Tok Bilong Jehova i Gat Laip
Sampela Bikpela Tok Bilong Buk 1 Bilong Buk Song
WANEM kain nem bai i stret long wanpela buk bilong Baibel i gat ol singsing i litimapim nem bilong Man Bilong Wokim olgeta samting, em God Jehova? I stret long ol i givim nem Ol Sam o Ol Song long dispela buk. Dispela buk i gat planti sapta, winim ol narapela buk, na em i gat ol naispela singsing i stori long ol gutpela pasin bilong God na ol strongpela wok bilong em na planti tok profet. Planti song i kamapim samting em ol man i raitim ol dispela song i pilim long bel taim hevi i painim ol. Ol dispela tok i stori long ol samting i bin kamap insait long 1,000 yia—kirap long taim bilong Moses i go inap long taim ol i lusim kalabus long Babilon. Ol man i raitim ol dispela singsing em Moses, King Devit, na ol narapela. Ol man i tok pris Esra i stretim ol song na mekim i kamap wanpela buk.
Long bipo yet, ol i brukim Buk Song long faipela hap olsem: (1) Song 1-41; (2) Song 42-72; (3) Song 73-89; (4) Song 90-106; na (5) Song 107-150. Dispela stori bai skelim namba 1 hap bilong en. King Devit i raitim klostu olgeta singsing long dispela namba 1 hap, tasol 3-pela em i no bin raitim. Ol i no save husat tru i bin raitim Song 1, 10, na 33.
“GOD BILONG MI EM I OLSEM BIKPELA STON”
Kirap bilong namba wan song i tok man husat i save laikim tumas lo bilong God em i ken amamas, na namba 2 song i toktok long Kingdom.a Planti beten tru i stap long dispela namba 1 hap bilong Buk Song. Olsem: Song 3-5, 7, 12, 13, na 17 em ol beten bilong Devit i askim God long kisim em bek long ol birua bilong em. Song 8 i stori long strong na biknem bilong Jehova i antap tru na ol man i samting nating.
Devit i tok long Jehova olsem em i Man Bilong Lukautim lain bilong em. Devit i tok: “God bilong mi em i olsem bikpela ston mi save go long en na hait long ol birua.” (Song 18:2) Song 19 i litimapim nem bilong Jehova na i tok em i Man Bilong Wokim olgeta samting, Song 20 i tok em i Man Bilong Kisim Bek ol man, na Song 21 i tok em i Man Bilong Kisim Bek King em i bin makim. Song 23 i tok em i Bikpela Wasman, na Song 24 i tok em i nambawan King.
Bekim Bilong Ol Askim Bilong Baibel:
2:1, 2—Wanem insait bilong dispela “tok nating” em ol man i pasim? Dispela “tok nating” em tingting bilong ol gavman bilong ol man long mekim ol samting bilong strongim wok bos bilong ol. Dispela tingting i tok nating, long wanem, ol samting ol i tingting pinis long mekim em bai lus nating na i no inap kamap tru. Ol man i no inap tru long win taim ol i redi long pait wantaim “Bikpela na dispela man em i makim bilong bosim ol manmeri bilong en.”
2:7—Wanem dispela “tok” Jehova i bin mekim? Dispela tok em kontrak bilong Kingdom, em Jehova i bin wokim wantaim Pikinini bilong em, Krais Jisas.—Luk 22:28, 29.
2:12—Long wanem rot ol hetman bilong graun i mas “givim kis” long pikinini bilong God? Long taim bilong ol man i bin raitim Baibel, pasin bilong givim kis long man i makim olsem man i pren wantaim narapela na i stap gut long em. Na em i pasin bilong tok welkam long man i kam long haus. God i tokim ol hetman bilong graun long givim kis long Pikinini, olsem tokaut long em i King Mesaia.
3:het tok long rait italik—Wanem wok bilong ol dispela het tok i stap long sampela song? Planti het tok i kolim nem bilong man i raitim song na i stori long wanem samting i bin kamap taim man i raitim dispela song, olsem yumi ken lukim long Song 3. Na tu, sampela taim het tok bai stori long as bilong singsing o wok bilong en, (Song 4 na 5) na pasin bilong mekim musik (Song 6).
11:3—Taim dispela ves i tok long ol manmeri i no save mekim stretpela pasin, dispela i makim wanem samting? Dispela i makim olsem i no gat lo na oda na ol man i mekim pasin i no stret. Long kain taim olsem, ol “stretpela man” i mas bilip tru long God.—Song 11:4-7.
21:3—“Hat king i gat gol” i makim wanem samting? Baibel i no stori olsem dispela hat king i makim hat king tru tru o em i makim biknem Devit i bin kisim taim em i winim planti pait. Tasol dispela ves i tok profet long wok king Jisas i bin kisim long Jehova long 1914. Hat king i gat gol na dispela i makim olsem wok king bilong em i nambawan tru.
