No Ken Larim Pasin Bilong Tupela Tingting i Bagarapim Bilip Bilong Yu

Yu ting skin i stap strong, tasol long de bihain, yu pilim olsem yu sik. Orait nau wantu yu no gat strong moa. Het na ol narapela hap skin i pen nogut tru. Wanem samting i mekim? Ol liklik binatang jem i bin kam insait long skin bilong yu na ol i wok long bagarapim klok na lewa samting. Sapos yu no rausim ol dispela jem, ol inap bagarapim tru helt bilong yu o kilim yu i dai.

TRU, sapos skin i no strong tumas taim sik i painim yu, bai yu hatwok moa yet long daunim sik. Wanpela man (Peter Wingate) bilong raitim buk long marasin i tok, man em skin bilong em i no gat strong long wanem em i no bin kaikai gut, em i no gat strong long sakim sik na nau ‘liklik sik tasol inap kilim em i dai.’

Sapos olsem, orait long laik bilong yu yet bai yu no lusim gutpela kaikai, a? Ating yu save mekim olgeta samting yu inap mekim bambai yu ken kisim gutpela kaikai na stap strong. Na ating yu wok strong na bai yu no kisim ol liklik binatang jem. Tasol olsem wanem? Yu save mekim wankain bikpela wok olsem na bai yu inap stap strong long bilip? (Taitus 2:⁠2) Yu save long samting nogut em pasin bilong tupela tingting inap mekim long yu? Pasin bilong tupela tingting inap kamap long bel na tingting na bagarapim bilip bilong yu na pasin wanbel i stap namel long yu na Jehova. Tasol i olsem sampela i no tingim dispela. Ol i no kisim kaikai bilong spirit na nau ol i no gat strong long sakim pasin bilong tupela tingting. Olsem wanem long yu yet?

Tupela Tingting​​—⁠Samting Nogut?

Tru, i no olsem long olgeta taim pasin bilong tupela tingting em samting nogut, nogat. Sampela taim, bilong yumi ken bilip tru tru long wanpela samting, pastaim yumi mas save gut long olgeta samting bilong en. Sampela man bilong lotu ol i tok yumi mas bilip tasol​—⁠no ken kisim tupela tingting long wanpela samting​—⁠tasol dispela kain tok i giaman na inap mekim nogut long yumi. Tru, Baibel i tok olsem man i laikim tru narapela, “oltaim em i save bilip” long em. (1 Korin 13:⁠7) Gutpela Kristen i redi long bilip long ol man em bipo long olgeta taim ol i bin tok tru tasol. Tasol Tok Bilong God i gat tok lukaut olsem yumi no ken “bilipim olgeta kain tok.” (Sindaun 14:15) Sampela taim, pasin man i bin mekim bipo, dispela i save mekim na i gat as tru na yumi no bilip tumas long em. Baibel i toksave olsem, maski ‘ol tok bilong man i ting long giamanim yu ol i swit long yau bilong yu, yu no ken bilipim tok bilong en.’​​—⁠Sindaun 26:​24, 25.

Aposel Jon tu i tok ol Kristen i no ken bilip nating. Em i tok: “Yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit [olsem ol tok], bai yupela i ken save, ol i kam long God, o nogat.” (1 Jon 4:⁠1) Ating wanpela ‘tok’ inap luk olsem em i kam long God. Tasol olsem wanem? Tru tru dispela tok i kam long em? Sapos yumi no bilip hariap, ating dispela inap lukautim gut yumi, long wanem, aposel Jon i tok, “planti man i laik giamanim yumi, ol i raun nabaut long graun.”​​—⁠2 Jon 7.

