“Yupela i No Ken Pret. Bai Mi Helpim Yupela”

JISAS i bin givim tok lukaut long ol disaipel bilong em olsem: “Satan bai i mekim, na ol bai i kalabusim sampela man namel long yupela, bilong traim yupela.” Tasol paslain liklik long Jisas i givim dispela tok lukaut, em i tok: “Bihain liklik yu bai karim pen, tasol dispela i no ken mekim yu i pret.” Satan i save yusim yet pasin bilong pretim ol man long kalabusim ol. Em i mekim olsem bilong pasim wok bilong autim tok bilong Kingdom. Em nau, yumi ken save sampela gavman long nau bai wok yet long mekim nogut long ol Kristen. (KTH 2:​10; 12:17) Olsem na wanem samting bai helpim yumi long redi long ol traim bilong Satan na bai yumi “no ken pret,” olsem Jisas i tok?

Tru, ating planti bilong yumi i bin pret sampela taim. Tasol Baibel i tokim yumi olsem long rot bilong helpim i kam long Jehova, yumi inap daunim pasin bilong pret. Olsem wanem yumi inap daunim pret? Wanpela rot bilong Jehova long helpim yumi long redi long karim hevi bilong pasin birua, em long rot bilong helpim yumi long luksave long ol samting em Satan na lain bilong em i save mekim wok long en. (2 Ko. 2:​11) Bilong helpim yumi long luksave long dispela samting, yumi ken skelim samting i bin kamap long taim bilong ol man i bin raitim Baibel. Bai yumi skelim tu stori bilong sampela gutpela wanbilip bilong yumi long nau em ol i bin “sanap strong na sakim olgeta kain pasin bilong trik na giaman Satan i save hait na mekim.”​​—Ef. 6:​11-​13.

Wanpela King Nogut i Givim Hevi Long Gutpela King

Inap 700 yia samting paslain long Krais, king nogut Senakerip bilong Asiria i bin daunim planti kantri. Dispela i mekim na em i tingting long pait long ol lain bilong Jehova na biktaun bilong ol, Jerusalem, we gutpela man Hesekia i mekim wok king long en. (2 Kin. 18:​1-3, 13) Satan i luksave long dispela samting, na em i kirapim Senakerip long mekim samting em yet i gat laik long en na bai lotu i tru i pinis olgeta long graun.​​—Stt. 3:15.

Senakerip i salim ol lain ami bilong em i go long Jerusalem bilong kirapim ol Israel long givim ol yet long han bilong ol Asiria. Wanpela bilong ol man em i salim i go em namba wan ofisa bilong ami, olsem Rabsake, na em i stap olsem nambawan mausman bilong king.a (2 Kin. 18:17) Wok bilong Rabsake em bilong daunim bilip bilong ol Juda na mekim ol i givap long pait. Rabsake i mekim wok long wanem ol samting bilong putim pasin bilong pret i go daun long bel bilong Juda?

Holimpas Yet Bilip Maski Ol i Stap Wanpis

Rabsake i tokim ol mausman bilong Hesekia olsem: “Yupela go givim Hesekia dispela tok bilong strongpela king, em king bilong Asiria. Em i tok olsem, Hesekia, yu gat wanem kain strong na yu no laik i stap aninit long mi. . . . Yu lukluk long kantri Isip na yu wet long em i helpim yu long pait. Tasol mi tokim yu, Isip i olsem wanpela stik pitpit i bruk pinis. Sapos yu kisim na holim olsem stik bilong wokabaut, orait bai hap pitpit i sutim han bilong yu.” (2 Kin. 18:​19, 21) Dispela tok Rabsake i bin sutim em i no tru, long wanem, Hesekia i no bin wokim kontrak wantaim kantri Isip. Tasol dispela tok i mekim tru wok bilong en, em bilong givim tingting long ol olsem: ‘I no gat wanpela inap helpim yupela, yupela i stap wanpis.’

