Jehova i “Kaunim Pinis Olgeta Gras Long Het Bilong Yupela”
“Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela.”—MATYU 10:29, 30.
1, 2. (a) Bilong wanem Jop i pilim olsem God i lusim em? (b) Olsem wanem? Ol tok bilong Jop i makim olsem em i birua long Jehova? Stori long dispela.
“GOD, mi sanap long ai bilong yu na singaut long yu long helpim mi, tasol yu save lukluk tasol long mi na yu no putim yau long singaut bilong mi. Yu no save marimari liklik long mi. Nogat. Yu save mekim nogut tasol long mi long olgeta strong bilong yu.” Man i mekim ol dispela tok em i bin bel hevi tru, na yumi no kirap nogut long dispela samting! Em i bin lusim wok skin bilong em, ol pikinini bilong em i dai long wanpela narapela kain bagarap, na nau wanpela sik i wok long bagarapim skin bilong em. Nem bilong dispela man em Jop, na stori bilong dispela samting nogut tru i bin painim em i stap long Baibel bilong helpim yumi.—Jop 30:20, 21.
2 Ating ol tok bilong Jop inap mekim na i luk olsem em i birua long God, tasol i no olsem. Jop i kamapim tasol bel hevi bilong em. (Jop 6:2, 3) Em i no save olsem Satan i as bilong ol hevi i painim em, olsem na em i popaia na ting olsem God i lusim em. Jop i mekim dispela tok long Jehova: “Bilong wanem yu save givim baksait long mi olsem mi birua bilong yu na yu abrusim mi?”a—Jop 13:24.
3. Taim ol hevi i painim yumi, yumi inap kisim wanem ol tingting?
3 Long nau, planti manmeri long lain bilong Jehova ol i karim ol hevi i kamap long rot bilong ol bikpela pait, ol hevi bilong wok politik o long i stap bilong ol man, ol bagarap bilong graun olsem win ren samting, hevi bilong lapun, sik, stap rabis tru, na ol gavman i putim tambu. Ating yu tu yu wok long karim wanpela hevi olsem. Ating sampela taim yu kisim tingting olsem Jehova i haitim pes bilong em na em i no lukim hevi bilong yu. Yu save gut long tok bilong Jon 3:16: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol.” Tasol taim yu wok long karim hevi na i luk olsem dispela hevi i no inap pinis, ating bai yu tingting olsem: ‘Tru tru God i laikim mi? Em i save long hevi bilong mi? Em i save tingim mi?’
4. Pol i karim wanem hevi? Kain hevi olsem inap mekim wanem long yumi?
4 Tingim hevi i bin painim aposel Pol. Em i tok: “Wanpela samting olsem nil i kam i stap wantaim mi na i save sutim skin bilong mi.” Na em i tok moa olsem: “Tripela taim mi beten strong long Bikpela, long em i ken rausim dispela samting long mi.” Jehova i harim beten bilong em. Tasol Jehova i kamapim long Pol olsem em i no inap wokim mirakel bilong rausim dispela hevi. Pol i mas bilip olsem strong bilong God bai helpim em long karim dispela hevi i olsem ‘nil i sutim skin.’b (2 Korin 12:7-9) Olsem Pol, ating yu tu yu wok long karim wanpela hevi. Ating yu tingting olsem, ‘Jehova i no mekim wanpela samting bilong pinisim hevi bilong mi, olsem na ating em i no save long hevi bilong mi o em i no tingim mi.’ Tasol dispela tingting i no stret! Jehova i tingim tru olgeta wan wan wokboi bilong em, na dispela i kamap klia long ol tok Jisas i givim long ol aposel bihain liklik long em i bin makim ol. Yumi ken stori long olsem wanem ol tok bilong em inap strongim yumi long nau.
“Yupela i No Ken Pret”—Bilong Wanem?
