Sapta 6
Bilong Wanem Yumi Go Lapun Na Yumi Dai?
1. Ol saveman i no save long wanem samting bilong laip bilong man?
OL SAVEMAN i no save bilong wanem yumi go lapun na yumi dai. I olsem ol liklik liklik hap bilong skin, olsem sel, i mas wok long kamap nupela gen long olgeta taim na yumi mas i stap oltaim. Wanpela buk (Hyojun Soshikigaku) i tok: “Taim ol sel i go olpela, olsem wanem dispela i mekim na man i save go lapun na em i dai? Mipela i no save liklik long dispela.” Planti saveman i ting yumi bilong i stap sampela yia tasol na yumi dai; ol i ting dispela i olsem “lo” i stap long skin bilong yumi. Yu ting dispela tingting bilong ol i stret?
2. Yumi ol manmeri i save stap liklik taim tasol na dispela i bin kirapim sampela long mekim wanem?
2 Ol manmeri i laik tru bai ol inap i stap longtaim, na ol i bin painim rot bilong i stap oltaim oltaim na i no ken i dai. Kirap long yia 350 samting paslain long Krais, i gat sampela marasin ol i tok em inap givim strong long man na em i no ken i dai, na ol bikman long Saina i gat laik long kisim. Bihain sampela king bilong Saina i kisim dispela kain marasin ol i tok em bai helpim man long i stap oltaim, em marasin ol i wokim long ain mekuri—tasol ol i kisim na ol i dai! Ol manmeri long olgeta hap bilong graun i ting taim ol i dai, i stap bilong ol i no pinis. Ol man bilong lotu Buda na Hindu na Muslim na sampela narapela, olgeta i bilip strong olsem ol inap i stap laip bihain long taim ol i dai. Ol lain i gat nem Kristen i ting ol bai i stap gutpela tru long heven.
3. (a) Olsem wanem na ol man i gat bikpela laik tru long i stap oltaim? (b) I gat wanem ol askim long i dai na yumi mas save long bekim bilong en?
3 Tingting bilong ol manmeri long i stap amamas bihain long taim ol i dai i makim olsem ol i laik tru long i stap oltaim oltaim. Baibel i tok, “[God] i putim tingting bilong laip i stap oltaim long bel bilong ol man,” i olsem God i putim tingting long bel bilong yumi na yumi laik i stap oltaim. (Saveman 3:11, NW) Em i wokim namba wan man na meri bambai ol inap i stap oltaim long graun. (Stat 2:16, 17) Orait, bilong wanem yumi save dai? Dai i kamap olsem wanem long graun? Sapos yumi save long God, yumi inap save long bekim bilong ol dispela askim.—Song 119:105.
WANPELA LAIK NOGUT
4. Jisas i tok wanem na em i kamapim ples klia dispela man nogut i as na ol manmeri i save dai?
4 Man nogut i save wok strong long haitim ol samting inap kamapim rong bilong em. Na i olsem tu long wanpela man em i as bilong wanpela bikpela rong tru i givim dai long planti bilion manmeri—em tu i laik haitim rong bilong em. Em i bin stiaim ol samting na ol man i no save wanem samting i painim ol taim ol i dai. Krais Jisas i kamapim dispela man nogut taim Em i tokim ol man i laik kilim Em i dai: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em.”—Jon 8:31, 40, 44.
5. (a) Dispela ensel i kamap Satan, olsem wanem long em long pastaim? (b) Wanem insait bilong dispela tok “Satan”? Bilong wanem em i kisim narapela nem olsem “man bilong krungutim gutnem bilong man”?
5 Tru tumas, Satan em i man nogut “bilong kilim ol man i dai.” Baibel i tokaut klia olsem Satan em i wanpela man i stap tru; em i no olsem tingting nogut i stap long bel bilong ol man. (Matyu 4:1-11) God i wokim em olsem stretpela ensel, tasol “em i no bihainim pasin i tru.” I stret tru em i kisim nem Satan! (KTH 12:9) Ol i kolim em “Satan,” olsem “birua,” long wanem, em i bikhet na birua long Jehova. Dispela man nogut ol i kolim em tu olsem “man bilong krungutim gutnem bilong man,” long wanem, em i tok bilas long God na bagarapim nem bilong Em.
