Yu Ting Jehova i Save Tingim Ol Samting Yu Mekim?
BAI yu bekim dispela askim olsem wanem? Planti bai tok: ‘Mi ting olsem God i bin lukim ol samting ol man olsem Moses, Gideon na Devit i bin mekim, tasol mi no ting God i laik save long ol samting mi inap mekim. Mi no wankain olsem Moses, Gideon o Devit.’
Tru, sampela gutpela man em Baibel i stori long ol, ol i bin mekim sampela bikpela wok i kamapim bilip bilong ol. Ol i ‘winim pait na daunim ol ami bilong planti king, pasim maus bilong ol laion, mekim ol traipela paia i dai, na ranawe na bainat i no inap kilim ol.’ (Hibru 11:33, 34) Tasol sampela narapela ol i bin kamapim bilip bilong ol long ol liklik samting, na Baibel i tokim yumi olsem God i tingim ol wok ol i mekim bilong kamapim bilip bilong ol. Olsem: Tingim stori bilong Baibel long wanpela wasman bilong sipsip, wanpela profet, na wanpela meri em man bilong em i dai pinis.
Wanpela Wasman Bilong Sipsip i Mekim Ofa
Yu inap tingim wanem samting bilong Abel, em namba tu pikinini man bilong Adam na Iv? Ating yu inap tingim olsem em i bin dai olsem man i dai bilong kamapim bilip bilong em, em wanpela samting i no inap painim planti bilong yumi. Tasol pastaim God i tingim Abel long narapela samting em i bin mekim.
Wanpela taim Abel i kisim sampela namba wan pikinini sipsip bilong em na mekim ofa long God. Ating yumi ting olsem ofa em i givim i olsem liklik samting tasol long nau, tasol Jehova i lukim dispela ofa na em i kamapim olsem em i amamas long en. Na i no dispela tasol. Klostu 4,000 yia bihain, Jehova i kirapim aposel Pol long raitim stori bilong dispela samting long Buk Hibru. Maski planti yia i lus, God i no lusim tingting long dispela ofa, a?—Hibru 6:10; 11:4.
Olsem wanem Abel i makim wanem kain ofa em bai givim? Baibel i no tokaut long dispela, tasol ating em i bin tingting gut pastaim long wanem kain ofa em bai givim. Em i man bilong lukautim sipsip, olsem na yumi ken ting em i mekim ofa long sampela sipsip bilong em. Tasol tingim, em i bin givim “wanpela naispela patpela pikinini sipsip.” (Stat 4:4) Na ating em i bin tingim tingim long bel ol tok Jehova i bin mekim long snek long gaden Iden olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai ol i krungutim het bilong yu, na bai yu kaikaim lek bilong ol.” (Stat 3:15; KTH 12:9) Tru, em i no save dispela “meri” na “lain bilong meri,” olsem ol pikinini bilong em, ol i makim husat, tasol ating Abel i luksave olsem snek bai ‘kaikaim lek bilong lain’ bilong meri, na dispela i makim olsem blut i mas kapsait. Em i luksave olsem i no gat wanpela samting i winim wanpela animal i gat laip. Tasol bikpela samting i olsem, ofa em i givim i stret tru.
Olsem Abel, ol Kristen long nau tu ol i save mekim ofa long God. Ol i no save givim ol namba wan pikinini sipsip mama i bin karim, tasol ‘oltaim ol i givim biknem long God, na dispela i stap olsem ofa ol i save givim long God. Yes, oltaim maus bilong ol i litimapim nem bilong en.’ (Hibru 13:15) Maus bilong yumi i save litimapim nem bilong God taim yumi tokim ol narapela long bilip bilong yumi.
Yu laik mekim sampela samting bilong mekim ofa bilong yu i kamap gutpela moa? Orait, tingim gut ol samting bilong helpim ol man long teritori bilong yu. Ol i tingting planti long wanem samting? Ol i save laikim wanem samting? Wanem ol tok bilong Baibel bai i stret long ol? Taim yu autim tok, long olgeta taim skelim ol toktok yu bin mekim long ol man na yu ken tingim olsem wanem tok yu autim i ken kamap gutpela moa. Na taim yu stori long Jehova, yu mas givim bel tru long mekim tok na kamapim strong. Mekim ofa bilong yu i givim tru “biknem long God.”
