Baibel i Save Senisim i Stap Bilong Man

WANEM samting i kirapim wanpela Rastafarian long katim rasta bilong em, na lusim pasin bilong bel nogut long ol waitskin? Na wanem samting i helpim wanpela yangpela man bilong pait, long lusim pasin bilong mekim wok bilong ol lain bilong maketim ol drak? Skelim tok ol i mekim.

“Mi lusim pasin bilong bel nogut long narapela lain.”​​—HAFINI NGHAMA

KRISMAS: 34

KANTRI: SAMBIA

BIPO: RASTAFARIAN

LAIP BILONG MI LONG BIPO: Mama i karim mi long wanpela refiuji kem long Sambia. Mama i bin ranawe lusim Namibia long taim bilong pait na em i joinim lain SWAPO (South West Africa People’s Organization). Dispela lain i mekim pait long gavman bilong Saut Afrika i bin bosim Namibia long dispela taim bipo.

I kam inap long taim mi gat 15 krismas, mi bin stap long planti refiuji kem. Ol yangpela long ol SWAPO kem i kisim skul long mekim wok bilong helpim dispela lain. Ol i skulim mipela long givim bel long ol samting bilong politik na bel nogut long ol waitskin.

Taim mi gat 11-pela krismas, mi laik kamap wanpela Kristen long wanpela lotu long kem we ol Katolik, Luteran, Angliken, na sampela moa i lotu wantaim. Pasto mi bin toktok wantaim em, em i no laik bai mi mekim olsem. Kirap long dispela taim, mi no bilip moa long God. Tasol taim mi gat 15 krismas, mi kirap laikim rege musik, na tu, mi gat laik long pinisim sampela hevi em ol blakskin Afrika i save kisim, na dispela i kirapim mi long joinim lain Rastafarian. Mi larim gras bilong mi i kamap rasta, mi smok mariwana, mi lusim abus, na mi tokaut strong olsem ol blakskin i mas kamap fri. Tasol mi insait yet long pasin pamuk na lukim ol muvi bilong pait na bagarapim man. Na mi mekim yet ol tok nogut.

BAIBEL I SENISIM I STAP BILONG MI: Long 1995, taim mi gat 20 krismas samting, mi kirap tingting long wanem samting tru mi laik mekim long i stap bilong mi. Mi wok long stadim olgeta buk bilong ol Rastafarian em mi inap kisim. Sampela bilong ol dispela buk i kolim sampela hap tok bilong Baibel, tasol tok ol dispela buk i kamapim, i no klia long mi. Olsem na mi ting bai mi yet i ritim Baibel.

Bihain wanpela pren Rastafarian i givim wanpela Baibel stadi buk long mi, em ol Witnes Bilong Jehova i wokim. Mi wanpela i stadim dispela buk wantaim Baibel. Bihain, mi bungim ol Witnes Bilong Jehova na stadi yet long Baibel wantaim ol.

Mi wok strong tru na mi lusim pasin bilong smok na dring planti. (2 Korin 7:1) Mi stretim gut skin na klos bilong mi, katim rasta bilong mi, lusim pasin bilong lukim ponografi na ol muvi bilong pait na bagarapim man, na mi lusim pasin bilong mekim tok nogut. (Efesus 5:​3, 4) Bihain, mi lusim tu pasin bilong bel nogut long ol waitskin. (Aposel 10:​34, 35) Bilong senisim ol dispela pasin, mi mas lusim ol musik i kirapim man long bel nogut long ol narapela skin na lusim ol olpela pren bilong mi, em ol inap pulim mi long bihainim gen olpela wokabaut bilong mi.

Taim mi lusim pinis ol dispela pasin, mi go painim Haus Kingdom bilong ol Witnes Bilong Jehova na askim ol long mi ken joinim lotu bilong ol. Ol i kirap stadi wantaim mi long Baibel. Taim mi wokim disisen long kisim baptais na kamap wanpela Witnes Bilong Jehova, famili bilong mi i no amamas. Mama i tokim mi long joinim ol narapela lotu em ol i tok ol i Kristen, na no ken joinim ol Witnes Bilong Jehova. Wanpela ankol bilong mi em i wanpela bikman insait long gavman, na oltaim em i save tok bilas long mi, long wanem, mi wokim disisen long bung wantaim ol Witnes.

Tasol mi lain long pasin Jisas i bin mekim long ol man na mi bihainim tok bilong em, na dispela i helpim mi long sanap strong taim ol i birua na tok bilas long mi. Taim mi skelim tok bilong ol Witnes wantaim ol tok bilong Baibel, mi bilip tru olsem mi painim pinis lotu i tru. Olsem: Ol i bihainim tok bilong Baibel long autim tok long ol man. (Matyu 28:​19, 20; Aposel 15:14) Na ol i no save insait long ol wok politik.​—Song 146:​3, 4; Jon 15:​17, 18.

GUTPELA SAMTING I PAINIM MI: Mi lain long bihainim ol lo bilong Baibel long laip bilong mi na dispela i helpim mi long planti samting. Olsem: Mi lusim mariwana na nau mi no tromoi planti handet dola long olgeta mun long baim dispela samting. Na tingting bilong mi i no paul nabaut na mi ting mi lukim ol kain kain samting, nau tingting na skin bilong mi i kamap gutpela.

