“No Ken Toktok Planti”

“Long olgeta samting yupela i mekim, yupela . . . i no ken toktok planti.”​—FILIPAI 2:14.

1, 2. Aposel Pol i givim wanem tok kaunsel long ol Kristen long Filipai na Korin? Bilong wanem em i givim dispela kain tok?

LONG pas holi spirit i kirapim aposel Pol long raitim long kongrigesen Kristen long Filipai, em i mekim bikpela tok amamas long ol. Em i tok amamas long ol wanbilip bilong em long dispela taun long ol i save givim ol samting na wok strong, na em i tok amamas long ol gutpela wok ol i save mekim. Tasol Pol i tokim ol tu olsem ‘long olgeta samting ol i mekim, ol i no ken toktok planti.’ (Filipai 2:14) Bilong wanem aposel Pol i mekim dispela tok?

² Pol i save long ol samting pasin bilong toktok planti o tok kros inap kamapim. Sampela yia paslain long dispela, em i bin tokim kongrigesen long Korin olsem pasin bilong toktok planti inap kamapim bikpela hevi. Pol i tok taim lain Israel i stap long ples drai nating, planti taim ol i mekim Jehova i belhat. Ol i mekim olsem wanem? Ol i mangal long ol samting nogut, lotuim ol god giaman, mekim pasin pamuk, ol i traim Jehova, na ol i toktok planti. Pol i kirapim ol Korin long kisim skul long dispela samting. Em i tok: “Yupela i no ken tok kros [“toktok planti,” NW] long God, olsem sampela bilong ol i bin mekim, na ensel . . . i bin kam na kilim ol i dai.”​—1 Korin 10:​6-11.

 3. Bilong wanem yumi laik skelim pasin bilong toktok planti?

³ Yumi ol wokman bilong Jehova long nau i gat wankain pasin olsem kongrigesen long Filipai. Yumi givim bel long mekim ol gutpela wok, na yumi gat pasin laikim namel long yumi yet. (Jon 13:​34, 35) Tasol taim yumi tingim ol samting nogut em pasin bilong toktok planti i bin kamapim long lain bilong God long bipo, i gat as tru na yumi mas bihainim dispela tok: “Long olgeta samting yupela i mekim, yupela . . . i no ken toktok planti.” Orait pastaim yumi ken tingim sampela stori bilong Baibel long ol man i bin toktok planti. Na yumi ken skelim ol samting yumi ken mekim bambai pasin bilong toktok planti i no ken kamapim hevi long nau.

Ol Manmeri Nogut i Tok Kros Long Jehova

 4. Lain Israel i toktok planti long wanem samting long ples drai nating?

⁴ Taim Baibel i stori long ol samting i painim lain Israel taim ol i stap long ples drai nating inap 40 yia, Baibel i yusim tok Hibru i makim pasin bilong ‘toktok planti, komplein, o tok kros.’ Sampela taim lain Israel i no amamas long sindaun bilong ol na ol i toktok planti. Olsem: Inap sampela wik tasol bihain long ol i lusim wok kalabus long Isip, olgeta manmeri bilong Israel “i kros na toktok planti long Moses na Aron.” Ol i toktok planti long kaikai na i tok: “Mobeta Bikpela i bin kilim mipela long Isip. Taim mipela i stap long Isip mipela i save kisim olkain kaikai inap long laik bilong mipela yet. Tasol yutupela i kisim mipela i kam long dispela ples wesan i no gat kaikai, na yutupela i laik bai mipela i stap hangre inap mipela olgeta i dai.”​—Kisim Bek 16:​1-3.

