Ol Samting Josua i Tingim Bek
JEHOVA i tok: “Wokman bilong mi, Moses, i dai pinis. Orait yupela i mas redi nau. Yu wantaim olgeta manmeri bilong Israel, yupela i mas brukim wara Jordan na i go kamap long dispela graun mi laik givim long yupela.” (Josua 1:2) Man! Josua i kisim wanpela bikpela wok tru! Klostu 40 yia em i bin i stap olsem wokman bilong Moses. Nau Jehova i tokim em long kisim ples bilong bikman bilong em na bringim ol Israel i go insait long Graun Bilong Promis.
Taim Josua i tingim ol samting bai kamap bihain, ating em i tingim bek ol traim i painim em pinis na em i bin winim ol dispela traim. Ol samting Josua i tingim bek i bikpela samting tru bilong helpim em long dispela taim bipo, na em inap helpim tu ol Kristen long nau.
Pastaim Wokboi na Bihain Kepten
Wanpela samting Josua i tingim bek em ol planti yia em i bin mekim wok kalabus. (Kisim Bek 1:13, 14; 2:23) Yumi no inap save long ol samting i painim Josua long dispela taim, long wanem, Baibel i no stori tumas long en. Ating taim Josua i bin mekim wok bilong em long Isip em i bin lain long stretim gut ol wok, na em i bin helpim ol Hibru na ol “planti arapela lain manmeri” long stretim ol samting bilong ranawe long dispela kantri.—Kisim Bek 12:38.
Josua i bilong wanpela famili bilong lain Efraim. Bubu bilong em, Elisama, em i wanpela hetman bilong dispela lain na em i bin bosim 108,100 soldia bilong tripela lain bilong Israel. (Namba 1:4, 10, 16; 2:18-24; 1 Stori 7:20, 26, 27) Tasol bihain liklik long ol Israel i bin lusim Isip na ol Amalek i laik pait long ol, Moses i singautim Josua long stretim ol samting bilong pait long ol. (Kisim Bek 17:8, 9a) Bilong wanem Moses i makim Josua, na em i no makim bubu o papa bilong em? Wanpela tingting i olsem: “Josua em hetman bilong bikpela lain Efraim, na man i gat nem pinis long stretim gut wok, na man ol narapela i bilip tru long em, olsem na Moses i makim em olsem lida, long wanem, em i gat save tru long makim ol soldia na stretim ol samting bilong pait.”
Tasol maski wanem samting i as tru bilong dispela, Josua i mekim ol samting olsem Moses i tokim em long mekim. Maski ol Israel i no gat save liklik long pait, Josua i bilip strong olsem God bai helpim ol. Olsem na taim Moses i tokim Josua, “tumora . . . mi bai sanap antap long dispela liklik maunten na holim stik wokabaut God i bin tokim mi long karim.” Em nau, Josua i bilip strong. Ating Josua i mas tingim bek olsem nau tasol Jehova i bin bagarapim nambawan bikpela ami bilong dispela taim. Long de bihain, taim Moses i litimapim han bilong em i go antap na em i holim i stap inap san i go daun, ol birua i no inap winim ol Israel, na ol Amalek i bagarap olgeta. Orait nau Jehova i tokim Moses long raitim tok bilong Em long wanpela buk na “givim dispela tok long Josua,” olsem: “Mi Bikpela, bai mi pinisim tru ol Amalek, na bai ol manmeri i no ken tingting moa long ol.” (Kisim Bek 17:9b-14) Tru tumas, Jehova bai givim dispela strafe long ol.
Wokman Bilong Moses
Ol samting i kamap long ol Amalek i bin strongim tru pasin pren namel long Josua na Moses. Josua i holim gutpela wok olsem wokman bilong Moses, o “man bilong helpim Moses,” kirap long “taim em i yangpela yet” i go inap long taim Moses i dai, inap olsem 40 yia.—Namba 11:28.