6. Wanem samting i kirapim Satan long bikhet long God?
6 Wanem samting i kirapim Satan long bikhet long God? Pasin mangal. Em i lukim ol man i lotuim Jehova na em i mangal tru long dispela samting—em i laik bai ol i mas lotuim em. Satan i no sakim dispela laik nogut long ol man i mas lotuim em, maski i stret ol i mas lotuim God wanpela tasol, em i Man bilong wokim olgeta samting. (Skelim wantaim Esekiel 28:12-19.) Dispela ensel i kamap Satan, em i larim dispela laik nogut bilong mangal i kamap strong long bel bilong em, na dispela laik nogut i kirapim em long mekim sin.—Jems 1:14, 15.
7. (a) Wanem samting tru i mekim na ol man i save dai? (b) Sin em wanem samting?
7 Nau yumi save long man nogut i bin mekim dispela bikpela rong tru i bringim i dai long ol man. Tasol wanem as tru na ol man i save dai? Baibel i tok: “Spia bilong dai em sin tasol.” (1 Korin 15:56) Na sin em wanem samting? Bilong save long dispela tok “sin,” yumi ken tingim insait bilong dispela tok long ol tok ples ol i bin raitim Baibel long en long pastaim. Insait bilong hap tok Hibru na hap tok Grik ol i tanim olsem “mekim sin” i olsem “i no winim mak.” Yumi olgeta i no winim wanem mak? Mak bilong bihainim tru ol tok bilong God. Tasol olsem wanem sin i bin kamap long graun?
ROT BILONG KAMAPIM DISPELA LAIK NOGUT
8. Satan i mekim wanem bilong kirapim ol man long lotu long em?
8 Satan i tingim gut rot em i ting bai helpim em long bosim olgeta man na ol i ken lotu long em. Em i pasim tok long bel long pulim namba wan man na meri, em Adam na Iv, long mekim rong long God. Jehova i bin givim save long namba wan tumbuna papamama bilong yumi em inap bringim ol long laip oltaim. Ol i save Man bilong wokim ol em i gat gutpela pasin, long wanem, em i bin putim tupela i stap long gutpela ples tru, em gaden Iden. Taim God i givim naispela meri long Adam olsem poroman na helpim bilong em, Adam i pilim moa yet gutpela pasin bilong Papa bilong em long heven. (Stat 1:26, 29; 2:7-9, 18-23) Bilong i stap oltaim, tupela i mas bihainim tok bilong God.
9. God i givim wanem lo long namba wan man? Olsem wanem na dispela i no putim hevi long em?
9 God i tokim Adam: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:16, 17) God Jehova i wokim ol man, olsem na i stret em i ken putim ol lo na makim wanem pasin i stret ol i ken bihainim na wanem pasin i no stret. Lo bilong em i no putim hevi long Adam na Iv, long wanem, tupela inap kaikai pikinini bilong olgeta narapela diwai long gaden. Sapos ol i bihainim dispela lo na ol i no bikhet na bihainim pasin ol yet i ting em i stret, dispela bai makim olsem ol i save i stret God i stap bos bilong ol na ol i amamas long i stap aninit long em.
10. (a) Satan i mekim wanem bilong pulim namba wan man na meri i go bihainim em? (b) I olsem Satan i tok Jehova i gat wanem tingting? (c) Yu ting olsem wanem long tok Satan i sutim long God?
10 Satan i wok long tingim rot bilong pulim tupela na bai ol i lusim God. Bilong grisim ol i go bihainim em, em i mekim tok giaman. Em i tromoi tok long maus bilong wanpela snek, olsem man i tromoi tok long maus bilong doli, na em i tokim Iv: “Ating God i tambuim yutupela long kaikai pikinini bilong olgeta diwai bilong gaden, a?” Iv i kolim lo bilong God na nau Satan i tok: “Yutupela i no inap i dai.” Nau em i mekim wanpela tok na bai Iv i ting Jehova i gat tingting nogut na em i tambuim dispela diwai; em i tok: “Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.” (Stat 3:1-5) I olsem Satan i tok God i laik pasim tupela long kisim gutpela samting. Satan i bagarapim tru nem bilong gutpela Papa Jehova, em i Man bilong mekim tok i tru tasol!
11. Olsem wanem Adam tupela Iv i kamap olsem poroman bilong Satan long mekim pasin nogut?
11 Iv i lukluk gen long diwai na nau em i laik tru long kisim pikinini bilong en i gutpela tru long ai bilong em. Olsem na em i kisim na em i kaikai. Bihain, long laik bilong em yet, man bilong em tu i sakim tok bilong God na kaikai. (Stat 3:6) Tru, Satan i giamanim Iv, tasol Iv na Adam wantaim i helpim dispela laik nogut bilong Satan long bosim ol man. Long dispela pasin, tupela i kamap olsem poroman bilong em.—Rom 6:16; 1 Timoti 2:14.