 5. Taim lain Israel i komplein, ol i toktok planti long husat tru?

⁵ Tasol Jehova i bin lukautim lain Israel long ol samting ol i mas kisim long ples drai nating, em i givim kaikai na wara long ol. Lain Israel i no inap dai long hangre long ples drai nating. Tasol ol i no amamas long sindaun bilong ol, olsem na ol i toktok planti. Tru, ol i komplein long Moses na Aron, tasol long ai bilong Jehova ol i toktok planti long God yet. Moses i tokim lain Israel: “Bikpela . . . i harim yupela i toktok planti long em. Tasol mitupela i samting nating. Yupela i no tok kros long mipela. Nogat. Yupela i tok kros long Bikpela tasol.”​—Kisim Bek 16:​4-8.

6, 7. Olsem Namba 14:​1-3 i kamapim, olsem wanem pasin bilong lain Israel i bin senis?

⁶ Bihain liklik, lain Israel i toktok planti gen. Moses i salim 12-pela man long go lukstil long Graun Bilong Promis. Tenpela man i kam bek na ol i no mekim gutpela tok. Dispela i kamapim wanem samting? “Olgeta i tok kros long Moses wantaim Aron. Ol i tok olsem, ‘I gutpela sapos mipela i bin i dai long Isip o long dispela ples drai nating. Bilong wanem Bikpela i laik kisim mipela i go long dispela kantri [Kenan]? Sapos mipela i go long en, bai ol i kilim mipela long pait na bai ol i kisim ol meri na pikinini bilong mipela olsem kalabus. Sapos yumi go bek long Isip, em bai i gutpela.’ ”​—Namba 14:​1-3.

⁷ Pasin bilong lain Israel i bin senis olgeta! Pastaim ol i bin amamas tru long ol i lusim Isip na abrusim bagarap long solwara Retsi na dispela i bin kirapim ol long mekim singsing bilong litimapim nem bilong Jehova. (Kisim Bek 15:​1-21) Tasol ples drai nating i gat ol hatwok bilong en na ol i pret long ol Kenan, olsem na amamas bilong lain bilong God i pinis na ol i kirap toktok planti. Ol i no tok tenkyu long God long em i bin helpim ol long kamap fri, nogat, ol i sutim tok long em olsem ol i sot long kaikai samting. Olsem na pasin bilong toktok planti i soim olsem ol i no gat stretpela tingting long ol samting Jehova i bin givim long ol. Yumi no kirap nogut long em i tok: “Planti taim ol dispela lain manmeri nogut i bin tok kros long mi. . . . Wanem taim bai ol i lusim dispela kain tok?”​—Namba 14:27; 21:5.

Toktok Planti Long Taim Bilong Ol Aposel

8, 9. Kamapim stori bilong sampela man long Ol Skripsa Grik em ol i bin toktok planti.

⁸ Ol stori yumi kamapim pinis i stori long ol manmeri i tokaut stret long ol samting ol i no amamas long en. Tasol taim Jisas Krais i stap long Jerusalem long Ol Bikpela De Bilong i Stap Long Haus Win long 32 C.E., “ol manmeri i toktok planti long em namel long ol yet.” (Jon 7:​12, 13, 32) I luk olsem ol i tok isi isi namel long ol yet, sampela i tok em i gutpela man, na sampela i tok em i no gutpela man.

⁹ Long narapela taim, Jisas na ol disaipel bilong em i stap long haus bilong Livai, o Matyu, em man bilong kisim takis. “Ol Farisi wantaim ol saveman bilong lo bilong lain Farisi ol i toktok planti long ol disaipel bilong Jisas. Ol i tok: ‘Watpo yupela i save kaikai na dring wantaim ol man bilong kisim takis na ol man bilong mekim sin?’ ” (Luk 5:​27-30) Bihain liklik long Galili “ol Juda i harim Jisas i tok, ‘Mi yet, mi dispela bret i bin lusim heven na i kam daun’ na ol i kros na i toktok planti long em.” Sampela disaipel bilong Jisas tu i bel hevi long tok Jisas i mekim na ol i kirap toktok planti.​—Jon 6:​41, 60, 61.