Long taim bilong yumi, ol man i birua long lotu i tru ol i save mekim wankain pasin na pretim ol Kristen tru bilong kalabusim ol. Long dispela rot ol i laik putim pasin bilong pret i go daun long bel bilong ol Kristen. Wanpela sista em ol i bin kalabusim em na em i no inap bung moa wantaim ol wanbilip inap sampela yia, long wanem, em i bin holimpas bilip, bihain em i tingim bek samting i bin helpim em long daunim pret, na em i tok: “Pasin bilong beten i helpim mi long i go klostu long Jehova . . . Mi tingim gutpela tok bilong Aisaia 66:​2, olsem God i save belgut long ‘ol man i save daunim ol yet na sori long ol sin ol i bin mekim.’ Long olgeta taim, dispela skripsa i save strongim na mekim gut bel bilong mi.” Na i wankain long wanpela brata em ol i bin putim em i stap wanpis long rum kalabus, em i tok: “Mi luksave olsem maski mi stap long dispela liklik rum gad, dispela i no pasim mi long pas gut wantaim Jehova.” Tru tumas, pasin bilong pas gut wantaim Jehova i bin strongim dispela tupela Kristen long karim hevi bilong stap wanpis. (Sng. 9:​9, 10) Ol man bilong mekim nogut long ol inap tekewe ol long famili, ol pren, na ol wanbilip bilong ol, tasol ol dispela Witnes i kalabus i save olsem ol birua i no inap mekim na ol i stap longwe long Jehova.​​—Ro. 8:​35-39.

Olsem na em i bikpela samting tru long yumi mas strongim pasin bilong yumi long pas gut wantaim Jehova long olgeta taim rot i op! (Jem. 4:8) Oltaim yumi mas askim yumi yet: ‘Mi bilip tru olsem Jehova i stap? Ol tok bilong em i save stiaim mi taim mi mekim ol liklik na ol bikpela disisen long i stap bilong mi long olgeta de?’ (Lu. 16:10) Sapos yumi wok strong long holimpas yet pasin bilong yumi long pas gut wantaim God, orait i no gat as long yumi pret. Profet Jeremaia i stap olsem mausman bilong ol Juda i karim pen na hevi, em i tok: “Bikpela, mi stap nogut tru na i olsem mi bin stap long ples bilong ol man i dai pinis. Na mi singaut long yu long helpim mi . . . Na yu bin kam klostu long mi na yu tok long mi no ken pret.”​​—Kra. 3:​55-57.

Kirapim Ol Long Kisim Tupela Tingting, Dispela i No Wok

Rabsake i mekim tok giaman na bai ol man i kisim tupela tingting. Em i tok: “Hesekia, yu bin bagarapim ol ples lotu bilong [Jehova] na ol alta i stap nabaut . . . Bikpela yet i bin tokim mi long kam bagarapim dispela kantri.” (2 Kin. 18:​22, 25) Olsem na Rabsake i strong olsem Jehova bai i no pait bilong helpim ol lain bilong Em, long wanem, Em i no amamas long ol. Tasol dispela tok i no tru. Jehova i amamas long Hesekia na ol Juda em ol i bin kirapim gen lotu i tru.​​—2 Kin. 18:​3-7.

Long nau, sampela man i gat tingting nogut ol i kamapim sampela samting i tru long yumi ol Witnes na ol i laik mekim wok long dispela bilong yumi ken wanbel wantaim tok bilong ol, tasol long pasin hait ol i paulim nabaut sampela tok bambai yumi kisim tupela tingting. Olsem, ol i tokim ol brata na sista i stap long kalabus olsem brata husat i lukautim wok autim tok long kantri bilong ol i lusim pinis bilip bilong em, olsem na i orait long ol tu i ken mekim olsem na lusim bilip. Tasol ol dispela kain tok i no mekim na ol Kristen tru i kisim tupela tingting.

Tingim samting i kamap long wanpela sista Kristen long taim bilong Wol Woa 2. Taim em i stap long kalabus, ol i soim em ol pepa i kamapim olsem brata i go pas long wok i lusim pinis bilip bilong em. Man i sutim tok i askim em sapos em i bilip long dispela Witnes. Sista i bekim tok olsem: “[Em] i wanpela sinman tasol.” Na em i tok moa, taim brata i bihainim yet ol stiatok bilong Baibel, God i bin mekim wok em. “Tasol tok bilong em long ol pepa i soim olsem em i no bihainim moa ol tok bilong Baibel, olsem na em i no moa stap olsem wanpela brata bilong mi.” Dispela sista husat i holimpas bilip, em i bihainim gut tok Baibel i mekim olsem: “Ol king na ol man bilong graun i no inap kisim bek yu. Olsem na nogut yu bilip long ol.”​​—Sng. 146:3.

