God i Gat Nem

WANEM namba wan samting yu save askim man long en taim yu bungim em long namba wan taim?— Yes, yu save askim long nem bilong em. Yumi olgeta i gat nem. God i givim nem long namba wan man i stap long graun. Em i kolim em Adam. Nem bilong meri bilong Adam em Iv.

Na i no ol man tasol i gat nem, nogat. Tingim ol narapela samting em ol tu i gat nem. Taim wanpela man i kisim wanpela dok, em i save givim nem long en, a?— Yes, em i bikpela samting long ol samting i mas i gat nem.

Long nait lukluk i go antap na lukim planti planti sta. Yu ting ol i gat nem?— Yes, God i bin givim nem long olgeta wan wan sta. Baibel i tok: “Em i makim pinis namba bilong ol sta, na em i save kolim nem bilong ol sta wan wan.”—Song 147:4.

Yu ting husat em i bikpela man tru, winim olgeta man long heven na graun?— Yes, em God. Yu ting em i gat nem?— Jisas i bin tok olsem God i gat nem. Wanpela taim Jisas i beten long God na em i tok: ‘Mi bin kamapim nem bilong yu long ol disaipel bilong mi.’ (Jon 17:26) Yu save long nem bilong God?— God yet i tokim yumi long nem bilong em. Em i tok: “Mi Jehova. Dispela em i nem bilong mi.” Olsem na nem bilong God em JEHOVA.—Aisaia 42:​8, NW.

Yu save pilim olsem wanem taim ol arapela i tingim nem bilong yu?— Yu amamas, a?— Jehova tu i laik bai ol man i save long nem bilong em. Olsem na yumi mas yusim nem Jehova taim yumi tokim ol arapela long God. Bikpela Tisa i bin yusim nem bilong God, Jehova, taim em i toktok long ol man. Wanpela taim Jisas i tok: “Yupela i mas laikim tru Jehova, God bilong yupela, long bel olgeta bilong yupela.”—Mak 12:​30, NW.

Jisas i save olsem “Jehova” i wanpela bikpela nem tru. Olsem na em i skulim ol disaipel bilong em long mekim wok long nem bilong God. Em i skulim ol tu long kolim nem bilong God taim ol i beten. Jisas i save olsem God i laik bai olgeta man i mas save long nem bilong Em, Jehova.

Bipo tru, God i bin kamapim long Moses olsem nem bilong Em i bikpela samting. Moses i bilong lain Israel. Ol lain Israel i bin stap long kantri ol i kolim Isip. Ol i kolim ol manmeri bilong dispela hap olsem ol Isip. Ol Isip i mekim lain Israel i kamap ol wokboi nating na ol i mekim hatpela pasin tru long ol. Taim Moses i kamap bikpela, em i traim long helpim wanpela wantok bilong em. Dispela i mekim na Fero, em king bilong Isip, em i kros. Em i laik kilim i dai Moses! Olsem na Moses i ranawe lusim Isip.

Moses i go long narapela kantri. Em kantri Midian. Long dispela hap, Moses i marit na i kamapim famili. Na tu, em i mekim wok olsem wasman bilong sipsip. Wanpela taim, Moses i lukautim ol sipsip klostu long wanpela maunten na em i lukim wanpela narakain samting i kamap. Paia i lait long wanpela liklik diwai, tasol paia i no kukim dispela diwai! Moses i go klostu moa na bai em inap lukim gut dispela samting.

Yu save long wanem samting i kamap?— Moses i harim wanpela nek i kam long dispela diwai i paia. Dispela nek i singaut, “Moses! Moses!” Husat i mekim dispela tok?— Em God i toktok! God i laik bai Moses i mekim wanpela bikpela wok. God i tok: ‘Kam, mi laik salim yu i go long Fero, em king bilong Isip, na yu mas kisim lain bilong mi, em lain Israel, na ol i ken lusim Isip.’ God i promis long em bai helpim Moses long mekim dispela samting.

Tasol Moses i tokim God: ‘Sapos mi go long lain Israel long Isip na mi tokim ol, God i bin salim mi na mi kam. Orait olsem wanem sapos ol i askim mi, “Wanem nem bilong em?” Bai mi tok wanem?’ God i tokim Moses long tokim ol Israel olsem: ‘Jehova i bin salim mi i kam long yupela, na em i tokim mi olsem Jehova em i nem bilong em inap oltaim oltaim.’ (Kisim Bek 3:​1-15; NW) Dispela i makim olsem God bai holim dispela nem Jehova. Em i no inap senisim dispela nem. God i laik bai ol man i kolim dispela nem long em inap oltaim oltaim.

