Tok Bilong Jehova i Gat Laip
Sampela Bikpela Tok Bilong Buk Rut
EM WANPELA gutpela stori bilong tupela meri em narapela i stap gut long narapela. Na ol i laikim tru Jehova na bilip long rot em i makim. Dispela stori i kamapim klia olsem Jehova i tingim tru lain famili em Mesaia bai kamap long en. Em i wanpela gutpela stori bilong wanpela famili i gat amamas na hevi wantaim. Buk Rut i kamapim ol dispela stori na sampela moa.
Buk Rut i stori long ol samting i kamap insait long 11-pela yia em long “taim ol hetman i bosim ol Israel.” (Rut 1:1) Ol stori i stap insait long dispela buk i mas kamap kirap long taim bilong ol hetman i bosim ol Israel, long wanem, Boas, wanpela man i gat bikpela hap graun na em i wanpela bilong ol lain i insait long dispela stori, em i pikinini man bilong Rahap husat i bin stap long taim bilong Josua. (Josua 2:1, 2; Rut 2:1; Matyu 1:5) Profet Samuel i raitim ol stori bilong dispela buk long yia 1090 B.C.E. Dispela buk tasol i gat nem bilong wanpela meri i no bilong Israel. Tok i stap insait long dispela buk i “gat laip, na em i wok strong i stap.”—Hibru 4:12.
“OLGETA PLES YU GO LONG EN, MI TU BAI MI GO LONG EN”
Taim Naomi na Rut i kamap long Betlehem, ol manmeri i laik save long ol. Ol meri bilong taun i tok long lapun meri olsem: “Ating dispela em i Naomi, a?” Na Naomi i tok: “Yupela i no ken kolim mi Naomi, em i olsem meri bilong belgut. Nogat. God I Gat Olgeta Strong i bin mekim nogut long mi, olsem na yupela i mas kolim mi Mara, em i olsem meri bilong bel nogut. Taim mi lusim dispela ples, mi gat planti samting, tasol nau Bikpela i bringim mi i kam bek na mi no gat wanpela samting.”—Rut 1:19-21.
Taim bikpela hangre i kamap long Israel, famili bilong Naomi i lusim Betlehem na i go sindaun long Moap. Naomi i “gat planti samting” olsem em i gat man na tupela pikinini man. Tasol bihain liklik long ol i sindaun long Moap, man bilong em Elimelek i dai. Bihain tupela pikinini man bilong em i maritim tupela meri Moap, em Orpa na Rut. Tenpela yia bihain, tupela pikinini man i dai na tupela i no bin kamapim pikinini, na nau dispela tripela meri i no gat man bilong ol. Taim tambu mama bilong tupela meri, em Naomi, i laik i go bek long Juda, tupela tambu meri bilong em i go wantaim em. Taim ol i wokabaut i go, Naomi i strong long tupela tambu bilong em i mas go bek long Moap na maritim ol man long lain bilong tupela. Orpa i harim tok na i go bek. Tasol Rut i stap wantaim Naomi, na em i tok: “Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi.”—Rut 1:16.
Naomi na Rut i kamap long Betlehem long taim bilong katim rais bali. Rut i bihainim tok i stap long Lo Bilong God, na em i kirap bungim ol bali long gaden bilong wanpela wanblut bilong Elimelek—em wanpela bikman nem bilong em Boas. Boas i mekim gut long Rut na Rut i wok long gaden bilong Boas i go inap long “wok bilong katim bali na wit i pinis.”—Rut 2:23.
Bekim Bilong Ol Askim Bilong Baibel:
1:8—Bilong wanem Naomi i tokim tupela tambu bilong em long i go bek na “stap long ples wantaim mama” bilong tupela na em i no tok long stap wantaim papa bilong tupela? Baibel i no stori long papa bilong Orpa i stap laip yet o nogat. Tasol papa bilong Rut i stap yet. (Rut 2:11) Ating Naomi i tokim tupela long i go i stap wantaim ol mama bilong tupela, long wanem, em i ting olsem long dispela rot em bai kirapim tupela long tingim gen pasin bilong mama bilong tupela long mekim gut bel bilong ol. Dispela tok bai mekim gut bel bilong tupela em ol i wari long lusim gutpela tambu mama bilong ol. Ating dispela tok tu i soim olsem sindaun bilong tupela mama bilong Rut na Orpa i gutpela na i no wankain olsem bilong Naomi.
