Bilip Long Tok Bilong Jehova

“Mi bilipim tok bilong yu.”​—SONG 119:42.

 1. Yumi ken tok wanem long man i bin raitim Song 119, olsem em i husat na em i gat wanem pasin?

MAN i raitim Song 119 i laikim tru tok bilong Jehova. Ating Prins Hesekia bilong Juda i bin raitim dispela song. Tok i stap long dispela song i stret wantaim pasin bilong Hesekia, husat i “pas tru long Bikpela” taim em i stap king bilong Juda. (2 King 18:​3-7) Samting i stap ples klia i olsem: Man i raitim dispela song em i tingim tru ol samting bilong spirit.​—Matyu 5:3.

 2. Wanem wanpela bikpela poin bilong Song 119, na man i bihainim wanem pasin na em i raitim?

² Wanpela bikpela poin Song 119 i kamapim em olsem: Ol tok bilong God i bikpela samting tru.a Bilong helpim ol long tingim tok bilong song, man i raitim dispela song i bihainim ol 22 leta bilong ABC bilong tok Hibru. Long tok Hibru bilong bipo ol i bin brukim dispela 176 ves long 22 hap na olgeta hap i gat 8-pela lain long en. Long ol wan wan hap, olgeta 8-pela lain bai kirap long wankain leta tasol. Dispela song i stori long tok na lo bilong God, stretpela tok na stretpela lo bilong God, pasin bilong Bikpela, ol samting God i laik yumi mekim, na stretpela pasin bilong Em. Long dispela stadi na narapela stadi i kamap bihain long en, bai yumi skelim tok bilong Song 119 em ol i bin kisim long Baibel Hibru na tanim stret. Taim yumi tingim ol samting i bin painim ol wokman bilong Jehova long bipo na long nau dispela inap mekim yumi amamas moa long tok bilong dispela song na long Tok Bilong God, em Baibel.

Bihainim Tok Bilong God na Stap Amamas

 3. Wanem mining bilong dispela tok “no gat asua”? Stori long dispela.

³ Bilong i stap amamas tru yumi mas wok long bihainim lo bilong God. (Song 119:​1-8) Sapos yumi mekim olsem, Jehova bai tingim olsem yumi “no gat asua.” (Song 119:1) Dispela tok yumi no gat asua i no makim olsem yumi gutpela olgeta, nogat. Dispela i makim olsem yumi wok strong long mekim laik bilong God Jehova. Noa “em i gutpela man, na wokabaut bilong en i stret long ai bilong God.” Dispela gutpela man na famili bilong em i abrusim bagarap long taim bilong Bikpela Tait, long wanem, em i mekim ol samting Jehova i tokim em long mekim. (Stat 6:9; 1 Pita 3:20) Olsem tasol, bilong yumi ken abrusim bagarap bilong dispela taim nogut bilong nau, yumi mas lukaut gut na “bihainim olgeta lo” bilong God na mekim laik bilong em.​—Song 119:4.

 4. Yumi mas mekim wanem bilong yumi ken amamas na ol samting yumi mekim i ken kamap gutpela?

⁴ Jehova i no inap lusim yumi sapos ‘bel bilong yumi i stap stret, na yumi litimapim nem bilong em na bihainim gut olgeta lo bilong em.’ (Song 119:​7, 8) God i no bin lusim Josua, lida bilong lain Israel, em man i bin ‘ritim buk bilong lo long san na long nait bilong bihainim tru olgeta tok i stap long lo.’ Dispela i mekim na olgeta samting em i mekim i bin kamap gutpela na em i bihainim gutpela tingting. (Josua 1:​8, NW ) Klostu long taim em i laik i dai, Josua i wok yet long litimapim nem bilong God na em inap tokim ol Israel olsem: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” (Josua 23:14) Olsem Josua na man bilong raitim Song 119, yumi mas litimapim nem bilong Jehova na bilipim tok bilong em bilong yumi ken amamas na ol samting yumi mekim i ken kamap gutpela.

Tok Bilong Jehova i Mekim Yumi Stap Klin

 5. (a) Stori long olsem wanem man inap stap klin long samting bilong spirit. (b) Wanem helpim i stap bilong wanpela yangpela husat i mekim bikpela rong?