10, 11. Bilong wanem ol Juda i save tok Grik i toktok planti? Ol elda Kristen i ken lainim wanem samting long pasin ol aposel i mekim taim ol man i toktok planti?

¹⁰ Gutpela samting i kamap bihain liklik long Pentikos 33 C.E., taim sampela lain i toktok planti. Planti nupela disaipel, em ol i kam long ol narapela kantri, ol i stap na ol wanbilip long Judia i lukautim ol, tasol hevi i kamap long pasin bilong serim kaikai. Baibel i tok: “Ol disaipel i save tok Grik, ol i gat kros long ol disaipel i save tok Aram. Ol i tok olsem, ‘Long olgeta de yupela i save helpim ol manmeri i sot long kaikai samting, tasol yupela i no save helpim ol meri bilong mipela, man bilong ol i dai pinis.’ ”​—Aposel 6:1.

¹¹ Ol dispela manmeri i toktok planti ol i no olsem lain Israel long ples drai nating. Ol dispela Juda i save tok Grik ol i no tingim ol yet na komplein long sindaun bilong ol. Ol i toktok long sampela meri, man bilong ol i dai pinis, ol i no kisim helpim. Na tu, ol dispela lain i toktok planti, ol i no laik kamapim hevi o toktok planti long Jehova. Ol i komplein long ol aposel na ol dispela aposel i kirap kwik long stretim dispela samting, long wanem, komplein bilong ol i gat as bilong en. Ol aposel i stap gutpela piksa ol elda Kristen long nau i ken bihainim! Ol elda i was gut, nogut ol i ‘pasim yau na i no harim ol rabisman i singaut long ol bilong helpim ol.’​—Sindaun 21:13; Aposel 6:​2-6.

Pasin Bilong Toktok Planti Inap Bagarapim Yu Isi Isi

12, 13. (a) Mekim tok piksa i soim ol samting pasin bilong toktok planti i save kamapim. (b) Wanem samting inap kirapim wanpela long toktok planti?

¹² Planti stori bilong Baibel nau yumi bin skelim i soim olsem pasin bilong toktok planti i bin kamapim bikpela hevi insait long lain bilong God long bipo. Olsem na em i gutpela long yumi tingting gut long ol samting nogut dispela pasin inap kamapim long nau. Yumi ken mekim tok piksa long dispela samting. Planti ain i save ros. Taim liklik ros i kamap pinis long ain na man i no mekim wanpela samting bilong stretim, orait ros inap go bikpela na dispela ain i no gat wok moa bilong en. Planti ka i stap nating na ol man i no inap draivim moa. Ensin bilong ol i no bagarap, nogat, ros i mekim na ol ka i no seif long draivim. Olsem wanem dispela tok piksa i stret long pasin bilong toktok planti?

¹³ Ol ain i save ros, na olsem tasol ol man i gat sin i save komplein. Yumi mas was gut, nogut yumi kirap bihainim dispela pasin. Wara na sol i save mekim ros i go bikpela hariap, na olsem tasol ol hevi i save kirapim yumi long toktok planti. Ol hevi inap mekim na liklik samting yumi no amamas long en i kamap bikpela samting yumi bel hevi tru long en. Long dispela taim bilong las de, pasin bilong dispela graun i wok long i go nogut moa, na ating ol samting yumi ken komplein long en bai i kamap planti moa. (2 Timoti 3:​1-5) Olsem na wanpela wokman bilong Jehova inap kirap toktok planti long narapela. Ating em i toktok planti long wanpela liklik samting, olsem em i no amamas long pasin kranki bilong narapela, o long save bilong em long mekim samting, o wok em i holim insait long oganaisesen.

14, 15. Bilong wanem yumi mas daunim pasin bilong komplein?

