Pasin Bilong Bilip na Wet Yu Ting Em Inap Helpim Yu?

DANIEL i gat 10-pela krismas tasol na em i gat sik kensa, na em i karim hevi bilong dispela sik inap wanpela yia. Ol dokta bilong em i no ting olsem em bai kamap orait, na ol famili bilong em tu i gat wankain tingting. Tasol Daniel i bilip olsem em bai kamap orait. Em i ting olsem taim em i kamap bikpela, em bai mekim wok painimaut long dispela sik na painim marasin bilong pinisim sik kensa. Daniel i wetim wanpela speselis dokta bilong dispela kain sik kensa bai kam lukim em. Tasol long de we dispela dokta bai kam, weda i no gutpela so em i no kam. Daniel i bel hevi tru. Em fes taim Daniel i no amamas moa. Tupela de bihain em i dai.

Wanpela wokman bilong haus sik i skelim pasin bilong man long bilip olsem em bai kamap orait na pasin bilong i no ting olsem em bai kamap orait, dispela tupela pasin inap mekim sampela samting long helt bilong man. Ating yu bin harim ol kain stori olsem. Kain olsem, wanpela lapun em klostu i laik dai, tasol em i wet i stap long wanpela samting—ating em i wetim wanpela long famili i kam lukim em, o wanpela bikpela de long laip bilong em i kamap. Taim dispela samting i kamap pinis, wantu em i dai. Wanem samting i as bilong dispela? Yu ting pasin bilong bilip na wet inap mekim sampela samting long man olsem sampela i ting?

Planti wok painimaut bilong ol dokta i soim olsem pasin bilong holim stretpela tingting, bilip na wet, na ol narapela gutpela pasin i gat strong long mekim sampela samting long laip na helt bilong man. Tasol planti dokta i no gat wankain tingting. Sampela i tok dispela kain tok em stori tumbuna na i no stret long save bilong saiens. Ol i ting olsem ol sik i save kamap long rot bilong ol jem o sampela bagarap long bodi, na i no filings bilong man i mekim sampela samting long helt bilong em.

Dispela kain tingting ol man i gat long pasin bilong bilip na wet i no bikpela samting, dispela i no nupela samting. Planti tausen yia i go pinis, ol i askim saveman bilong Grik em Aristotle long kamapim insait bilong dispela pasin bilong bilip na wet, na em i tok: “Dispela pasin i olsem man i ai op i stap na driman.” Na i no longtaim i go pinis, Benjamin Franklin, em wanpela bikman bilong gavman bilong Amerika, em i tok: “Man i gat pasin bilong bilip na wet, dispela i no inap helpim em.”

Orait pasin bilong bilip na wet em wanem samting? Yu ting em pasin bilong man i bilip olsem samting em i wis long en em i tru, olsem driman nating? O i gat as na yumi ken ting olsem pasin bilong bilip na wet em i samting tru—em pasin yumi olgeta i nidim na bai yumi stap amamas na helt bilong yumi i stap gut?

Bilong Wanem Yumi Mas i Gat Pasin Bilong Bilip na Wet?

OLSEM WANEM sapos Daniel, dispela mangi yumi stori long en long fes atikol we i gat sik kensa, em i holimpas bilip olsem em bai kamap orait? Yu ting em inap winim dispela sik? Yu ting em bai stap laip yet long nau? Maski ol man husat i bilip strong olsem pasin bilong bilip na wet bai helpim man long kamap orait, ol i no inap tok olsem. Na dispela em bikpela poin. Yumi no ken ting olsem pasin bilong bilip na wet inap oraitim sik, na stretim olgeta samting.

Long wanpela intaviu em CBS News i mekim wantaim Dr Nathan Cherney, em i givim tok lukaut olsem, i no stret long tokim ol man i sik nogut tru olsem ol bai kamap orait sapos ol i bilip strong olsem ol bai kamap orait: “Mipela i bin lukim olsem ol man marit i bin sutim tok long ol meri bilong ol husat i sik olsem ol i no bin lusim bikpela haptaim long tingim tingim long bel ol samting, na ol i no tingting olsem ol bai kamap orait.” Dr Nathan Cherney i tok moa: “Dispela i givim tingting kranki olsem sapos yu ting yu bai kamap orait yu inap kontrolim sik bilong yu, na sapos yu no kamap orait, sampela bai ting olsem yu no bin mekim olgeta samting bilong kamap orait. Tasol dispela tingting i no stret.”