22:1, 2—Wanem samting inap mekim na Devit i pilim olsem Jehova i lusim em? Ol birua bilong Devit i mekim nogut tru long em, olsem na em i pilim olsem ‘bel bilong em i malumalum tru, olsem gris i kamap olsem wara.’ (Song 22:14) Olsem na em i pilim olsem Jehova i lusim em. Jisas tu i bin pilim olsem taim ol i hangamapim em. (Matyu 27:46) Tok bilong Devit i kamapim samting em ol man i save pilim taim kain hevi olsem i painim ol. Tasol beten bilong em i stap long Song 22:16-21 i soim olsem Devit i no lusim bilip bilong em long God.
Skul Yumi Kisim:
1:1. Yumi no ken bung wantaim ol man i no save laikim Jehova.—1 Korin 15:33.
1:2. Long olgeta de yumi mas tingim gut ol samting bilong lotuim God.—Matyu 4:4.
4:4. Taim yumi belhat, em i savepasin long yumi no ken toktok, nogut yumi mekim wanpela tok em bihain bai yumi bel hevi long en.—Efesus 4:26.
4:5. Ol wok bilong lotu yumi mekim olsem ofa, em ol ofa “Bikpela i save laikim” sapos stretpela tingting i kirapim yumi long mekim na pasin bilong yumi i stret wantaim ol samting Jehova i laik yumi mas mekim.
6:5. Nambawan gutpela samting yumi ken mekim taim yumi stap laip em yumi ken givim biknem long Jehova.—Song 115:17.
9:12. Jehova “i save tingting long ol man i karim pen na em i save bekim pe nogut long ol man i mekim nogut long ol.”
15:2, 3; 24:3-5. Ol Kristen tru i mas mekim tok tru tasol na no ken mekim tok giaman na bagarapim nem bilong ol narapela.
15:4. Sapos yumi kisim save olsem yumi bin mekim tok promis i no stret wantaim tok bilong Baibel, orait yumi no ken truim dispela tok promis. Tasol yumi mas truim ol narapela tok promis yumi mekim, maski i hatwok long mekim olsem.
15:5. Yumi ol man i lotuim Jehova i no ken mekim wok nogut long mani bilong yumi.
19:1-6. Ol samting i no inap toktok o wokim tingting ol i save litimapim nem bilong Jehova, olsem na yumi ol man i save toktok na wokim tingting i mas litimapim nem bilong em.—KTH 4:11.
19:7-11. Ol lo bilong Jehova i gutpela tru bilong helpim yumi!
19:12, 13. Pasin bilong mekim rong na bikhet em ol sin yumi mas sakim.
19:14. Yumi mas tingim gut ol samting yumi mekim, ol toktok bilong yumi, na ol samting yumi tingting long en.
‘MI WOKABAUT STRET, OLSEM NA YU LUKAUTIM MI’
Long kirap bilong tupela song long dispela hap, Devit i kamapim klia bikpela laik bilong em long bihainim stretpela pasin. Em i tok: “Tasol mi yet mi save mekim stretpela pasin.” (Song 26:11) Long beten em i mekim bilong askim God long lusim rong bilong em, em i tok: “God, taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta.” (Song 32:3) Devit i mekim dispela gutpela tok long ol man i save stap gut long Jehova: “Bikpela i save lukautim ol stretpela manmeri, na em i save harim beten bilong ol.”—Song 34:15.
Tok bilong Song 37 i gutpela tok tru bilong ol lain Israel na em i gutpela bilong yumi tu, long wanem, yumi stap long “taim bilong las de” bilong pasin bilong dispela graun. (2 Timoti 3:1-5) Song 40:7, 8 i tok profet long Krais Jisas olsem: “God, mi kam pinis, olsem bipo ol i raitim tok long mi long buk. God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” Laspela song long buk 1 bilong Buk Song i stori long Devit i askim Jehova long helpim em bihain long taim em i mekim sin wantaim Batseba. Em i tok: “Yu bin lukim mi i wokabaut stret, olsem na yu lukautim mi.”—Song 41:12.
Bekim Bilong Ol Askim Bilong Baibel:
26:6—Olsem wanem yumi wokabaut raunim alta bilong Jehova wankain olsem Devit? Alta i makim laik bilong Jehova long kisim ofa Jisas Krais i bin givim bilong baim bek ol manmeri. (Hibru 8:5; 10:5-10) Yumi wokabaut raunim dispela alta taim yumi bilip long dispela ofa.
29:3-9—Ol dispela ves i tok taim Jehova i toktok i olsem klaut i pairap. Dispela i kamapim wanem pasin bilong em? Dispela i kamapim bikpela strong bilong Jehova!
31:23—Man i bikhet i kisim wanem kain pe? Em i kisim strafe. Taim stretpela man i no tingting gut na mekim popaia Jehova bai stretim em. Man i bikhet i no save tanim bel long pasin nogut em i bin mekim, olsem na em i kisim strafe long pasin nogut em i mekim.—Sindaun 11:31; 1 Pita 4:18.
