Jekop i Tingim Ol Samting Bilong Spirit i Bikpela Samting

LAIP bilong Jekop i pulap tru long planti hevi. Brata bilong em i belhat nogut tru long em, olsem na em i mas ranawe. Em i gat laik long maritim wanpela meri em i laikim tru, tasol wanpela i trikim em long maritim narapela meri na bihain em i gat 4-pela meri, na dispela i kamapim planti hevi. (Stat 30:​1-13) Inap 20 yia wanpela man i yusim Jekop long mekim wok bilong em yet. Em i pait wantaim wanpela ensel na em i kisim bagarap long skin na dispela bagarap i stap inap oltaim. Wanpela man i reipim pikinini meri bilong em, na ol pikinini man bilong em i kilim i dai planti man, na em i krai sori long meri na pikinini bilong em i dai pinis, em tupela lewa bilong em. Taim em i lapun, bikpela hangre i kamap long ples bilong em, olsem na em i mas lusim ples na i go long narapela ples, na em i tokaut olsem em i no stap laip ‘longpela taim tumas, na em i bungim planti hevi tu.’ (Stat 47:⁠9) Maski ol dispela hevi i painim em, Jekop em i man bilong tingim ol samting bilong spirit na em i save bilip long God. Yu ting pasin bilong Jekop long bilip long Jehova i lus nating? Yumi inap lainim wanem samting taim yumi skelim ol samting i bin painim em?

Narapela Kain Long Brata Bilong Em

Jekop i save tingim ol samting bilong spirit, tasol Iso i givim baksait long ol samting bilong spirit na dispela i as bilong kros i stap namel long tupela. Jekop i tingim kontrak God i bin mekim wantaim Abraham, na em i givim bel long lukautim dispela lain em God i bin makim bilong kisim dispela samting God i promis long en. Olsem na Jehova i “laikim” em. Jekop em i “man bilong stap isi.” Dispela tok i makim olsem em i man bilong mekim stretpela pasin. Tasol Iso i no tingim ol samting bilong spirit em i bin kisim, na em i salim namba bilong em olsem namba wan pikinini i go long Jekop. Em i salim dispela namba olsem wanpela liklik samting tru. God i orait long Jekop i kisim dispela namba na blesing em brata bilong em i mas kisim, na dispela i mekim Iso i belhat nogut tru. Bihain Jekop i lusim olgeta samting em i laikim tumas na i go, tasol samting i kamap bihain long dispela i daunim tru bel hevi bilong em.​—⁠Malakai 1:​2, 3; Stat 25:​27-34; 27:​1-45.

Long driman, God i soim Jekop wanpela lata, as bilong en i stap long graun na het bilong en i go antap long heven, na ol ensel i wok long i go antap na i kam daun long en na em i tokim Jekop olsem em bai lukautim Jekop na ol pikinini bilong em. “Olgeta manmeri bilong graun bai i askim mi long givim blesing long ol na mekim gut long ol olsem mi mekim gut long yu na long ol lain tumbuna pikinini bilong yu. Harim. Mi stap wantaim yu na bai mi lukautim yu long olgeta hap yu go long en. Na bai mi bringim yu i kam bek long dispela graun. Na bai mi no ken lusim yu inap mi mekim kamap olgeta samting mi bin tokim yu long en.”​—⁠Stat 28:​10-15.

Man! Dispela tok i strongim tru bel bilong Jekop, a? Jehova i tokim Jekop olsem ol tok promis em i givim long Abraham na Aisak bai helpim famili bilong em long ol samting bilong spirit. Jekop i luksave olsem ol ensel inap mekim wok bilong helpim ol man em God i orait long ol, na God i tokim Jekop olsem Em bai lukautim em. Taim Jekop i kisim save long dispela em i amamas tru na em i mekim strongpela tok promis long stap gut long Jehova.​—⁠Stat 28:​16-22.

