Laip Oltaim Long Graun—Em Wanpela Tok Promis Bilong God
“Olgeta samting i stap nogut . . . ol i wetim gutpela samting God i laik mekim long ol.”—RO. 8:20.
ATING yu inap tingim amamas yu bin kisim long namba wan taim yu lainim olsem liklik taim bihain bai ol manmeri i no inap kamap lapun na dai, ol bai stap laip oltaim long graun. (Jo. 17:3; KTH 21:3, 4) Na ating yu bin amamas long tokim ol narapela long dispela promis bilong Baibel. Dispela promis bilong stap laip oltaim em wanpela bikpela tok bilong gutnius yumi save autim. Na dispela promis i save stiaim olgeta wokabaut bilong yumi.
2 Tasol ol lotu Kristendom i sakim dispela promis bilong laip oltaim long graun. Baibel i tok taim man i dai, i no gat wanpela hap bilong em i stap laip yet, nogat. Tasol planti lotu i skulim ol man olsem man i gat wanpela spirit i no inap i dai, na taim man i dai, dispela spirit i go stap long ples spirit. (Sav. 9:4-5) Olsem na planti man i no bilip olsem ol man bai stap laip oltaim long graun. Ating bai yumi laik save: Tru Baibel i sapotim dispela tok promis? Sapos olsem, orait wanem namba wan taim God i bin kamapim dispela promis long ol man?
“Olgeta Samting i Stap Nogut . . . Ol i Wetim Gutpela Samting”
3 Jehova i kamapim klia laik bilong em long ol manmeri long pastaim tru. God i tokaut klia olsem Adam inap stap laip oltaim sapos em i bihainim tok. (Stt. 2:9, 17; 3:22) Ol tumbuna pikinini bilong Adam i bin kisim save olsem long sin bilong Adam, ol man i no stap gutpela olgeta moa. Ol i lukim olsem rot i go insait long gaden Iden i pas, na ol manmeri i kamap lapun na i dai. (Stt. 3:23, 24) Bihain long sampela haptaim, krismas bilong ol man i wok long i go daun. Olsem: Adam i bin stap laip inap 930 yia. Pikinini bilong Noa, Siem, i bin stap laip inap 600 yia tasol na pikinini bilong em, Arpaksat, i bin stap laip inap 438 yia. Papa bilong Abraham, Tera, i bin stap laip inap 205 yia. Abraham i gat 175 krismas, na pikinini bilong em, Aisak, i gat 180 krismas, na Jekop i gat 147 krismas. (Stt. 5:5; 11:10-13, 32; 25:7; 35:28; 47:28) Olsem na ating planti manmeri i luksave olsem ol man i no inap moa long i stap laip oltaim! Olsem wanem? I gat as na ol i ken bilip olsem ol man inap i stap laip oltaim gen?
4 Baibel i tok: “Olgeta samting [ol manmeri] i stap nogut . . . ol i wetim gutpela samting.” (Ro. 8:20) Em wanem samting? Namba wan tok profet bilong Baibel i tok wanpela “lain,” o pikinini, bai ‘krungutim het bilong snek.’ (Ritim Stat 3:1-5, 15.) Long ol bilip manmeri, dispela promis long Pikinini, i opim rot long ol long bilip olsem God i no givim baksait long laik bilong em long ol manmeri. Dispela promis i strongim tingting bilong ol man olsem Abel na Noa long bilip olsem God bai kamapim bek ol blesing em Adam i bin lusim. Ating ol i luksave olsem snek bai “kaikaim lek bilong [pikinini],” na dispela i makim olsem blut i mas kapsait.—Stt. 4:4; 8:20; Hi. 11:4.
5 Tingim Abraham. Taim God i traim em, Abraham i redi long ‘givim Aisak, dispela wanpela pikinini bilong en olsem ofa long God.’ (Hi. 11:17-18) Bilong wanem em i redi long mekim olsem? (Ritim Hibru 11:19.) Em i bilip long kirap bek! I gat as na Abraham i bilip long kirap bek, long wanem, Jehova i bin givim bek strong long em bilong kamapim pikinini na nau em wantaim meri bilong em, Sera, inap kamapim wanpela pikinini long taim tupela i lapun pinis. (Stt. 18:10-14; 21:1-3; Ro. 4:19-21) Na tu, Abraham i bilipim tok Jehova i bin mekim long em. God i bin tokim em: “Long Aisak tasol bai ol lain tumbuna pikinini bilong yu i kamap.” (Stt. 21:12) Olsem na i gat as na Abraham i bilip olsem God bai kirapim bek Aisak.
