Askim

Baibel i tok long “Buk Bilong Ol Stretpela Man” na “Buk i stori long ol pait bilong Bikpela.” (Jos. 10:13; Nam. 21:14) Tasol dispela tupela buk i no hap bilong ol buk bilong Baibel. Yu ting holi spirit i as bilong ol tok bilong dispela tupela buk i bin lus?

I no gat as na yumi ken tok olsem holi spirit i bin kirapim ol man long raitim dispela tupela buk na bihain dispela tupela buk i bin lus. Ol man em holi spirit i bin kirapim ol long raitim Baibel, ol i bin stori long sampela narapela buk. Ating sampela bilong ol dispela buk i hap bilong Baibel, tasol ol i kolim nem bilong ol long tok we ol man bilong ritim Baibel long nau i no kliagut long en. Olsem: 1 Stori 29:29 i kolim olsem “Stori Bilong Profet Samuel,” “Stori Bilong Profet Natan,” na “Stori Bilong Profet Gat.” Ating dispela tripela buk em ol buk yumi save long en olsem Buk 1 Samuel, Buk 2 Samuel, na Buk Hetman.

Narapela samting i olsem, sampela buk em Baibel i stori long en, nem bilong ol i klostu wankain long nem bilong ol buk bilong Baibel, tasol ol i no hap bilong Baibel. Olsem, yumi ken tok piksa long 4-pela buk bilong bipo em: “Stori Bilong Ol King Bilong Juda,” “Buk Bilong Ol King Bilong Juda Na Israel,” “Buk Bilong Ol King Bilong Israel,” na “Buk Bilong Ol King Bilong Israel na Juda.” Nem bilong ol dispela buk i klostu wankain long nem bilong ol buk bilong Baibel em yumi save long en olsem 1 King na 2 King, tasol holi spirit i no bin kirapim ol man long raitim dispela 4-pela buk na ol i no hap bilong Baibel. (1 Kin. 14:29; 2 Sto. 16:11; 20:34; 27:​7, NW) Ol dispela buk em ol rait i stori long ol samting i kamap long bipo na i bin i stap long taim profet Jeremaia na Esra i raitim tupela buk bilong Baibel, em Buk Esra na Buk Jeremaia.

Tru ol man bilong raitim Baibel i bin stori o lukim tok bilong sampela buk i bin stap bipo, tasol spirit bilong God i no as bilong ol tok i stap long ol dispela buk. Esta 10:2 i tok long “buk bilong ol king bilong Persia na Midia.” Olsem tasol, bilong raitim Gutnius Luk, Luk i “bin wok longpela taim long askim gut long as bilong dispela olgeta samting.” Ating tok bilong em i makim olsem em i bin skelim ol tok i stap long ol dispela buk taim em i bungim lista bilong lain tumbuna bilong Jisas em yumi ken ritim long Gutnius bilong em. (Lu. 1:3; 3:​23-​38) Ol buk em Luk i kisim tok long en, spirit bilong God i no as bilong ol tok bilong en, tasol spirit bilong God i as bilong Gutnius em Luk i raitim. Na dispela Gutnius i stap yet olsem gutpela samting bilong helpim yumi.

Tupela buk em nem bilong ol i stap long askim i stap antap​​—“Buk Bilong Ol Stretpela Man” na “Buk i stori long ol pait bilong Bikpela”​​—em ol rait i bin i stap tru, tasol spirit bilong God i no as bilong ol tok bilong en. Long dispela as, Jehova i no lukautim ol dispela buk. Baibel i stori long dispela tupela buk na dispela i stiaim ol saveman bilong Baibel long tok olsem dispela tupela buk i gat ol tok o ol singsing i stori long ol pait namel long Israel na ol birua bilong en. (2 Sam. 1:​17-​27) Wanpela buk ensaiklopidia bilong Baibel i tok ol dispela buk i gat “ol tok na ol singsing em ol man i save gut tru long singsing long Israel bilong bipo, ol i bin bungim na lukautim.” Na tu, sampela man em God i yusim ol bilong mekim wok profet sampela taim, ol i raitim ol buk em spirit bilong Jehova i no as bilong ol tok bilong en o em i no makim bilong kamap hap bilong Baibel. Tasol Baibel i “gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi” long nau.​​—2 Ti. 3:16; 2 Sto. 9:29; 12:15; 13:22.

Tru Baibel i stori long sampela buk em ol man i bin mekim wok long en, tasol dispela i no ken givim tingting long yumi olsem holi spirit i as bilong ol tok i stap long ol dispela buk. God Jehova i bin lukautim gut olgeta rait i gat “tok bilong God bilong yumi” na ol dispela tok bai “stap oltaim oltaim.” (Ais. 40:8) Em nau, wanem ol buk em Jehova i makim bilong kamapim dispela 66 buk bilong Baibel, em ol dispela buk tasol yumi mas i gat bilong “kisim tru olgeta gutpela pasin, na em i mekim yumi i redi long mekim olgeta kain gutpela wok.”​—2 Ti. 3:​16, 17.