Jekop i no hambak na stilim namba bilong Iso. Paslain long mama i karim tupela pikinini man, Jehova i tok olsem “pikinini i kamap pastaim bai em i stap wokboi bilong pikinini i kamap bihain.” (Stat 25:23) Ating sampela bai tok, ‘Em bai isi moa sapos God i mekim na mama i karim Jekop pastaim.’ Tasol ol samting i kamap bihain i kamapim bikpela tok i tru. Ol blesing God i laik givim long ol man, em i no holim i stap bilong ol man husat i ting ol i gat rait long kisim, nogat; tasol em i save marimari long ol man em i makim. Olsem na Jekop i kisim namba olsem namba wan pikinini, na i no brata bilong em, long wanem, em i no tingim dispela samting olsem bikpela samting. Olsem tasol, lain Juda bilong skin i kamapim wankain pasin olsem Iso, olsem na ol Israel bilong spirit i kamap senis bilong ol. (Rom 9:​6-16, 24) Long nau tu, pasin bilong pas gut wantaim Jehova i no inap kamap nating tasol, maski man i bin kamap insait long famili i save pret long God. Olgeta man i laik kisim blesing bilong God, ol i mas wok strong long bihainim ol pasin bilong God na laikim tru ol samting bilong spirit.

Laban i Tok Welkam Long Em

Taim Jekop i go long Mesopotemia long lain bilong em bilong painim wanpela meri bilong maritim, em i bungim kasen bilong em, Resel, pikinini meri bilong Laban, long wanpela hul wara na em i rausim bikpela ston i karamapim hul wara na em i givim wara long ol animal Resel i lukautim.a Resel i ran i go long haus na toksave olsem Jekop i kam, na Laban i go hariap bilong bungim em. Sapos Laban i tingim ol samting famili bilong em i bin kisim long wokboi bilong Abraham, orait nau em bai bel hevi stret, long wanem, Jekop i kam han nating. Tasol i gat wanpela samting Laban i lukim na em inap mekim wok long en​—⁠em wanpela strongpela wokman.​—⁠Stat 28:​1-5; 29:​1-14.

Jekop i tokim Laban long ol samting i bin painim em. Yumi no save olsem em i bin stori long pasin trik em i mekim bilong kisim namba olsem namba wan pikinini, tasol bihain long Laban i harim “olgeta samting i bin kamap long em,” Laban i tok: “Tru tumas, mitupela i wanblut tru.” Wanpela saveman i tok dispela hap tok inap makim olsem Laban i tok welkam long Jekop long i stap wantaim em o em i save olsem Jekop i wanblut bilong em, olsem na em i mas lukautim Jekop. Tasol maski i gat wanem as na em i mekim dispela tok long Jekop, Laban i tingting long olsem wanem em bai yusim Jekop bilong mekim wok bilong em yet.

Orait nau Laban i kamapim wanpela tok na inap 20 yia dispela tok i kamapim hevi. Em i tokim Jekop olsem: “Yu kandere tru bilong mi, na mi no laik bai yu wok nating. Tokim mi, yu laik kisim hamas pe long wok bilong yu?” Laban i giaman olsem em i wanpela gutpela ankol, tasol tru tru em i no tingim moa Jekop olsem wanpela wanblut, i olsem em i mekim kontrak bilong inapim wanpela wok tasol. Jekop i laikim tru Resel, olsem na em i tok: “Bai mi wok 7-pela yia long yu, na yu ken larim mi i maritim Resel, dispela yangpela pikinini meri bilong yu.”​—⁠Stat 29:​15-20.

Taim man i putim mani samting bilong baim meri, long dispela taim i olsem ol i mekim tok promis long marit. Bihain, Lo Bilong Moses i tok olsem sapos wanpela man i pilai wantaim wanpela meri i no bin slip yet wantaim wanpela man, orait em i mas baim papa bilong dispela meri inap 500 kina. Saveman Gordon Wenham i ting olsem dispela “pe bilong baim meri i antap tru” tasol planti pe “i daun tru.” (Lo 22:​28, 29) Jekop i no gat rot bilong givim pe bilong baim meri. Olsem na em i tokim Laban em bai wok long Laban inap 7-pela yia. “Long taim bilong ol Babilon, ol wokboi nating i save kisim 5 kina i go inap 10 kina olsem pe long wanpela mun (420 kina i go inap 840 kina insait long 7-pela yia),” na Wenham i tok moa: “Jekop i givim bikpela pe long Laban bilong em i ken maritim Resel.” Laban i wanbel long dispela.​—⁠Stat 29:⁠19.