5, 6. (a) Olsem wanem Jisas i helpim ol aposel na bai ol i no ken pret long ol samting bai painim ol? (b) Olsem wanem Pol i soim olsem em i bilip olsem Jehova i lukautim em?
5 Ol aposel i kisim narapela kain strong long Jisas, em strong bilong “rausim ol spirit nogut i stap long ol manmeri, na bilong mekim orait olgeta kain sik bilong ol manmeri.” Tasol dispela i no makim olsem ol hevi i no inap painim ol, nogat. Jisas i stori gut long sampela bilong ol hevi bai painim ol. Tasol em i tokim ol: “Yupela i no ken pret long ol man i save kilim i dai bodi, tasol ol i no inap kilim spirit bilong yupela. Nogat. Yupela i mas pret long God tasol. Em inap bagarapim spirit na bodi tu long hel [“Gehena,” NW ].”—Matyu 10:1, 16-22, 28.
6 Bilong helpim ol aposel long kliagut long as na i no gat wok long ol i pret, Jisas i mekim tupela tok piksa. Em i tokim ol: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” (Matyu 10:29-31) Jisas i kamapim olsem pasin bilong sanap strong long taim bilong hevi i poroman wantaim pasin bilong bilip olsem Jehova i tingim yumi olgeta wan wan. Aposel Pol i bin bilip olsem, na em i tok: “Sapos God i helpim yumi, orait husat bai i birua long yumi? God i no bin pasim Pikinini bilong em yet. Nogat. Em i bin salim em i kam bilong helpim yumi olgeta. Na sapos em i givim yumi Pikinini bilong em yet, orait ating em bai i givim yumi olgeta arapela samting tu.” (Rom 8:31, 32) Maski wanem ol hevi i painim yu, sapos yu stap gut long Jehova, yu ken bilip tru olsem em i tingim yu. Bai yu save olsem Jehova i tingim tru yu taim yumi skelim gut ol tok Jisas i bin givim long ol aposel.
Pe Bilong Pisin
7, 8. (a) Long taim bilong Jisas, ol man i ting olsem wanem long ol liklik pisin? (b) Bilong wanem Matyu 10:29 i mekim wok long tok Grik i makim olsem ol dispela “liklik pisin” i liklik tru?
7 Ol tok piksa bilong Jisas i makim gut pasin bilong Jehova long tingim olgeta wan wan wokboi bilong em. Pastaim, tingim ol liklik pisin. Long taim bilong Jisas, ol dispela liklik pisin i olsem kaikai, tasol ol i save bagarapim ol kaikai long gaden, olsem na ol man i tingim ol olsem samting nogut. Ol dispela liklik pisin i planti tru na pe bilong ol i liklik tru, olsem na long mani bilong nau man inap baim tupela liklik pisin long 15 toea. Sapos man i dabolim dispela mani, em inap baim 5-pela liklik pisin—ol i givim nating namba 5 pisin, i olsem i no gat pe bilong en!—Luk 12:6.
8 Tingim tu sais bilong dispela pisin. Maski dispela pisin i no stap moa olsem pikinini pisin, sais bilong en i liklik tru. Tasol dispela tok Grik ol i bin tanim olsem “liklik pisin” long Matyu 10:29 i tok long ol dispela pisin em ol i liklik tru. Jisas i laik bai ol aposel i tingim wanpela pisin i liklik tru na i olsem samting nating.
9. Wanem strongpela tok i kamap klia long tok piksa bilong Jisas long ol liklik pisin?
9 Stori bilong Jisas long ol liklik pisin i kamapim klia wanpela strongpela tok: Samting ol man i tingim olsem samting nating, em i bikpela samting long God Jehova. Jisas i strongim dispela tok taim em i tok olsem, taim wanpela liklik pisin i “pundaun long graun,” Jehova i save long dispela.c Samting yumi mas lainim i stap ples klia tru. Sapos God Jehova i save tingim ol liklik pisin tru i no gat nem, orait em i tingim moa yet ol man i mekim wok bilong em!