Nau mi gat samting bilong soim rot long mi na laip bilong mi i gat as bilong en, em samting mi gat laik tru long kisim long taim mi bin yangpela. Na bikpela samting moa, nau mi pilim olsem mi inap i go klostu long God.​—Jems 4:8.

“Mi lain long bosim belhat bilong mi.”​—MARTINO PEDRETTI

KRISMAS: 43

KANTRI: AUSTRALIA

BIPO: MAN BILONG SALIM DRAK

LAIP BILONG MI LONG BIPO: Insait long ol yia mi wok long kamap bikpela, famili bilong mi i save go sindaun long ol narapela narapela hap. Mi bin sindaun long ol liklik taun, na long wanpela biktaun, na inap liklik haptaim mi bin stap long wanpela misin stesin bilong ol Aborijini. Mi tingim gutpela taim mi bin kisim wantaim ol kasen na ol ankol bilong mi. Mipela i save go painim pis, painim abus, wokim ol bumarang, na sapim piksa bilong ol samting.

Papa em man bilong boksen na em i kirap skulim mi long pait long taim mi liklik yet. Mi kisim pasin bilong pait. Taim mi tineja, mi lusim bikpela hap taim long dring long ol ba. Mi wantaim ol pren bilong mi i save raun painim ol man bilong pait wantaim ol. Mipela i holim ol naip na stik bilong pilai beisbal na go bungim 20 man samting na paitim ol.

Mi kisim mani long rot bilong salim ol drak na ol samting em ol wokman long wof i stilim. Na mi save helpim ol man bilong maketim ol drak long kisim mani long ol man i gat dinau long ol, na mi save hansapim ol long gan. Mi gat laik long kamap wanpela kilman. Tingting bilong mi i olsem: Kilim ol man, nogut ol i kilim yu.

BAIBEL I SENISIM I STAP BILONG MI: Taim mi wok long kamap bikpela, mi bin harim stori long ol Witnes Bilong Jehova. Taim mi gat 22 krismas samting, mi askim mama long wanem hap sampela Witnes i stap long en. Tupela de bihain wanpela Witnes, nem bilong en Dixon, i kam paitim dua. Mipela i toktok i go na em i singautim mi long go long miting bilong ol Witnes Bilong Jehova. Mi go long dispela miting na mi wok long i go yet long ol dispela miting inap 20 yia pinis. Olgeta askim bilong mi, ol Witnes i bin kamapim bekim bilong en long Baibel.

Mi amamas long kisim save olsem Jehova i save tingim olgeta wan wan man, na ol man i givim baksait long em tu. (2 Pita 3:9) Na mi kisim save olsem em i gutpela Papa na em bai lukautim mi, maski ol narapela i no mekim olsem. Na mi amamas long kisim save olsem em bai lusim ol rong bilong mi sapos mi senisim pasin bilong mi. Ol ves bilong Baibel long Efesus 4:​22-24 i bin kirapim tru tingting bilong mi. Ol dispela ves i strongim mi long “rausim dispela olpela pasin” bilong mi na ‘kamap nupela man, em God i mekim i kamap nupela.’

Mi no senisim pasin bilong mi hariap. Long ol de namel long wik mi no kisim drak, tasol long wiken, taim mi stap wantaim ol pren bilong mi, ol i pulim mi long kisim drak. Mi luksave olsem sapos mi laik stretim pasin bilong mi, mi mas lusim dispela hap ol pren bilong mi i stap long en, olsem na mi tingting long i go sindaun long narapela provins. Sampela pren i tok ol bai go wantaim mi na lusim mi long dispela nupela hap, na mi tok orait long dispela. Long rot ol i stat long smokim mariwana na ol i laik givim sampela long mi. Tasol mi tokim ol olsem mi wok long lusim dispela pasin, na taim mipela i kamap long boda bilong provins, ol i lusim mi. Bihain mi kisim save olsem, bihain liklik long ol i lusim mi, ol dispela pren i holim gan na hansapim wanpela beng na stilim mani.

GUTPELA SAMTING I PAINIM MI: Taim mi lusim pasin bilong bung wantaim ol dispela pren, mi no hatwok tumas long senisim pasin bilong mi. Long 1989, mi kisim baptais na kamap wanpela Witnes. Bihain long mi kisim baptais, susa, mama, na papa bilong mi, ol tu i kirap mekim wok bilong Jehova.

Mi marit inap 17 yia pinis na mi gat 3-pela naispela pikinini. Mi lain pinis long bosim belhat bilong mi, maski ol man i sikirapim bel bilong mi. Na mi lain pinis long laikim tru ol man bilong ‘olgeta kantri, olgeta kain skin, na olgeta tok ples.’ (KTH 7:9) Mi pilim olsem tok bilong Jisas i bin kamap tru long mi. Em i tok: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.”​—Jon 8:​31, 32.

[Rait long pes 19]

Bilong senisim pasin bilong mi, mi mas lusim ol musik i kirapim man long bel nogut long ol narapela skin

[Rait long pes 20]

Mi wantaim ol pren bilong mi i save raun painim ol man bilong pait wantaim ol. Mipela i holim ol naip na stik bilong pilai beisbal na go bungim 20 man samting na paitim ol