Tasol tru tru, ol man i gat ol sik we ol bai dai, ol i mas i gat strong bilong pait long daunim ol dispela sik. Olsem na i gutpela sapos ol famili bilong ol i no ken mekim ol tok we i mekim na ol sikman i pilim olsem ol i gat asua. So yu ting dispela i makim olsem pasin bilong bilip na wet i no inap helpim man?

Yumi no ken ting olsem. Dispela dokta, em i speselis bilong lukautim ol sikman em klostu ol i laik dai—wok bilong em i bilong helpim ol sikman long karim hevi bilong sik i go inap long ol i dai, na i no bilong daunim sik bilong ol o mekim ol i stap laip longpela taim. Ol dokta i gat dispela kain wok ol i bilip olsem ol samting ol i mekim bilong helpim sikman long holim stretpela tingting, dispela i gutpela moa, na dispela i stret tu long ol man i sik nogut tru. Ol samting i soim olsem pasin bilong sikman long bilip olsem em bai kamap orait, dispela bai helpim em.

Pasin Bilong Bilip na Wet Inap Helpim Yu

Dokta W. Gifford-Jones i tok: “Pasin bilong bilip olsem yu bai kamap orait, dispela i gat strong.” Em i skelim ol wok painimaut ol i bin mekim long as na em i bikpela samting long mekim gut bel bilong ol sikman em klostu ol i laik i dai. Ol i ting dispela kain pasin bilong sapotim sikman i save helpim em long holimpas bilip olsem em bai kamap orait na holim stretpela tingting. Wanpela wok painimaut ol i mekim long 1989, i kamapim olsem ol sikman husat i kisim dispela kain helpim ol i stap longpela taim liklik, na bihain sampela wok painimaut ol i mekim i no strongim dispela tingting. Tasol ol narapela wok painimaut i soim olsem ol sikman em ol man i mekim gut bel bilong ol, ol i no wari na tingting planti na ol i no pilim bikpela pen, winim ol sikman em i no gat wanpela i mekim gut bel bilong ol.

Tingim narapela wok painimaut long pasin bilong ting olsem ol samting bai kamap gut na pasin bilong ting olsem ol samting i no inap kamap gut, dispela inap mekim wanem long ol man i gat sik bilong klok (CHD). Ol i bin askim 1,300 man long tingting ol i gat long pasin bilong ting olsem ol samting bai kamap gut na pasin bilong ting olsem ol samting i no inap kamap gut. Tenpela yia bihain ol i skelim gen ol dispela man na 12 pesen bilong ol i bin kisim sik bilong klok. Planti bilong ol dispela man i kisim sik bilong klok em ol man husat i gat pasin bilong ting olsem ol samting i no inap kamap gut. Laura Kubzansky, em profesa bilong helt long Harvard School of Public Health, i tok: “Planti samting i soim olsem dispela tingting olsem man i mas ting olsem ol gutpela samting bai kamap gut, dispela inap helpim helt bilong man, em i no tingting bilong saiens—dispela wok painimaut ol i mekim long dispela 1,300 man i kamapim klia olsem pasin bilong ting olsem ol samting bai kamap gut, dispela i gutpela bilong helpim klok bilong man.”

Sampela wok painimaut i soim olsem ol man husat i bilip olsem helt bilong ol i gutpela, ol i kamap orait bihain long operesen, tasol lain husat i bilip olsem helt bilong ol i no gutpela, ol i no kamap orait kwik. Ol wok painimaut i kamapim tu olsem ol man i gat pasin bilong ting olsem gutpela samting bai kamap, ol i save stap longpela taim. Wanpela wok painimaut i skelim pasin bilong ting ol samting bai kamap gut na pasin bilong ting ol samting i no inap kamap gut i mekim sampela samting long ol lapun. Taim ol man i soim sampela tok long ol lapun we i tok olsem ol lapun i gat savetingting na ol i gat save long planti samting, dispela i givim strong long ol long wokabaut. Strong ol i kisim long harim dispela tok i wankain long strong man i kisim long eksasais inap 12-pela wik!

