I Stret Yumi Olgeta i Litimapim Nem Bilong Jehova
“Litimapim nem bilong Bikpela!”—SNG. 111:1.
1, 2. Wanem mining bilong tok “Haleluya”? Dispela tok i kamap long Ol Skripsa Grik bilong makim wanem samting?
“HALELUYA!” Em wanpela tok yumi save harim planti taim long ol haus lotu bilong Kristendom. Na tu, taim sampela man i toktok wantaim ol narapela, ol i save kolim dispela tok. Tasol i no planti man i save long mining tru bilong en, na planti man i kolim dispela tok, wokabaut bilong ol i bagarapim nem bilong God. (Ta. 1:16) Wanpela dikseneri bilong Baibel i tok, “Haleluya” em wanpela “tok ol man bilong raitim ol song i save yusim bilong singautim ol narapela long bung wantaim ol long litimapim nem bilong Jehova.” Sampela saveman bilong Baibel i tok, mining bilong “Haleluya” em “ ‘Litimapim nem bilong Ja,’ [olsem] Jehova.”
2 Baibel New World Translation i tanim dispela tok long Song 111:1 olsem “Yupela ol manmeri, litimapim nem bilong Ja!” Long tok Grik, dispela tok i kamap 4-pela taim long Kamapim Tok Hait 19:1-6,a bilong makim pinis bilong lotu giaman. Taim dispela samting i kamap, ol man i lotu tru long God ol bai tok “Haleluya,” tasol ol bai mekim long pasin i soim rispek.
Ol Bikpela Wok Bilong Em
3. Wanem nambawan as na yumi save bung wantaim?
3 Man bilong raitim Song 111 i kamapim planti as na i stret yumi olgeta i litimapim nem bilong Jehova. Ves 1 i tok: “Laik bilong mi i strong olgeta, olsem na bai mi givim bikpela tenkyu long em long bung bilong olgeta manmeri bilong en.” Ol Witnes Bilong Jehova long nau i gat wankain laik. Nambawan as na yumi save bung wantaim, long ol kongrigesen bilong yumi na long ol bikpela kibung, em bilong litimapim nem bilong Jehova.
4. Olsem wanem ol man inap save gut long ol wok bilong Jehova?
4 “Bikpela i save mekim ol nambawan wok tru. Ol manmeri i save laikim tumas wok bilong Bikpela, ol i laik save gut long ol dispela wok.” (Sng. 111:2) Wanpela buk i tok, dispela ves i stret long ol man husat i laik save gut long ol wok bilong God na ol i “wok strong long tingim tingim long bel na stadi gut long en.” Olgeta samting Jehova i bin wokim, i gat as na ol i stap. Em i putim san, graun, na mun long ples stret bilong en, bai graun bilong yumi i gat hat na lait, nait na de, taim bilong san na ren, na taim bilong haiwara na draiwara.
5. Ol bikpela save ol man i bin kisim long yunives i bin kamapim klia wanem samting?
5 Ol saientis i bin kisim planti save long hap bilong sola sistem em graun i stap long en, na sais, na wokabaut bilong mun bilong yumi i helpim graun olsem wanem. Graun na mun i stap long ples stret bilong en na i wok gut wantaim, na dispela i mekim na i gat kain kain taim bilong yia, olsem taim bilong san na taim bilong ren. Ol i bin kisim planti save tu long fopela kain strong i bosim yunives, em ol i save wok stret tru long mak bilong ol na i no save abrus liklik. Wanpela profesa i tingim dispela samting, na long wanpela buk i stori long yunives em i tok: “Nau yumi ken save long as na insait long 30 yia i go pinis, planti saientis i bin senisim tingting bilong ol na nau ol i wanbel long tok olsem, ol man em ol i bilip olsem yunives i bin kamap nating, ol i bilip nating tasol. Taim yumi kliagut moa long ol samting bilong dispela gutpela graun yumi stap long en, dispela i save kamapim klia moa yet olsem wanpela man i gat bikpela save i bin wokim ol samting.”