Jekop i pilim dispela 7-pela yia i olsem “samting nating,” long wanem, em i laikim tru Resel. Bihain long dispela 7-pela yia em i kisim meri bilong em​—⁠meri i bin karamapim pes bilong em long wanpela liklik hap laplap​—⁠tasol Jekop i no ting olsem Laban bai trikim em. Man! Em i mas kirap nogut tru long moning taim em i painimaut olsem em i no slip wantaim Resel, tasol em i bin slip wantaim susa bilong em, Lea! Jekop i askim Laban olsem: “Watpo yu mekim dispela pasin long mi? Mi bin mekim wok bilong yu bilong kisim Resel. Bilong wanem yu trikim mi?” Na Laban i tok: “Pasin bilong mipela i olsem. Namba wan pikinini meri i mas marit pastaim, na bihain namba 2 pikinini i ken marit. Yu wet inap wanpela wik pastaim, inap kaikai bilong marit i pinis, na bai mipela i givim Resel tu long yu. Tasol bai yu mas wok 7-pela yia moa.” (Stat 29:​20-27) I no gat wanpela samting Jekop inap mekim sapos em i laik kisim Resel, em i mas mekim olsem Laban i tokim em.

Dispela 7-pela yia nau em i mas wok long en i no gutpela olsem dispela 7-pela yia bilong pastaim. Jekop i no inap lusim tingting long dispela pasin trik bilong Laban. Na olsem wanem long Lea? Jekop i no inap lusim tingting long em i bin helpim dispela trik bilong Laban. Laban i no bin tingim liklik ol samting bai kamap bihain long Lea na Resel. Em i tingim em yet tasol. Resel i bel nogut, na tu, em i jeles taim Lea i karim fopela pikinini man, na em yet i no inap karim pikinini. Resel i laikim tru pikinini, olsem na em i givim wokmeri bilong em long Jekop bilong karim pikinini bilong em, na Lea tu i mekim olsem bilong resis wantaim Resel. Jekop nau i gat 4-pela meri, na 12 pikinini, na famili bilong em i no stap amamas. Tasol maski i olsem, Jehova i mekim lain bilong Jekop i kamap bikpela lain.​—⁠Stat 29:28–30:⁠24.

Jehova i Blesim Em

Maski ol dispela hevi i painim em, Jekop i luksave olsem God i stap wantaim em olsem Em i bin tok promis long mekim. Laban i luksave long dispela tu, long wanem, pastaim em i no gat planti animal, tasol nau lain animal bilong em i go planti moa taim Jekop i lukautim ol. Laban i no laik bai Jekop i lusim em, olsem na em i askim Jekop long wanem samting em i laikim olsem pe bilong wok em i mekim. Jekop i tokim Laban long givim em ol animal i gat makmak. Ol man i tok olsem, long dispela hap planti sipsip i waitpela na planti meme i blakpela o braunpela; wan wan tasol i gat makmak. Laban i ting bai i no gat planti animal i kamap i gat makmak, olsem na em i wanbel long tok bilong Jekop, na kwiktaim em i kisim olgeta animal bilong em i gat makmak i go i stap longwe long ol animal em Jekop i lukautim. Em i ting olsem Jekop bai i no inap kisim planti animal​—⁠em i ting ol animal Jekop bai kisim bai aninit tru long 20 pesen bilong ol pikinini sipsip na meme em ol wasman bilong sipsip i save kisim olsem pe. Tasol tingting bilong Laban i no stret, long wanem, Jehova i stap wantaim Jekop.​—⁠Stat 30:​25-36.

God i stiaim ol samting, na ol animal Jekop i lukautim i kamapim ol gutpela strongpela pikinini i gat makmak. (Stat 30:​37-42) Tru, tingting bilong Jekop long pasin bilong kamapim ol dispela kain pikinini i no stret. Tasol saveman Nahum Sarna i tok, ‘Sapos ol animal i no gat makmak ol i gat jin bilong kamapim pikinini i gat makmak, orait pikinini ol i karim bai i gat makmak, na ol dispela kain animal i strongpela.’