1:13, 21—Yu ting Jehova i bin mekim sindaun bilong Naomi i kamap nogut na em i bagarap? Nogat, na Naomi i no sutim tok long God olsem em i mekim pasin i no stret. Tasol ol samting i bin painim em i mekim na em i ting Jehova i no amamas long em. Em i bel nogut na i no amamas. Na tu, long dispela taim bilong ol long bipo, taim meri i karim pikinini ol i save tok em blesing i kam long God, na sapos meri i no karim pikinini, em i wanpela samting nogut. Em i no gat ol tumbuna pikinini na tupela pikinini man bilong em i dai, olsem na ating Naomi i pilim olsem Jehova i daunim em.
2:12—Wanem “gutpela pe” Rut i kisim long Jehova? Rut i karim wanpela pikinini man na em i kisim wanpela gutpela samting tru, em i insait long lain tumbuna i nambawan tru, winim olgeta narapela lain tumbuna—em lain tumbuna bilong Jisas Krais.—Rut 4:13-17; Matyu 1:5, 16.
Skul Yumi Kisim:
1:8; 2:20. Maski ol hevi i painim Naomi, em i bilip strong yet long gutpela-pasin-sori bilong Jehova. Yumi tu i mas mekim olsem taim ol hevi i painim yumi.
1:9. Haus i no ken i stap olsem ples bilong olgeta insait long famili i ken kisim kaikai na slip, na em tasol. Nogat. Em i mas stap tu olsem ples bilong kisim malolo na bel isi.
1:14-16. Orpa i “go bek long lain bilong en na long god bilong ol tumbuna bilong en.” Tasol Rut i no go bek. Em i lusim gutpela sindaun long ples bilong em na i stap gut long Jehova. Sapos yumi kisim pasin bilong laikim tru God na yumi no tingim yumi yet tasol, dispela bai lukautim yumi na yumi no larim pasin bilong tingim yumi yet tasol i mekim na yumi “surik na lus.”—Hibru 10:39.
2:2. Rut i go kisim bali em ol papa graun i lusim i stap bilong ol lain bilong narapela ples na ol man i stap rabis i ken kisim. Em i gat pasin daun. Kristen i stap rabis i no ken mekim pasin antap na sakim ol helpim em ol wanbilip i givim o ol helpim i stret em i kisim long gavman.
2:7. I stret Rut inap tru long kisim bali long gaden, tasol em askim ol wokman bilong gaden bilong kisim tok orait paslain long em i mekim olsem. (Wok Pris 19:9, 10) Dispela i kamapim klia pasin daun bilong em. Yumi bihainim savetingting sapos yumi ‘daunim yumi yet,’ long wanem, “ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Sefanaia 2:3; Song 37:11.
2:11. Rut i kamap wanblut bilong Naomi na gutpela pren bilong em. (Sindaun 17:17, NW ) Pasin pren bilong tupela i strong, long wanem, pasin laikim, pasin bilong i stap gut long narapela, pasin bilong tingim narapela, na sori i as bilong en. Tasol bikpela samting moa i as bilong pasin pren bilong tupela—em ol samting bilong spirit i as bilong pasin pren bilong tupela, olsem laik bilong ol long mekim wok bilong Jehova na stap namel long ol man i lotuim em. Yumi tu, yumi gat rot bilong pas gut wantaim ol man i lotu tru long Jehova.
2:15-17. Maski Boas i mekim ol samting bilong helpim Rut bambai em i no ken mekim bikpela wok tumas, “Rut i wok long bungim het bali long gaden inap san i go daun.” Rut em i wanpela meri bilong wok strong tru. Kristen i mas i gat nem olsem man bilong wok strong.
