Sapta 7
God i Larim Pasin Nogut i Stap, Dispela i Lainim Yumi Long Wanem Samting?
1, 2. (a) Sapos wantu tasol Jehova i bin kilim i dai tupela bikhetman long Iden, bai olsem wanem long yumi? (b) Jehova i bin mekim wanem gutpela pasin sori bilong helpim yumi?
JEKOP i tok: ‘Mi no stap long dispela graun longpela taim tumas, na mi bungim planti hevi tu.’ (Stat 47:9) Jop tu i tok, ol man ‘i save stap sotpela taim tasol long graun, na kain kain trabel i save kamap long ol.’ ( Jop 14:1) Olsem dispela tupela man, planti bilong yumi i bin karim ol hevi, o ol man i bin mekim pasin i no stret long yumi, o sampela bikpela hevi i bin painim yumi. Tasol em i no asua bilong God na mama i karim yumi. Tru, tingting na skin bilong yumi i no gutpela olgeta na yumi no stap long Paradais olsem Adam tupela Iv i bin i stap long en. Tasol olsem wanem sapos Jehova i bin kilim i dai tupela wantu tasol taim ol i bikhet? Tru, bai i no gat ol sik, bel hevi, o i dai, tasol bai i no gat ol lain manmeri tu. Bai yumi no stap. Jehova i marimari na em i larim Adam tupela Iv long kamapim ol pikinini, maski ol dispela pikinini i kisim sin long tupela. Na long rot bilong Krais, Jehova i stretim rot long yumi ken kisim ol samting Adam i bin lusim—em laip oltaim long Paradais long graun.—Jon 10:10; Rom 5:12.
2 Yumi inap wet long i stap oltaim long nupela taim long Paradais, em long dispela ples bai yumi no gat sik, bel hevi, pen, na i dai, na bai i no gat ol man nogut tu. Yumi save long dispela na em i mekim gut bel bilong yumi! (Sindaun 2:21, 22; KTH 21:4, 5) Tru, long Baibel yumi kisim save olsem wok bilong kisim bek yumi em i bikpela samting long yumi na long Jehova, tasol i gat wanpela samting i winim wok bilong kisim bek yumi.
Em i Tingim Nem Bilong Em
3. Wanem samting i insait long wok bilong Jehova long kamapim ol samting em i tingting pinis long mekim long graun na long ol man?
3 Nem bilong God i insait long wok bilong kamapim ol samting em i tingting pinis long mekim long graun na long ol man. Insait bilong dispela nem Jehova i olsem “Em i Mekim i Kamap.” Olsem na nem bilong em i insait long namba bilong em olsem King bilong heven na graun, na Man bilong kamapim ol samting em i tingting pinis long mekim, na God bilong tok i tru. Jehova i gat bikpela namba, olsem na bilong olgeta samting long heven na graun i ken i stap bel isi na i stap gutpela, ol i mas rispek tru long nem bilong Jehova na ol samting dispela nem i makim, na olgeta man i mas bihainim tok bilong em.
4. Jehova i laik bai wanem samting i kamap long dispela graun?
4 Taim Jehova i wokim pinis Adam tupela Iv, em i givim wok long tupela. Em i tokaut klia olsem em i laik bai ol i lukautim ol samting bilong graun na long dispela rot ol i mekim Paradais i go bikpela, na tu, em i laik bai ol i kamapim ol pikinini na kamap planti. (Stat 1:28) Yu ting dispela laik bilong God bai i no inap kamap, long wanem, tupela i mekim sin? Sapos Jehova i no inap kamapim ol samting em i tingting pinis long mekim long graun na long ol man, dispela bai daunim tru nem bilong em, em God i gat olgeta strong!
5. (a) Sapos namba wan man na meri i kisim kaikai long diwai bilong save wanem samting i gutpela na wanem samting i nogut, wanem taim bai ol i dai? (b) Olsem wanem Jehova i truim tok bilong em long Stat 2:17, na tingim tu ol samting em i tingting pinis long mekim long graun?
5 Jehova i bin givim tok lukaut long Adam tupela Iv, olsem sapos ol i sakim tok na kisim kaikai long diwai bilong save wanem samting i gutpela na wanem samting i nogut, ol bai i dai “long dispela de” ol i kaikai. (Stat 2:17, NW ) Na tru tumas, Jehova i kotim ol long dispela de stret ol i mekim sin na em i tok ol i mas i dai. Long ai bilong God i olsem Adam tupela Iv i dai pinis long dispela de. Tasol bilong kamapim ol samting em i tingting pinis long mekim long graun, Jehova i larim tupela long kamapim famili paslain long ol i dai tru. Long ai bilong God wan tausen yia i olsem wanpela de, na Adam i dai taim em i gat 930 krismas, olsem na em i dai insait long wanpela “de.” (2 Pita 3:8; Stat 5:3-5) Em nau, tok bilong Jehova i tru. Tupela i dai long taim God i makim, na i dai bilong ol i no pasim God long kamapim laik bilong em long graun. Tasol inap liklik taim God i larim ol man i gat sin, ol man nogut tu, long i stap long graun.