6 Abraham i gat strongpela bilip, olsem na Jehova i wokim wanpela kontrak wantaim em i tok long lain tumbuna pikinini bilong em, o pikinini. (Ritim Stat 22:18.) Namba wan man long dispela lain, o “pikinini,” em Jisas Krais. (Ga. 3:16) Jehova i bin tokim Abraham olsem “lain,” o pikinini, bilong em bai kamap planti “olsem ol sta bilong skai na olsem wesan bilong nambis”—em namba Abraham i no inap save hamas tru. (Stt. 22:17) Bihain dispela namba i kamap ples klia. Jisas Krais na 144,000 husat bai wok king wantaim em long Kingdom bilong em, olgeta i insait long dispela lain, o “pikinini.” (Ga. 3:29; KTH 7:4; 14:1) Long rot bilong Kingdom Bilong Mesaia, ‘olgeta lain pipel long graun bai kisim blesing.’
7 Abraham i no bin kliagut long mining tru bilong dispela kontrak em Jehova i bin mekim wantaim em. Tasol Baibel i tok: “Abraham i bilip na i wet long lukim dispela taun i stap strong tru.” (Hi. 11:10) Dispela taun em Kingdom Bilong God. Bilong kisim ol blesing aninit long dispela Kingdom, Abraham i mas i stap laip gen. Long rot bilong kirap bek, em inap i stap laip oltaim long graun. Na tu, ol manmeri husat i abrusim Armagedon na ol man husat i kirap bek long indai, ol inap i stap oltaim.—KTH 7:9, 14; 20:12-14.
“Mi No Inap Pasim Moa”
8 Namel long taim bilong Josep, em tumbuna pikinini bilong Abraham, na profet Moses, i gat wanpela man i stap, nem bilong en Jop. Buk Jop, ating Moses i bin raitim, i stori gut long as na Jehova i larim Jop i karim hevi na long ol samting i painim em bihain. Tasol Buk Jop i no wanpela buk i stori tasol long ol hevi bilong wanpela man, nogat, em i tokaut tu long wanpela bikpela tok em ol lain bilong heven na graun i insait long en. Dispela buk i kamapim klia olsem Jehova i save mekim wok bos bilong em long stretpela pasin, na tu, i kamapim klia olsem pasin bilong ol wokboi bilong Jehova long stap gut long em, na laip oltaim em i laik givim long ol, dispela i insait long bikpela tok i bin kamap long gaden Iden. Maski Jop i no bin kliagut long dispela bikpela tok, em i no larim 3-pela poroman bilong em i kirapim em long ting em i no bin holimpas pasin bilong em long i stap gut long God. (Jop 27:5, NW) Dispela i mas strongim bilip bilong yumi na helpim yumi long luksave olsem yumi inap holimpas pasin bilong yumi long i stap gut long Jehova na wok bos bilong em.
9 Taim 3-pela pren giaman bilong Jop i toktok pinis, “Elihu, pikinini bilong Barakel bilong lain Bus” i toktok. Wanem samting i kirapim em long toktok? Em i tok: “Mi gat planti tingting bilong bekim tok bilong yu, na [“spirit bilong God i mekim na,” NW] mi no inap pasim moa long bel bilong mi.” (Jop 32:5, 6, 18) Tok bilong Elihu i bin kamap tru taim Jop i kamap orait gen, tasol dispela tok inap helpim tu ol narapela. Em inap kirapim olgeta man husat i stap gut long God long wetim gutpela samting.
10 Sampela taim tok Jehova i givim long wanpela man, em inap makim tu ol narapela samting. Dispela samting i kamap ples klia long tok profet Daniel i bin mekim long King Nebukatnesar bilong Babilon, taim king i driman long ol i katim wanpela traipela diwai i go daun. (Dan. 4:10-27) Truim bilong dispela driman i bin kamap tru long samting i painim Nebukatnesar, tasol dispela driman i makim tu wanpela samting i bikpela moa. Driman i makim olsem bihain long 2,520 yia—dispela haptaim i kirap long 607 B.C.E.a—God bai bosim gen graun long rot bilong wanpela kingdom i kamap long lain bilong King Devit. Wok bos bilong God long bosim graun i kirap taim em i putim Jisas Krais olsem King long heven long 1914. Tingim! Klostu nau Kingdom bai inapim tru samting em ol man i bihainim tok ol i wok long wetim!