33:6—Wanem mining bilong dispela tok “God i bin tok”? Dispela i makim olsem God i save salim strong bilong em, olsem holi spirit, bilong mekim wok bilong em, olsem em i bin mekim taim em i bin wokim ol samting long heven. (Stat 1:1, 2) Yumi ken tok dispela strong bilong em, i olsem strongpela win i lusim maus bilong em, na em inap salim i go longwe bilong mekim wok bilong em.
Skul Yumi Kisim:
26:4. Yumi bihainim savepasin taim yumi no bung wantaim ol man husat i save haitim pasin tru bilong ol long Intenet, ol lain long skul na ol wanwok em ol i save haitim pasin tru bilong ol na ol i giaman long kamap pren bilong yumi, ol apostet husat i giaman long mekim gutpela pasin, na ol lain husat i save giaman long mekim gutpela pasin long ai bilong ol man, tasol long pasin hait ol i save mekim pasin i no stret.
26:7, 12; 35:18; 40:9. Yumi mas litimapim nem bilong Jehova long ai bilong ol man long ol bung Kristen.
26:8; 27:4. Olsem wanem? Yumi save amamas tru long i go long ol miting Kristen?
26:11. Devit i tok em i gat bikpela laik long mekim stretpela pasin, na tu, em i askim Jehova long kisim bek em. Na olsem tasol, maski yumi sinman, yumi tu inap mekim stretpela pasin.
29:10. Jehova i “bosim olgeta biksolwara,” dispela i makim olsem em i bosim gut olgeta strong bilong em.
30:5. Nambawan pasin bilong Jehova em pasin laikim—i no pasin bilong belhat.
32:9. Jehova i no laik bai yumi kamap olsem hos o donki we man i mas mekim wok long stik bilong kirapim em long bihainim tok, nogat. Em i laik bai yumi bihainim tok bilong em long laik bilong yumi yet, long wanem yumi kliagut long laik bilong em.
33:17-19. I no gat wanpela gavman inap kisim bek yumi maski em i gat strong. Yumi mas bilip long Jehova na Kingdom bilong em.
34:10. Tok bilong dispela ves i gutpela tok tru long ol lain i save putim ol samting bilong Kingdom i stap nambawan long laip bilong ol.
39:1, 2. Taim ol man nogut i laik bai yumi tokim ol long ol samting bilong ol wanbilip bilong yumi na bai ol i ken bagarapim ol, yumi bihainim savepasin taim ‘yumi no mekim wanpela tok’ na yumi pasim maus tasol.
40:1, 2. Sapos yumi bel hevi i stap, pasin bilong bilip na wetim Jehova bai helpim yumi long karim dispela hevi. Dispela i olsem em i pulim yumi i kam antap long “bikpela hul i daun tumas” na kamautim yumi long “tais i olsem sup tru.”
40:5, 12. Sapos yumi tingting olsem yumi save kisim blesing ‘moa moa yet, na yumi no inap kaunim,’ dispela bai helpim yumi long karim ol hevi i painim yumi, maski ol i planti.
“Litimapim Nem Bilong Bikpela”
Ol dispela 41 song long buk 1 bilong Buk Song i mekim gut bel bilong yumi na i strongim yumi, a? Maski yumi karim hevi o bel bilong yumi i gat tok, ol dispela tok bilong God long Baibel inap strongim bel bilong yumi. (Hibru 4:12) Ol dispela song i givim gutpela tok bilong helpim yumi long i stap bilong yumi. Planti taim ol dispela song i tokim yumi olsem maski wanem kain hevi i painim yumi, Jehova bai i no inap lusim yumi.
Laspela ves bilong buk 1 bilong Buk Song i gat dispela tok: “Yumi litimapim nem bilong Bikpela, em i God bilong ol Israel. Na olgeta lain i kamap bihain, ol tu i ken litimapim nem bilong en. I tru.” (Song 41:13) Taim yumi skelim pinis buk 1 bilong Buk Song em i kirapim yumi long givim biknem long Jehova.
[Futnot]
[Rait long pes 19]
Sapos ol samting i no gat laip inap long givim biknem long Jehova, yumi tu i mas mekim olsem, a?
[Piksa long pes 17]
Devit i raitim klostu olgeta song long buk 1 bilong Buk Song
[Piksa long pes 18]
Yu save wanem song i stori long Jehova olsem Bikpela Wasman?
[Piksa long pes 20]
No ken larim wanpela de i lus nating na yu no tingim ol samting bilong spirit
[Piksa Kredit Lain long pes 17]
Stars: Courtesy United States Naval Observatory
[Piksa Kredit Lain long pes 19]
Stars, pages 18 and 19: Courtesy United States Naval Observatory
[Piksa Kredit Lain long pes 20]
Stars: Courtesy United States Naval Observatory