God i Amamas Long Noa​​—⁠Bilong Wanem Yumi Mas Tingim Dispela?

ATING yumi olgeta inap tingim bek sampela taim we yumi bin harim tok bilong wanpela bikpela samting i kamap. Yumi inap tingim yet planti samting bilong dispela taim​—⁠olsem yumi bin i stap we, na samting yumi bin mekim, na tingting bilong yumi long dispela samting i kamap. Na olsem tasol, yumi ken ting olsem Noa i no bin lusim tingting long dispela taim em God Jehova, King bilong heven na graun, i bin tokim em long wanpela bikpela samting i laik kamap. Jehova i tok em bai bagarapim “olgeta samting i gat laip.” Noa i mas wokim wanpela traipela sip bilong lukautim em yet wantaim famili bilong em, na sampela bilong olgeta kain animal.​​—⁠Stat 6:​9-​21.

Noa i mekim wanem? Em i amamas long harim dispela tok, o em i toktok planti? Na olsem wanem em i tokim meri pikinini bilong em long dispela samting? Baibel i no tokim yumi. Tasol samting Baibel i tokim yumi long en, em olsem: “Noa i mekim olgeta samting olsem God i tokim em.”​​—⁠Stat 6:​22.

Em wanpela bikpela samting yumi mas tingim, long wanem, dispela tok bilong Baibel i helpim yumi long save long wanpela as na God i amamas long Noa​—⁠Noa i redi long mekim olgeta samting God i tokim em long mekim. (Stat 6:⁠8) Wanem narapela samting i mekim na God i amamas long Noa? Bekim bilong en i bikpela samting, long wanem, yumi mas bihainim pasin bilong Noa na bai yumi inap abrusim bagarap taim God i kirap gen na pinisim tru ol pasin nogut long graun. Pastaim yumi ken tingim sindaun bilong Noa taim Bikpela Tait i no kamap yet.

Ol Spirit Nogut i Kam Daun Long Graun

Noa i bin stap long bipo tru. Mama i bin karim em olsem 1,000 yia samting bihain long God i wokim namba wan man. Sampela man i ting olsem ol man long dispela taim bipo ol i olsem hap man na hap monki, tasol nogat. Ol man long dispela taim bipo ol i gat ol tul ol i bin wokim long bras na ain, na ating Noa i bin yusim ol dispela tul long wokim sip. Na tu, ol i gat gita na mambu samting bilong mekim musik. Ol i marit, kamapim pikinini, wokim gaden, na lukautim bulmakau. Ol i wok long baim na salim ol samting. Long ol dispela samting, sindaun bilong ol man long bipo i kain olsem bilong yumi long nau.​​—⁠Stat 4:​20-​22; Luk 17:​26-​28.

Tasol long sampela samting, ol samting i narapela kain olgeta. Wanpela samting i olsem: Ol man long dispela taim bipo ol i save stap longpela taim tru, winim yumi long nau. Krismas bilong planti man i winim 800 yia. Noa i stap 950 yia; Adam, 930 yia; na Metusela, tumbuna papa bilong Noa, 969 yia.a​​—⁠Stat 5:​5, 27; 9:​29.

Stori bilong wanpela samting moa i narapela kain i stap long Stat 6:​1, 2: “Bihain planti manmeri i kamap pinis long graun, na ol i gat ol pikinini meri. Ol pikinini man bilong God i lukim ol dispela meri i naispela tumas. Na ol i kisim ol meri long laik bilong ol yet na maritim ol.” Ol dispela “pikinini man bilong God,” em ol ensel i bin lusim heven na tanim i kamap man na stap wantaim ol manmeri long graun. God i no bin salim ol i kam, na ol i no kam bilong helpim ol manmeri. Ol i “lusim ples bilong ol” long heven na bai ol i ken slip wantaim ol naispela meri hia long graun. Ol i kamap ensel nogut.​​—⁠Jut 6.

Ol dispela ensel nogut ol i man bilong bikhet, ol i gat bikpela strong na save, na ol i pulim ol man long mekim pasin nogut. Ol i bosim na daunim ol manmeri. Ol i no mekim wok bilong ol long pasin hait olsem sampela raskol i save mekim, nogat. Ol i bikhet long God na mekim long ples klia.