Wai na i luk olsem pasin bilong bilip olsem gutpela samting bai kamap na holim stretpela tingting i helpim helt bilong man? Ating ol saientis na ol dokta i no kliagut yet long tingting na bodi bilong man na bai ol i ken bekim stret dispela askim. Tasol ol saveman husat i skelim dispela topik ol i gat sampela save tasol long dispela na ol inap bekim dispela askim. Olsem, wanpela speselis dokta bilong kru i tok: “I gutpela long stap amamas na wetim gutpela samting i kamap. Taim man i stap amamas em i no inap pilim presa tumas, na bodi bilong em i stap gut. Em wanpela samting ol man i ken mekim bilong stap helti.”

Ating dispela tingting i nupela long ol dokta na ol saientis, tasol em i no nupela long man i save ritim Baibel. Winim 3,000 yia i go pinis, holi spirit i givim tingting long saveman King Solomon long raitim dispela tok: “Bel i save stap amamas, em i gutpela bilong oraitim man, tasol sapos bel na tingting bilong man i bagarap, dispela i save pinisim strong bilong em.” (Provep 17:22, futnot) Dispela tok i stret. Dispela ves i no tok olsem bel i stap amamas bai oraitim sik, nogat, tasol “em i gutpela bilong oraitim man.”

Sapos pasin bilong bilip olsem yu bai kamap orait em i olsem marasin, ating olgeta dokta bai givim long ol sikman, a? Tasol pasin bilong bilip long ol gutpela samting bai kamap dispela i no helpim tasol helt bilong man, nogat.

Bilip Olsem Ol Samting Bai Kamap Gut, Ting Olsem Ol Samting i No Inap Kamap Gut, na Laip Bilong Yu

Ol saveman i painimaut olsem ol man i bilip olsem ol samting bai kamap gut dispela i save helpim ol. Ol i save mekim gut ol skul wok, mekim gut wok, na pilai gut ol spot. Olsem, ol i mekim wanpela wok painimaut long tim bilong ol meri i save ran long resis. Na ol kosa i skelim gut ol wan wan meri long hau ol inap ron gut long resis. Long seim taim, ol i askim ol meri sapos ol i ting ol bai winim resis o nogat. Ol samting i kamap i soim olsem ol meri i ran inap tru long mak ol i tingim, na i no long mak em ol kosa i ting long en. Bilong wanem pasin bilong bilip olsem ol bai win i stiaim ol?

Ol saientis i skelim ol man i gat pasin bilong ting ol samting i no inap kamap gut, na ol i kisim save long planti samting. Namel long 1960 samting, ol saveman i skelim ol animal na ol i painimaut wanpela pasin bilong ol, na dispela i kirapim ol long kamapim wanpela hap tok olsem, “kisim pasin bilong givap.” Ol i kisim save olsem ol man tu inap kisim kain pasin olsem. Olsem, ol i putim sampela manmeri insait long wanpela rum we i gat nois na ol i tokim ol olsem ol inap stopim nois sapos ol i presim ol rait baten. Na ol i mekim olsem na stopim dispela nois.

Long namba 2 grup, ol i tokim ol tu long mekim wankain samting—tasol maski ol i presim ol baten ol i no inap long stopim nois. Planti namel long dispela grup i givap. Taim ol i skelim ol gen, dispela lain i no laik mekim wanpela samting. Ol i ting olsem i no gat wanpela samting ol inap mekim bilong senisim ol samting. Na tu insait long namba 2 grup ol manmeri i gat pasin bilong ting ol samting bai kamap gut ol i no givap, ol i traim yet long mekim ol samting.

Dokta Martin Seligman, tu i bin helpim ol dispela wok painimaut, na dispela i kirapim em long skelim pasin bilong ting olsem ol samting bai kamap gut na pasin bilong ting olsem ol samting bai i no inap kamap gut. Em i skelim gut ol manmeri i gat tingting olsem ol i no inap mekim wanpela samting. Em i tok ol man i gat kain tingting olsem, dispela i mekim na i hatwok long ol i mekim ol samting o i pasim ol long mekim ol samting. Seligman i stori long ol man i gat kain tingting olsem ol samting bai i no inap kamap gut na em i tok: “Inap 25 yia mi skelim ol na mi luksave olsem ol man i gat kain tingting olsem, ol i bilip olsem ol samting nogut i painim ol em asua bilong ol yet na ol samting nogut bai wok yet long painim ol, maski ol i mekim wanem samting. Mi bilip olsem ol man i gat pasin bilong ting olsem ol samting bai i no kamap gut, planti samting nogut i save painim ol winim ol man i gat pasin bilong ting olsem ol samting bai kamap gut.”

