Tok Bilong Jehova i Gat Laip
Sampela Bikpela Tok Bilong Buk 2 Bilong Buk Song
YUMI ol wokman bilong Jehova, yumi save olsem ol hevi bai painim yumi. Aposel Pol i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Wanem samting bai helpim yumi long sanap strong na karim hevi bilong pasin birua, na long dispela rot yumi soim olsem yumi givim bel long bihainim stretpela pasin bilong God?
Dispela Buk 2 bilong Buk Song bai helpim yumi long mekim olsem. Song 42 i go 72 i helpim yumi long save olsem, bilong winim ol hevi yumi mas bilip tru long Jehova na lain long wetim em i kisim bek yumi. Dispela i skulim yumi long wanpela bikpela samting, a? Olsem ol narapela tok bilong Baibel, ol tok i stap long Buk 2 bilong Buk Song “i gat laip, na em i wok strong i stap.”—Hibru 4:12.
JEHOVA EM I “PLES HAIT BILONG YUMI, NA EM I SAVE STRONGIM YUMI”
Wanpela Livai i stap longwe long ples bilong em. Em i bel hevi olsem em i no inap i go long haus lotu bilong Jehova na lotu long em, olsem na em i tok: “Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi.” (Song 42:5, 11; 43:5) Dispela tok i stap long tripela ves i bungim Song 42 na 43 na ol i kamap olsem wanpela song. Song 44 em wanpela beten bilong ol lain Juda i ken kisim helpim—em wanpela lain i stap long taim bilong hevi, ating em long taim ol lain Asiria i laik pait long ol long taim bilong King Hesekia.
Song 45 em i singsing bilong marit bilong king, em i tok profet long King Mesaia. Tripela song bihain long Song 45 i tok Jehova i olsem “ples hait bilong yumi, na em i save strongim yumi,” “em i nambawan king na em i bosim olgeta manmeri bilong graun,” na “God i stap insait long taun na em i save helpim ol manmeri.” (Song 46:1; 47:2; 48:3) Song 49 i kamapim klia olsem “i no gat wanpela man i ken baim bek em yet long mani.” (Song 49:7) Ol pikinini man bilong Kora i bin raitim 8-pela song, em Song 42 i go 49. Asap i raitim Song 50.
Bekim Bilong Ol Askim Bilong Baibel:
44:19—Dispela “ples bilong ol wel abus” em i wanem samting? Ating man bilong raitim song i toktok long ples bilong pait we bodi bilong ol man i dai long pait i kamap olsem kaikai bilong ol wel animal.
45:13, 14a—Husat dispela “[“pikinini,” NW] meri bilong king” em ol i “bringim dispela meri i go long king”? Em i pikinini meri bilong “King bilong olgeta lain manmeri,” em God Jehova. (KTH 15:3) Dispela meri i makim lain 144,000 Kristen, em long rot bilong spirit bilong em, Jehova i makim ol long kamap pikinini bilong em. (Rom 8:16) Dispela “pikinini meri” bilong Jehova, “em i gat gutpela bilas, olsem meri i laik marit na i putim gutpela bilas,” ol bai bringim em i go long man em i laik maritim—em King Mesaia.—KTH 21:2.
45:14b, 15—Ol “yangpela meri” i makim husat? Ol i makim “planti manmeri tru” i lotu tru long God, em ol i bung na helpim lain remnan em God i bin makim. Ol bai winim taim bilong “bikpela hevi” na ol bai stap long graun taim marit bilong King Mesaia i kamap long heven. (KTH 7:9, 13, 14) Long dispela taim, ol bai “amamas na belgut.”
45:16—Olsem wanem ol pikinini bai senisim ol tumbuna bilong king? Taim mama i karim Jisas long graun, em i gat ol lain tumbuna i bin stap long graun. Ol bai kamap pikinini bilong em taim em i kirapim bek ol long Taim Bilong Wan Tausen Yia Bilong Krais i Stap King. Sampela bilong ol bai “bosim ol manmeri long olgeta hap bilong graun.”
50:2—Bilong wanem Baibel i tok Jerusalem i “nambawan tru na i naispela tumas”? Dispela tok i no makim lukluk bilong taun, nogat. Jehova i mekim wok long en na em i makim em bilong kamap hap we ol i wokim tempel long en, na kamap biktaun we ol king Jehova i makim i stap long en.
Skul Yumi Kisim:
42:1-3. Wanpela animal olsem dia long ples drai i save laik tru long dring wara, olsem tasol man Livai i laikim tumas long i stap klostu long Jehova. Em i bel hevi tru long em i no inap lotuim Jehova long haus lotu bilong Em, olsem na ‘aiwara bilong em i olsem kaikai bilong em long san na long nait’—em i no laik kaikai. Yumi mas tenkyu tru olsem yumi ken bung wantaim ol wanbilip bilong yumi na lotuim Jehova.