6. Yu gat wanem tingting long bodi bilong yumi man em God i bin wokim?
6 Narapela bikpela wok God i mekim na i nambawan tru, em bodi bilong yumi man. (Sng. 139:14) Taim God i wokim man na meri, ol i gat tingting, na bodi bilong ol i gat olgeta samting i stap long en—olsem klok na lewa samting—bambai bodi i ken wok gut, na ol i gat strong long mekim wok. Ol i gat pasin bilong toktok na harim tok, na pasin bilong rit na rait. Planti man inap mekim ol dispela samting. Na taim yumi sanap, yumi save sanap stret na baksait i no krungut. Yumi kirap nogut taim yumi tingim ol dispela samting. Na yumi gat ol rop wailis long kru i kirapim kru long wokim tingting, na inapim bodi long lukluk, harim, smelim, na teistim ol samting. Ol dispela samting i winim tru ol samting ol saientis i bin wokim. Ol samting yumi man i wokim, yumi inap mekim tasol, long wanem, yumi gat tingting na kain kain strong em God i bin givim long yumi. Na tu, yumi gat 10-pela pinga bilong mekim kain kain wok. Ol ensinia i no inap wokim samting i wankain olsem ol tenpela pinga bilong yumi, em ol i luk naispela tru na inap mekim kain kain wok. Askim yu yet, ‘Sapos God i no bin givim ol pinga long yumi, yumi inap droim piksa o wokim haus samting?’ Nogat tru.
Ol Bikpela Wok na Ol Pasin Bilong God
7. I gat wanem as na yumi mas tingim Baibel i olsem wanpela bilong ol bikpela wok bilong God?
7 I gat sampela bikpela wok moa Jehova i bin mekim bilong helpim ol man, em Baibel i stori long en. Baibel yet i wanpela bilong ol dispela bikpela wok, em olgeta tok bilong en i stret wantaim. I no gat narapela buk i olsem Baibel, em wanpela buk “spirit bilong God yet i bin kamapim . . . [na] i gutpela samting tru bilong skulim yumi.” (2 Ti. 3:16) Namba wan buk bilong Baibel, Stat, i stori long samting God i bin mekim bilong rausim ol pasin nogut long graun long taim bilong Noa. Namba 2 buk, Kisim Bek, i stori long ol samting Jehova i bin mekim bilong kamapim long ples klia olsem em i God tru, long taim em i kisim bek ol Israel long wok kalabus long Isip. Ating man bilong raitim song i bin tingim ol dispela samting taim em i tok: “Olgeta samting [ Jehova] i mekim i save kamapim biknem bilong en, na em i gutpela tumas. Stretpela pasin bilong en bai i stap oltaim oltaim. Bikpela i kirapim tingting bilong ol manmeri bai ol i tingting oltaim long ol gutpela samting em i bin mekim. Oltaim Bikpela i save marimari na sori long yumi.” (Sng. 111:3, 4) Ating yu wanbel long tok olsem ol samting Jehova i bin mekim long bipo, na long nau tu, i save kamapim “biknem bilong en.”
8, 9. (a) Olsem wanem ol wok bilong God i narapela kain long planti wok bilong ol man? (b) Wanem sampela pasin bilong God yu yet i amamas long en?
8 Man bilong raitim song i stori tu long ol gutpela pasin bilong Jehova, olsem stretpela pasin, pasin sori, na pasin marimari. Yumi save olsem taim ol sinman i mekim ol samting, planti taim stretpela pasin i no stap olsem as bilong ol samting ol i mekim, nogat. Planti taim gridi pasin, mangal, na pasin antap i kirapim ol long mekim ol samting. Dispela samting i kamap ples klia long ol samting nogut bilong pait ol i wokim bilong ol woa ol i kamapim, na bilong kisim planti mani. Ol dispela samting i mekim nogut tru long planti milion manmeri i no gat asua. Planti bikpela wok em ol man i bin kamapim, ol i bin kamap long rot we ol man nating i bin kisim nogut. Wanpela eksampel yumi ken tingim, em pasin bilong yusim ol slev bilong wokim ol piramid. Ol dispela piramid long Isip i stap olsem matmat bilong ol Fero i gat pasin antap. Na tu, planti wok ol man i mekim long nau i save “bagarapim graun.”—Ritim KTH 11:18.