Taim Pasin Bilong Tupela Tingting i No Gat As Bilong En

Tru, planti taim bilong kamapim klia ol tok i tru, long pasin daun yumi mas skelim gut ol samting. Tasol sapos i no gat as na yumi gat tupela tingting long samting na yumi larim dispela i kamap strong long bel na long tingting, dispela inap bagarapim ol bilip bilong yumi na pasin wanbel i stap namel long yumi na ol narapela. Dispela kain pasin bilong tupela tingting inap pasim yumi long tingim gut samting yumi mas mekim. Satan i mekim na Iv i kisim tupela tingting long pasin bilong Jehova. Yu tingim? Satan i tokim em: “Ating God i tambuim yutupela long kaikai pikinini bilong olgeta diwai bilong gaden, a?” (Stat 3:⁠1) Dispela askim i mekim na nau Iv i gat tupela tingting na dispela i pasim em long tingim gut samting em i mas mekim. Em wanpela pasin trik Satan i save mekim wok long en. Olsem wanpela man i save raitim pas bilong bagarapim nem bilong narapela, Satan i save gut long pasin bilong sutim tok kranki na tok giaman i go long ol narapela. Satan i bin kirapim planti man long kisim pasin bilong tupela tingting na dispela i bin bagarapim gutpela pasin wanbel i stap namel long ol na ol narapela.​​—⁠Galesia 5:​7-9.

Disaipel Jems i save gut long samting nogut dispela kain pasin bilong tupela tingting inap mekim. Em i tok taim hevi i kamap, yumi ken beten askim God long helpim yumi. Tasol Jems i toksave olsem taim yumi beten, yumi mas ‘bilip tru long God. Yumi no ken lusim bilip liklik na i ting olsem, “Ating God bai i givim dispela long mi, o nogat?” ’ Sapos yumi no bilip tumas long God, dispela inap mekim na yumi kamap “olsem solwara win i sakim na i kirap nabaut.” Yumi kamap olsem man em ‘tingting bilong em i bruk nabaut, na long olgeta pasin em i mekim, em i no save bihainim wanpela rot tasol.’ (Jems 1:​6, 8) Yumi no save yumi mas mekim wanem. Orait nau, olsem Iv i mekim, ating yumi kirap putim yau long kain kain tok na tingting em ol spirit nogut i as bilong en.

Stap Gut Long Ol Samting Bilong Spirit

Orait, yumi mas mekim wanem na bai yumi no kisim dispela kain pasin bilong tupela tingting, em dispela pasin i gat strong long mekim nogut long yumi? Samting yumi mas mekim i no gat hatwok long en: Yumi mas strong long sakim ol tok i gat tingting bilong Satan i stap long en, na yumi mas kisim olgeta samting Jehova i putim bilong helpim yumi long “stap strong long bilip.”​​—⁠1 Pita 5:​8-​10.

Yumi mas kisim planti gutpela kaikai bilong spirit​—⁠dispela em bikpela samting. Peter Wingate, em pastaim yumi stori long em, em i tok: ‘Oltaim yumi mas kisim kaikai, long taim yumi malolo tu, na bai olgeta hap skin na klok na lewa samting i ken wok gut, na bai ol liklik liklik hap skin i gat senis bilong en.’ Na i wankain tu sapos yumi laik stap gut long ol samting bilong spirit. Oltaim yumi mas kisim kaikai bilong spirit; sapos nogat, isi isi bilip bilong yumi, wankain olsem skin i sot long kaikai, bai bagarap na bihain, dai olgeta. Jisas Krais i kamapim klia dispela samting taim em i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.”​​—⁠Matyu 4:⁠4.

Tingim: Strongpela bilip yumi kisim pastaim, yumi bin kisim olsem wanem? Aposel Pol i tok: “Yumi harim tok bilong God na dispela i kirapim bilip.” (Rom 10:17) Em i laik tok olsem, pastaim yumi kisim strongpela bilip long Jehova, na ol tok promis bilong em, na oganaisesen bilong em, long rot bilong kisim kaikai bilong spirit long Tok Bilong God. Tasol taim yumi harim tok, yumi no bilip nating, nogat. Yumi bin mekim wankain samting olsem ol man long taun Beria i bin mekim. Olsem: ‘Long olgeta de yumi bin ritim na skelim tok i stap long buk bilong God, bilong yumi ken save, ol tok yumi harim em i tru o nogat.’ (Aposel 17:11) Yumi ‘save tru long ol pasin God i laikim tumas na long ol pasin i inap tru na i stret olgeta,’ na yumi bin skelim gut olgeta tok yumi bin harim na bai yumi ken save em i tok tru. (Rom 12:⁠2; 1 Tesalonaika 5:​21) Orait nau, taim yumi lukim Tok Bilong God na ol tok promis bilong em i no save popaia, em i kamap tru olgeta taim, ating bilip bilong yumi i kamap strong moa.​​—⁠Josua 23:14; Aisaia 55:​10, 11.