⁵ Yumi inap stap klin long samting bilong spirit sapos yumi bihainim tok bilong God. (Song 119:​9-16) Dispela tok em i tru maski papamama i no makim gutpela pasin yumi ken bihainim. Maski papa bilong Hesekia em man bilong lotuim ol imis, Hesekia i bin rausim ol samting bilong lotu giaman na stretim pasin bilong em na em i “wokabaut long klinpela pasin.” Olsem wanem sapos wanpela yangpela i mekim wok bilong God long nau na em i mekim bikpela rong? Pasin bilong tanim bel, prea, helpim bilong papamama, na gutpela helpim bilong ol elda Kristen inap helpim em long bihainim pasin bilong Hesekia na ‘wokabaut long klinpela pasin na bai em i stap klin.’​—Jems 5:​13-15.

 6. Wanem ol meri i bin stretim pasin bilong ol na ol i ‘wokabaut long klinpela pasin na ol i bihainim tok bilong God’?

⁶ Rahap na Rut i bin stap laip paslain tru long taim man i bin raitim Song 119, tasol tupela i bin stretim pasin bilong ol na ol i “wokabaut long klinpela pasin.” Rahap em i wanpela pamukmeri bilong Kenan, tasol em i kisim nem olsem meri i bilip tru long Jehova na lotuim em. (Hibru 11:​30, 31) Meri Moap Rut i bin lusim ol god bilong em yet, na em i lotuim Jehova, na bihainim Lo Em i givim long ol Israel. (Rut 1:​14-17; 4:​9-13) Dispela tupela meri​—ol i no bilong lain Israel​—ol i bin ‘bihainim tok bilong God’ na ol i kisim gutpela blesing, ol i kamap tumbuna bilong Jisas Krais.​—Matyu 1:​1, 4-6.

 7. Olsem wanem Daniel na 3-pela narapela yangpela Hibru i makim gutpela piksa yumi ken bihainim long pasin bilong i stap klin long samting bilong spirit?

⁷ “Stat long taim ol manmeri i yangpela yet ol i save tingting long mekim ol pasin nogut,” tasol ol yangpela inap bihainim stretpela rot, maski ol i stap long dispela graun em Satan i bosim. (Stat 8:21; 1 Jon 5:19) Daniel na 3-pela narapela yangpela Hibru, em ol i kalabus long Babilon, ol i bin ‘bihainim tok bilong God.’ Olsem: Ol i no laik kaikai ‘ol samting ol i givim ol long haus bilong king,’ nogut ol i kamap doti. (Daniel 1:​6-10) Ol Babilon i save kaikai ol animal i no klin, em Lo Bilong Moses i tambuim. (Wok Pris 11:​1-31; 20:​24-26) Taim ol i kilim ol animal bilong kaikai ol i no save rausim blut bilong en long olgeta taim, na taim ol i kaikai mit i gat blut long en dispela i brukim lo bilong God. (Stat 9:​3, 4) Olsem na yumi no kirap nogut olsem 4-pela Hibru i no kisim kaikai long haus bilong king! Ol dispela gutpela yangpela i bin stap klin long samting bilong spirit na ol i stap olsem gutpela piksa yumi ken bihainim.

Tok Bilong God i Helpim Man Long Stap Gut Long God

 8. Bilong kisimgut na bihainim ol lo bilong God yumi mas i gat wanem kain tingting na save?

⁸ Pasin bilong laikim tumas tok bilong God em i bikpela samting bilong helpim yumi long stap gut long Jehova. (Song 119:​17-24) Sapos yumi wankain olsem man bilong raitim song, bai yumi gat bikpela laik long kliagut long “olgeta gutpela gutpela tok” i stap long lo bilong God. Oltaim bel bilong yumi bai ‘i dai tru long bihainim stretpela pasin bilong God’ na bai yumi ‘laikim tumas tok em i givim long yumi.’ (Song 119:​18, 20, 24) Olsem wanem? Maski yumi dediket pinis long Jehova inap sotpela taim tasol, yumi save “laikim tumas long kisim gutpela susu i kam long God”? (1 Pita 2:​1, 2) Yumi mas kliagut long ol as tok bilong Baibel na bai yumi inap kisimgut na bihainim ol lo bilong God.