10. Wanem mining bilong dispela tok: “God i kaunim pinis olgeta gras long het bilong yupela”?
10 Jisas i tok tu olsem: “God i kaunim pinis olgeta gras long het bilong yupela.” (Matyu 10:30) Dispela sotpela tok i strongim bikpela tok bilong tok piksa bilong Jisas long ol liklik pisin. Tingim: Olgeta wan wan man i gat olsem 100,000 gras long het bilong ol. Olgeta gras i luk wankain, na yumi no save tingim tumas wanpela gras. Tasol God Jehova i lukim olgeta wan wan gras na i kaunim pinis namba bilong ol. Olsem na yu ting i gat wanpela samting long laip bilong yumi em Jehova i no inap save long en? Jehova i save gut long olgeta wan wan wokboi bilong em. Em i save “lukim tingting na laik bilong man.”—1 Samuel 16:7.
11. Devit i tok wanem bilong soim olsem em i bilip olsem Jehova i tingim em?
11 Devit, em tu i bin karim ol hevi, em i bin bilip olsem Jehova i lukim em. Em i tok: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi.” (Song 139:1, 2) Yu tu inap bilip tru olsem Jehova i save long yu. (Jeremaia 17:10) No ken hariap long ting olsem yu no gat nem na Jehova i no inap tingim yu!
Em i Tingim Krai Bilong Ol
12. Olsem wanem yumi save olsem Jehova i save tru long ol hevi i painim lain bilong em?
12 Jehova i save long olgeta wan wan wokboi bilong em, na tu, em i save tru long ol hevi i painim ol. Olsem: Taim ol Israel i kisim hevi olsem ol wokboi nating, Jehova i tokim Moses: “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim.” (Kisim Bek 3:7) Yumi save olsem taim yumi wok long karim wanpela hevi, Jehova i lukim dispela na em i harim krai bilong yumi, na dispela i strongim tru bel bilong yumi! Tru tumas, em i save tru long pen na hevi bilong yumi.
13. Wanem samting i soim olsem Jehova i tingim tru ol wokboi bilong em?
13 Jehova i tingim tru ol manmeri i pas gut wantaim em, na dispela i kamap klia long tingting bilong em long lain Israel. Maski planti taim pasin bikhet bilong ol yet i mekim na ol i kisim hevi, Aisaia i kamapim tingting bilong Jehova long ol: “Long taim ol i karim pen na hevi, Bikpela tu i bin karim pen na hevi wantaim ol.” (Aisaia 63:9) Taim yu stap olsem gutpela wokboi bilong Jehova, yu ken bilip tru olsem taim yu bel hevi, Jehova tu i bel hevi. Dispela em i gutpela samting tru bilong kirapim yu long sanap strong na karim hevi na wok strong yet long mekim wok bilong Jehova.—1 Pita 5:6, 7.
14. Wanem samting i mekim na Devit i raitim Song 56?
14 King Devit i bin bilip tru olsem Jehova i tingim em na i pilim hevi bilong em, na dispela i kamap klia long Song 56. Devit i bin raitim dispela song taim em i wok long ranawe long King Sol. Devit i ranawe i go long Gat, tasol ol Filistia i luksave long em na em i pret nogut ol i holim em. Em i tok: “Long moning i go inap long apinun tru, ol birua i wok long pait long mi. Planti man i birua long mi.” Dispela taim nogut i painim Devit i mekim na em i go long Jehova bilong kisim helpim. Em i tok: “Olgeta samting mi laik mekim, ol birua i traim long bagarapim. Oltaim ol i tingting long painim rot bilong bagarapim mi.”—Song 56:2, 5.
15. (a) Taim Devit i tokim Jehova long raitim krai bilong em long wanpela buk, dispela i makim wanem samting? (b) Taim wanpela hevi i painim yumi na i traim bilip bilong yumi, yumi ken bilip tru long wanem samting?
