Askim
Wanem dispela “malolo” Hibru 4:9-11 i toktok long en? Na yumi mas mekim wanem bilong “i go insait long dispela ples malolo”?
Aposel Pol i tokim ol Kristen Hibru i bin stap long taim bilong ol aposel olsem: “Ol manmeri bilong God bai i gat malolo i stap yet, em i olsem malolo bilong de Sabat. Na yumi save, man i go insait long ples malolo bilong God, em i pinisim wok bilong en na i malolo, olsem bipo God i pinisim wok bilong em yet na i malolo. Orait yumi mas wok strong bilong i go insait long dispela ples malolo.”—Hibru 4:9-11.
Taim Pol i toktok long God i pinisim wok bilong Em na i malolo, em i tingim dispela tok bilong Stat 2:2: “Long de namba 7 God i lukim olgeta wok bilong en i pinis, na em i malolo long dispela de.” Bilong wanem Jehova ‘i malolo long de namba 7’? I no olsem “olgeta wok bilong en i pinis” na nau em i mas malolo na kisim bek strong bilong em, nogat. Ves i kam bihain long dispela i givim tingting long yumi. Em i tok: “God i tambuim de namba 7 na em i tok . . . em i bikpela de bilong em yet, long wanem, em i wokim pinis olgeta samting na long dispela de em i malolo.”—Stat 2:3; Aisaia 40:26, 28.
“De namba 7” em i narapela kain long ol 6-pela de i go pas, long wanem, em i bikpela de bilong God yet—i olsem em i makim, o dediketim, dispela de bilong kamapim wanpela bikpela laik bilong em. Wanem dispela laik? Paslain long dispela taim, God i bin tokaut long laik bilong em, em i gat wanem laik long ol manmeri na graun. Em i tokim namba wan man na meri: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.” (Stat 1:28) Tru, God i bin wokim namba wan man na meri i gutpela olgeta na graun tu i gutpela, tasol bilong laik bilong God i ken kamap na graun olgeta i kamap wanpela paradais i gat ol man na meri i gutpela olgeta i stap long en, bikpela hap taim i mas lus. Olsem na long “de namba 7,” God i malolo, olsem lusim wok bilong em long wokim ol samting long graun, bambai ol samting em i wokim pinis i ken wok long kamap stret wantaim laik bilong em. Long pinis bilong “de namba 7,” olgeta samting God i gat laik long mekim bai kamap tru. Orait dispela malolo i bilong hamas yia?
Yumi ken tingim gen tok bilong Pol long Buk Hibru. Em i tok “ol manmeri bilong God bai i gat malolo i stap yet,” na em i tokim ol wanlain Kristen long ol i mas wok strong bambai ol inap “i go insait long dispela ples malolo.” Dispela i soim olsem taim Pol i raitim dispela tok, dispela “de namba 7” bilong malolo bilong God—em i bin kirap olsem 4,000 yia paslain long taim bilong Pol—em i wok i go yet. Em bai pinis long taim laik bilong God long ol manmeri na graun i kamap tru olgeta long pinis bilong Taim Bilong Wan Tausen Yia Bilong Jisas Krais i Stap King, em dispela man bilong “bosim de Sabat.”—Matyu 12:8; KTH 20:1-6; 21:1-4.
Pol i tingim dispela gutpela samting bai kamap na em i stori long olsem wanem man inap i go insait long malolo bilong God. Em i tok: “Man i go insait long ples malolo bilong God, em i pinisim wok bilong en na i malolo.” Dispela i soim olsem, maski namba wan man na meri i gutpela olgeta, ol manmeri bilong dispela graun ol i no bin i go insait long malolo bilong God. Dispela i olsem, long wanem, Adam tupela Iv i no stap longpela taim insait long malolo bilong God long “de namba 7”—ol i no laik bihainim pasin God i putim bilong stiaim ol. Ol i bikhet na ol i laik bosim wokabaut bilong ol yet. Ol i bihainim laik bilong Satan—ol i no laik bai God i soim gutpela rot long ol. (Stat 2:15-17) Olsem na ol i no inap tingting moa long kisim laip oltaim long Paradais long graun. Kirap long dispela taim na i go, olgeta manmeri i bin stap kalabus long sin na dai.—Rom 5:12, 14.
Tasol pasin bikhet bilong Adam na Iv i no pasim laik bilong God. De malolo bilong em i stap yet. Tasol long gutpela pasin sori, Jehova i wokim rot bilong baim bek ol man long ofa bilong Pikinini bilong em, Jisas Krais, na bai ol man i bilip long en i ken lusim kalabus bilong sin na dai. (Rom 6:23) Olsem na Pol i tokim ol wanlain Kristen long ol i mas ‘pinisim wok bilong ol na malolo.’ Ol i mas bilip long samting God i putim bilong kisim bek ol na ol i no ken traim long bosim wokabaut bilong ol yet, olsem Adam tupela Iv i bin mekim. Na tu, ol i no ken traim long kamap stretpela man long ol wok bilong ol yet.
Taim yumi lusim ol wok bilong helpim yumi yet tasol bambai yumi inap bihainim laik bilong God, dispela i save givim nupela strong na gutpela malolo long yumi. Jisas i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man . . . na samting mi givim yupela bilong karim, em i no hevi.” —Matyu 11:28-30.
Ol tok Pol i mekim long malolo bilong God na olsem wanem ol man inap i go insait long dispela malolo, dispela i bin strongim tru bel bilong ol Kristen Hibru long Jerusalem, em ol i bin holimpas bilip bilong ol na long dispela as ol lain i bin tok bilas na mekim nogut tru long ol. (Aposel 8:1; 12:1-5) Na olsem tasol, tok bilong Pol inap strongim tru bel bilong ol Kristen long nau. Yumi save olsem klostu nau God bai truim tok promis bilong em na kamapim Paradais long graun, aninit long stretpela Kingdom bilong em. Olsem na yumi tu i mas lusim ol wok bilong yumi yet na wok strong bambai yumi inap i go insait long dispela malolo.—Matyu 6:10, 33; 2 Pita 3:13.
[Ol Piksa long pes 31]
Long pinis bilong de malolo bilong God, bai i gat Paradais long graun olsem God i tok promis pinis