2:19-22. Naomi na Rut i save amamas long toktok wantaim long nait, olsem lapun meri i laik save long ol wok yangpela meri i bin mekim, na narapela i amamas long kamapim tingting na laik bilong em long narapela. Insait long famili Kristen tu i mas i gat dispela wankain pasin.
2:22, 23. Rut i no wankain olsem pikinini meri bilong Jekop, em Daina. Rut i poroman wantaim ol man i lotuim Jehova. Na em i stap gutpela piksa yumi ken bihainim!—Stat 34:1, 2; 1 Korin 15:33.
NAOMI I KISIM “PLANTI SAMTING”
Naomi em i lapun na em i no inap kamapim pikinini. Olsem na em i tokim Rut long kisim ples bilong em na kamapim pikinini long rot bilong maritim wanpela brata bilong Elimelek. Rut i bihainim tok bilong Naomi na em i askim Boas long maritim em. Boas i orait long mekim olsem. Tasol i gat wanpela wanblut i stap paslain long Boas olsem na ol i mas askim em pastaim olsem em i laik baim graun bilong Elimelek na maritim Rut tu o nogat.
Kwiktaim Boas i stretim dispela samting. Long moning long de bihain, em i kisim 10-pela hetman bilong Betlehem i kam bung i stap na em i askim dispela wanblut bilong em olsem em i laik baim graun na kisim Rut wantaim o nogat. Dispela man i no laik mekim olsem. Olsem na Boas i baim graun na maritim Rut. Tupela i kamapim wanpela pikinini man, nem bilong em Obet, em tumbuna papa bilong King Devit. Ol meri bilong Betlehem nau ol i tokim Naomi: “Litimapim nem bilong Bikpela . . . Tambu bilong yu i laikim yu tumas, na yu save laikim em tu. Sapos yu bin i gat 7-pela pikinini man, yu no inap laikim ol olsem yu save laikim dispela tambu meri bilong yu. Olsem na dispela pikinini man nau em i karim, em bai i helpim sindaun bilong yu na was gut long yu long taim yu kamap lapun.” (Rut 4:14, 15) Meri i bin kam bek long Betlehem na i “no gat wanpela samting” nau em i “gat planti samting”!—Rut 1:21.
Bekim Bilong Ol Askim Bilong Baibel:
3:11—Wanem samting i mekim na Rut i kisim nem olsem “gutpela meri”? I no olsem em i “bilasim gras” o “putim bilas gol na kain kain naispela klos” na ol man i litimapim nem bilong em, nogat. Pasin i stap “insait” long bel bilong Rut—em pasin bilong i stap gut long narapela na pasin laikim, pasin daun, na pasin bilong wok strong na i no tingim em yet tasol, em ol dispela pasin i mekim na ol man i litimapim nem bilong em. Ol meri Kristen i laik kisim kain gutpela nem olsem Rut, ol i mas wok strong long kisim ol dispela pasin.—1 Pita 3:3, 4; Sindaun 31:28-31.
3:14—Bilong wanem Rut na Boas i kirap long taim i no tulait yet? Dispela i no makim olsem tupela i bin mekim pasin pamuk long nait na tupela i laik haitim, nogat. Pasin Rut i bihainim long nait i stret wantaim kastam bilong ol, em samting wanpela meri bai mekim bilong kisim tok orait long maritim brata bilong man bilong em. Em i bihainim tok Naomi i givim em. Na tu, pasin bilong Boas i kamapim klia olsem em i no ting samting Rut i bin mekim i brukim lo. (Rut 3:2-13) Olsem na, Rut na Boas i kirap long taim i no tulait yet bambai ol manmeri i no ken kamapim ol tok win nating.