Ol dispela pikinini bilong God i slip wantaim ol meri na ol dispela meri i kamapim ol pikinini. Taim ol dispela pikinini i kamap bikpela, ol i gat bikpela strong tru. Ol man i givim wanpela nem Hibru long ol, em “Nefilim.” Baibel i tok: “Long dispela taim na long taim bihain tu i bin i gat ol traipela man [Nefilim] i stap long graun. Ol dispela man i pikinini bilong ol meri i bin slip wantaim ol pikinini man bilong God. Ol i strongpela man tru bilong mekim kain kain wok, na ol i gat biknem long dispela taim.” (Stat 6:⁠4) Ol man i pret nogut tru long ol Nefilim. Mining bilong dispela tok “Nefilim” i olsem “Man i Mekim Ol Narapela i Pundaun.” Ol i kilman na stori bilong ol long pait na bagarapim man, kain stori olsem i stap long ol tumbuna stori bilong bipo.

Bel Hevi Bilong Ol Stretpela Man

Baibel i tok long ol manmeri long dispela taim bipo olsem: “Pasin bilong ol manmeri long olgeta hap i nogut tru. Ol manmeri i tingting tasol long ol samting nogut. . . . Long olgeta hap bilong graun ol i wok long pait na bikhet tasol. . . . Olgeta lain manmeri i wok long mekim ol pasin nogut tasol.”​​—⁠Stat 6:​5, 11, 12.

Noa i stap namel long ol kain man olsem. Tasol em i no wankain olsem ol, nogat. “Noa em i gutpela man, na wokabaut bilong en i stret long ai bilong God.” (Stat 6:⁠9) I hatwok long stretpela man long wokabaut namel long ol man nogut. Ating Noa i bel hevi stret long toktok na pasin ol man i bihainim! Ating em i wankain olsem Lot, em wanpela stretpela man i bin stap bihain long Bikpela Tait. Lot, em i stap namel long ol man bilong Sodom, “em i lukim ol kain kain pasin pamuk samting bilong ol dispela man nogut na em i bel hevi tru . . . , na bel bilong en i pen tru long pasin bilong sakim lo ol i mekim.” (2 Pita 2:​7, 8) Yumi ken ting olsem Noa tu i bin bel hevi olsem.

Olsem wanem? Yu save bel hevi taim yu harim tok bilong ol samting nogut tru i kamap, o yu lukim ol pasin nogut ol lain yu stap namel long ol i bihainim? Sapos olsem, yu inap pilim tru tingting bilong Noa. Ating Noa i mas hatwok tru long stap namel long ol man i bihainim pasin nogut inap 600 yia, em krismas bilong em taim Bikpela Tait i kamap. Yumi ken ting olsem em i gat bikpela laik long ol dispela pasin nogut i mas pinis!​​—⁠Stat 7:⁠6.

Noa i No Pret Long Stap Narakain

Noa em i “gutpela man, na wokabaut bilong en i stret long ai bilong God.” (Stat 6:⁠9) Tingim: Baibel i tok wokabaut bilong em i stret long ai bilong God, i no long ai bilong ol man. Long ai bilong ol man paslain long Bikpela Tait, pasin bilong Noa i narapela kain. Yumi ken ting olsem em i no wanbel long tingting bilong ol na em i no insait long ol amamas nogut bilong dispela taim. Taim em i kirap wokim sip, ating ol i lap nogut na tok bilas long em. Ol i no ting samting em i tok long en bai kamap tru.

Na tu, Noa i gat ol strongpela bilip, na em i autim ol dispela bilip. Baibel i tok em i “man bilong tokaut long stretpela pasin.” (2 Pita 2:⁠5) Noa i save olsem ol man bai birua long em. Tumbuna papa bilong em, Enok, em wanpela stretpela man na em i bin tok profet olsem God bai kotim olgeta man nogut na mekim save long ol. Dispela i mekim na ol man i mekim nogut tru long Enok, tasol God i no larim ol birua i kilim em i dai. (Stat 5:​18, 21-​24; Hibru 11:5; 12:1; Jut 14, 15) Satan, ol ensel nogut, ol Nefilim, na klostu olgeta manmeri ol i birua long Noa, olsem na Noa i mas i gat strongpela bel na bilip olsem Jehova bai lukautim em.

Kirap long bipo yet, ol man i bin bel nogut long ol lain i save mekim wok bilong God. Ol i bin birua tu long Jisas Krais na ol disaipel bilong em. (Matyu 10:22; Jon 15:18) Noa i gat strongpela bel na em i no pret long mekim wok bilong God, maski ol narapela i no orait long dispela. Em i save olsem sapos God i amamas long em, dispela em i bikpela samting, winim ol birua i orait long em. Na tru tumas, God i amamas long Noa.