6, 7. (a) Olsem Kisim Bek 9:15, 16 i tok, bilong wanem Jehova i larim pasin nogut i stap? (b) Olsem wanem Jehova i soim strong bilong em long king bilong Isip? Olsem wanem planti lain i kisim save long nem bilong Em? (c) Wanem samting bai kamap taim pasin nogut bilong nau i pinis?
6 Tok Jehova i mekim long king bilong Isip long taim bilong Moses, dispela tu i kamapim klia olsem i gat wanem as na God i larim pasin nogut i stap. Taim king i tambuim ol Israel long lusim Isip, Jehova i no kilim em i dai wantu tasol. Nogat. Em i salim 10-pela hevi em ol i kamapim klia bikpela strong bilong Jehova. Taim em i tokaut long namba 7 hevi, Jehova i tokim king olsem Em inap pinisim king wantaim lain bilong em. Tasol Jehova i tok: “Mi bin larim yupela i stap olsem bai mi ken soim bikpela strong bilong mi long yupela, na bai ol manmeri i ken tokaut long biknem bilong mi long olgeta hap bilong graun.”—Kisim Bek 9:15, 16.
7 Na tru tumas, taim Jehova i helpim ol Israel long lusim Isip, ol man long planti hap ol i kisim save long nem bilong em. ( Josua 2:1, 9-11) Na nau inap 3,500 yia bihain, ol man i no lusim tingting long ol samting Jehova i bin mekim. Planti lain i kisim save long nem bilong Jehova, na tu, ol i kisim save long tok i tru bilong Man i gat dispela nem. Dispela i kamapim klia olsem Jehova em i God bilong truim ol tok promis bilong em na mekim ol samting bilong helpim ol wokman bilong em. ( Josua 23:14) Na em i kamapim tu bikpela strong bilong em, olsem i no gat wanpela samting inap pasim em long kamapim ol samting em i tingting pinis long mekim. (Aisaia 14:24, 27) Olsem na yumi ken bilip tru olsem klostu nau Jehova bai kirap helpim ol wokman bilong em i stap gut long em, na pinisim pasin nogut bilong dispela graun Satan i bosim. Ol man bai no inap lusim tingting long dispela bikpela strong Jehova bai kamapim na i givim biknem long em. Ol gutpela samting dispela wok bai kamapim, em bai helpim ol man inap long olgeta taim bihain.—Esekiel 38:23; KTH 19:1, 2.
‘Gutpela Save Bilong God i Pulap Tru!’
8. Pol i kirapim yumi long tingim wanem ol samting?
8 Long pas Pol i raitim long ol Rom, em i kamapim dispela askim: “Ating bai yumi tok God i mekim pasin i no stret, a?” Em i bekim strong: “Nogat tru.” Em i kamapim klia pasin marimari bilong God na ol tok Jehova i mekim long king bilong Isip long em i ken i stap laip inap liklik taim moa. Pol i tok tu olsem yumi ol manmeri i olsem graun long han bilong man bilong wokim sospen graun. Em i tok: “Em i laik kamapim ples klia belhat bilong em, bai olgeta man i ken save long bikpela strong bilong em. Ol sospen bilong kisim pe nogut ol i redi pinis long bagarap, tasol em i larim ol na em i wet longtaim long brukim ol. Long wanem, em i laik bai olgeta man i ken save long bikpela lait na strong bilong en, na long gutpela sindaun tru em i laik givim long ol sospen bilong kisim marimari. Bipo yet em i redim ol dispela sospen pinis bai em i ken givim gutpela sindaun na biknem long ol. Ol dispela sospen bilong kisim marimari, em yumi ol manmeri God i bin singautim. Na yumi no kam long lain bilong Juda tasol. Nogat. Yumi kam long ol arapela lain tu.”—Rom 9:14-24.
9. (a) Husat i olsem “sospen bilong kisim pe nogut”? (b) Bilong wanem Jehova i bin isi long ol man i birua long em? Olsem wanem ol samting bai kamap bihain i bilong helpim ol man i laikim tru Jehova?
