Buk Song
Singsing bilong Devit.
35 Jehova, yu mas helpim mi long winim kot em ol birua bilong mi i mekim long mi;+
Yu mas pait long ol man i pait long mi.+
2 Kisim liklik hap plang* bilong yu long pait na bikpela hap plang bilong yu long pait,+
Na yu mas kam na helpim mi.+
3 Kisim spia bilong yu na tamiok bilong pait* na kam pait long ol man i ranim mi.+
Yu tokim mi olsem: “Mi man bilong kisim bek yu.”+
4 Ol man i laik kilim mi i dai, yu ken daunim ol na mekim ol i sem.+
Na ol man i pasim tok long bagarapim mi, yu ken semim ol na ol bai lusim mi na ranawe.
5 Ol i ken kamap olsem pipia bilong wit samting em win i rausim i go;
Ensel bilong Jehova i ken rausim ol i go.+
6 Taim ensel bilong Jehova i ranim ol i go
Rot bilong ol i ken kamap tudak na wel nogut tru.
7 Mi no bin mekim wanpela samting long ol, tasol ol i haitim wanpela net bilong trapim mi;
Mi no mekim wanpela samting long ol, tasol ol i digim wanpela hul bilong mi ken pundaun long en.
8 Taim ol i no tingim i stap, bagarap i ken painim ol;
Net ol i haitim i ken trapim ol yet.
Ol i ken pundaun i go insait long en na bagarap.+
9 Tasol mi bai amamas long Jehova;
Mi bai amamas long pasin bilong em long kisim bek mi.
10 Mi bai tok long bel olgeta bilong mi olsem:
“Jehova, i no gat wanpela i olsem yu.
Ol man i no gat helpim, yu save kisim bek ol long han bilong ol man i gat strong,+
Ol rabisman na ol man i no gat helpim, yu save kisim bek ol long han bilong ol man i save stilim ol samting bilong ol.”+
11 Ol witnes i gat tingting nogut, ol i kam bilong mekim tok bilong daunim mi,+
Ol i sutim tok long mi long ol samting mi no bin mekim.
12 Mi mekim gutpela pasin long ol, tasol ol i bekim pasin nogut long mi,+
Na dispela i mekim na bel bilong mi i hevi tru.
13 Taim ol i sik, mi save pasim laplap bilong sori;
Na mi save tambu long kaikai na dispela i givim hevi long mi yet,
Na taim mi beten na mi no kisim bekim bilong beten bilong mi,
14 Mi save wokabaut na krai sori long ol olsem ol i pren o brata bilong mi;
Mi bel sori tru olsem man i krai sori long mama bilong em i dai.
15 Tasol taim hevi i painim mi, ol i amamas na bung wantaim;
Ol i bung wantaim bilong bagarapim mi long taim mi no tingim i stap.
Na ol i no malolo long mekim tok nogut long mi.
16 Ol man i sakim tok bilong God i mekim tok bilas long mi,*
Ol i kaikaim tit bilong ol, long wanem, ol i belhat long mi.+
17 Jehova, hamas taim moa na bai yu lukluk tasol i stap?+
Yu mas kisim bek mi na ol i no ken bagarapim mi,+
Na yu mas kisim bek gutpela laip bilong mi long han bilong ol yangpela laion.+
18 Sapos yu mekim olsem, bai mi tenkyu long yu namel long planti lain manmeri i bung wantaim;+
Mi bai preisim yu namel long bikpela lain manmeri.
19 Yu no ken larim ol man i birua nating long mi i amamas long mi karim hevi;
Na yu no ken larim ol man i heitim mi nating+ i tok bilas long mi.
20 Ol i no save mekim ol tok bilong kamapim bel isi,
Na ol i save giaman na pasim tok long birua long ol man i sindaun gut wantaim ol arapela.+
21 Ol i opim maus bilong ol na sutim tok long mi,
Ol i tok olsem: “Tru tumas! Mipela i lukim yu mekim ol dispela samting.”
22 Jehova, yu lukim pinis dispela olgeta samting. Olsem na yu no ken pasim maus.+
Jehova, yu no ken i stap longwe long mi.+
23 Yu mas kirap na i kam helpim mi,
Jehova, yu God bilong mi, olsem na yu mas helpim mi long winim kot.
24 Jehova, God bilong mi, yu gat stretpela pasin olsem na yu mas skelim mi;+
Yu no ken larim ol i amamas long lukim mi i bagarap.
25 Yu no ken larim ol i toktok long ol yet olsem: “Gutpela tru! Samting yumi laikim, yumi mekim pinis.”
Na yu no ken larim ol i tok olsem: “Yumi daunim em pinis.”+
26 Ol man i amamas long mi karim hevi,
Yu mas semim ol.
Na ol man i litimapim nem bilong ol yet na daunim mi, yu mas semim ol.
27 Tasol ol man i amamas long mi mekim stretpela pasin, ol i ken singim song na amamas;
Oltaim ol i ken tok olsem:
“Jehova i ken kisim biknem, em man i save amamas long ol wokman bilong em i save stap gut.”+