Buk Song
Tok i go long dairekta; singim long nek ol i kolim “Ol Plaua Lili.”* Singsing bilong Asap+ bilong helpim em long tingim ol samting.
80 Wasman bilong Israel, yu mas putim yau,
Yu save stiaim lain bilong Josep olsem ol sipsip.+
2 Kamapim bikpela strong bilong yu,+
Long ai bilong lain Efraim na lain Benjamin na lain Manase;
Kam na kisim bek mipela.+
3 God, yu mas orait gen long mipela;+
Larim pes bilong yu i lait long mipela, na bai mipela i no ken lus.+
4 Jehova God, bosman bilong bikpela lain ami,* hamas taim yet bai yu kros na yu no laik harim prea bilong ol manmeri bilong yu?+
5 Yu mekim aiwara bilong ol i kamap olsem bret bilong ol,
Na yu mekim ol i krai planti na aiwara bilong ol i olsem dring bilong ol.
6 Yu larim ol lain i sindaun klostu long mipela i pait namel long ol yet bilong bosim mipela;
Ol birua bilong mipela i tok bilas long mipela.+
7 God, bosman bilong bikpela lain ami, yu mas orait gen long mipela;
Larim pes bilong yu i lait long mipela, na bai mipela i no ken lus.+
8 Yu mekim wanpela rop wain+ i lusim Isip na i go.
Na yu rausim ol arapela kantri na planim em long graun bilong ol.+
9 Yu kliaim wanpela hap graun bilong planim em,
Na em i putim rop bilong en i go daun na em i kamap bikpela tru na karamapim olgeta hap bilong graun.+
10 Em i karamapim ol maunten,
Na ol han bilong en i karamapim ol diwai sida bilong God.
11 Ol han bilong en i go inap long solwara.
Na ol nupela kru bilong en i go inap long Wara Yufretis.+
12 Wai na yu brukim banis ston bilong gaden wain,+
Na bai ol man i wokabaut i kam i go i ken stilim ol prut bilong en?+
13 Ol wel pik bilong bikbus i save bagarapim em,
Na ol wel animal i save kaikai prut bilong en.+
14 God, bosman bilong bikpela lain ami, yu mas tingim mipela gen.
Yu stap long heven na yu lukluk i kam daun!
Yu mas lukautim dispela rop wain,+
15 Em as bilong en em yu yet i bin planim long rait han bilong yu,+
Na han bilong en em yu yet i bin mekim i kamap strong bilong givim biknem long yu.+
16 Ol i katim rop wain na kukim long paia.+
Yu krosim ol manmeri na ol i bagarap.
17 Han bilong yu i ken helpim man i stap long rait sait bilong yu,
Na helpim pikinini bilong man em yu bin mekim i kamap strong bilong givim biknem long yu.+
18 Sapos yu mekim olsem, orait bai mipela i no inap lusim yu.
Yu mas larim mipela i stap laip na bai mipela i ken singaut long nem bilong yu.
19 Jehova God, bosman bilong bikpela lain ami, yu mas orait gen long mipela;
Larim pes bilong yu i lait long mipela, na bai mipela i no ken lus.+