9 Tasol ol wok bilong Jehova i narapela kain. Long olgeta taim stretpela pasin i stap olsem as bilong ol dispela wok! Wanpela wok bilong Jehova i olsem: Em i bin mekim pasin marimari na stretim rot bilong kisim bek ol man i gat sin. Long dispela pasin bilong baim bek yumi, God i ‘soim yumi olsem em i stretpela olgeta.’ (Ro. 3:25, 26) Na “stretpela pasin bilong en bai i stap oltaim oltaim”! Em i no bin les kwik long ol man i gat sin, na dispela i bin kamapim pasin sori bilong em. Sampela taim em i bin tok “plis” taim em i tokim ol man long ol i mas lusim pasin nogut bilong ol na kirap mekim pasin i stret.—Ritim Esekiel 18:25.b
Em i Tingim Ol Tok Promis Bilong Em
10. Jehova i bin mekim wanem bilong truim kontrak em i mekim wantaim Abraham?
10 “Em i save givim kaikai long ol manmeri i save pret long em. Em i no save lusim tingting long dispela kontrak em i bin mekim wantaim ol manmeri bilong en.” (Sng. 111:5) Dispela kontrak man bilong raitim song i stori long en, em kontrak God i bin mekim wantaim Abraham. Jehova i bin tok promis long mekim gut tru long ol lain tumbuna pikinini bilong Abraham, na em i tok ol bai daunim ol birua na kisim ol taun bilong ol. (Stt. 22:17, 18; Sng. 105:8, 9) Long namba wan truim bilong ol dispela promis, ol lain tumbuna pikinini bilong Abraham ol i kamap lain Israel. Dispela lain i bin wok kalabus long Isip inap longtaim tru, tasol “God i tingim dispela kontrak em i bin mekim wantaim Abraham” na i kisim bek ol. (Kis. 2:24) Jehova i givim planti gutpela samting long ol. Em i givim kaikai bilong strongim bodi bilong ol, na ol tok bilong stiaim ol. (Lo 6:1-3; 8:4; Neh. 9:21) Insait long planti handet yia bihain, planti taim dispela lain i lusim God, maski God i save salim ol profet i go long ol bilong kirapim ol long kam bek long em. Winim 1,500 yia bihain long em i kisim bek ol Israel long Isip, God i salim Pikinini bilong em i kam long graun. Klostu olgeta Juda i sakim Jisas na ol i orait long ol Rom i kilim em i dai. Jehova i kamapim wanpela nupela lain, em “lain Israel tru bilong God.” Dispela lain, wantaim Krais, ol i lain pikinini bilong Abraham long spirit, em God i bin tok profet em bai mekim wok long en bilong mekim gut long ol manmeri.—Ga. 3:16, 29; 6:16.
11. Olsem wanem na Jehova i wok yet long tingim “dispela kontrak” em i mekim wantaim Abraham?
11 Jehova i wok yet long tingim “dispela kontrak” na ol blesing dispela kontrak bai kamapim. Long nau em i save kamapim planti kaikai bilong spirit long planti tok ples, winim 400. Na tu, em i save harim ol beten bilong yumi na givim yumi ol samting bilong skin yumi mas i gat. Dispela i stret wantaim dispela tok: “Olgeta de yu ken givim mipela kaikai inap bilong dispela de.”—Lu. 11:3; Sng. 72:16, 17; Ais. 25:6-8.