¹⁴ Maski i gat wanem as na yumi no amamas long sampela samting, tasol sapos yumi no daunim pasin bilong komplein, dispela inap mekim na yumi no amamas long ol samting na pasin bilong toktok planti i kamap pasin bilong yumi. Em nau, ol samting nogut em pasin bilong toktok planti i save kamapim inap bagarapim yumi olgeta long ol samting bilong spirit. Taim lain Israel i toktok planti long sindaun bilong ol long ples drai nating, ol i sutim tok long Jehova. (Kisim Bek 16:8) Yumi no ken tru bihainim pasin bilong ol!

¹⁵ Sapos yumi peintim ain long peint i pasim ros na stretim kwik ol hap we liklik ros i kamap pinis long en, ating ain bai i no ros hariap. Na olsem tasol, sapos yumi luksave olsem yumi gat dispela pasin bilong komplein, orait yumi inap bosim dispela pasin sapos kwiktaim yumi beten na wok strong long stretim. Olsem wanem yumi ken mekim olsem?

Kisim Tingting Bilong Jehova

16. Olsem wanem yumi ken daunim pasin bilong komplein?

¹⁶ Pasin bilong toktok planti i mekim na yumi tingting long yumi yet na ol hevi bilong yumi na yumi no tingim ol gutpela samting yumi ol Witnes Bilong Jehova i gat. Yumi mas kirapim yumi yet long tingim ol dispela gutpela samting bambai yumi ken daunim pasin bilong komplein. Olsem: Yumi olgeta wan wan i gat wanpela gutpela blesing​—yumi holim nem bilong God, Jehova. (Aisaia 43:​10, NW) Yumi ken pas gut wantaim em, na yumi inap toktok long Man bilong “harim beten” long olgeta taim. (Song 65:2; Jems 4:8) I stap bilong yumi i gat as tru bilong en, long wanem, yumi kliagut long bikpela tok long husat i mas i stap nambawan bos bilong heven na graun, na tu, wanpela gutpela samting yumi inap mekim em yumi ken bihainim tru God. (Sindaun 27:11) Yumi inap autim tok oltaim long gutnius bilong Kingdom. (Matyu 24:14) Sapos yumi bilip long ofa bilong Jisas Krais long baim bek ol man, maus bilong bel bilong yumi no inap kotim yumi. (Jon 3:16) Yumi gat ol dispela gutpela samting maski yumi mas karim wanem kain hevi.

17. Bilong wanem yumi mas kisim tingting bilong Jehova long ol samting, maski i gat as tru long komplein long wanpela samting?

¹⁷ Yumi mas traim long kisim tingting bilong Jehova long ol samting, na i no bilong yumi yet tasol. Man bilong raitim song, Devit, i tok: “God, yu mas skulim mi long gutpela pasin bilong yu, na soim mi long rot bilong yu.” (Song 25:4) Sapos i gat as tru long komplein long wanpela samting, Jehova bai luksave long dispela. Em inap stretim hariap dispela hevi. Olsem na bilong wanem sampela taim em i larim wanpela hevi i stap? Em inap mekim olsem bilong helpim yumi long kamapim ol gutpela pasin, olsem pasin bilong stap isi na no ken les kwik, sanap strong na karim hevi, bilip, na i no belhat kwik.​—Jems 1:​2-4.

18, 19. Stori long ol samting inap kamap sapos yumi karim hevi na i no komplein long en.

¹⁸ Taim yumi karim hevi na yumi no komplein, dispela i helpim yumi long kisim ol gutpela pasin, na tu, ol narapela husat i lukim gutpela pasin bilong yumi inap pilim tru dispela. Long 2003 sampela Witnes Bilong Jehova long Jemani i raun long bas i go long kibung long Hangari. Bas draiva i no wanpela Witnes, na em i tingting planti long em i mas i stap wantaim ol Witnes inap tenpela de. Tasol long pinis bilong raun, em i senisim tru tingting bilong em. Bilong wanem?

