Bilong Wanem Ol Lain Bilong Bipo i Bagarap?
BIKPELA TAIT i bin kamap long olgeta hap bilong graun, em i no wanpela bagarap i kamap nating. Em strafe bilong kot bilong God. Ol man i kisim toksave, tasol planti i no tingim. Bilong wanem? Jisas i tok: “Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no [ting] long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.”—Matyu 24:38, 39.
Ol i Gat Gutpela Sindaun
Long sampela samting, ol manmeri paslain long taim bilong Bikpela Tait ol i gat sampela gutpela samting, winim yumi long nau. Olsem: Olgeta manmeri i mekim wankain tok ples. (Stat 11:1) Dispela i helpim ol long wokim planti gutpela samting long han na kisim ol nupela save. Bilong mekim olsem, i mas i gat planti man i gat save long wokim ol kain kain samting na ol i mas wok gut wantaim. Na tu, ol manmeri long dispela taim ol i bin winim planti krismas moa, olsem na ol i ken bungim ol save ol i kisim insait long planti handet yia.
Sampela i tok, long dispela taim bipo ol manmeri i no bin i stap inap planti yia olsem, na taim Baibel i stori long ol yia, tru tru Baibel i stori long ol mun. Olsem wanem? Dispela tok em i tru? Tingim Mahalalel. Baibel i tok: “Mahalalel i gat 65 krismas na em i kamap papa bilong wanpela pikinini man, nem bilong en Jaret. . . . Mahalalel i stap inap 895 yia olgeta na em i dai.” (Stat 5:15-17) Sapos wanpela yia i makim wanpela mun, Mahalalel i kamapim pikinini man bilong em taim em i gat 5-pela krismas tasol! Dispela i kamapim klia olsem wanpela yia i no makim wanpela mun, nogat tru. Long dispela taim bipo ol man i strong moa, long wanem, ol i kamap bihain liklik long Adam, em man i bin stap gutpela olgeta. Tru tru ol i stap inap planti handet yia. Ol i kamapim wanem ol gutpela samting?
Planti handet yia paslain long Bikpela Tait ol manmeri i kamap planti, olsem na pikinini man bilong Adam, em Kein, em i wokim wanpela taun, na em i kolim dispela taun Enok. (Stat 4:17) Insait long ol yia paslain long Bikpela Tait, ol man i mekim kain kain wok. I gat ol woksop bilong wokim “olkain samting long bras na ain.” (Stat 4:22) Ol i mekim wok long ol dispela tul bilong wokim ol haus, ol tebol sia samting, ol klos, na gaden. Stori bilong ol manmeri i bin kamap bipo bipo tru, em i stori long ol dispela wok.
Taim ol manmeri i bungim olgeta save ol i kisim pinis, ating dispela i bin helpim ol long mekim ol kain kain wok long ain, long mekim wok gaden, lukautim ol sipsip na bulmakau, raitim ol stori samting, na wokim ol gutpela gutpela samting long han. Olsem: Jubal “em i tumbuna bilong ol man i save mekim musik long gita na mambu.” (Stat 4:21) Ol manmeri long dispela taim i kamapim ol kain kain gutpela samting. Tasol wantu olgeta samting i pinis. Wanem samting i kamap?
Wanem Hevi i Kamap?
Maski ol lain paslain long Bikpela Tait i gat planti gutpela samting, taim ol i bin kamap long pastaim tru ol samting i no stap gutpela. Man i bin kamapim ol dispela lain, em Adam, em i bikhet long God. Kein, man bilong wokim namba wan taun, em i kilim i dai brata bilong em. Olsem na yumi no ken kirap nogut long ol hevi na pasin nogut i go bikpela hariap! Ol samting i kamap long pasin nogut bilong Adam i wok long go bikpela bikpela.—Rom 5:12.
Ating ol samting i go nogut olgeta, olsem na Jehova i tokaut long em bai larim ol man i stap inap 120 yia moa. (Stat 6:3) Baibel i tok: “Pasin bilong ol manmeri long olgeta hap i nogut tru. Ol manmeri i tingting tasol long ol samting nogut. . . . Long olgeta hap bilong graun ol i wok long pait na bikhet tasol.”—Stat 6:5, 11.
Bihain, God i tokim Noa olsem long rot bilong wanpela bikpela tait em bai bagarapim olgeta samting i stap laip. (Stat 6:13, 17) Tru, Noa i kamap “man bilong tokaut long stretpela pasin,” tasol ating i hatwok long ol man long bilip olsem olgeta samting bai pinis. (2 Pita 2:5) Etpela man tasol i putim yau long toksave na ol i abrusim bagarap. (1 Pita 3:20) Olsem wanem na dispela em i bikpela samting long yumi long nau?
Em i Bikpela Samting Long Yumi?