Wanpela Profet i Autim Tok Long Ol Manmeri i No Laik Harim Tok
Orait nau tingim profet Enok. Ating em wanpela tasol i bin stap olsem witnes bilong God Jehova. Olsem wanem? Olsem Enok, yu wanpela tasol long famili bilong yu i save lotuim Jehova? Yu wanpela tasol long klas bilong yu o long ples wok bilong yu i save bihainim ol stiatok bilong Baibel? Sapos olsem, ating sampela hevi bai painim yu. Ol pren, wanblut, wanklas, o wanwok bilong yu ol inap kirapim yu long brukim ol lo bilong God. Ating ol bai tok: “I no gat wanpela bai save long ol samting yu mekim. Mipela i no inap tokaut long en.” Ating ol bai tok strong olsem i no gutpela long tingting planti long ol lo bilong Baibel, long wanem, God i no save tingim ol samting yu mekim. Ol bai i no amamas long yu no gat wankain tingting na pasin olsem ol, olsem na ol bai wok strong tru long mekim kain kain samting bilong pulim yu na bai yu no strong moa long bihainim ol lo bilong Baibel.
Tru, i hatwok long karim kain hevi olsem, tasol yu inap. Tingim Enok, em i namba 7 man i kamap long lain tumbuna pikinini bilong Adam. (Jut 14) Long taim Enok i kamap, klostu olgeta manmeri i no sem moa long pasin ol i save mekim. Toktok bilong ol i nogut tru; pasin bilong ol i “nogut.” (Jut 15) Ol i mekim wankain pasin olsem planti manmeri long nau i save mekim.
Olsem wanem Enok i karim dispela hevi? Bekim bilong dispela askim i bikpela samting long yumi long nau. Tru long taim bilong Enok, em wanpela tasol i bin lotuim Jehova, tasol em i no stap wanpis. Em i wokabaut wantaim God.—Stat 5:22.
Bikpela samting long laip bilong Enok, em i laik mekim ol samting God i laikim. Em i bin save olsem bilong wokabaut wantaim God em i mas mekim klinpela na stretpela pasin, na i no dispela tasol. Jehova i laik em i autim tok tu. (Jut 14, 15) Ol manmeri i mas kisim toksave olsem God i lukim ol pasin nogut ol i save mekim. Enok i wokabaut wantaim God inap olsem 300 yia—em longpela taim tru winim taim yumi wokabaut wantaim God. I go inap long taim em i dai, em i wokabaut wantaim God.—Stat 5:23, 24.
Olsem Enok, yumi tu i gat wok bilong autim tok. (Matyu 24:14) Yumi save autim tok long ol haus, na tu, yumi save autim gutnius long ol wanblut, ol man yumi wok bisnis wantaim ol, na ol wanklas bilong yumi. Tasol ating sampela taim yumi pret na yumi no autim tok. Olsem wanem? Yu gat dispela hevi? Sapos olsem, yu no ken bel hevi. Bihainim pasin bilong ol Kristen bilong pastaim na beten askim God long strongim yu. (Aposel 4:29) No ken lusim tingting olsem taim yu wokabaut wantaim God, yu no stap wanpis.
Wanpela Meri Wanpis i Redim Kaikai
Tingim, wanpela meri wanpis em man bilong em i dai pinis na Baibel i no kolim nem bilong en, tasol em i kisim tupela blesing, long wanem, em i redim wanpela liklik kaikai. Em i no bilong Israel, em i bilong narapela ples na em i bin stap long taun Sarefat long yia 900 B.C.E. samting. Klostu long pinis bilong taim bilong bikpela san na taim bilong hangre, kaikai bilong em i laik pinis. Em i gat liklik plaua na wel tasol bilong mekim laspela kaikai bilong em na pikinini man bilong em.
Long dispela taim stret, wanpela man i kam kamap. Em profet bilong God, Elaija, na em i askim dispela meri long givim liklik hap kaikai long em. Dispela meri i gat liklik kaikai tasol inap long em yet na pikinini man bilong em, na em i no gat inap kaikai bilong givim long dispela man i kam. Tasol Elaija i mekim tok promis long em long nem bilong Jehova olsem sapos em i givim kaikai long Elaija, em yet na pikinini man bilong em bai i no inap sot long kaikai. Em i wanpela meri wanpis bilong narapela ples olsem na em i mas i gat strongpela bilip olsem God bilong ol Israel bai tingim em. Tasol em i bilipim tok bilong Elaija, na Jehova i givim gutpela blesing long em. “Plaua long sospen bilong en i no pinis na wel long sospen bilong en i no sot, olsem Bikpela i bin tok long maus bilong Elaija.” Dispela meri wantaim pikinini man bilong em ol i gat kaikai i go inap long taim bilong hangre i pinis.—1 King 17:8-16.