3:15 (NW )—Boas i kapsaitim “sikspela sospen bali” long laplap bilong Rut na dispela i makim wanem samting? Ating dispela pasin i makim olsem: Bihain long 6-pela de bilong wok i gat de bilong malolo, olsem tasol taim bilong Rut i kisim malolo i klostu nau. Boas bai mekim ol samting bambai Rut i ken “stap gut” o kisim malolo long haus bilong man bilong em. (Rut 1:9; 3:1) O ating dispela hap bali em mak Rut inap long karim.
3:16—Bilong wanem Naomi i askim Rut olsem: “Tambu, em yu tasol, a?” Olsem wanem? Em i no luksave long tambu bilong em? Yes, ating em i no luksave long Rut, long wanem, taim Rut i kam bek long haus, ples i tudak yet. Tasol ating dispela askim inap makim tu olsem Naomi i laik save olsem man bilong baim bek graun bai kisim Rut olsem meri bilong em o olsem wanem.
4:6—I gat wanem as na wanpela man bilong baim graun i no laik baim graun bilong narapela wanblut bilong em? Pastaim, sapos wanpela man i kamap rabis na em i salim graun bilong em, wanpela man i laik baim dispela graun i mas kaunim hamas yia i stap yet inap long namba 50 yia, orait nau em bai save hamas mani em bai givim bilong baim dispela graun. (Wok Pris 25:25-27) Taim dispela man i mekim olsem dispela bai mekim na pe bilong graun samting bilong em bai go daun. Na tu, sapos Rut i karim wanpela pikinini man, em bai kisim dispela graun em man i baim graun i bin baim na i no ol wanfamili stret bilong dispela man.
Skul Yumi Kisim:
3:12; 4:1-6. Boas i bihainim gut ol samting Jehova i makim. Olsem wanem? Yumi save bihainim gut ol pasin tiokratik?—1 Korin 14:40.
3:18. Naomi i bilip long Boas. Yumi tu i mas bilip long ol wanbilip bilong yumi. Rut i redi long maritim wanpela man em i no save, na Baibel i no kolim nem bilong em. (Rut 4:1) Bilong wanem em i mekim olsem? Long wanem em i bilip long rot God i makim. Olsem wanem? Yumi tu i gat wankain bilip olsem? Taim yumi laik painim wanpela poroman bilong maritim, yumi save bihainim tok long maritim “man i bilip long Bikpela”?—1 Korin 7:39.
4:13-16. Tru Rut i bilong Moap na bipo em i save lotuim god giaman Kemos, tasol em i kisim wanpela gutpela pe stret! Dispela i kamapim klia olsem “taim God i makim man, dispela i no kamap long laik bilong man na long hatwok bilong em. Nogat. Em i kamap long marimari bilong God tasol.”—Rom 9:16.
“Long Taim Em Yet i Makim” God “Bai Litimapim Yupela”
Buk Rut i stori long Jehova olsem God bilong gutpela-pasin-sori, em i save mekim ol samting bilong helpim ol wokman bilong em. (2 Stori 16:9) Taim yumi tingim olsem wanem God i bin mekim gut long Rut, yumi luksave olsem em i bikpela samting long bilip strong long God, na “bilip olsem God i stap, na . . . God i save mekim gut tru long ol man i wok long painim em.”—Hibru 11:6.
Rut, Naomi, na Boas i bilip tru long rot Jehova i makim, na ol i kisim gutpela blesing. Olsem tasol, “God i save mekim olgeta samting i wok wantaim bilong mekim gut long ol man i save givim bel bilong ol long God. Em dispela ol man God i tok pinis long kisim bek ol, na em i bin singautim ol.” (Rom 8:28) Orait yumi mas bihainim tok bilong aposel Pita, em i tok: “Yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela. God i save wari long yupela. Olsem na olgeta hevi yupela i karim, yupela i mas putim long han bilong en.”—1 Pita 5:6, 7.
[Piksa long pes 26]
Yu save long as na Rut i no lusim Naomi?
[Piksa long pes 27]
Wanem samting i mekim na Rut i kisim nem olsem “gutpela meri”?
[Piksa long pes 28]
Jehova i givim wanem “gutpela pe” long Rut?