Olsem yumi stori pinis, sampela man bai ting olsem dispela tingting em i nupela, tasol ol man i save ritim Baibel ol i save pinis long dispela samting. Tingim dispela savetok: “Sapos yu bel hevi long taim pen na hevi i painim yu, strong bilong yu bai pinis.” (Provep 24:10) Tru tumas, Baibel i kamapim klia olsem pasin bilong bel hevi, na tingting olsem yumi no inap mekim wanpela samting, dispela bai pinisim strong bilong yumi. Yu ken mekim wanem na bai yu sakim dispela tingting olsem ol samting i no inap kamap gut na kisim tingting olsem ol samting bai kamap gut na kisim pasin bilong bilip na wet?

[Piksa]

Pasin bilong bilip na wet inap helpim yu

Yu Inap Daunim Pasin Bilong Ting Ol Samting No Inap Kamap Gut

TAIM wanpela hevi i painim yu, yu save mekim wanem? Planti saveman i bilip olsem bekim bilong dispela askim i kamapim klia olsem yu gat pasin bilong ting olsem ol samting bai kamap gut o yu gat pasin bilong ting olsem ol samting i no inap kamap gut. Yumi olgeta i save bungim ol hevi, sampela i karim planti hevi moa. Bilong wanem sampela i no givap maski ol i karim bikpela hevi, tasol sampela i gat ol liklik hevi ol i save givap?

Tingim olsem yu wok long painim wok. Yu go long wanpela intaviu tasol ol i no kisim yu long wok. Yu pilim olsem wanem long dispela? Ating yu pilim olsem ol i no laikim yu na yu tingim dispela olsem em wanpela hevi yu bai karim oltaim, na yu tokim yu yet olsem, ‘No gat wanpela bai kisim kain man olsem mi long wok. Mi no inap painim wanpela wok.’ Samting i nogut moa em, yu inap larim dispela wanpela hevi i stiaim tingting bilong yu long olgeta samting long laip bilong yu, na yu ting olsem ‘Mi no inap mekim wanpela samting. Mi yusles.’ Ol dispela kain tingting i as bilong pasin bilong ting olsem ol samting i no inap kamap gut.

Sakim Pasin Bilong Ting Olsem Ol Samting i No Inap Kamap Gut

Hau bai yu inap daunim dispela pasin? Namba 1 samting, yu mas luksave long ol kain tingting i no stret. Na yu mas wok strong long daunim ol dispela tingting. Traim long skelim wanem ol samting i mekim na yu no kisim wok. Olsem, tru tru ol i no kisim yu long wok bikos ol i no laikim yu? O ating bos i no kisim yu long wok, long wanem, em i laikim wanpela i gat narapela save long dispela wok?

Sapos yu tingim ol samting we i tru, dispela bai helpim yu long luksave olsem tingting i no stret yu holim, em giaman. Sapos yu traim wanpela samting na i no kamap gut, yu ting dispela i makim olsem yu no inap mekim gut olgeta samting? O yu inap tingim sampela samting we yu mekim gut—olsem ol samting yu mekim bilong pas gut wantaim God, famili bilong yu, o ol narapela? Yu mas tingim olsem long olgeta samting yu mekim, i no olgeta bai kamap nogut. Olsem, yu save tru tru olsem yu no inap painim wanpela wok? I gat planti samting yu inap mekim bilong sakim ol tingting i no stret.

Holim Stretpela Tingting Long Ol Samting Yu Inap Mekim

Long sampela yia i go pinis, ol saveman i kamapim liklik hap mining bilong dispela pasin bilong bilip na wet. Ol i tok olsem pasin bilong bilip na wet i makim olsem yu inap winim ol mak yu putim. Neks atikol bai stori gut olsem i gat planti samting moa i insait long pasin bilong bilip na wet, tasol hap mining ol saveman i tok long en i stret long sampela rot tu. Tasol tok ol saveman i mekim inap helpim yu long holim stretpela tingting long ol samting yu inap mekim.

Bilong winim ol mak yumi putim bilong winim long bihain, yumi mas i gat pasin bilong putim ol mak na wok long winim. Sapos yu ting yu no gat dispela pasin, orait i gutpela long tingim gut ol mak yu laik winim. Namba 1, yu gat sampela mak yu laik winim? Em i isi long yu bisi long ol samting yu save mekim long olgeta de, na yu no lusim haptaim long tingim wanem ol samting tru i bikpela samting long yu. Baibel i stori long dispela stiatok bilong helpim yu long putim wanem samting i mas stap nambawan, na em i tok: “Skelim gut wanem ol samting i bikpela samting moa.”—Filipai 1:10.