Bikpela Strong Bilong Jehova
12. Olsem wanem na Israel bilong bipo i bin kisim ‘graun bilong sampela lain’?
12 “Em i givim graun bilong ol sampela lain long ol manmeri bilong en. Na long dispela pasin em i soim strong bilong en long ol.” (Sng. 111:6) Ating man bilong raitim song i tingim dispela taim we God i bin wokim mirakel na kisim bek ol Israel long Isip. Taim Jehova i larim ol Israel i go insait long Graun Bilong Promis, orait nau ol inap daunim ol lain i stap long hap is na hap wes bilong wara Jordan na kisim graun bilong ol. (Ritim Nehemia 9:22-25.) Tru tumas, Jehova i givim ‘graun bilong sampela lain’ long ol Israel. Man! God i gat bikpela strong tru!
13, 14. (a) Ating man bilong raitim song i bin tingim wanem samting i bin kamap long Babilon we God i kamapim strong bilong em? (b) Wanem sampela samting moa Jehova i bin mekim bilong kisim bek lain bilong em?
13 Tasol maski Jehova i bin mekim planti samting bilong helpim ol Israel, ol i no soim rispek long em, o long ol tumbuna bilong ol, Abraham, Aisak, na Jekop. Ol i wok yet long bikhet inap long God i salim ol Babilon i kam rausim ol long graun bilong ol na bringim ol i go long Babilon. (2 Sto. 36:15-17; Neh. 9:28-30) Sapos man bilong raitim Song 111 i bin stap long taim ol Israel i lusim Babilon na kam bek long ples—olsem sampela saveman bilong Baibel i tok—orait dispela i narapela as na em i litimapim nem bilong Jehova long Em i stap gut long kontrak bilong Em na long bikpela strong em i kamapim. God i bin mekim olsem taim em i kisim bek ol Juda long Babilon, em wanpela strongpela gavman i no save larim ol kalabusman i go fri.—Ais. 14:4, 17.
14 Inap 500 yia bihain, Jehova i mekim wanpela bikpela wok tru long strong bilong em. Em i helpim ol man i tanim bel long lusim kalabus long sin na dai. (Ro. 5:12) Dispela i opim rot long 144,000 manmeri i ken kamap lain bilong Krais em God i bin makim ol long holi spirit. Long 1919, Jehova i yusim strong bilong em long helpim liklik hap lain bilong ol long lusim kalabus bilong lotu giaman. Strong bilong God tasol em i as bilong ol samting ol i bin mekim long dispela taim bilong las de. Ol i stap gut long God, na taim ol i dai ol bai mekim wok king wantaim Jisas Krais long heven na bosim dispela graun na helpim ol manmeri i tanim bel pinis. (KTH 2:26, 27; 5:9, 10) Ol bai kisim olgeta hap graun, ol Israel bilong bipo ol i bin kisim wanpela hap tasol bilong en.—Mt. 5:5.
Ol Stiatok Yumi Inap Bilipim na i Bilong i Stap Oltaim
15, 16. (a) Wanem sampela samting moa i insait long ol wok bilong God? (b) God i givim wanem ol lo long ol Israel long bipo?
15 “Pasin bilong en i tru na i stret olgeta. Yumi inap bilipim na bihainim olgeta lo bilong en. God i save mekim gutpela na stretpela pasin tasol na em i kamapim lo. Na lo bilong en bai i stap oltaim.” (Sng. 111:7, 8) Narapela samting i insait long ol wok bilong Jehova, em tupela hap ston i gat 10-pela bikpela lo long en, em i bin givim long ol Israel. (Kis. 31:18) Ol dispela lo, wantaim olgeta narapela lo insait long kontrak bilong Lo Bilong Moses, ol i gat ol stiatok i stap olsem as bilong en, em yumi inap bilipim na i bilong i stap oltaim.
16 Wanpela lo long dispela tupela hap ston i tok: “Mi Bikpela, mi God bilong yupela, na mi no inap larim wanpela giaman god i senisim mi.” Na dispela lo i tok moa: “Ol manmeri i laikim mi tumas na i save bihainim olgeta lo bilong mi, orait bai mi laikim ol tru na mi laikim ol 1,000 lain tumbuna bilong ol i kamap bihain.” Na i gat ol gutpela stiatok olsem: “Yupela i mas aninit long papamama bilong yupela na bihainim tok bilong ol,” na “no ken stil,” na no ken mangalim samting bilong narapela.—Kis. 20:5, 6, 12, 15, 17.