15 Orait nau, long Song 56:8, Devit i tok: “Yu save long mi karim hevi na mi pilim nogut tru long en, na mi krai i stap. Orait yu tingting yet long dispela, na yu raitim pinis long buk bilong yu.” Devit i bin pilim tru pasin bilong Jehova long tingim em! Taim hevi i painim yumi, ating yumi krai taim yumi beten long Jehova. Gutpela man Jisas, em tu i bin mekim olsem. (Hibru 5:7) Devit i bilip tru olsem Jehova i lukim em na Jehova bai tingim pen na hevi bilong em, i olsem em i raitim krai bilong Devit long wanpela buk. Ating yu pilim olsem krai bilong yu bai pulapim planti pes bilong buk. Sapos olsem, yu ken strongim bel. Baibel i tok: “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”—Song 34:18.
Kamap Pren Tru Bilong God
16, 17. (a) Olsem wanem yumi save olsem Jehova i save long ol hevi i painim lain bilong em? (b) Jehova i bin mekim wanem na bai ol man inap stap pren bilong em?
16 Yumi save olsem Jehova i ‘kaunim pinis olgeta gras long het bilong yumi,’ na dispela i givim tingting long yumi olsem dispela God yumi lotuim, em i save lukim na tingim yumi. Tru, yumi mas wet inap long nupela taim na bai olgeta pen na hevi i pinis, tasol long nau yet Jehova i wok long mekim wanpela gutpela samting tru long lain bilong em. Devit i tok: “God em i pren tru bilong ol manmeri i save stap aninit long em. Na em i save skulim ol long kontrak em i bin mekim wantaim ol.”—Song 25:14.
17 “Pren tru” bilong Jehova. Long tingting bilong yumi ol man i gat sin, i no gat wanpela man inap stap pren bilong Jehova! Tasol Jehova i singautim ol man i pret long em long stap long haus bilong em. (Song 15:1-5) Na Jehova i mekim wanem long ol? Devit i tok olsem Em i skulim ol long kontrak em i bin mekim wantaim ol. Jehova i kamapim ol tok hait bilong em, em i tokim ol profet long olgeta samting em i laik mekim. Em i mekim olsem na bai ol i ken save long ol samting em i tingting pinis long mekim, na tu, ol i ken save long samting ol i mas mekim na bai i stap bilong ol i stret long ol samting Jehova i tingting pinis long kamapim.—Amos 3:7.
18. Olsem wanem yumi save olsem Jehova i laik bai yumi pas gut wantaim em?
18 Yumi ol sinman inap kamap pren bilong God Antap Tru, em God Jehova, na dispela em i gutpela samting bilong mekim gut bel bilong yumi. Em i tokim yumi long mekim olsem. Baibel i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Jehova i laik bai yumi pas gut wantaim em. Em i bin stretim rot bilong yumi inap pas gut wantaim em. Ofa bilong Jisas bilong baim bek man i bin opim rot na bai yumi inap kamap pren bilong God i Gat Olgeta Strong. Baibel i tok: “Yumi save laikim ol arapela, long wanem, God i bin laikim yumi pastaim.”—1 Jon 4:19.
19. Taim yumi sanap strong na karim hevi, olsem wanem dispela bai strongim pasin bilong yumi long pas gut wantaim Jehova?