Taim yumi kliagut long wanem samting i bikpela samting long laip bilong yumi, em i isi moa long putim ol mak yumi laik winim long sait bilong lotuim God, pas gut wantaim famili, na ol narapela samting. Yumi no ken putim planti mak pastaim, na tingting long winim olgeta wan wan mak. Sapos yumi hatwok long winim wanpela mak, dispela bai mekim yumi bel hevi, na ating yumi bai givap. Olsem na ol bikpela mak yumi laik winim, i gutpela long brukim i go liklik liklik, we yumi inap winim insait long sotpela haptaim.

Sapos man i tingting strong long mekim wanpela samting, em bai painim rot bilong mekim. Taim yumi tingim pinis ol bikpela mak yumi laik winim, yumi mas tingting strong o i gat strongpela laik long winim. Sapos yumi tingim ol gutpela samting bai kamap long ol dispela mak, yumi bai wok strong long winim. Tru bai i gat ol hevi, tasol yumi mas tingim ol dispela hevi olsem ol samting yumi inap winim, na yumi no ken givap.

Tasol yumi mas tingim tu ol rot we yumi inap winim ol mak yumi putim. Saveman C. R. Snyder, i mekim wok painimaut long olsem wanem em i bikpela samting long yumi mas i gat pasin bilong bilip na wet, na em i tok man i mas tingim kain kain rot bilong winim ol mak em i putim. Na sapos wanpela rot i no wok, orait em i ken traim narapela rot.

Snyder i tok tu olsem sampela taim yumi ken senisim ol mak yumi putim. Sapos yumi no inap winim wanpela mak yumi putim, na yumi tingting planti long en dispela bai mekim yumi bel hevi. Tasol sapos yumi senisim na putim narapela mak em yumi inap winim, dispela bai mekim na yumi bilip olsem i gat gutpela samting yumi inap wet long en.

Baibel i stori long wanpela gutpela eksampel bilong dispela. King Devit i putim mak long wokim tempel bilong God bilong em, Jehova. Tasol God i tokim Devit olsem pikinini man bilong em Solomon bai mekim dispela wok. Devit i no bel hevi o strong long mekim dispela wok, nogat, em i senisim mak em i putim. Em i yusim strong bilong em long bungim mani na ol samting em pikinini man bilong em bai nidim bilong wokim dispela tempel.—1 King 8:17-19; 1 Stori 29:3-7.

Maski sapos yumi gat stretpela tingting na yumi gat pasin bilong ting olsem ol samting bai kamap gut, ating bai yumi hatwok yet long bilip olsem gutpela samting bai kamap. Bilong wanem i olsem? Long wanem, yumi no gat strong long stretim olgeta hevi we i mekim na ol manmeri i no gat gutpela samting long bilip na wet long en. Taim yumi tingim ol hevi i save painim ol man—stap rabis, woa, pasin i no fea, sik na dai—olsem wanem yumi inap holimpas pasin bilong yumi long bilip na wet?

[Piksa]

Sapos ol i no kisim yu long wanpela wok, yu ting olsem yu no inap painim wanpela wok?

[Piksa]

King Devit i redi long senisim mak em i putim

Husat i As Bilong Ol Gutpela Samting Yu Wetim?

PIKSAIM olsem hanwas bilong yu i bruk na i no wok moa. Bilong stretim, yu mas wokim disisen long wanem hap yu bai kisim i go long en. I gat planti edvetaismen bilong ol hap bilong stretim ol hanwas, na olgeta i tok ol inap stretim gut hanwas, tasol tok bilong sampela i pait wantaim. Tasol olsem wanem sapos yu painimaut olsem neiba bilong yu em dispela saveman i bin disainim dispela kain hanwas sampela yia i go pinis? Na tu, yu kisim save olsem em i amamas long helpim yu, na yu no inap baim. Ating yu luksave long husat yu bai go long en, a?