Man Bilong Baim Bek Yumi
17. I gat wanem as na i stret ol Israel i mas soim olsem ol i tingim nem bilong God i holi?
17 “Em i bin baim bek ol manmeri bilong en. Na em i mekim wanpela kontrak wantaim ol, na dispela kontrak i stap oltaim oltaim. Bikpela em i God bilong mekim gutpela na stretpela pasin olgeta, na taim ol man i tingting long biknem bilong en [“nem bilong em i holi,” NW] ol i save pret na i stap aninit tru long em.” (Sng. 111:9) Long dispela ves tu, ating man bilong raitim song i tingim pasin bilong Jehova long stap gut long kontrak em i bin mekim wantaim Abraham. Jehova i tingim dispela kontrak na em i no lusim ol manmeri bilong em, pastaim long Isip we ol i stap slev na bihain long Babilon we ol i stap kalabus. Long dispela tupela taim, God i kisim bek ol manmeri bilong em. Olsem na i gat as tru na ol Israel i mas soim olsem ol i tingim nem bilong em i holi.—Ritim Kisim Bek 20:7; Rom 2:23, 24.
18. I gat wanem as na yu tingim wok bilong holim nem bilong God em i wanpela gutpela samting tru?
18 Na i wankain tu long ol Kristen long nau, em God i bin baim bek ol long kalabus bilong sin na dai. Yumi mas wok strong long bihainim namba wan tok long beten bilong Jisas: “Nem bilong yu i mas i stap holi.” (Mt. 6:9) Pasin bilong tingim gutpela nem bilong God i mas kirapim yumi long pret long em. Man i raitim Song 111 i gat stretpela tingting long pasin bilong pret long God. Em i tok: “Sapos man i laik kamap saveman em i mas pret long Bikpela. Em i save givim gutpela tingting long ol manmeri i save bihainim laik [ol lo] bilong en.”—Sng. 111:10.
19. Stadi i kamap bihain long dispela bai stori long wanem samting?
19 Pasin bilong pret long God bai helpim yumi long heitim pasin nogut. Na tu, em bai helpim yumi long bihainim ol gutpela pasin bilong God i stap long Song 112, em yumi bai stori long en long stadi i kamap bihain long dispela. Dispela song bai helpim yumi long save long ol samting yumi mas mekim na bai yumi inap stap namel long planti milion manmeri em ol i amamas long litimapim nem bilong God i go inap oltaim oltaim. I stret yumi olgeta i mekim olsem. “Yumi mas litimapim nem bilong en oltaim oltaim.”—Sng. 111:10.
[Ol Futnot]
a Long Buk Baibel, futnot bilong Kamapim Tok Hait 19:1 i tok: “ ‘Yumi litimapim nem bilong God.’ . . . Tok Hibru em i olsem, ‘Haleluya.’ ”
b Esekiel 18:25: “Yupela Israel, [“plis,” NW] harim gut tok bilong mi. Yupela i ting pasin bilong mi i no stret, a? Nogat. Pasin bilong yupela tasol i no stret.”
Ol Askim Bilong Skelim Long Bel
• Bilong wanem i stret yumi olgeta i litimapim nem bilong Jehova?
• Wanem ol pasin bilong Jehova i kamap ples klia long ol wok bilong em?
• I gat wanem as na yu tingim wok bilong holim nem bilong God em i wanpela gutpela samting tru?
[Piksa long pes 20]
Namba wan as na yumi save bung wantaim, em bilong litimapim nem bilong Jehova
[Piksa long pes 23]
Olgeta lo bilong Jehova i gat ol stiatok em yumi inap bilipim na i bilong i stap oltaim