Tasol i gat narapela blesing moa dispela meri wanpis i kisim. Bihain liklik long dispela mirakel, pikinini man bilong em i kisim sik na i dai. Elaija i sori long em, olsem na em i beten askim Jehova long kirapim bek dispela pikinini man. (1 King 17:17-24) Dispela em wanpela nupela mirakel. I no gat stori long wanpela i bin kirap bek bipo! Olsem wanem? Jehova bai marimari gen long dispela meri wanpis bilong narapela lain? Yes. Jehova i givim strong long Elaija long kirapim bek dispela pikinini man. Bihain Jisas i stori long dispela gutpela samting dispela meri wanpis i kisim na em i tok: ‘Planti meri i stap long Israel, na man bilong ol i dai pinis . . . Tasol God i salim Elaija i go long taun Sarefat long hap bilong biktaun Saidon, long wanpela meri, man bilong en i dai pinis.’—Luk 4:25, 26.
Long nau planti hevi bilong mani i kamap; ol kantri i gat planti wok bisnis samting, ol tu i gat hevi bilong mani. Sampela bikpela kampani i rausim ol wokman bilong ol, em ol i bin stap gut long ol dispela kampani inap planti yia. Taim kain hevi olsem i kamap, ating wanpela Kristen bai tingting long lusim bikpela hap taim long mekim wok na bai kampani i no ken rausim em. Sapos em i mekim olsem em bai i gat liklik taim tasol bilong go long ol miting, insait long wok autim tok, o lukautim famili bilong em long ol samting bilong bel na spirit. Tasol maski wanem samting i kamap em i pilim olsem em i mas holim yet dispela wok mani bilong em.
I gat as na Kristen i tingting planti taim kain hevi olsem bilong mani i kamap, a? Long nau i hatwok long painim wok. Planti bilong yumi i no tingting long kamap maniman, tasol olsem meri wanpis bilong Sarefat, yumi laik kisim ol samting bilong skin em yumi mas i gat. Tasol aposel Pol i kirapim yumi long tingim tok bilong God olsem: “Bai mi no lusim yu. Bai mi no larim yu i stap nating. Nogat tru.” Yumi inap bilip tru na tok: “Bikpela i save helpim mi na mi no inap pret. Ol man i no inap mekim wanpela samting long mi.” (Hibru 13:5, 6) Pol i bilip strong tru long dispela promis, na oltaim Jehova i bin lukautim em. God bai mekim olsem long yumi tu sapos yumi no lusim em.
Ating yumi ting olsem yumi no inap mekim ol gutpela wok olsem Moses, Gideon, na Devit, tasol yumi ken bihainim pasin bilong ol long bilip. Na yumi ken tingim ol liklik samting Abel, Enok na meri wanpis long Sarefat i bin mekim bilong kamapim bilip bilong ol. Jehova i save tingim olgeta kain gutpela wok i kamapim bilip bilong man—ol liklik wok tu. Taim wanpela sumatin i pret long God na em i no kisim drak long ol wanskul, o wanpela Kristen i sakim wanpela wanwok i laik pulim em long mekim pasin pamuk, o wanpela lapun Witnes i wok long go yet long ol miting Kristen maski skin bilong em i les o em i gat sik, Jehova i save lukim ol dispela samting na em i save amamas tru!—Sindaun 27:11.
Yu Save Tingim Ol Wok Ol Narapela i Mekim?
Yes, Jehova i save lukim ol samting yumi mekim. Olsem na yumi mas bihainim pasin bilong God, na yumi tu i mas tingim wok ol narapela i mekim. (Efesus 5:1) Gutpela sapos yumi tingim ol hevi ol wanbilip Kristen bilong yumi i save karim bilong ol i ken go long ol miting bilong kongrigesen, na insait long wok autim tok, na ol wok ol i save mekim long wan wan de.
Tokim ol narapela i save lotuim Jehova olsem yu amamas long ol wok ol i save mekim. Ol bai amamas olsem yu luksave long wok ol i mekim, na tok yu mekim inap mekim gut bel bilong ol na ol bai save olsem Jehova tu i save tingim ol samting ol i mekim.