Buk Song
Tok i go long dairekta. Devit i raitim dispela song.
140 O Jehova, kisim bek mi long han bilong ol man nogut;
Lukautim mi na bai ol man bilong pait na bagarapim man i no ken mekim nogut long mi,+
2 Em ol man i save tingting long mekim pasin nogut+
Na ol i save kirapim kros pait long olgeta taim.
3 Toktok bilong ol i sap tumas olsem tang bilong snek;+
Na i olsem posin bilong snek i stap insait long maus bilong ol.+ (Selah)
4 O Jehova, lukautim mi na bai ol man nogut i no ken bagarapim mi.+
Banisim mi long ol man bilong pait na bagarapim man,
Em ol man i pasim tok long mekim mi pundaun.
5 Ol man i gat pasin antap i haitim trap i stap bilong trapim mi;
Ol i yusim rop bilong taitim trap klostu long rot.+
Ol i putim ol trap bilong holimpas mi.+ (Selah)
6 Mi tok long Jehova olsem: “Yu God bilong mi.
O Jehova, harim singaut bilong mi na helpim mi.”+
7 O Jehova, Nambawan Bikpela, yu strongpela Seivia bilong mi,
Long taim bilong pait yu lukautim het bilong mi.+
8 O Jehova, ol samting ol man nogut i laik tru long kisim, yu no ken larim ol i kisim.
No ken larim samting ol i pasim tok long mekim i kamap gut na ol i hambak long dispela.+ (Selah)
9 Ol tok nogut em ol man i stap klostu long mi i mekim long mi
I ken kamap long ol yet.+
10 Hatpela paia i ken kam daun olsem ren antap long ol.+
Ol i ken tromoi ol i go insait long paia,
Na i go insait long ol hul i daun tru,*+ na bai ol i no ken kam antap gen.
11 Man bilong bagarapim gutnem bilong narapela i no ken i stap gut long graun.+
Samting nogut i ken painim ol man bilong pait, na bagarapim ol.
12 Jehova, mi save olsem yu bai sapotim ol man i no gat nem
Na yu bai helpim ol man i stap rabis.+
13 Tru tumas, ol stretpela man bai tok tenkyu long nem bilong yu;
Ol stretpela man bai stap long ai bilong yu.+