No Ken Sot Long Kaikai Bilong Spirit

Orait nau bikpela samting i olsem: Yumi mas holimpas bilip na no ken kisim tupela tingting long samting em inap daunim strongpela bilip bilong yumi long Jehova na oganaisesen bilong em. Bilong mekim olsem, yumi mas wok yet long skelim ol tok bilong Baibel long olgeta de. Aposel Pol i toksave, “long dispela taim i laik kamap bihain sampela man [em pastaim i luk olsem ol i gat strongpela bilip] bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Timoti 4:⁠1) Ol dispela tok giaman inap kirapim sampela long kisim pasin bilong tupela tingting na mekim ol i stap longwe long God. Wanem samting bai lukautim yumi? Yumi mas wok yet long “kisim bikpela strong long ol gutpela tok yumi bilip long en na long olgeta gutpela save [yumi] bin kisim na bihainim.”​​—⁠1 Timoti 4:⁠6.

Tasol sori tru, sampela long nau ol i no laik “kisim bikpela strong long ol gutpela tok yumi bilip long en”​—⁠maski planti kaikai bilong spirit i stap na ol inap kisim. Olsem wanpela man bilong raitim Buk Sindaun i tok, maski planti gutpela kaikai bilong spirit i stap, ating sampela i no kirap na kaikai.​​—⁠Sindaun 19:24; 26:⁠15.

Dispela inap mekim nogut long yumi. Peter Wingate i tok: “Taim bodi i stat long mekim wok long ol protin bilong skin yet, skin i wok long bagarap.” Taim yu no kaikai, bodi i kirap long mekim wok long ol kabohaidret samting bilong skin yet. Taim bodi i mekim wok pinis long ol dispela samting, nau bodi i kisim ol protin em yumi mas i gat bilong kamapim ol nupela sel na stretim bek ol olpela. Klok na lewa samting i wok long bagarap. Orait nau helt bilong yu i wok long bagarap kwiktaim.

Long sait bilong spirit, kain samting olsem i bin painim sampela long kongrigesen Kristen bilong pastaim. Ol i ting ol inap stap strong long ol kaikai bilong spirit ol i kisim pinis. Ating ol i bin lusim pasin bilong stadi, na nau ol i no stap strong moa long ol samting bilong spirit. (Hibru 5:​12) Aposel Pol i kamapim samting nogut dispela inap mekim, taim em i tokim ol Hibru Kristen: “Dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.” Em i save sapos yumi ‘givim baksait long bikpela wok God i mekim bilong kisim bek yumi,’ dispela inap mekim na isi isi yumi bai lusim pasin bilong stadi.​​—⁠Hibru 2:​1, 3.

Taim man i no kisim gutpela kaikai, planti taim i no olsem em i luk sik o bun nating, nogat. Na olsem tasol, taim man i no kisim kaikai bilong spirit, ating dispela samting i no kamap ples klia wantu tasol. Maski yu no kisim gutpela kaikai bilong spirit, yu inap luk olsem yu stap gut long ol samting bilong spirit​—⁠tasol ating yu bai stap olsem inap sotpela taim tasol! Bihain, yu no stap strong moa long ol samting bilong spirit, na ating yu kisim pasin bilong tupela tingting, na yu no inap pait strong long holimpas bilip. (Jut 3) Ating ol narapela i no save yu no kisim kaikai bilong spirit, tasol yu yet yu save.