9 Kirap long taim pasin bikhet i kamap long Iden, ol man husat i sakim Jehova na ol lo bilong em, ol i olsem “sospen bilong kisim pe nogut.” Kirap long dispela taim i kam inap nau, Jehova i bin isi long ol man. Ol man nogut i bin tok bilas long ol samting em i bin mekim, na birua long ol wokman bilong em, na ol i kilim i dai Pikinini bilong em. Jehova i bin bosim gut bel, na em i givim bikpela hap taim long olgeta lain long heven na graun long ol i ken lukim ol samting nogut i kamap long pasin bilong bikhet long God na pasin bilong ol man long bosim wokabaut bilong ol yet. Tasol i dai bilong Jisas i wokim rot bilong kisim bek ol manmeri i harim tok, na long “bagarapim na rausim wok bilong Satan.”—1 Jon 3:8; Hibru 2:14, 15.
10. Bilong wanem Jehova i bin larim pasin nogut i stap insait long dispela 1,900 yia?
10 Jisas i dai na kirap bek winim 1,900 yia i go pinis, na insait long dispela hap taim Jehova i bin wok yet long larim “sospen bilong kisim pe nogut” i stap. Bilong wanem? Long wanem, em i wok long kisim wanpela lain ol bai wok wantaim Jisas Krais long Kingdom bilong em long heven. Ol inap olsem 144,000, na ol i “sospen bilong kisim marimari” em aposel Pol i bin tok long en. Pastaim God i singautim ol Juda long kam insait long dispela lain bilong i stap long heven. Bihain, God i singautim ol man bilong ol narapela lain. Jehova i no bin subim ol dispela man long mekim wok bilong em. Nogat. Tasol ol man i pilim tru ol gutpela wok bilong em, em i opim rot long sampela ol i ken mekim wok king wantaim Pikinini bilong em long Kingdom bilong heven. Wok bilong redim dispela lain bilong i stap long heven, klostu nau bai i pinis.—Luk 22:29; KTH 14:1-4.
11. (a) Pasin bilong Jehova long isi long ol man i helpim husat long nau? (b) Olsem wanem dispela bai helpim ol man i dai pinis?
11 Tasol olsem wanem long ol lain bilong i stap long graun? Jehova i isi long ol man na dispela i bin opim rot long bungim “planti manmeri tru” bilong olgeta lain. Nau ol i planti milion. Jehova i bin tok promis olsem dispela lain bilong i stap long graun bai abrusim bagarap long pinis bilong pasin nogut bilong dispela graun, na ol inap wet long kisim laip i stap oltaim long Paradais long graun. (KTH 7:9, 10; Song 37:29; Jon 10:16) Long taim God i makim, ol man i dai pinis bai kirap bek na ol inap i stap long graun aninit long Kingdom bilong heven. Baibel i tok profet long Aposel 24:15: “God bai i kirapim bek ol man i dai pinis, em ol stretpela man na ol man nogut wantaim.”—Jon 5:28, 29.
12. (a) Jehova i larim pasin nogut i stap na dispela i lainim yumi long wanem ol pasin bilong em? (b) Yu ting olsem wanem long pasin bilong Jehova long stretim ol dispela tok?
12 Yu ting God i mekim pasin i no stret? Nogat, God i no pinisim hariap ol man nogut, olsem ol “sospen bilong kisim pe nogut,” na long dispela rot God i marimari long ol narapela man, na dispela i stret wantaim laik bilong em. Dispela i kamapim klia olsem em i gat pasin marimari na em i laikim tru ol man. Na tu, yumi bin lukim ol samting Jehova i mekim bilong kamapim ol samting em i tingting pinis long mekim, na long dispela rot yumi kisim bikpela save long em. Yumi kirap nogut long narapela narapela pasin bilong em i kamap ples klia—stretpela pasin, pasin marimari, i no les kwik, na gutpela tingting na save. Jehova i bihainim gutpela tingting bilong stretim tok long husat i stap nambawan bos, olsem i stret husat i stap king, na inap olgeta taim bihain dispela bai kamapim klia olsem pasin bilong em long mekim wok king i nambawan tru. Yumi mekim wankain tok olsem aposel Pol: “Olaman! Ol gutpela pasin bilong God na tingting na save bilong en i pulap tru . . . Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en.”—Rom 11:33.
Yumi Gat Rot Long Kamapim Bel Bilong Yumi
13. Taim pen na hevi i painim yumi, yumi gat rot long mekim wanem? Wanem samting bai helpim yumi long bihainim gutpela tingting?
13 Planti wokman bilong Jehova i karim ol bikpela hevi. Ol hevi bilong ol i stap yet, long wanem, God i no bin pinisim yet ol man nogut na helpim ol lain man long kamap gutpela gen. Olsem wanem? Dispela i mas mekim na yumi bel nogut? O yumi ting ol kain hevi olsem i opim rot long yumi ken soim olsem Satan em i giaman? Yumi inap mekim olsem sapos yumi tingim dispela tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Satan i sutim tok long Jehova, na em i tok sapos ol mani kago bilong ol man i lus o skin bilong ol i bagarap, ol bai tok em asua bilong God, o ol bai toknogutim em. ( Jop 1:9-11; 2:4, 5) Taim hevi i painim yumi na yumi stap gut long God, yumi mekim bel bilong Jehova i amamas na yumi soim olsem yumi no mekim olsem Satan i tok.