Orait skelim dispela hanwas wantaim pasin bilong yu long bilip na wetim ol gutpela samting. Sapos yu lukim olsem pasin bilong yu long bilip na wet i no strong moa—olsem planti man long dispela taim bilong hevi—bai yu go long husat bilong kisim helpim? Planti man i tok ol inap long stretim hevi, tasol ol i save kamapim kain kain tingting i pait wantaim na inap mekim yu paul. So i gutpela moa long yumi go long Man husat i wokim yumi na givim yumi pasin bilong bilip na wetim ol gutpela samting. Baibel i tok olsem “em i no stap longwe long yumi olgeta wan wan” na em i laik tru long helpim yumi.—Aposel 17:27; 1 Pita 5:7.

Pasin Bilong Bilip na Wet i Gat Bikpela Mining Moa

Long Baibel pasin bilong bilip na wet i gat bikpela mining moa winim mining em ol dokta, saientis, na ol dokta bilong tingting i kamapim. Tok Hibru na tok Grik bilong pastaim em ol i yusim long Baibel, ol i tanim dispela hap tok “pasin bilong bilip na wet” olsem amamas long wet na wetim gutpela samting bai kamap. Dispela pasin bilong bilip na wet i gat tupela hap bilong en. Em i makim pasin bilong laik tru long kisim gutpela samting, na tu, i gat as na yu bilip olsem gutpela samting bai kamap. Pasin bilong bilip na wet em Baibel i stori long en i no makim olsem yu wis wanpela samting i kamap, nogat. Pasin bilong bilip na wet em Baibel i stori long en i gat as tru bilong en na ol samting yu bilip long en em i samting tru.

Pasin bilong wetim gutpela samting i wankain long pasin bilong bilip, olsem ol samting yu bilip long en em i samting tru—i no bilip nating tasol. (Hibru 11:1) Tasol Baibel i kamapim klia olsem dispela tupela pasin i narapela narapela.—1 Korin 13:13.

Yumi ken tok piksa olsem: Taim yu askim wanpela gutpela pren long helpim yu, yu bilip olsem em bai mekim olsem. I gat as na yu bilip long em, long wanem, yu trastim em—yu save gut long em, na yu lukim em i bin helpim yu na givim ol samting long yu. Pasin bilong yu long bilip na pasin bilong wetim gutpela samting i klostu wankain, tasol dispela tupela pasin i narapela narapela. Olsem wanem yu ken i gat kain bilip long God?

As Bilong Pasin Bilong Bilip na Wet

God i as tru bilong pasin bilong bilip na wet. Long taim bilong ol man i raitim Baibel, ol i kolim Jehova olsem “Man ol Israel i bilip na wetim.” (Jeremaia 14:8) Pasin bilong bilip na wet em lain bilong God i gat i kam long em; olsem na em i as bilong ol samting ol i wetim. Dispela kain pasin i no olsem ol i laik tasol long kisim wanpela samting, nogat. Pasin bilong bilip na wet em samting tru, long wanem, ol inap trastim tru God. Insait long planti handret yia, ol tok promis em i mekim long ol, oltaim em i save truim ol dispela tok promis. Hetman bilong ol, Josua, i tokim ol Israel: “Yupela i save pinis olsem i no gat wanpela tok bilong ol gutpela tok promis em Jehova, God bilong yupela, i bin autim i popaia.”—Josua 23:14.

Planti tausen yia bihain, God i save truim yet ol tok promis bilong em. Baibel i pulap long ol tok promis bilong em, na i stori tu long olsem wanem ol dispela tok promis i bin kamap tru. Ol man inap bilip tru long ol tok profet bilong em, long wanem, long taim ol i raitim, ol i bin raitim long pasin we i olsem ol dispela tok profet i bin kamap pinis.

Olsem na yumi ken tok Baibel em buk i stori long pasin bilong bilip na wetim ol gutpela samting. Taim yu stadi long ol samting God i mekim long ol man, bai i gat planti risen na pasin bilong yu long bilip na wet long em bai kamap strong moa. Aposel Pol i tok: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.”—Rom 15:4.God i Tok Promis Long Givim Ol Gutpela Samting Yumi Wetim

Long wanem taim yumi nidim tru pasin bilong bilip na wet? Ating em long taim wanpela i dai, a? Long planti man, long kain taim olsem—taim wanpela ol i laikim em i dai—ol i pilim olsem i no gat gutpela samting bilong bilip na wet long en. Dai em samting yumi no gat strong bilong winim. Em bai painim yumi olgeta wan wan. Yumi pilim olsem bikos i no gat man inap abrusim dai, na yumi no inap kisim bek ol famili bilong yumi i dai pinis. Olsem na i stret Baibel i kolim dai olsem “laspela birua.”—1 Korin 15:26.