Pasin bilong kisim stretpela save long Tok Bilong God na bihainim ol tok bilong en, dispela bai banisim yumi long ol tok giaman em ol inap pinisim strong bilong yumi na yumi no tingting strong moa long karim ol hevi. (Ef. 4:​13, 14; Hi. 6:​19) Olsem na bilong redim yumi yet na bai yumi inap tingting gut taim ol samting i putim presa long yumi, yumi mas putim pasin bilong ritim Baibel long olgeta de na mekim stadi bilong yumi yet i stap nambawan samting. (Hi. 4:​12) Yes, nau em taim bilong yumi kisim sampela save moa na strongim bilip bilong yumi. Wanpela brata em ol i bin kalabusim em i stap wanpis inap planti yia, em i tok: “Mi laik strongim olgeta long mekim gut wok long olgeta kaikai bilong spirit yumi kisim, long wanem, wanpela taim bai kamap na dispela ol tok bai helpim yumi tru.” Tru tumas, sapos yumi stadi gut long Tok Bilong God na ol buk na nius em wokboi i gat gutpela tingting i redim, orait long taim traim i painim yumi bai holi spirit i ‘kirapim tingting bilong yumi na bai yumi tingim gen olgeta tok’ yumi bin lainim.​—Jo. 14:26.

Pret i No Daunim Ol

Rabsake i traim long pretim ol Juda. Em i tok: “Hesekia, king bilong mi inap givim yu 2,000 hos, sapos yu inap long painim 2,000 soldia bilong sindaun long ol na pait. Tasol mi save, yu yet yu no gat kain man olsem i stap. . . . Olsem na yu no gat strong inap long daunim wanpela liklik lain soldia bilong mipela.” (2 Kin. 18:​23, 24) Long tingting bilong ol man, Hesekia na ol lain bilong em i no inap tru long daunim strongpela ami bilong Asiria.

Long nau tu, i luk olsem ol man bilong mekim nogut long ol Kristen tru ol i gat bikpela strong, na moa yet taim gavman i sapotim ol. Kain pasin olsem i bin stap taim ol Natsi i mekim nogut tru long ol Kristen tru long taim bilong Wol Woa 2. Ol i traim long pretim planti wokman bilong God. Wanpela brata bilong yumi husat i bin i stap planti yia long kalabus i stori long olsem wanem ol i bin pretim em. Wanpela taim wanpela ofisa i askim em: “Yu bin lukim ol i bin sutim brata bilong yu, a? Yu lainim wanem samting long dispela?” Brata i bekim tok olsem: “Mi wanpela Witnes Bilong Jehova na bai mi stap olsem.” Ofisa i laik pretim em na i tok, “Orait, nau mipela bai sutim yu.” Tasol brata bilong yumi i sanap strong, na ol birua i lusim em na i go. Wanem samting i bin helpim em long sanap strong na winim traim? Em i tok: “Mi bilip tru long Jehova.”​​—Snd. 18:10.

Taim yumi bilip strong long Jehova, i olsem yumi holim wanpela traipela plang i lukautim yumi long olgeta traim Satan i putim bilong bagarapim yumi long ol samting bilong spirit. (Ef. 6:​16) Olsem na i gutpela long yumi beten askim Jehova long helpim yumi long strongim bilip bilong yumi. (Lu. 17:5) Yumi mas mekim gutpela wok long ol samting bilong strongim bilip em wokboi i gat gutpela tingting i save givim long yumi. Taim ol man i laik pretim yumi, yumi kisim strong taim yumi tingim tok em Jehova i bin mekim long profet Esekiel husat i mas givim tok long ol man i gat hatpela pasin. Jehova i tokim em: “Tasol nau bai mi mekim tingting bilong yu i strong olsem tingting bilong ol, na bai yu no inap surik long ol. Bai mi mekim yu i kamap strong olsem ston daimon.” (Ese. 3:​8, 9) Jehova inap helpim yumi long kamap strong olsem ston daimon, sapos i gat wok long mekim olsem, wankain olsem em i bin mekim long Esekiel.