42:4, 5, 11; 43:3-5. Sapos sampela samting i mekim na yumi no inap bung wantaim kongrigesen Kristen, pasin bilong tingim amamas yumi save kisim taim yumi bung wantaim kongrigesen bai strongim yumi. Ating pastaim bai yumi pilim olsem yumi stap wanpis, tasol dispela bai kirapim yumi long tingim olsem God em i ples hait bilong yumi na yumi mas wetim em i helpim yumi.
46:1-3. Maski wanem kain hevi i painim yumi, yumi mas bilip tru olsem “God em i ples hait bilong yumi, na em i save strongim yumi oltaim.”
50:16-19. Ol man i save tok giaman na mekim pasin nogut bai i no inap i stap mausman bilong God.
50:20. Yumi no ken toktok nabaut long popaia bilong ol narapela, yumi mas lusim tingting long popaia bilong ol.—Kolosi 3:13.
‘MI WET LONG GOD WANPELA TASOL I HELPIM MI’
Dispela hap bilong ol song i kirap long beten Devit i mekim bihain long em i mekim sin wantaim Batseba. Song 52 i go 57 i kamapim klia olsem Jehova bai kisim bek ol man husat i putim olgeta hevi bilong ol long han bilong em na wetim em i helpim ol. Taim hevi i save painim Devit, em i save askim Jehova long helpim em, olsem Song 58 i go 64 i kamapim. Em i tok: “Mi save bilip strong long God wanpela tasol. Na mi wet long em wanpela tasol i helpim mi.”—Song 62:5.
Pasin bilong pas gut wantaim Man Bilong Kisim Bek yumi bai kirapim yumi long “singim song na tokaut long biknem bilong em.” (Song 66:2) Song 65 i litimapim nem bilong Jehova olsem man bilong givim ol samting, Song 67 na 68 i tok em i Man bilong helpim lain bilong em, na Song 70 na 71 i tok em i Man Bilong Lukautim ol man.
Bekim Bilong Ol Askim Bilong Baibel:
53:1—Olsem wanem man i tok i no gat God i stap em i “longlong man”? Dispela tok longlong long dispela ves i no makim olsem man i no gat save, nogat. Taim yumi skelim tok bilong Song 53:1-4, yumi kisim save olsem dispela tok i makim man i no save bihainim stretpela pasin.
58:3-5—Olsem wanem ol man nogut i olsem snek? Tok giaman ol i save mekim long ol narapela i olsem marasin nogut bilong snek. Ol i save bagarapim gutnem bilong ol narapela. “Olsem snek, yau bilong en i pas na em i no inap harim tok,” man nogut i no save harim tok bilong stiaim na stretim em.
58:7—Olsem wanem ol man nogut i “olsem wara i ran i go na i lus nating long graun”? Ating Devit i tingim sampela wara bilong ol ples daun long Graun Bilong Promis. Long taim bilong bikpela ren, wara i save tait, tasol wantu ol i save drai na pinis olgeta. Devit i beten long God i mas bagarapim ol man nogut na pinisim ol wantu.
68:13—Olsem wanem ‘bodi bilong pisin i lait olsem silva na wing bilong en i lait olsem gol’? Gras bilong sampela pisin balus i gat kala blu na grei long en na sampela hap gras bilong ol i lait tru. Taim san i holim gras bilong ol, em i lait olsem silva. Ating Devit i tok piksa long ol soldia bilong Israel i kam bek long pait i olsem dispela pisin balus—ol i flai strong na ol i lait tru. Sampela saveman bilong Baibel i tok, ating dispela tok inap makim wanpela naispela samting ol soldia i kisim long taim bilong pait. Tasol maski i gat wanem as na Devit i mekim dispela tok, Devit i tok piksa long ol pait em Jehova i helpim lain bilong em long winim.
68:18—“Ol presen bilong ol bikhetman” em wanem samting? Em ol man ol i bin kisim i go kalabus taim ol i rausim ol birua long Graun Bilong Promis. Bihain ol i makim ol kain man olsem long helpim ol Livai long wok bilong ol.—Esra 8:20.
68:30—Wanem insait bilong dispela tok “krosim dispela wel abus i stap long tais”? Devit i tok piksa long ol birua bilong lain bilong Jehova ol i olsem ol wel animal, na em i askim God long krosim ol o pasim ol long bagarapim lain bilong em.
69:23—Wanem mining bilong dispela tok ‘bagarapim baksait bilong ol birua bai ol i no inap sanap strong’? Ol masol long baksait i save helpim yumi taim yumi mekim ol strongpela wok, olsem taim yumi apim ol samting na karim ol samting i hevi. Taim baksait i bagarap man i no gat strong long mekim ol samting. Devit i beten long God i pinisim strong bilong ol birua bilong em.
Skul Yumi Kisim:
51:1-4, 17. Maski yumi mekim sin, yumi inap pas gut wantaim God Jehova. Sapos yumi tanim bel, yumi ken bilip tru olsem em bai marimari long yumi.