Taim Moses i go bek long Isip, ol Isip i ting Jehova em i wanpela liklik god nating bilong ol Israel. Ol i no ting em i God bilong graun olgeta. Olsem na Jehova i tokim king bilong Isip: ‘Bai mi kamapim nem bilong mi long olgeta hap bilong graun.’ (Kisim Bek 9:16) Na tru tumas, Jehova i bin mekim olsem. Yu save long olsem wanem em i bin mekim?—

Em i salim Moses i go kisim lain Israel na ol i lusim Isip. Taim ol i kamap long solwara Retsi, Jehova i mekim na solwara i bruk i go tupela hap, na long namel i gat rot bilong wokabaut. Lain Israel i bihainim dispela rot na ol i go kamap gut long hapsait bilong solwara. Tasol taim Fero na olgeta ami bilong em i stap pinis long dispela rot, solwara i sanap long sait sait i bruk i kam daun na olgeta Isip i dai.

I no longtaim na ol man long olgeta hap i harim stori bilong samting Jehova i bin mekim long solwara Retsi. Olsem wanem yumi save ol i bin harim dispela stori?— Orait inap olsem 40 yia bihain, lain Israel i kamap long Kenan, em dispela graun Jehova i bin tok promis long givim long ol. Long dispela hap, yangpela meri Rahap i tokim tupela man Israel olsem: “Mipela i bin harim stori long olsem wanem Jehova i bin mekim solwara Retsi i drai taim yupela i lusim Isip.”—Josua 2:​10, NW.

Long nau, planti man ol i wankain olsem ol dispela Isip. Ol i no bilip olsem Jehova em i God bilong graun olgeta. Olsem na Jehova i laik bai lain bilong em yet i tokim ol arapela man long em. Jisas i bin mekim olsem. Klostu long taim em i laik dai, em i beten na tokim Jehova olsem: “Mi bin kamapim nem bilong yu long ol.”—Jon 17:26.

Olsem wanem? Yu laik bihainim pasin bilong Jisas? Orait, yu mas tokim ol arapela olsem nem bilong God em Jehova. Ating yu bai lukim olsem planti man i no save long dispela nem. Wanpela as na ol man i no save long nem bilong God em olsem: Sampela lain bilong tanim tok bilong Baibel ol i bin rausim nem bilong God na putim Bikpela. Tasol sapos yu lukim Kisim Bek 3:15 long bikpela Buk Baibel, bai yu lukim wanpela toksave long sta daunbilo. Em i tok: “Long Tok Pisin, yumi bihainim pasin bilong ol [Hibru], na wanem hap i gat dispela nem ‘Yhwh’ i stap, yumi tanim olsem, ‘Bikpela.’ ”

Dispela i skulim yumi long wanem samting?— Yes, em i skulim yumi olsem God i gat nem, em Jehova. Em i nem bilong God i Gat Olgeta Strong, em i Papa bilong Jisas na em i Man i bin wokim olgeta samting. Na tingim, Jisas i tok olsem yumi mas laikim tru God Jehova long bel olgeta bilong yumi. Olsem wanem? Yu laikim Jehova?—

Olsem wanem yumi inap soim olsem yumi laikim Jehova?— Wanpela rot em yumi save long em olsem wanpela Pren. Narapela rot em yumi tokim ol arapela long nem bilong em. Yumi ken tokim ol long ol gutpela samting Jehova i bin wokim na ol gutpela pasin em i bin mekim. Dispela i save mekim Jehova i amamas tru, long wanem, em i laik bai ol manmeri i mas save long em. Yumi tu inap insait long dispela wok, a?—

Tasol i no olgeta man bai i gat laik long harim taim yumi tokim ol long Jehova. Planti man i no bin harim Jisas, em Bikpela Tisa, taim em i tokim ol long God. Tasol dispela i no pasim Jisas long autim tok long Jehova.

Olsem na yumi ken bihainim pasin bilong Jisas. Yumi mas wok yet long tokim ol man long Jehova. Sapos yumi mekim olsem, God Jehova bai amamas long yumi, long wanem, yumi soim olsem yumi laikim tru nem bilong em.