Wanem gutpela samting bai painim ol man i dai pinis? Dispela ves bilong Baibel we i kolim dai olsem laspela birua, em i tok tu olsem God bai “pinisim” dispela birua olgeta. Jehova God i gat bikpela strong moa winim dai. Planti taim em i kamapim klia dispela. Long wanem rot em bin mekim olsem? Long rot bilong kirapim bek ol man i dai pinis. Baibel i stori long 9-pela kirap bek we God i bin yusim strong bilong em long kirapim bek ol man i dai pinis.

Olsem, Jehova i givim strong long Pikinini bilong em, Jisas, long kirapim bek gutpela pren bilong em Lasarus i bin dai inap 4-pela de. Jisas i no mekim olsem long ples hait, nogat, em i kirapim bek Lasarus long ai bilong planti man.—Jon 11:38-48, 53; 12:9, 10.

Ating yu laik save, ‘Wai na ol i kirapim bek ol manmeri i dai pinis? Ol dispela manmeri i bin go lapun na bihain ol i dai gen.’ Em tru. Tasol tok Baibel i mekim long kirap bek, kain olsem bilong Lasarus, dispela i kamapim as na yumi ken bilip olsem ol man i dai pinis ol bai kirap bek. Olsem na i gat as tru long yumi bilip na wetim gutpela samting.

Jisas i tok: “Kirap bek em mi yet na laip em mi yet.” (Jon 11:25) Em i dispela Man em Jehova bai givim strong long em long kirapim bek ol man i dai long olgeta hap. Jisas i tok: “Taim i laik kamap na olgeta man i stap long matmat ol bai harim nek bilong [Krais] na kam ausait.” (Jon 5:28, 29) Yes, ol man i stap long matmat ol bai kirap bek long paradais long graun.

Profet Aisaia i stori long kirap bek olsem: “Ol daiman bilong yu bai stap laip. Bodi bilong ol manmeri bilong mi i dai pinis bai kirap sanap. Kirap na singaut amamas, yupela ol manmeri i stap long das! Bikos wara bilong nait bilong yu i olsem wara bilong nait i save kamap long moningtaim, na graun bai larim ol daiman i no gat strong, i kisim laip gen.”—Aisaia 26:19.

Dispela tok i mekim isi bel bilong yumi, a? Ol man i dai ol i stap long ples i seif, wankain olsem wanpela bebi i stap seif long bel bilong mama. Tru tumas, ol man i stap long matmat ol i stap gut long tingting bilong God i Gat Olgeta Strong. (Luk 20:37, 38) Na klostu nau ol bai kirap bek long nupela taim we famili bilong ol bai amamas long welkamim ol, wankain olsem nupela bebi i bon na famili bilong em i amamas long lukim em! So i gat gutpela samting i wetim ol man i dai pinis.

Pasin Bilong Bilip na Wet Inap Mekim Wanem Long Yu?

Pol i skulim yumi long pasin bilong bilip na wet. Em i tok pasin bilong bilip na wet em i bikpela hap bilong klos pait bilong yumi—em hat kapa. (1 Tesalonaika 5:8) Wanem mining bilong tok bilong em? Long taim bilong ol man i raitim Baibel, soldia i save putim hat kapa bilong i go long pait, planti taim em i putim hat kapa antap long narapela hat ol i wokim long skin bilong animal o gras bilong sipsip. Dispela hat kapa i lukautim soldia, na taim ol i sut long het bilong em, em i no kisim bagarap. Wanem poin bilong tok bilong Pol? Wankain olsem hat kapa i save lukautim het bilong soldia, pasin bilong bilip na wet i save lukautim tingting bilong yumi. Sapos pasin bilong yu long bilip na wet i strong na i stret wantaim ol samting God i tingting pinis long mekim, tingting bilong yu bai i stap isi taim hevi i bungim yu, na yu no inap wari na tingting planti. Yumi olgeta i nidim dispela hat kapa.