12. Ol man i bikhet long God na wanem samting i kamap?
12 Adam tupela Iv i kisim pe nogut long pasin nogut ol i bin mekim. Tupela i no kisim narapela kain save na kamap wankain olsem God, nogat tru. Tupela i sem na i hait. Jehova i mekim kot long Adam na kolim strafe bilong em: “Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:19) Taim tupela tumbuna bilong yumi bilong pastaim tru i kaikai pikinini bilong diwai tambu, God i kotim tupela na kolim strafe bilong tupela, na long dispela ‘de’ stret i olsem tupela i dai pinis long ai bilong em. Orait nau God i rausim tupela long Paradais na skin bilong ol i kirap long bagarap na ol i wok long i dai.
SIN NA DAI I KISIM OLGETA MAN
13. Long wanem rot sin i kisim olgeta manmeri?
13 I olsem Satan i kamapim tru laik bilong em long ol man i mas lotu long em. Tasol ol man i lotu long em, em i no inap helpim ol long i stap laip. Taim sin i kirap mekim wok long skin bilong namba wan man na meri, nau ol i no inap kamapim ol pikinini i gutpela olgeta. Sin i pas tru long skin bilong tupela, olsem rait ol man i katim long ston, olsem na ol inap kamapim tasol ol pikinini em ol tu i gat sin. Tupela i kamapim ol pikinini taim tupela i mekim sin pinis, olsem na sin i kisim olgeta pikinini bilong tupela na ol i dai.—Song 51:5; Rom 5:12.
14. (a) Ol man i tok ol i no gat sin, ol i kain olsem husat? (b) Wanem samting i kamapim klia long ol Israel olsem ol i gat sin?
14 Tasol long nau planti man i no bilip moa olsem yumi gat sin. Long sampela kantri ol i no save long dispela bilip olsem yumi olgeta i gat sin, em yumi bin kisim long namba wan tumbuna bilong yumi. Tasol dispela i no makim olsem i no gat sin. Manki i gat doti long pes, ating em i tok em i stap klin, na em i mas lukim pes long glas pastaim bambai em i ken save pes i doti. Ol Israel bilong bipo, taim ol i kisim Lo bilong God long han bilong profet Moses, ol i olsem dispela manki. Lo i kamapim klia olsem sin i stap. Aposel Pol i tok: “Sapos lo i no i stap bilong helpim mi long save long wanem ol pasin i nogut, orait bai mi no inap save sin em i wanem samting.” (Rom 7:7-12) Olsem manki i lukim pes long glas, ol Israel inap lukim Lo na skelim pasin bilong ol yet na save ol i no klin long ai bilong God.
15. Sapos yumi lukim Baibel, olsem yumi lukim pes long glas, bai yumi kisim wanem save?
15 Sapos yumi lukim glas, em Baibel, na tingim gut ol lo bilong en, yumi inap save yumi gat sin. (Jems 1:23-25) Tingim lo Krais Jisas i givim long ol disaipel bilong em long ol i mas laikim tru God na ol man, em lo i stap long Matyu 22:37-40. Planti man ol i no winim dispela mak! Planti ol i no laikim tru God na ol man, tasol bel bilong ol i no kotim ol liklik.—Luk 10:29-37.
LUKAUT LONG OL TRIK BILONG SATAN!
16. Yumi ken mekim wanem na bai ol trik bilong Satan i no ken pundaunim yumi? Tasol olsem wanem na i hatwok long mekim olsem?
16 Satan i laik kirapim yumi long bikhet na mekim sin oltaim. (1 Jon 3:8) Olsem wanem? I gat rot bilong abrusim ol trik bilong em na yumi no pundaun? I gat rot. Yumi mas wok strong long daunim ol laik bilong skin i pulim yumi long bikhet na mekim sin. I hatwok long mekim olsem, long wanem, skin i save pulim yumi strong long mekim sin. (Efesus 2:3) Pol i hatwok tru na i olsem em i gat pait. Bilong wanem i olsem? Long wanem, sin i stap insait long em. Sapos yumi laik bai God i amamas long yumi, yumi tu i mas wok strong long daunim ol laik nogut i stap long skin bilong yumi na i laik pulim yumi long mekim sin.—Rom 7:14-24; 2 Korin 5:10.