14. Sapos yumi wet long Jehova i helpim yumi taim ol hevi i painim yumi, dispela inap helpim yumi olsem wanem?
14 Sapos yumi wet long Jehova i helpim yumi taim ol hevi i painim yumi, yumi ken kisim ol gutpela pasin. Olsem: Jisas i karim pen na hevi na dispela i “skulim em tru long pasin bilong bihainim tok,” i no gat narapela samting i bin skulim em olsem. Ol hevi i painim yumi i ken skulim yumi tu long kisim pasin bilong i stap isi na no ken les, na sanap strong, na pilim tru ol stretpela pasin bilong Jehova.—Hibru 5:8, 9; 12:11; Jems 1:2-4.
15. Taim yumi stap isi na karim ol hevi, olsem wanem dispela inap helpim ol narapela man?
15 Ol narapela bai lukim ol samting yumi mekim. Taim pasin bilong yumi long laikim stretpela pasin i kamapim ol hevi long yumi, sampela ol inap luksave long husat ol i Kristen tru long nau. Na taim ol i kam bung wantaim yumi long mekim lotu, ol inap wet long kisim laip oltaim. (Matyu 25:34-36, 40, 46) Jehova na Pikinini bilong em i laik bai ol man inap kisim dispela samting.
16. Tingting bilong yumi long ol hevi i painim yumi i mekim wanem long pasin bilong i stap wanbel?
16 Em i gutpela tru taim yumi ting ol hevi i opim rot long yumi ken kamapim olsem yumi givim bel long Jehova, na insait long wok bilong kamapim laik bilong em! Taim yumi mekim olsem, dispela inap kamapim klia olsem yumi wok long kamap wanbel wantaim God na Krais. Jisas i beten long Jehova i ken helpim ol Kristen tru, em i tok: “Mi no beten bilong helpim ol dispela man [ol disaipel i stap klostu long em] tasol. Nogat. Mi beten bilong helpim ol manmeri bai i harim tok bilong ol na i bilip long mi. Mi laik bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela.”—Jon 17:20, 21.
17. Yumi ken bilip long wanem samting sapos yumi stap gut long Jehova?
17 Sapos yumi stap gut long Jehova, em bai givim planti gutpela samting long yumi. Baibel i tok: “Yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.” (1 Korin 15:58) Baibel i tok tu olsem: “God em i no man nogut, na bai em i lusim tingting long ol gutpela wok yupela i bin mekim.” (Hibru 6:10) Jems 5:11 i tok: “Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, Bikpela em i save sori moa yet long yumi, na oltaim em i save marimari long yumi.” Wanem gutpela samting i bin painim Jop? “Bikpela i mekim gut moa yet long Jop.” ( Jop 42:10-16) Yes, Jehova i “save mekim gut tru long ol man i wok long painim em.” (Hibru 11:6) Na yumi inap wet long kisim gutpela samting tru—em laip i stap oltaim long Paradais long graun!
18. Bai yumi tingim moa pen na hevi yumi bin karim long bipo?
18 Taim Kingdom bilong God i bosim graun, em bai pinisim olgeta samting i bin nogutim ol lain man inap planti tausen yia. Ol amamas bilong dispela taim bai winim tru ol hevi yumi karim long nau. Bai yumi no inap tingim moa ol pen na hevi i bin painim yumi long bipo. Ol gutpela tingting na wok em ol manmeri bai mekim long olgeta de long nupela taim, em bai helpim ol long lusim tingting isi isi long ol pen na hevi ol i bin karim. Jehova i tok: “Lukim, mi wokim nupela skai [nupela Kingdom long heven i bosim ol man] na nupela graun [ol stretpela manmeri]. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.” Yes, long nupela taim Jehova bai kamapim, ol stretpela man bai ol inap tok olsem: “Nau olgeta hap graun i ken i stap bel isi gen, na olgeta manmeri i ken singaut amamas.”—Aisaia 14:7; 65:17, 18.
Stori Gen Long Ol Dispela Tok
• Jehova i larim pasin nogut i stap, tasol olsem wanem em i bin mekim gut long nem bilong em yet?
• God i larim “ol sospen bilong kisim pe nogut” i stap, na olsem wanem dispela i bin opim rot long em i ken marimari long yumi tu?
• Taim ol hevi na pen i painim yumi, yumi mas ting olsem wanem long en?
[Ol Piksa long pes 67]
Jehova i ‘mekim gut moa yet long Jop, na las hap bilong laip bilong en i winim tru ol yia em i bin i stap bipo’