Askim
Stat 27:18, 19 i tok Jekop i giaman olsem em i Iso. Yu ting i gat rong long Jekop i mekim olsem?
Ating yu save long dispela stori. Lapun Aisak i tokim Iso long go kisim sampela abus na i tok: “Mi kaikai na mi givim yu las blesing bilong mi pastaim, na bihain mi ken i dai.” Rebeka i harim tok man bilong em i mekim, olsem na em i hariap na kukim switpela kaikai na tokim Jekop olsem: “Yu ken givim [kaikai] long papa bilong yu, bai em i kaikai. Na em i ken givim blesing long yu.” Rebeka i kisim klos bilong Iso na bilasim Jekop na karamapim nek na han bilong em long skin bilong yangpela meme, na nau Jekop i bringim dispela kaikai i go long papa bilong em. Taim Aisak i askim em, “Yu husat?” Jekop i tok: “Mi Iso, namba wan pikinini bilong yu.” Aisak i bilipim tok bilong em na i givim blesing long em.—Stat 27:1-29.
Baibel i no stori stret long i gat wanem as na Rebeka na Jekop i mekim dispela pasin, tasol Baibel i kamapim olsem dispela samting i kamap wantu tasol. Tingim tu dispela samting: Baibel i no kolim stret olsem pasin Rebeka na Jekop i mekim i stret o i no stret, olsem na dispela stori i no makim olsem pasin bilong giaman i orait. Tasol Baibel i givim sampela save long dispela samting i bin kamap.
Namba wan samting, dispela stori i kamapim klia olsem Jekop i gat rait long kisim blesing long papa bilong em, na Iso, nogat. Pastaim, Jekop i bin baim dispela namba olsem namba wan pikinini long twins brata bilong em Iso husat i no ting dispela namba i bikpela samting, na Iso i salim dispela namba long wanpela plet kaikai bilong inapim hangre bilong em. Iso “i ting namba bilong en olsem namba wan pikinini em i samting nating.” (Stat 25:29-34) Olsem na taim Jekop i go long papa bilong em, em i laik kisim blesing i stret long em i ken kisim.
Namba tu samting, taim Aisak i kisim save olsem em i bin givim blesing long Jekop, em i no traim long senisim dispela samting em i bin mekim. Ating em i tingim tok Jehova i bin mekim long Rebeka paslain long em i karim dispela tupela twins, Jekop na Iso, olsem: “Pikinini i kamap pastaim bai em i stap wokboi bilong pikinini i kamap bihain.” (Stat 25:23) Na tu, taim Jekop i laik go long Haran, Aisak i kolim sampela tok moa long dispela blesing.—Stat 28:1-4.
Laspela samting, yumi mas tingim olsem Jehova i bin luksave long ol dispela samting i bin kamap na em i tingim. Dispela blesing em Aisak i givim, em i insait long promis God i bin givim long Abraham. (Stat 12:2, 3) Sapos God i no laik bai Jekop i kisim blesing, em inap pasim dispela samting long kamap. Tasol Jehova i no bin mekim olsem, na em i tokim Jekop: “Olgeta manmeri bilong graun bai i askim mi long givim blesing long ol na mekim gut long ol olsem mi mekim gut long yu na long ol lain tumbuna pikinini bilong yu.”—Stat 28:10-15.