“No Ken Larim Em i Go Long Ples Bilong Ol Man i Dai Pinis”
11 Taim Elihu i bekim tok long Jop, Elihu i stori long ‘wanpela bilong ol planti tausen ensel bilong God i kam na i helpim man.’ Olsem wanem sapos dispela ensel ‘i prea long God i ken mekim gut long em’? Elihu i tok: “Sapos . . . ensel . . . i askim God olsem, ‘Yu ken marimari long dispela man na yu no ken larim em i go long ples bilong ol man i dai pinis, long wanem, mi painim pinis rot bilong baim bek dispela man,’ orait bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.” (Jop 33:23-26) Ol dispela tok i makim olsem God i redi long kisim pe bilong “baim bek” ol man i tanim bel.—Jop 33:24.
12 Ating Elihu i no kliagut long olgeta samting long pe bilong baim bek man, wankain olsem ol profet i no bin kliagut long olgeta tok ol i raitim. (Dan. 12:8; 1 Pi. 1:10-12) Tasol tok bilong Elihu i soim olsem bai i gat wanpela taim we God bai kisim pe bilong baim bek man na tekewe ol man long kalabus bilong kamap lapun na dai. Tok bilong Elihu i makim olsem ol man inap stap laip oltaim. Na tu, Buk Jop i kamapim olsem bai i gat kirap bek.—Jop 14:14, 15.
13 Long nau, ol tok bilong Elihu i gat bikpela mining yet long planti milion Kristen em ol i tingting long abrusim bagarap bilong pasin bilong dispela graun. Ol lapun husat bai abrusim bagarap, ol bai kamap yangpela gen. (KTH 7:9, 10, 14-17) Na tu, ol gutpela man i amamas long wetim taim we ol bai lukim ol man i kirap bek ol i kamap yangpela gen. Tasol bilong ol Kristen God i makim i ken kisim laip oltaim long heven na i no inap dai moa, na ol arapela sipsip i ken kisim laip oltaim long graun, ol i mas bilip long ofa Krais i givim bilong baim bek man.—Jo. 10:16; Ro. 6:23.
Em Bai Pinisim Tru Dai
14 Ol lain tumbuna pikinini bilong Abraham ol i kamap olsem wanpela lain kantri taim God i wokim kontrak wantaim ol. Taim Jehova i givim Lo long ol, em i tok: “Yupela i mas bihainim olgeta pasin mi laikim na olgeta lo mi givim yupela. Sapos yupela i mekim olsem bai yupela i stap laip.” (Wkp. 18:5) Tasol ol Israel i no inap bihainim stret dispela Lo, em Lo i stretpela olgeta. Lo i kotim ol na ol i mas bagarap, olsem na i mas i gat wanpela samting bilong tekewe ol long dispela bagarap.—Ga. 3:13.
15 Bihain long Moses, spirit bilong Jehova i kirapim ol arapela man bilong raitim Baibel long stori long laip oltaim. (Sng. 21:4; 37:29) Olsem, long pinis bilong song bilong Devit em man bilong raitim song, em i stori long pasin wanbel bilong ol manmeri i lotu tru long God long Saion. Em i tok: “Long dispela ples Bikpela i save mekim gut tru long ol man i stap wanbel. Em i givim ol laip bilong i stap gut oltaim oltaim.”—Sng. 133:3.
16 Jehova i kirapim Aisaia long tok profet olsem ol man bai stap laip oltaim long graun. (Ritim Aisaia 25:7, 8.) Sin na dai i olsem wanpela bikpela hevi tru i wok long daunim ol manmeri. Jehova i tokim ol manmeri bilong em olsem em bai pinisim tru sin na dai “long olgeta hap bilong graun.”
17 Na tingim tu samting Lo Bilong Moses i makim long meme bilong Asasel. Wanpela taim long olgeta yia, long Bikpela De Bilong God i Tekewe Sin Bilong Ol Manmeri, hetpris i ‘mas putim tupela han long het bilong meme na em i mas autim olgeta pasin nogut na olgeta sin bilong ol manmeri bilong Israel. Long dispela pasin em i putim olgeta dispela sin long het bilong meme. Na dispela meme bai i karim olgeta sin bilong ol Israel i go long wanpela hap i no gat man.’ (Wkp. 16:7-10, 21, 22) Aisaia i bin tok profet olsem Mesaia bai kam, na em bai mekim wankain wok na karim i go ol sik, “ol hevi na pen,” na “sin bilong planti manmeri,” na dispela bai opim rot long ol manmeri i ken kisim laip oltaim.—Ritim Aisaia 53:4-6, 12.