51:5, 7-10. Sapos yumi mekim sin, yumi ken beten askim Jehova long tingim skin bilong yumi i gat sin bilong Adam, olsem na em i ken sori long yumi. Na tu, yumi mas beten askim em long mekim yumi i kamap klin, kamap gut gen long ai bilong em, helpim yumi long rausim ol tingting na laik nogut long bel, na helpim yumi long i stap strong.
51:18. Ol rong bilong Devit i mekim na lain Israel olgeta inap kisim bagarap. Olsem na em i beten long God i ken mekim gut long ol manmeri bilong Saion. Taim yumi mekim wanpela bikpela rong, planti taim dispela i save bagarapim nem bilong Jehova na kongrigesen. Olsem na yumi mas beten askim God long stretim ol samting rong bilong yumi i bin kamapim.
52:8. Yumi inap kamap “olsem diwai oliv i stap klostu long haus bilong God”—yumi pas gut wantaim Jehova na karim kaikai—long rot bilong bihainim tok bilong em na larim em i stretim yumi.—Hibru 12:5, 6.
55:4, 5, 12-14, 16-18. Pikinini man bilong Devit, Apsalom i laik stilim wok king bilong papa bilong em, na gutpela pren bilong Devit, Ahitofel, em tu i insait long dispela samting, na dispela i mekim na Devit i bel hevi tru. Tasol dispela i no mekim na Devit i no bilip moa long Jehova. Yumi no ken larim bel hevi i mekim na yumi no bilip long God.
55:22. Olsem wanem yumi ken putim ol hevi bilong yumi long han bilong Jehova? Yumi ken mekim olsem long rot bilong (1) beten na kamapim long Jehova samting yumi tingting planti long en, (2) larim tok bilong em na oganaisesen bilong em i stiaim na soim rot long yumi, na (3) yumi yet i ken mekim sampela samting na bai ol hevi i no ken daunim yumi tumas.—Sindaun 3:5, 6; 11:14; 15:22; Filipai 4:6, 7.
56:8. Jehova i save long hevi bilong yumi na ol samting dispela hevi i mekim long yumi.
62:11. I no gat wok long God i kisim strong long narapela. Em i as tru bilong olgeta strong. ‘Em i gat bikpela strong.’
63:3 (NW). “Gutpela-pasin-sori” bilong God i nambawan tru, long wanem, sapos i no gat dispela pasin, laip bilong yumi bai i no gat as bilong en. Em i savepasin long pas gut wantaim Jehova.
63:6. Nait—em taim we i no gat nois na i no gat wanpela samting bilong pulim tingting—em i gutpela taim bilong tingim tingim long bel ol samting.
64:2-4. Tok baksait inap bagarapim gutnem bilong man i no gat asua. Yumi no ken harim tok baksait na mekim tok baksait long narapela.
69:4. Bilong i stap wanbel wantaim ol narapela, sampela taim i gutpela long “givim ol samting” olsem tok sori long ol, maski yumi ting olsem yumi no gat asua.
70:1-5. Jehova i save harim ol beten bilong yumi. (1 Tesalonaika 5:17; Jems 1:13; 2 Pita 2:9) Sampela taim God i larim hevi i stap, tasol em bai givim yumi savetingting na strong long karim dispela hevi. Em bai i no inap larim wanpela hevi i painim yumi i winim strong bilong yumi.—1 Korin 10:13; Hibru 10:36; Jems 1:5-8.
71:5, 17. Taim Devit i yangpela yet, na em i no pait yet wantaim Goliat, em i bin kisim pasin bilong bilip strong long Jehova. (1 Samuel 17:34-37) Ol yangpela i mas bilip long Jehova na wetim em i helpim ol long olgeta samting ol i mekim.
“Biknem Bilong Em i Ken Inapim Olgeta Graun”
Laspela singsing long dispela Buk 2 bilong Buk Song, em Song 72 i stori long taim Solomon i stap king, na dispela i stap olsem piksa bilong makim taim Mesaia bai i stap king. Dispela song i stori long ol gutpela samting—bel isi, i no gat pasin bilong pait na mekim nogut long wanpela lain, na bai i gat planti rais na wit long graun. Olsem wanem? Bai yumi insait long dispela lain i kisim dispela blesing na ol narapela gutpela samting bilong Kingdom? Olsem man bilong raitim song, yumi inap insait long dispela lain sapos yumi amamas long wetim Jehova, na larim em i stap ples hait na strong bilong yumi.
“Ol prea bilong Devit . . . i pinis” taim em i tok: “Litimapim nem bilong God, Bikpela bilong ol Israel. Em wanpela tasol i save mekim ol dispela gutpela samting. Litimapim gutpela nem bilong em oltaim oltaim. Biknem bilong en i ken inapim olgeta graun. I tru tumas.” (Song 72:18-20) Yumi tu i mas givim bel olgeta long litimapim nem bilong Jehova.
[Piksa long pes 9]
Yu save “pikinini meri” bilong king em i husat?
[Piksa long pes 10, 11]
Baibel i tok Jerusalem i “nambawan tru na i naispela tumas.” Yu save bilong wanem Baibel i tok olsem?