19 Dispela pasin bilong yumi long pas gut wantaim God bai kamap strong moa taim yumi sanap strong na karim ol hevi. Disaipel Jems i tok: “Oltaim yupela i mas sanap strong na karim hevi, bai dispela pasin i ken kamap strong tru long yupela. Olsem na bai yupela i stap gut, na yupela bai i no sot long wanpela pasin bilong God. Nogat. Pasin bilong yupela bai i gutpela na i stret olgeta.” (Jems 1:4) Taim yumi sanap strong na karim hevi, dispela i save kamapim wanem samting? Tingim hevi bilong Pol olsem ‘nil i sutim skin.’ Taim Pol i sanap strong na karim hevi, dispela i bin kamapim wanem samting? Pol i tok long ol hevi i painim em olsem: “Mi save amamas moa yet long stap olsem man i no gat strong. Olsem bai strong bilong Krais i ken i stap long mi. Olsem na sapos long dispela wok bilong Krais mi no gat strong, na ol man i mekim nogut long mi, na ol kain kain hevi na trabel i kisim mi, na ol man i wok long bagarapim mi, orait bel bilong mi i save stap gutpela tasol. Long wanem, taim mi no gat strong, long dispela taim tasol mi gat strong tru.” (2 Korin 12:9, 10) Samting i painim Pol i helpim em long save olsem Jehova bai givim em strong—em “dispela bikpela strong”—na bai em inap sanap strong na karim hevi. Dispela i helpim em long i go klostu moa long Krais na God Jehova.—2 Korin 4:7; Filipai 4:11-13.
20. Olsem wanem yumi ken bilip tru olsem Jehova bai helpim na strongim bel bilong yumi taim hevi i painim yumi?
20 Ating Jehova i larim ol hevi bilong yu i stap yet. Sapos olsem, orait tingim tok promis em i mekim long ol man i pret long em: “Bai mi no lusim yu. Bai mi no larim yu i stap nating. Nogat tru.” (Hibru 13:5) Em inap helpim na strongim bel bilong yu. Jehova i ‘kaunim pinis olgeta gras long het bilong yu.’ Em i lukim pasin bilong yu long sanap strong na karim hevi. Em i pilim wankain bel hevi yu pilim. Em i tingim tru yu. Na em i no inap ‘lusim tingting long ol gutpela wok yu bin mekim.’—Hibru 6:10.
[Ol Futnot]
a Stretpela man Devit na ol gutpela pikinini bilong Kora ol tu i bin mekim ol wankain tok olsem Jop.—Song 10:1; 44:24.
b Baibel i no tokaut stret long ‘nil i sutim skin’ bilong Pol i makim wanem samting. Ating em i wanpela sik bilong skin, olsem ai i no inap lukluk gut. O em inap makim ol aposel giaman na ol arapela em ol i sutim tok long wok aposel na wok autim tok bilong Pol.—2 Korin 11:6, 13-15; Galesia 4:15; 6:11.
c Sampela saveman i tok dispela hap tok long liklik pisin i pundaun long graun i no makim i dai bilong en, em inap makim narapela samting. Ol i tok namba wan tok ples ol i bin raitim dispela tok long en i makim pisin i kam daun long graun bilong painim kaikai. Sapos i olsem, orait dispela i makim olsem God i save lukim na tingim olgeta samting dispela liklik pisin i mekim long olgeta wan wan de, na i no long taim em i dai tasol.—Matyu 6:26.
Yu Inap Tingim?
• Wanem ol samting inap mekim na man i pilim olsem God i lusim em?
• Ol tok piksa bilong Jisas long ol liklik pisin na long God i kaunim pinis olgeta gras long het bilong yumi i skulim yumi long wanem samting?
• Dispela tok olsem Jehova bai raitim krai bilong yumi long “buk” bilong em i makim wanem samting?
• Olsem wanem yumi inap kamap “pren tru” bilong Jehova?
[Piksa long pes 22]
Bilong wanem Jehova i no rausim hevi long Pol i olsem ‘nil i sutim skin’?
[Piksa long pes 23]
Tok piksa bilong Jisas long ol liklik pisin inap skulim yumi long wanem samting?
[Kredit Lain]
© J. Heidecker/VIREO
[Piksa long pes 25]
Taim yumi ritim Baibel long olgeta taim, yumi inap bilip tru olsem God i tingim yumi olgeta wan wan