Noa i Bilip

Olsem yumi stori pinis, Noa i strongim bel na autim tok long ol manmeri. Ol i mekim wanem? Baibel i tok paslain long Bikpela Tait, ol i “wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.” Ol i no bihainim tok lukaut bilong Noa.​​—⁠Matyu 24:​38, 39.

Jisas i tok bai i gat wankain pasin long taim bilong yumi. Winim 100 yia pinis, ol Witnes Bilong Jehova i bin tokaut olsem Jehova bai truim promis bilong em long kamapim wanpela nupela taim i gat stretpela pasin long en. Maski planti milion manmeri i bilipim dispela tok, planti bilion manmeri i stap olsem tasol. “Ol i no laik tingting gut na save” olsem Bikpela Tait i bin kamap tru na dispela inap givim skul long ol.​​—⁠2 Pita 3:​5, 13.

Tasol Noa i tingim. Em i bilipim tok God Jehova i givim long em. Em i bihainim dispela tok na God i kisim bek em. Aposel Pol i tok: “Noa i bilip long God, na God i toksave long em long samting bai i kamap bihain, em samting Noa i no lukim yet. Orait em i bilipim tok bilong God na em i wokim wanpela sip. Na em wantaim meri pikinini bilong en ol i go insait long sip na ol i stap gut, na ol i no bagarap.”​​—⁠Hibru 11:⁠7.

Wanpela Gutpela Piksa Bilong Bihainim

Sip Noa i wokim em i traipela tru​​—⁠longpela bilong en i winim ragbi fil, na i go antap winim haus i gat 3-pela plua. Em i longpela tru, winim olgeta narapela traipela sip ol i bin wokim long diwai, inap 30 mita. Tru, sip bilong Noa i olsem wanpela traipela bokis​—⁠em i bilong trip tasol antap long wara​—⁠tasol maski i olsem, man i mas i gat save long wokim. Ol i mas penim insait na ausait bilong sip long kolta. Na ating ol i lusim 50 yia samting long wokim.​​—⁠Stat 6:​14-​16.

Na i gat sampela samting moa. Noa i mas bringim planti kaikai i kam insait long sip, inap long famili bilong em, na ol animal, inap long wanpela yia. Taim Bikpela Tait i no kamap yet, ol i mas bringim ol animal i kam insait long sip. “Noa i mekim olgeta samting olsem Bikpela i tok.” Ating em i amamas tru taim olgeta samting i redi pinis na nau Jehova i pasim dua bilong sip!​​—⁠Stat 6:​19-​21; 7:​5, 16.

Orait nau Bikpela Tait i kamap. Ren i pundaun inap 40 de na 40 nait. Olgeta i mas stap long sip inap wanpela yia, inap long graun i drai. (Stat 7:​11, 12; 8:​13-​16) Olgeta man nogut i bagarap. Noa na famili bilong em tasol i abrusim bagarap na stap laip long graun we i no gat pasin nogut i stap moa long en.

Baibel i tok dispela Bikpela Tait long taim bilong Noa i stap olsem piksa bilong “samting i mas kamap.” Em wanem samting? Baibel i tok: “Skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.” Tasol wankain olsem long taim bilong Noa, bai i gat ol man i abrusim bagarap. Yumi ken bilip tru olsem taim traim i kamap long ol man i bihainim God, em “i save long rot bilong kisim bek” ol.​​—⁠2 Pita 2:​5, 6, 9; 3:⁠7.

Noa i givim bel long God, em i stretpela man namel long ol man nogut. Em i bihainim tru tok bilong God. Em i no pret long bihainim pasin i stret, maski em i save dispela bai kirapim ol man husat i no laik tru long mekim wok bilong God long bel nogut na birua long em. Sapos yumi bihainim pasin bilong Noa long ol dispela samting, God bai amamas long yumi tu na yumi ken bilip tru olsem em bai kisim bek yumi na yumi ken stap long nupela taim klostu nau bai kamap.​​—⁠Song 37:​9, 10.

[Futnot]

[Rait long pes 5]

Stori bilong ol Nefilim long pait na bagarapim man, kain stori olsem i stap long ol tumbuna stori bilong bipo

[Piksa long pes 7]

Long rot bilong bihainim strongpela bilip bilong Noa, God bai amamas long yumi

[Piksa Kredit Lain long pes 5]

Alinari/Art Resource, NY