Sakim Ol Traim

Ol birua i bin luksave olsem taim olgeta wok bilong ol i lus nating, ol samting bilong grisim man inap mekim na man i lusim bilip. Rabsake i bin mekim kain pasin olsem. Em i tokim ol manmeri long Jerusalem long tok bilong king bilong Asiria olsem: “Yupela i mas larim mi i kisim taun bilong yupela. Na bai yupela i stap gut inap long taim mi kam na kisim yupela i go long narapela kantri i wankain olsem kantri bilong yupela yet. Dispela kantri i gat planti ol gaden wain na planti ol gaden wit bilong wokim bret. Na em i gat ol diwai oliv na hani tu. ‘Sapos yupela i bihainim tok bilong mi, bai yupela i stap gut na bai yupela i no dai.’” (2 Kin. 18:​31, 32) Dispela laik bilong kaikai bret na dringim nupela wain i pulim tru tingting bilong ol lain em ol i kalabus i stap insait long banis bilong taun!

Wanpela taim ol i bin givim kain gutpela promis olsem long wanpela misineri husat i bin stap kalabus. Ol i laik daunim laik bilong em long sanap strong. Ol i tokim em olsem ol bai kisim em i go long wanpela “gutpela haus” i gat “naispela gaden,” na em i ken stap long dispela hap inap 6-pela mun bilong wokim gut tingting. Tasol brata i bin was i stap long ol samting bilong spirit na em i no lusim ol stiatok Kristen. Wanem samting i bin helpim em? Bihain em i tok: “Mi save tingim Kingdom olsem wanpela samting i stap tru. . . . Save mi kisim long Kingdom Bilong God i strongim mi, na mi bilip tru long en, na mi no kisim tupela tingting liklik long en, mi no inap tru lusim bilip.”

Olsem wanem? Yumi bilip olsem Kingdom Bilong God em wanpela gavman i stap tru? Bilipman Abraham, aposel Pol, na Jisas Krais, ol i bin winim ol bikpela hevi, long wanem, ol i bin bilip olsem Kingdom em wanpela samting i stap tru. (Fl. 3:​13, 14; Hi. 11:​8-10; 12:2) Sapos yumi wok strong long putim Kingdom olsem namba wan samting long i stap bilong yumi na tingim ol blesing bilong i stap oltaim Kingdom bai kamapim, yumi tu inap sakim ol traim i laik pulim yumi long kisim ol samting i bilong helpim yumi inap sotpela taim tasol.​​—2 Ko. 4:​16-18.

Jehova i No Inap Lusim Yumi

Maski Rabsake i wok strong long pretim ol Juda, Hesekia wantaim ol man i stap aninit long em, ol i bilip strong tru long Jehova. (2 Kin. 19:​15, 19; Ais. 37:​5-7) Jehova i harim beten bilong ol, na em i salim wanpela ensel i kam kilim i dai 185,000 soldia long kem bilong ol Asiria insait long wanpela nait. Senakerip i kisim bikpela sem tru, na long de bihain em wantaim sampela soldia i stap yet, ol i go bek long biktaun Ninive.​​—2 Kin. 19:​35, 36.

Tru tumas, Jehova i no bin lusim ol man husat i bilip strong long em. Ol brata na sista bilong yumi long nau em ol i stap gutpela piksa long pasin bilong holimpas bilip taim traim i painim ol, ol i kamapim klia olsem Jehova i save mekim wankain pasin long nau. I gat as na Papa bilong yumi long heven i tokim yumi olsem: “Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.”​—Aisaia 41:13.

[Futnot]

[Rait long pes 13]

Winim 30 taim long Baibel, Jehova i tokim ol wokboi bilong em olsem: “Yupela i no ken pret”

[Piksa long pes 12]

Olsem wanem pasin bilong Rabsake long pulim lain Israel i wankain long pasin ol birua bilong lain bilong God i mekim long nau?

[Ol Piksa long pes 15]

Pasin bilong pas gut wantaim Jehova i helpim yumi long stap gut yet long em taim traim i painim yumi