Yumi stap long wankain taim olsem Noa. Planti taim yumi harim stori long ol pasin teroris nogut tru, na pasin bilong bagarapim na pinisim wanpela lain olgeta, na ol man i holim gan na kilim i dai planti man na i olsem i no gat as tru bilong en, na pasin bilong kros pait insait long famili i go bikpela tru. Long nau pasin bilong pait na bagarapim man i pulap gen long graun, na olsem long bipo, ol manmeri i kisim toksave pinis olsem kot bilong God bai painim ol. Jisas yet i tok, em bai kam olsem Jas em God i bin makim bilong tilim ol manmeri olsem wanpela wasman i save tilim ol sipsip na meme i go tupela lain. Jisas i tok, ol man em ol i no inap tru long God i kisim bek ol, ol bai i “go bilong kisim pe nogut, em pen [olsem dai] i save stap oltaim.” (Matyu 25:31-33, 46) Tasol Baibel i tok, long dispela taim planti milion manmeri bai abrusim bagarap—em wanpela bikpela lain manmeri i lotuim trupela God. Long nupela taim bihain, ol dispela manmeri bai sindaun gut na stap bel isi tru inap oltaim oltaim, i no gat wanpela taim olsem i bin kamap bipo.—Maika 4:3, 4; KTH 7:9-17.
Planti man i tok bilas long ol kain tok olsem bilong Baibel na long ol tok lukaut long ol samting God i mekim long ol lain em i bin skelim long kot. Tasol aposel Pita i tok ol kain man olsem i no tingim ol samting i bin kamap bipo. Em i tok: “Long taim bilong las de, ol man bilong tok bilas bai i kamap . . . Bai ol i tok bilas olsem, ‘Em i bin tok olsem em bai i kam bek gen, a?’ . . . Ol i no laik tingting gut na save long dispela samting. Bipo tru God i bin tok na skai i kamap. Na God i kisim wara na mekim graun i kamap namel long wara. Na bihain God i tok na em i mekim wara i kamap gen na bikpela tait i karamapim dispela graun, na graun i bagarap olgeta. Na nau, long wankain tok bilong God tasol, skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.”—2 Pita 3:3-7.
Long nau sampela man i bihainim tok bilong Jisas na ol i givim bel tru long givim toksave long ol manmeri bilong olgeta hap long dispela de bilong kot bai kamap na ol i autim gutnius bilong bel isi bai kamap bihain long dispela. (Matyu 24:14) Yumi no ken ting dispela toksave em samting nating, nogat. God i Gat Olgeta Strong i save truim tok bilong em.
Nupela Taim Bai Kamap
Taim yumi tingim ol bikpela senis bai kamap, wanem samting bai painim ol man long bihain? Long kirap bilong tok bilong em antap long maunten, Jisas i tok promis: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” Na bihain em i skulim ol disaipel bilong em long beten long God olsem: “Mipela i mas bihainim laik bilong yu long graun olsem ol i save bihainim long heven.” (Matyu 5:5; 6:10) Tru tumas, Jisas i skulim ol man olsem ol manmeri i stap gut long God ol bai kisim gutpela sindaun tru long dispela graun bilong yumi. Em i stori long dispela olsem “taim olgeta samting i kamap nupela.”—Matyu 19:28.
Olsem na taim yu tingim ol samting bai kamap bihain, no ken larim ol man bilong tok bilas i mekim na yu kisim tupela tingting long toksave bilong God. Tru, i olsem sindaun bilong yumi i gutpela, na dispela pasin bilong nau i bin stap longpela taim pinis long graun, tasol yumi no ken bilip tumas long dispela. God i kotim pinis ol manmeri bilong dispela graun. Olsem na larim ol tok long pinis bilong pas bilong Pita i strongim yu. Em i tok:
“Orait tingim. Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim dispela De, bai em i kamap kwiktaim. . . . Yupela i save wet long ol dispela samting i kamap. Olsem na yupela i mas wok strong long mekim yupela yet i stap klin long ai bilong God na yupela i no gat asua long wanpela samting. . . . Yupela i mas larim marimari bilong Krais i strongim yupela, na yupela i mas kisim planti save moa long em.” (2 Pita 3:11, 12, 14, 18) Larim ol samting i kamap long taim bilong Noa i skulim yu. Go klostu long God. Wok long kisim save long Jisas Krais. Kisim pasin bilong givim bel long God, na stap namel long ol planti milion manmeri i tingting pinis olsem ol i laik abrusim bagarap long pinis bilong dispela taim nogut na stap long gutpela taim bai kamap bihain.
[Piksa long pes 5]
Paslain long Bikpela Tait ol i bin mekim ol kain kain wok long ain
[Piksa long pes 7]
Gutpela samting bai kamap bihain