Ol Samting Jehova i Wokim i Nambawan Tru

‘Ol Samting Bilong Solwara Ol Bai Kisim Planti Mani Long En’

LONG taim san i go daun, liklik kol win i meknaisim solwara na i sakim solwara isi isi i go long nambis. Gutpela pairap bilong solwara i bruk i kam long nambis, dispela i pulim planti man husat i save go sindaun long nambis bilong kisim malolo na stap isi.a

Long planti hap bilong graun kain nambis olsem i go longwe tru inap planti tausen kilomita. Ol mak bilong ol nambis i save senis senis na ol i makim pinis bilong hap bilong solwara. Man Bilong Wokim ol samting i bin wokim olsem. Em i tok long em yet taim em i tokaut olsem: “Mi bin putim nambis olsem mak bilong solwara.” Em i tok moa: “Maski biksi i kamap na i pairap strong, em i no inap abrusim dispela mak.”​—⁠Jeremaia 5:22; Jop 38:8; Song 33:⁠7.

Graun bilong yumi em i pulap long wara, i no gat narapela planet i olsem. Bikpela hap bilong graun olsem 70 pesen em wara i karamapim. Taim Jehova i wok long redim graun bilong ol man i ken stap long en, em i tok: “Wara i stap aninit long skai i mas i go bung long wanpela hap tasol, bai ples drai i kamap.” Taim em i mekim olsem, em nau “ples drai i kamap.” Baibel i tok moa: “Dispela ples drai God i kolim ‘Graun.’ Na ol wara i bung pinis long wanpela hap em i kolim ‘Solwara.’ God i lukim olgeta dispela samting i gutpela, na em i amamas.” (Stat 1:​9, 10) Dispela ol biksolwara i stap na i kamapim wanem ol samting?

Long ol narapela narapela kain rot, God i wokim wara long biksolwara bilong helpim ol samting long i stap laip. Olsem: Wara i gat strong bilong holim hat bilong san. Olsem na biksolwara i save holim hat bilong san, na dispela i mekim na long taim bilong kol i no kol nogut tru.

I gat narapela samting wara i save mekim bilong helpim ol samting long i stap laip. Wara i save brukim, daunim na pinisim wantu ol samting i stap long en. Bilong helpim ol samting i gat laip i kamap, i gat kain kain marasin olsem kemikal i mas bung wantaim, na i mas i gat wara bilong helpim dispela wok na bungim ol liklik samting olsem molekiul. Ol i kisim save olsem planti bilong ol dispela kemikal, em ol i stap insait long skin o mit bilong ol samting i stap laip, i gat wara long en. Buk The Sea, i tok: “Olgeta kain samting i gat laip i mas kisim wara​—⁠dispela wara i mas kam long wara bilong biksolwara, ol diwai samting na ol animal long graun, ol tu i save kisim dispela wara.”

Ol biksolwara i mekim bikpela wok tu bilong klinim win. Ol liklik liklik samting i kain olsem gras i save pulim win kabon daioksait na rausim win oksijen. Wanpela man bilong mekim wok painimaut i tok, “70 pesen bilong win oksijen em ol samting bilong graun i save kisim long olgeta yia, em i kam long ol dispela liklik liklik gras samting bilong solwara.”

Na tu, ol samting bilong biksolwara i save kamapim ol marasin bilong daunim sampela sik. Inap planti handet yia pinis ol i bin mekim wok long sampela samting ol i kisim long pis na yusim olsem marasin. Inap longtaim pinis ol i mekim wok long marasin cod-liver oil. I no longtaim i go pinis, ol i yusim marasin em ol i kisim long pis na long ol narapela samting bilong solwara bilong daunim sik sotwin na daunim ol kain kain binatang jem na sik kensa.

Ol i bin wok long makim pe bilong ol samting yumi kisim long ol dispela samting bilong biksolwara. Ol i no inap makim pe stret bilong ol dispela samting, tasol ol man i mekim wok painimaut i ting sapos yumi brukim olgeta samting yumi kisim long graun olgeta long 3-pela hap, orait tupela hap i kam long ol biksolwara. Dispela i kamapim klia tru olsem i gat as na God i wokim ol solwara​—⁠bilong lukautim na helpim ol samting long i stap laip. Em i stret tru long tok Baibel i kolim, olsem ‘ol samting bilong solwara ol bai kisim planti mani long en’!​—⁠Lo 33:⁠19.

Jehova i kisim biknem olsem Bikpela Man Bilong Tingim na Wokim ol samting i nambawan tru. Dispela i kirapim Nehemia long mekim dispela tok bilong litimapim nem bilong God: “Yu wanpela tasol yu Bikpela. Yu bin wokim heven na . . . solwara na olgeta samting i stap long ol. Na yu save givim laip long olgeta samting.”​—⁠Nehemia 9:⁠6.

[Futnot]

[Blok/Ol Piksa long pes 9]

Wara, Win, na Biksi i Bruk

Solwara na win i kamapim ol biksi i save bruk i kam pairap strong tru antap long ol ston long nambis, olsem dispela long California, long Amerika. Biksi i save bruk i kam long solwara em i wanpela gutpela samting long biksolwara, em i kamapim bikpela strong. Ol i narapela kain samting i kirapim yumi long tingim tu bikpela strong bilong Man Bilong Wokim ol samting. Jehova em man i wokim “biksi i kamap long solwara, em i save wokabaut antap long en.” “Long strong na gutpela save bilong em yet, God i bin . . . mekim biksi i stap isi.” (Jop 9:8; 26:12) Tru tumas, “strong bilong pairap bilong solwara em i liklik tasol. Tasol strong bilong yu em i bikpela tru. Biksi i save bruk na pairap strong long nambis, tasol strong bilong biksi em i no inap wantaim strong bilong yu.”​—⁠Song 93:⁠4.

Katim Ol Piksa Long Wesan

Sampela taim ol nambis i kamap olsem hap bilong wokim ol naispela piksa ol i katim long wesan, olsem ol maunten wesan long nambis bilong Namibia, long sauten Afrika, yu lukim hia. Win i gat strong bilong surikim ol samting na dispela i kamapim ol kain kain mak long wesan. Sampela maunten wesan i liklik, na sampela em i bikpela i go antap inap 400 mita. Kain bikpela hip wesan olsem i helpim yumi long kisimgut kain tok Baibel i mekim olsem ol “wesan bilong nambis.” Long Baibel, dispela tok i makim samting em man i no inap kaunim namba bilong en, na i hatwok long skelim. (Stat 22:17) Yumi mas pret na daun long Man Bilong Wokim ol samting, husat i tingim na wokim kain banis wesan olsem bilong pasim bikpela win, ren na tait bilong biksolwara.

[Piksa long pes 9]

San i go daun, nambis bilong Bight of Biafra, Kamarun