18 Long rot bilong Aisaia, Jehova i tokim ol manmeri bilong em, lain Israel: “Ol dispela lain bilong yu i dai pinis na ol i stap long ples tudak, ol bai i kirap bek na lukim lait. Yu save givim laip long ol man i dai pinis, olsem wara bilong nait i pundaun long graun i drai na i mekim ol nupela gras i kamap. Yupela ol lain i slip long matmat, yupela kirap na amamas na singaut.” (Ais. 26:19) Ol Skripsa Hibru i tokaut klia long bilip bilong kirap bek na ol man bai stap laip long graun. Olsem: Taim Daniel i gat klostu 100 krismas, Jehova i tokim em: “Bai yu dai, tasol bihain bai yu kirap bek na long las de bai yu kisim ol samting God i bin makim bilong yu.”—Dan. 12:13.
19 Bilip bilong kirap bek i as na Marta i mekim dispela tok long Jisas long brata bilong em i dai pinis: “Mi save, em bai i kirap bek long las de, long dispela taim olgeta manmeri bai i kirap bek.” (Jo. 11:24) Ol tok bilong Jisas na ol tok em spirit bilong God i kirapim ol disaipel bilong Jisas long raitim, yu ting ol dispela tok i senisim dispela bilip? Olsem wanem? Jehova i laik yet olsem ol man i ken stap laip oltaim long graun? Bai yumi skelim bekim bilong ol dispela askim long namba tu stadi.
[Futnot]
a Lukim sapta 6 bilong buk Putim Yau Long Tok Profet Bilong Daniel!
Yu Inap Stori Long Dispela?
• Ol manmeri “stap nogut,” ol i wetim wanem gutpela samting?
• Wanem samting i soim olsem Abraham i bin bilip long kirap bek?
• Tok Elihu i bekim long Jop i kirapim ol manmeri long wetim wanem gutpela samting?
• Olsem wanem Ol Skripsa Hibru i strongim bilip bilong kirap bek na ol man bai stap laip oltaim long graun?
[Askim Bilong Stadi]
1, 2. (a) Bilong wanem promis bilong i stap laip oltaim long graun em bikpela samting long yumi? (b) Bilong wanem planti man i no bilip olsem ol man bai stap laip oltaim long graun?
3. Olsem wanem laik bilong God long ol manmeri, i kamap ples klia long pastaim tru?
4. Wanem samting i strongim tingting bilong ol bilipman bilong bipo na ol i bilip olsem God bai kamapim bek ol blesing em Adam i bin lusim?
5. Wanem samting i kamapim olsem Abraham i bilip long kirap bek?
6, 7. (a) Jehova i wokim wanem kontrak wantaim Abraham? (b) Olsem wanem promis Jehova i bin mekim long Abraham i opim rot long ol manmeri i wetim gutpela samting?
8, 9. Bilong wanem Buk Jop i no wanpela buk i stori tasol long ol hevi bilong wanpela man?
10. Wanem samting i soim olsem sampela taim tok Jehova i givim long wanpela man, em inap makim tu ol narapela samting?
11. Ol tok bilong Elihu i makim olsem God bai mekim wanem?
12. Ol tok bilong Elihu i kamapim wanem gutpela samting inap painim ol man?
13. Ol tok bilong Elihu i gat wanem mining long ol Kristen?
14. Ol Israel i no inap mekim wanem, na dispela i soim olsem i mas i gat wanpela samting i winim Lo Bilong Moses bilong helpim ol long kisim laip oltaim?
15. God i kirapim Devit long stori long wanem blesing long bihain?
16. Long rot bilong Aisaia, Jehova i tok promis long wanem samting bai kamap long “olgeta hap bilong graun”?
17. Olsem tok profet i makim, Mesaia bai mekim wanem na dispela bai opim rot long ol manmeri i ken kisim laip oltaim?
18, 19. Aisaia 26:19 na Daniel 12:13 i stori long wanem gutpela samting bai kamap?
[Piksa long pes 5]
Tok Elihu i bekim long Jop i soim olsem ol man bai lusim kalabus bilong kamap lapun na dai
[Piksa long pes 6]
God i tokim Daniel olsem ‘em bai kirap bek na long las de em bai kisim ol samting God i bin makim bilong em’