¹⁹ Taim ol i raun long bas, sampela samting i no wok gut, tasol ol Witnes i no komplein. Draiva i tok ol Witnes i gutpela pasindia, winim olgeta pasindia em i bin kisim raun! Na em i tok promis olsem taim ol Witnes i kam long haus bilong em, em bai singautim ol i kam insait na putim gut yau long tok bilong ol. Gutpela samting tru i kamap taim ol pasindia ‘i no toktok planti long ol samting’!

Lusim Rong i Kamapim Pasin Wanbel

20. Bilong wanem yumi mas lusim rong bilong narapela?

²⁰ Olsem wanem sapos yumi gat tok long wanpela wanbilip? Sapos em i wanpela bikpela samting, yumi mas bihainim stiatok em Jisas i kolim long Matyu 18:​15-17. Tasol ating i no gat wok long mekim olsem long olgeta taim, long wanem, planti hevi i liklik samting tasol. Yu ken ting olsem dispela hevi i opim rot long yu ken lainim pasin bilong lusim rong bilong narapela. Pol i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim.” (Kolosi 3:​13, 14) Olsem wanem? Yumi redi long lusim rong bilong narapela man? I gat as tru na Jehova i ken komplein long ol samting yumi mekim. Tasol planti taim em i sori na i lusim rong bilong yumi.

21. Ol man i harim tok bilong man i toktok planti, dispela inap mekim wanem long ol?

²¹ Maski yu bel hevi long wanem samting, pasin bilong toktok planti i no inap stretim dispela. Tok Hibru i makim “toktok planti” inap makim tu pasin bilong “tok kros.” Ating yumi no amamas long stap wantaim man i gat pasin bilong toktok planti na yumi laik stap longwe long em. Sapos yumi yet i toktok planti, o tok kros, ol narapela inap pilim wankain long yumi. Ating ol i no amamas long harim tok yumi mekim na ol i no laik poromanim yumi! Ating sampela bai putim yau taim yumi toktok planti, tasol dispela i no kirapim ol long laikim yumi.

22. Wanpela yangpela meri i tok wanem long ol Witnes Bilong Jehova?

²² Pasin bilong lusim rong bilong narapela i kamapim pasin wanbel​—em samting lain bilong Jehova i laikim tumas. (Song 133:​1-3) Long wanpela kantri long Yurop, wanpela yangpela meri Katolik i gat 17 krismas i raitim pas long brens ofis bilong ol Witnes Bilong Jehova bilong tok amamas long ol. Em i tok: “Mi no save long narapela oganaisesen we ol memba bilong en i no gat pasin birua, pasin mangal, tingting nogut long narapela, tingim ol yet, o brukim lain.”

23. Bai yumi stori long wanem samting long stadi i kamap bihain long dispela?

²³ Pasin bilong amamas tru long ol gutpela samting yumi kisim taim yumi lotuim God tru, Jehova, bai helpim yumi long kamapim pasin wanbel na sakim pasin bilong toktok planti long ol samting bilong ol narapela. Stadi i kamap bihain long dispela bai soim olsem wanem ol pasin God i lainim yumi long en i helpim yumi long abrusim wanpela kain pasin bilong toktok planti i nogut moa​—em pasin bilong toktok planti long oganaisesen bilong Jehova long graun.

Yu Inap Tingim?

• Wanem samting i insait long pasin bilong toktok planti?

• Mekim tok piksa long ol samting pasin bilong toktok planti i save kamapim?

• Wanem samting inap helpim yumi long daunim pasin bilong toktok planti?

• Olsem wanem pasin bilong amamas long lusim rong inap helpim yumi long sakim pasin bilong toktok planti?

[Piksa long pes 14]

Lain Israel i bin toktok planti long Jehova!

[Piksa long pes 17]

Yu traim long kisim tingting bilong Jehova long ol samting?

[Ol Piksa long pes 18]

Pasin bilong lusim rong i kamapim pasin wanbel Kristen