Dispela namba em i holim i makim olsem em i gat rot long mekim sampela gutpela wok na sampela bikpela wok tu. Olsem: Taim Moses, Aron, ol pikinini man bilong Aron, na 70 lida bilong Israel, ol i go antap long maunten Sainai na long driman samting ol i lukim lait bilong Jehova, ating Josua i stap wantaim ol. Em i wokman bilong Moses, olsem na taim Moses i go antap moa long maunten, Josua i go wantaim em, tasol em i stap longwe liklik taim Moses i go insait long klaut i makim olsem Jehova i stap. Josua i bin stap long maunten inap 40 san na 40 nait. Em i wetim bikman bilong em i kam bek, na taim Moses i kirap long go daun na i karim tupela hap ston God i bin raitim Lo long en, Josua i stap wetim em.—Kisim Bek 24:1, 2, 9-18; 32:15-17.
Bihain long taim ol Israel i lotuim bulmakau gol, Josua i stap yet olsem wokman bilong Moses long haus sel i stap longwe liklik ausait long kem. Long dispela hap Jehova i save toktok wantaim Moses. Tasol taim Moses i go bek long kem, Josua “i save stap yet insait. Em i no save lusim haus sel bilong God.” Ating em i mas i stap long dispela haus sel bambai ol Israel i no ken go insait long en taim ol i no stap klin. Man! Josua i tingim gut wok bilong em!—Kisim Bek 33:7, 11.
Man bilong raitim stori bilong ol samting i bin kamap bipo, Josephus, em i bin tok olsem krismas bilong Moses i winim krismas bilong Josua inap 35 yia, olsem na pasin bilong poroman wantaim Moses i bin strongim tru bilip bilong Josua. Ol i kolim pasin pren i stap namel long tupela olsem “man i bikpela pinis i pas wantaim man i yangpela, na bikman i pas wantaim sumatin,” na dispela i mekim na Josua i kamap “man i strong tru na ol man inap bilip long em.” Long nau yumi no gat ol profet olsem Moses i stap namel long yumi, tasol long ol kongrigesen bilong lain bilong Jehova i gat sampela man i stap lapun na ol i gat bikpela save na ol i strong tru long ol samting bilong spirit, olsem na ol i bikpela samting bilong strongim tru yumi. Olsem wanem? Yu save amamas long ol? Yu kisim sampela gutpela tingting na save long ol?
Man Bilong Lukstil Long Kenan
Bihain liklik long taim ol Israel i kisim Lo, wanpela bikpela samting i kamap long i stap bilong Josua. Ol i makim em olsem maus bilong lain bilong em bilong lukstil long Graun Bilong Promis. Yumi save gut long dispela stori. Olgeta 12-pela man bilong lukstil i wanbel long tok olsem graun “i gutpela tru na i gat planti gris,” olsem Jehova i bin tok promis long en. Tasol 10-pela i no bilip long Jehova na ol i pret, nogut ol Israel i no inap rausim ol manmeri bilong dispela kantri. Josua na Kalep tasol i strong long ol manmeri i no ken pret na bikhet, long wanem, Jehova bai stap wantaim ol. Orait nau olgeta lain i no bilipim tok bilong tupela na ol i tok long tromoi ston long tupela na kilim tupela i dai. Ating ol bai mekim olsem, tasol Jehova i kamapim bikpela lait na strong bilong em. Ol i no bilip, olsem na Jehova i tokaut olsem olgeta man i winim pinis 20 krismas bai i no inap i go insait long Kenan. Long ol dispela man, Josua na Kalep na ol Livai tasol ol i no dai long ples nating.—Namba 13:1–16, 25-29; 14:6-10, 26-30.