Pol i stori long narapela tok piksa long pasin bilong bilip na wet wantaim laik bilong God. Em i tok: “Dispela samting yumi bilip na wet long en i stap olsem anka bilong laip bilong yumi. Em i stap strong na i no inap surik liklik.” (Hibru 6:19) Pol i bin abrusim bagarap planti taim long taim sip i kisim bagarap, olsem na em i save olsem anka em bikpela samting. Long taim bilong strongpela win na ren, ol boskru i save tromoi anka bilong sip i go daun. Sapos anka i pas strong long as bilong solwara, em bai holim strong sip na bikpela win na ren i no inap sakim sip i go pas long ol ston na bruk.

Olsem tasol, sapos pasin bilong yumi long bilip na wet long ol tok promis bilong God “i stap strong na i no inap surik liklik,” dispela bai helpim yumi long karim ol hevi. Jehova i tok promis olsem wanpela taim bai kamap klostu nau we bai i no gat woa, pasin nogut, pasin bilong bel hevi, na dai tu. (Lukim blok long pes 10.) Taim yumi holim strong pasin bilong bilip na wetim ol gutpela samting, dispela bai stiaim yumi long stap longwe long ol samting inap bagarapim yumi, na dispela bai strongim yumi long bihainim ol tok bilong God, na yumi no bihainim pasin bilong ol man bilong dispela graun.

Jehova i tok promis long givim ol gutpela samting em yu tu i ken wet long en. Em i laik bai yu kisim dispela laip em i bin tingting pinis long kamapim. Em i laik “kisim bek olgeta kain man.” Olsem wanem em bai mekim olsem? Pastaim, olgeta man i mas “kisim stretpela save long tok i tru.” (1 Timoti 2:4) Lain i wokim dispela magasin i laik kirapim yu long kisim save long tok i tru bilong God long Baibel we bai givim yu laip. Ol gutpela samting em God i tok promis long en em yu wetim, dispela i winim ol samting em dispela graun i givim.

Taim yu wetim ol gutpela samting God i tok promis long en, yu no ken givap, long wanem, God bai givim yu strong long winim ol mak yu putim we i stret wantaim laik bilong em. (2 Korin 4:7; Filipai 4:13) Yumi olgeta i nidim gutpela samting em yumi ken bilip na wet long en. So sapos yu wok long painim ol gutpela samting em yu ken bilip na wet long en, yu ken bilip tru olsem yu bai painim!

[Blok/Piksa]

As na Yumi Wetim Ol Gutpela Samting

Ol dispela Skripsa inap strongim yu long bilip na wetim ol gutpela samting:

◼ God i tok promis long ol gutpela samting bai kamap bihain.

Tok Bilong Em i tok olsem paradais bai kamap long olgeta hap bilong graun na ol man bai amamas na stap wanbel long en.—Buk Song 37:11, 29; Aisaia 25:8; Revelesen 21:3, 4.

◼ God i no save giaman.

Em i no laikim tru olgeta kain pasin bilong tok giaman. Jehova i holi tru, so em i no inap tru long tok giaman.—Provep 6:16-19; Aisaia 6:2, 3; Taitus 1:2; Hibru 6:18.

◼ God i gat olgeta strong.

Jehova wanpela tasol i gat olgeta strong. No gat wanpela samting long yunives inap pasim em long truim ol tok promis bilong em.—Kisim Bek 15:11; Aisaia 40:25, 26.

◼ God i laik bai yu stap oltaim oltaim.

—Jon 3:16; 1 Timoti 2:3, 4.

◼ God i laik bai yumi stap gut.

Em i no laik lukluk long ol popaia na pasin kranki bilong yumi, nogat, em i lukluk long ol gutpela pasin na ol wok yumi mekim. (Buk Song 103:12-14; 130:3; Hibru 6:10) Em i laik bai yumi mekim ol samting i stret na em i amamas taim yumi mekim olsem.—Provep 27:11.

◼ God i tok promis long helpim yu long winim ol mak i stret wantaim laik bilong em.

Ol wokman bilong em i no inap pilim olsem ol i no gat helpim. God i givim holi spirit, em bikpela strong bilong em, long helpim yumi.—Filipai 4:13.

◼ Taim yumi bilip na wet long God, yumi no inap bel hevi.

Yu ken trastim tru God. Em i no inap lusim yu.—Buk Song 25:3.

[Piksa]

Wankain olsem hat kapa i lukautim het, pasin bilong bilip na wet i lukautim tingting

[Piksa]

Wankain olsem anka, pasin bilong bilip na wet bai strongim yumi

[Credit Line]

Courtesy René Seindal/Su concessione del Museo Archeologico Regionale A. Salinas di Palermo