filipai i bilip long God bihain long “wanpela bikpela guria i kamap,” ating sampela em nau ol i no putim yau long tok yumi autim, ol bai kirap bilip long God bihain long bagarap i painim Bikpela Babilon.—Apo. 16:​25-34.

YUMI AUTIM TOK BIKOS YUMI LAIKIM JEHOVA NA NEM BILONG EM

11. Olsem wanem yumi givim glori, ona, na strong bilong yumi long Jehova? (Revelesen 4:11) (Lukim tu ol piksa.)

¹¹ Nambawan bikpela risen na yumi autim gutnius em bikos yumi laikim God Jehova na nem holi bilong em. Yumi tingim wok autim tok bilong yumi olsem rot bilong preisim God yumi laikim. (Ritim Revelesen 4:11.) Long bel olgeta, yumi wanbel long dispela tok olsem: “Jehova, yu God bilong mipela, i stret tru long yu kisim glori na ona na strong.” Yumi givim glori na ona long em taim yumi tokim ol narapela long ol evidens i kamapim klia olsem em i “wokim olgeta samting” na yumi stap laip bikos em i givim laip long yumi. Yumi givim strong bilong yumi long Jehova taim yumi yusim taim, strong, na ol samting yumi gat bilong givim bel olgeta long autim tok inap long skel na sindaun bilong yumi. (Mat. 6:33; Luk 13:24; Kol. 3:23) Tru tumas, yumi amamas long tokim ol narapela long God yumi laikim. Na tu, yumi amamas long tokim ol long nem bilong em na em i wanem kain God tru. Bilong wanem?

12. Olsem wanem yumi mekim holi nem bilong Jehova taim yumi autim tok?

¹² Yumi laikim Jehova na dispela i kirapim yumi long mekim holi nem bilong em. (Mat. 6:9) Yumi laik insait long wok bilong kamapim klia olsem Satan i mekim ol tok giaman bilong krungutim gutnem bilong Jehova. (Stt. 3:​1-5; Jop 2:4; Jon 8:44) Taim yumi autim tok, yumi laik tru long tokim ol man long Jehova em i wanem kain God na em i gat wanem ol pasin. Yumi laik bai olgeta man i save olsem pasin laikim em nambawan pasin bilong em, wok bos bilong em i stretpela na i fea, na klostu nau Kingdom bilong em bai pinisim olgeta pen na hevi na kamapim bel isi long graun olgeta na olgeta man bai stap amamas. (Sng. 37:​10, 11, 29; 1 Jon 4:8) Taim yumi sambai long gutnem bilong Jehova long wok autim tok bilong yumi, yumi mekim holi nem bilong em. Na tu, yumi amamas bikos yumi save olsem yumi mekim wok em yumi mas mekim olsem ol Witnes Bilong Jehova. Wai na yumi tok olsem?

13. Wai na yumi amamas long holim nem olsem ol Witnes Bilong Jehova? (Aisaia 43:​10-12)

¹³ Jehova i makim yumi long stap olsem ol “witnes” bilong em. (Ritim Aisaia 43:​10-12.) Sampela yia i go pinis, wanpela pas i kam long Gavening Bodi i tok: “Nambawan gutpela samting yumi holim em dispela nem olsem wanpela Witnes Bilong Jehova.”c Wai na yumi tok olsem? Skelim dispela tok piksa. Sapos yu laik bai wanpela i stap olsem witnes bilong yu long kot, orait yu bai makim wanpela em yu save long em na yu trastim em, em i gat gutnem na ol narapela inap bilipim tok bilong em. Taim Jehova i makim yumi long stap olsem ol Witnes bilong em, em i kamapim klia olsem em i save gut long yumi na em i trastim yumi olsem yumi inap tokim ol narapela olsem em wanpela tasol em i God tru. Yumi amamas tru long stap olsem ol Witnes bilong em na long olgeta taim rot i op, yumi laik tokim ol narapela long nem bilong em na daunim olgeta tok giaman em ol man i mekim long em. Taim yumi mekim olsem, yumi inapim mining bilong nem yumi kisim olsem ol Witnes Bilong Jehova!—Sng. 83:18; Rom 10:​13-15.

YUMI BAI WOK YET LONG AUTIM TOK I GO INAP LONG PINIS

14. Wanem ol gutpela samting bai kamap klostu nau?

¹⁴ Yumi amamas long lukim ol gutpela samting bai kamap klostu nau! Jehova bai blesim wok bilong yumi, olsem na yumi ken bilip tru long lukim planti manmeri moa i kisim tok i tru paslain long traipela hevi tru i kirap. Na tu, yumi amamas olsem long taim bilong traipela hevi tru em taim we bai givim bikpela hatwok tru long ol manmeri, ating planti manmeri moa bai lusim pasin nogut bilong dispela graun bilong Satan em klostu nau bai pinis, na ol bai bung wantaim yumi long preisim Jehova!—Apo. 13:48.

15-16. Yumi bai wok yet long mekim wanem, na i go inap long wanem taim?

¹⁵ Long nau, yumi gat wok i stap yet long mekim. Yumi gat bikpela wok bilong autim gutnius bilong Kingdom Bilong God long olgeta hap bilong graun, em wok yumi no inap mekim gen long bihain. Na long wankain taim, yumi mas wok yet long givim tok lukaut long ol manmeri long samting em klostu nau bai kamap. Ol manmeri i mas save olsem pinis bilong dispela haptaim nogut bilong nau i wok long i kam klostu tru. Na long taim bilong God long kotim ol manmeri i kamap, ol bai save olsem tok yumi bin autim em i kam long God Jehova.—Ese. 38:23.

¹⁶ Olsem na yumi mas tingting strong long mekim wanem? Yumi laikim gutnius, yumi laikim ol manmeri, na bikpela samting moa, yumi laikim God Jehova na nem bilong em, olsem na dispela i mas kirapim yumi long givim bel olgeta long autim tok i go inap long Jehova i tok, “Em inap nau!”