Olgeta Israel i bin lukim ol strongpela wok bilong Jehova long Isip, a? Olsem na wanem samting i bin helpim Josua long bilip olsem God bai helpim ol, tasol ol narapela i gat tupela tingting? Ating Josua i tingim gut olgeta samting Jehova i bin tok promis long en na i mekim pinis, na em i tingim tingim ol dispela samting. Planti yia bihain em i tok: ‘Bikpela i bin givim olgeta gutpela samting long ol Israel olsem em i bin promis long givim long ol. Olgeta samting em i bin promis long mekim, ol i kamap pinis, na i no gat wanpela promis i popaia.’ (Josua 23:14) Olsem na Josua i bilip olsem olgeta promis Jehova i bin mekim long ol samting bai kamap bihain, ol dispela samting tu bai kamap tru. (Hibru 11:6) Dispela i mas kirapim yumi long askim olsem: ‘Olsem wanem long mi? Pasin bilong mi long stadi na tingim gut ol tok promis bilong Jehova i helpim mi long bilip tru olsem ol bai kamap tru? Mi save bilip olsem God bai lukautim mi wantaim ol lain bilong em long taim bilong bikpela hevi tru i laik kamap?’
Josua i kamapim strongpela bilip, na tu, em i gat strongpela bel na i no pret long mekim ol samting i stret. Em na Kalep tasol ol i sanap strong long bihainim laik bilong Jehova, na olgeta narapela i toktok long tromoi ston long ol bilong kilim ol i dai. Yu ting yu bai pilim olsem wanem? Bai yu pret? Josua i no pret. Em na Kalep i tokaut strong long bilip bilong ol. Bilong kamapim olsem yumi stap gut long God, nogut bihain yumi mas mekim wankain samting.
Stori bilong ol man bilong lukstil i kamapim tu olsem Moses i bin senisim nem bilong Josua. Pastaim nem bilong em Hosia, na insait bilong dispela nem em “Kisim Bek,” na Moses i skruim liklik hap tok long en i makim nem bilong God na i kolim em Josua—olsem “Jehova i Kisim Bek.” Baibel Septuagint i kolim nem bilong em “Jisas.” (Namba 13:8, 16) Stret olsem dispela bikpela nem i makim, Josua i tokaut strong olsem Jehova bai kisim bek ol. Moses i no senisim nating nem bilong Josua. Dispela nem i kamapim klia olsem Moses i pilim tru gutpela pasin bilong Josua na i wankain olsem gutpela wok Josua bai mekim taim em i stiaim nupela lain i go insait long Graun Bilong Promis.
Inap 40 yia ol Israel i hatwok na wokabaut long ples drai nating, na ol papa bilong ol i wok long i dai. Yumi no save long ol samting bilong Josua long dispela taim. Tasol ating i stap bilong em long dispela taim i bin skulim em long planti samting. Em i lukim Jehova i givim strafe long ol bikhetman Kora, Datan, na Abiram, na ol man i bihainim ol, na ol man i insait long pasin nogut bilong lotuim god Bal bilong maunten Peor. Yumi ken ting Josua i bel hevi tru taim em i kisim save olsem Moses i no litimapim nem bilong Jehova long ol samting em i bin mekim long wara bilong Meriba, olsem na Moses tu i no inap i go insait long graun bilong promis.—Namba 16:1-50; 20:9-13; 25:1-9.
Makim Em Olsem Senis Bilong Moses
Paslain liklik long taim Moses i dai, em i askim God long makim wanpela senis bilong em bambai ol Israel i no ken kamap olsem ‘lain i stap nating, olsem ol sipsip i no gat wasman.’ Jehova i mekim wanem? Em i tok, Josua “em inap mekim wok bilong mi,” na long ai bilong olgeta Israel Jehova i makim Josua. Ol i mas harim tok bilong em. Man! God i litimapim tru nem bilong em! Jehova i bin lukim strongpela bilip bilong Josua na save bilong em long mekim wok. Jehova i no inap makim narapela man i gutpela moa bilong bosim ol Israel. (Namba 27:15-20) Tasol Moses i save Josua bai i gat bikpela hatwok tru. Olsem na Moses i strongim dispela man i senisim em na i tokim em long “sanap strong na i no ken surik,” long wanem, Jehova bai stap wantaim em.—Lo 31:7, 8.