Taim Laban i lukim olsem ol sipsip na meme i karim tasol ol pikinini i gat makmak, Laban i traim gen long senisim tok bilong em long wanem kain animal i bilong Jekop​—⁠em ol animal i gat kain kain makmak. Em i mekim ol dispela samting bilong helpim skin bilong em yet, tasol maski em i senisim senisim kontrak, oltaim Jehova i mekim gut long Jekop na em i kisim planti samting. Laban i no inap mekim wanpela samting. I no longtaim na Jekop i gat planti samting: ol animal, ol wokboi na wokmeri, ol kamel, na ol donki, tasol em i no kisim ol dispela samting long strong bilong em yet, nogat, Jehova i helpim em long kisim ol dispela samting. Bihain em i stori long Resel na Lea olsem: “Papa bilong yutupela . . . i giamanim mi na planti taim em i senisim pe bilong mi. Tasol God i no larim em i mekim nogut long mi. . . . God i kisim ol lain meme na sipsip bilong papa bilong yutupela na i givim long mi.” Na tu, Jehova i tokim Jekop olsem Em i lukim ol samting Laban i mekim long em, tasol Jekop i no ken tingting planti. God i tokim em: “Lusim dispela ples na go bek long as ples bilong yu,” na God i mekim gut long em.​—⁠Stat 31:​1-13; 32:⁠9.

Bihain, taim em i lusim Laban em man i bin giamanim em, Jekop i go bek long ples bilong em. Maski 20 yia i lus, em i pret yet long Iso, na em i pret moa yet taim em i harim olsem Iso i kam wantaim 400 man. Jekop inap mekim wanem? Em i man bilong tingim ol samting bilong spirit na em i save bilip long God, na em i mekim ol samting i kamapim bilip bilong em. Em i beten, na em i tokaut olsem em i no gutpela man long Jehova i mekim gut long em na em i askim God long sambai long em na famili bilong em olsem Em i bin tok promis long mekim na bai Iso i no ken bagarapim ol.​—⁠Stat 32:​2-12.

Orait nau wanpela narakain samting i kamap. Long nait wanpela man, em wanpela ensel, i kam pait wantaim Jekop na ensel i paitim Jekop long dispela hap em bun bilong as i join wantaim bun bilong lek, na bun bilong lek i lus. Jekop i laik bai ensel i givim blesing long em pastaim na em bai larim em i go. Bihain profet Hosea i tok olsem Jekop, “i krai planti na i askim God long marimari long en.” (Hosea 12:​2-4; Stat 32:​24-29) Jekop i save olsem bipo taim ol ensel i kam long ol man, ol i kam bilong tokaut long kontrak bilong Abraham long rot bilong ol pikinini bilong em. Olsem na em i pait strong na em i kisim wanpela blesing. Long dispela taim, God i senisim nem bilong em i go long Israel, na dispela i makim, “God i Pait Bilong Helpim Ol.”

Yu Redi Long Pait?

Tru, Jekop i no bin karim hevi tasol taim em i pait wantaim wanpela ensel na taim em i bungim Iso. Tasol ol dispela stori i kamapim klia em i wanem kain man. Iso i no redi long karim hevi bilong hangre liklik bilong kisim namba olsem namba wan pikinini, nogat; tasol long laip olgeta bilong em Jekop i pait strong bilong kisim ol blesing, na em i pait tu wantaim wanpela ensel. Olsem God i bin tok promis, God i stiaim Jekop na lukautim em na em i kamap papa bilong wanpela bikpela lain na tumbuna papa bilong Mesaia.​—⁠Matyu 1:​2, 16.

Olsem wanem? Yu redi long wok strong, olsem pait strong, na bai Jehova i ken orait long yu? Long nau kain kain traim na hevi i save painim ol man i laik mekim wok bilong God, na sampela taim dispela i save mekim na i hatwok long makim ol rot i stret long bihainim. Tasol Jekop i stap olsem gutpela piksa bilong yumi long holimpas yet pasin bilong bilip na wet long kisim dispela samting em Jehova i laik givim long yumi.

[Ol Futnot]

[Ol Piksa long pes 31]

Long laip olgeta bilong em Jekop i pait strong bilong kisim ol blesing