17. Wanem samting i mekim na i hatwok moa long sakim ol laik nogut bilong skin?
17 Oltaim Satan i wok long painim rot bilong pulim yumi na bai yumi kalapim lo bilong God, olsem na i hatwok long yumi sakim sin. (1 Pita 5:8) Pol i wari long ol brata Kristen na em i tok: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lusim pasin bilong i stap klin na tingting long Krais tasol.” (2 Korin 11:3) Satan i mekim wankain pasin long nau. Em i wok long giamanim ol man bai ol i gat tupela tingting long pasin bilong Jehova, i gutpela o nogat, na i gutpela ol i bihainim lo bilong Jehova o nogat. Satan i save long ol laik nogut i stap long skin bilong yumi, na em i wok strong long pulim yumi long bikhet, na mangal, na bel nogut, na birua.
18. Olsem wanem Satan i mekim wok long ol manmeri bilong dispela graun long kirapim yumi long mekim sin?
18 Wanpela samting Satan i save mekim wok long en bilong pundaunim yumi, em ol manmeri bilong dispela graun i stap aninit long strong bilong em. (1 Jon 5:19) Yumi stap namel long ol manmeri i mekim pasin nogut na pasin giaman, na sapos yumi no was gut bai ol i pulim yumi long mekim pasin i no stret long ai bilong God. (1 Pita 4:3-5) Planti ol i sakim ol lo bilong God, na taim maus bilong bel i kotim ol, ol i no tingim, na bihain bel bilong ol i no pilim moa rong ol i mekim. (Rom 2:14, 15; 1 Timoti 4:1, 2) Isi isi sampela i kirap bihainim pasin bipo maus bilong bel i pasim ol long mekim maski em i no wok gutpela olgeta.—Rom 1:24-32; Efesus 4:17-19.
19. Yumi mas wokabaut stret, tasol olsem wanem na dispela tasol i no inap?
19 Sapos yumi wokabaut stret namel long ol manmeri bilong dispela graun, yumi mekim gutpela wok. Tasol yumi mas mekim sampela samting moa bambai God i ken amamas long yumi. Yumi mas bilip long God, na bel bilong yumi i mas pilim olsem yumi mas mekim wok bilong God. (Hibru 11:6) Disaipel Jems i tok: “Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.” (Jems 4:17) Yes, sapos yumi bikhet na givim baksait long God na ol lo bilong em, yumi mekim sin.
20. Ating Satan bai mekim wanem bilong pasim yu long mekim pasin i stret? Tasol wanem samting inap helpim yu long sakim olkain traim olsem?
20 Sapos yu stadi long Baibel bilong kisim save long God, yu ken save Satan bai kirapim sampela man long birua long yu. Yu no ken larim kain traim olsem i pasim yu long mekim pasin i stret. (Jon 16:2) Taim Jisas i mekim wok bilong em long graun, planti hetman i bilip long em, tasol ol i no tokaut long bilip bilong ol. Ol i pret, nogut ol wanples i givim baksait long ol. (Jon 12:42, 43) Satan i no isi liklik—em i wok strong long pretim ol man i wok long kisim save long God. Tasol oltaim yu mas tingim na pilim ol gutpela samting Jehova i bin mekim. Na ating bai yu inap helpim ol birua tu long pilim gutpela pasin bilong Jehova.
21. Olsem wanem yumi inap winim strong bilong dispela graun na ol laik nogut bilong skin?
21 Taim sin i stap yet long skin bilong yumi, bai yumi mekim sin. (1 Jon 1:8) I olsem yumi gat pait, tasol i gat samting bilong helpim yumi long mekim dispela pait. Tru tumas, yumi inap winim pait na sakim dispela man nogut, em Satan. (Rom 5:21) Taim wok bilong Jisas long graun i laik pinis, em i laik strongim ol disaipel na em i tok: “Long taim yupela i stap long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.” (Jon 16:33) God bai helpim yumi na yumi inap winim strong bilong dispela graun, maski yumi gat sin. Satan i no gat strong bilong mekim wanpela samting long ol man i sakim em na “stap aninit long God.” (Jems 4:7; 1 Jon 5:18) Long sapta i kamap bihain bai yumi kisim save, God i wokim pinis rot bilong yumi ken lusim kalabus bilong sin na dai.
TRAIM SAVE BILONG YU
Satan em i husat?
Bilong wanem ol man i save go lapun na ol i dai?
Sin em wanem samting?
Satan i mekim wanem bilong pulim ol man na bai ol i bikhet na mekim rong long God?
[Piksa i karamapim pes olgeta long pes 54]