God i mekim gen wankain tok long Josua bilong strongim em na i tok moa olsem: “Yu mas was gut na bihainim tru olgeta lo wokman bilong mi, Moses, i bin givim long yu. Yu no ken lusim wanpela liklik hap bilong dispela lo. Sapos yu bihainim gut ol dispela lo, orait maski yu go long wanem hap bai yu no inap bagarap. Nogat. Bai yu stap gut tasol. Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol. Mi tokim yu pinis. Olsem na yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.”—Josua 1:7-9.
Josua i tingim ol dispela tok bilong Jehova na em i lain pinis long mekim gut wok, olsem na em i no inap holim tupela tingting, a? Ol bai kisim tru dispela graun. Tru, ol hevi bai kamap, na namba wan bikpela hevi em ol i mas brukim wara Jordan long taim wara i tait. Tasol Jehova yet i bin tokim em: “Yupela i mas brukim wara Jordan.” Olsem na ating i no gat wanpela hevi em i no inap winim, a?—Josua 1:2.
Ol samting i wok long kamap long i stap bilong Josua—olsem ol i daunim Jeriko, ol i wok long daunim ol lain birua, na ol i tilim graun long ol lain bilong Israel—ol dispela samting i kamapim klia olsem em i no lusim tingting long ol tok promis bilong God. Paslain liklik long taim em i dai, taim Jehova i givim bel isi long ol Israel na ol birua i no wok long pait long ol, Josua i bungim ol manmeri bilong tingim gen ol samting God i bin mekim long ol, na long kirapim ol long givim bel olgeta long mekim wok bilong Em. Olsem na ol Israel i wokim gen kontrak wantaim Jehova, na yumi ken save olsem gutpela pasin bilong lida bilong ol i strongim ol, olsem na “taim Josua i stap yet ol Israel i save lotu long Bikpela.”—Josua 24:16, 31.
Josua i olsem gutpela piksa tru yumi ken bihainim. Long nau, kain kain hevi i save traim bilip bilong ol Kristen. Pasin bilong winim ol dispela traim em i bikpela samting bambai Jehova i ken orait long yumi na bihain yumi ken kisim ol samting em i tok promis long en. Josua i gat strongpela bilip na dispela i helpim em long winim ol traim. Tru, yumi no bin lukim ol strongpela wok bilong God olsem Josua i bin lukim, tasol sapos wanpela i gat tupela tingting long dispela, orait buk bilong Baibel i gat nem bilong Josua long en i kamapim ol tok bilong wanpela man i bin lukim ol samting long ai bilong em yet na em i kamapim klia olsem ol tok bilong Jehova i tru. Olsem Josua, yumi ken kisim gutpela tingting na save na yumi inap winim ol traim sapos yumi ritim Tok Bilong God long olgeta de na yumi wok strong long bihainim ol dispela tok long i stap bilong yumi.
Olsem wanem? Sampela taim yu bel hevi long pasin bilong sampela wanwok Kristen? Tingim pasin bilong Josua long sanap strong na karim hevi taim em i mas wokabaut inap 40 yia wantaim ol poroman bilong em i no bilip, na i no asua bilong em. Olsem wanem? I hatwok long yu long sambai long bilip bilong yu? Tingim samting Josua na Kalep i mekim. Ol i kisim gutpela pe tru long pasin bilong ol long bilip na bihainim tok bilong God. Tru tumas, Josua i bilip tru olsem Jehova bai truim ol tok promis bilong em. Gutpela yumi tu i bilip olsem.—Josua 23:14.
[Piksa long pes 10]
Pasin bilong poroman wantaim Moses i strongim bilip bilong Josua
[Piksa long pes 10]
Josua na Kalep i bilip tru long strong bilong Jehova
[Piksa long pes 10]
Wok bos bilong Josua i kirapim ol manmeri long pas gut wantaim Jehova