Olsem na holimpas pasin bilong stadi. Wok strong long sakim pasin bilong tupela tingting. Sapos oltaim yu tingting planti long ol samting yu gat tupela tingting long en na yu no stretim, dispela inap mekim nogut long yu. (2 Korin 11:⁠3) Satan i gat bikpela laik bai yu kisim pasin bilong tupela tingting, long kain askim olsem: ‘Tru yumi stap long taim bilong las de? Yumi inap bilip tru long olgeta tok bilong Baibel? Tru dispela oganaisesen em oganaisesen bilong Jehova?’ Olsem na no ken lusim pasin bilong kisim gutpela kaikai bilong spirit​—⁠nogut Satan i paulim tingting bilong yu. (Kolosi 2:​4-7) Bihainim gutpela tok Pol i givim long Timoti. Stadi gut long “ol buk i gat tok bilong God” long en bambai yu inap “holim strong dispela tok yu bin kisim na yu save bilip strong long en.”​​—⁠2 Timoti 3:​13-​15.

Bilong mekim olsem, ating yu mas i gat helpim. Peter Wingate i tok moa: “Sapos man i no kisim kaikai na bodi i sot tru long vaitamin samting, dispela inap bagarapim bel na nau bel i no inap mekim wok long kaikai, taim em i kisim. Ating pastaim kain man olsem i mas kisim kaikai i no strongpela tumas.” Em i mas lukautim gut dispela bodi i bin sot tru long kaikai, bambai skin i ken kamap gutpela gen. Na olsem tasol, man i lusim pasin bilong stadi long Baibel em i mas i gat narapela bilong helpim na strongim em na bai em i gat laik gen long kisim kaikai bilong spirit. Sapos kain samting olsem i bin painim yu, orait askim narapela long helpim yu na amamas taim narapela i tok em i laik helpim yu long kamap strong gen long ol samting bilong spirit.​​—⁠Jems 5:​14, 15.

No Ken “Lusim Bilip”

Taim yumi skelim i stap bilong Abraham, ating sampela i pilim olsem i gat as tru long em inap tingting planti. Ating i luk olsem em i no inap kamap “tumbuna bilong planti lain manmeri,” maski God i tok promis pinis. Bilong wanem? Long wanem, long ai bilong ol man ating dispela samting i no inap kamap. Baibel i tok: ‘Bodi bilong en i slek na i dai pinis, na em i save olsem Sara i no inap long karim pikinini.’ Tasol em i no larim pasin bilong tupela tingting i kamap long bel na tingting bilong em, nogat. Aposel Pol i tok: “Bilip bilong en i stap strong na i no slek” na “em i no lusim bilip.” Abraham “i save pinis olsem, God em inap mekim olsem em i bin promis long mekim.” (Rom 4:​18-​21) Inap planti yia, em i bin wok strong long kisim pasin bilong pas gut wantaim Jehova olsem gutpela pren na em i bilip tru long Em. Em i save givim baksait long pasin bilong tupela tingting, em dispela pasin i gat strong long bagarapim dispela pasin wanbel i stap namel long tupela.

Yu tu i ken mekim olsem sapos yu holimpas ‘ol gutpela tok’​​—⁠olsem kisim planti kaikai bilong spirit. (2 Timoti 1:​13) Tingim samting dispela pasin bilong tupela tingting inap mekim long yu. Satan i laik bagarapim bilip bilong yu. Sapos yu lusim pasin bilong kisim ol gutpela kaikai bilong spirit long rot bilong stadi long Baibel na go long ol miting Kristen, dispela bai opim rot long Satan i pundaunim yu. Olsem na mekim gutpela wok long ol kaikai bilong spirit em “wokboi i gat gutpela tingting” i save givim long yumi long taim stret. (Matyu 24:45) Wok yet long ‘skul long tok bilong God’ na stap strong long bilip. (1 Timoti 6:3; Taitus 2:⁠2) No ken larim pasin bilong tupela tingting i bagarapim bilip bilong yu.

[Ol Piksa long pes 21]

Yu save kisim planti gutpela kaikai bilong spirit?