 9. Yumi mas mekim wanem taim lo bilong God i pait wantaim tok bilong ol man?

⁹ Tru yumi laikim tumas ol tok bilong God, tasol olsem wanem sapos “ol hetman” i kamapim ol tok bilong daunim yumi? (Song 119:​23, 24) Long nau, planti taim ol man i gat namba i laik fosim yumi long tingim ol lo bilong ol man i bikpela samting winim lo bilong God. Taim tok bilong ol man na laik bilong God i pait wantaim, bai yumi mekim wanem? Laik bilong yumi long tok bilong God bai helpim yumi long stap gut long Jehova. Olsem ol aposel bilong Jisas Krais, em ol man i bin mekim nogut long ol, bai yumi tok: “Mipela i mas bihainim tok bilong God tasol. Mipela i no ken bihainim tok bilong ol man.”​—Aposel 5:29.

10, 11. Stori long olsem wanem yumi inap stap gut long Jehova maski ol bikpela hevi i painim yumi.

¹⁰ Yumi inap stap gut long Jehova maski ol bikpela hevi i painim yumi. (Song 119:​25-32) Sapos yumi laik i stap gut long God, yumi mas i gat laik long kisim skul na beten strong long God i ken skulim yumi. Na tu yumi mas ‘pasim tok long bihainim em tru.’​—Song 119:​26, 30.

¹¹ Hesekia, em man ol i ting em i bin raitim Song 119, i bin ‘pasim tok long bihainim God tru.’ Em i mekim olsem maski em i stap namel long ol man bilong lotu giaman na ating ol man i stap long haus bilong king i tok bilas long em. I luk olsem ‘bel bilong em i hevi tru,’ long wanem, em i stap wantaim ol kain man olsem. (Song 119:28) Tasol Hesekia i bilip long God, na em i wanpela gutpela king, na em i “mekim gutpela pasin long ai bilong Bikpela.” (2 King 18:​1-5) Sapos yumi bilip tru long God, orait yumi tu inap stap gut long God na winim ol traim i kamap long yumi.​—Jems 1:​5-8.

Tok Bilong Jehova i Save Strongim Bel

12. Olsem wanem yumi wan wan inap bihainim tok bilong Song 119:​36, 37?

¹² Taim yumi bihainim tok bilong God dispela i save strongim bel bilong yumi na yumi inap karim ol hevi i save painim yumi. (Song 119:​33-40) Long pasin daun yumi laik kisim ol tok bilong Jehova na bai ‘bel bilong yumi i kirapim yumi long bihainim olgeta lo’ bilong em. (Song 119:​33, 34) Olsem man bilong raitim song, yumi askim God: “Kirapim bel bilong mi bai mi gat laik long bihainim tok bilong yu. Nogut bel bilong mi i kirap long mangalim olgeta samting.” (Song 119:36) Olsem aposel Pol, yumi “laik wokabaut stret long olgeta taim.” (Hibru 13:18) Sapos bos long ples wok i laik bai yumi mekim samting i no stret, strongim bel na bihainim tok bilong God​—na long olgeta taim Jehova i save blesim kain pasin olsem. Em i save helpim yumi long daunim ol tingting nogut i kamap long tingting bilong yumi. Olsem na yumi laik prea olsem: “Helpim mi long givim baksait long ol samting i no gutpela.” (Song 119:37) Yumi no laik kisim tingting olsem samting God i no laikim em i gutpela samting. (Song 97:10) Dispela i mas kirapim yumi long abrusim ponografi na ol samting bilong ol spirit nogut.​—1 Korin 6:​9, 10; KTH 21:8.

13. Taim ol man i mekim nogut long ol disaipel bilong Jisas, olsem wanem ol i kisim strong bilong autim tok na ol i no pret?

¹³ Stretpela save long tok bilong God i givim yumi strong long autim tok na no ken pret. (Song 119:​41-48) Na yumi mas i gat strongpela bel bilong ‘bekim tok long ol man i tok nogut long yumi.’ (Song 119:42) Sampela taim yumi stap olsem ol disaipel bilong Jisas em ol man i mekim nogut long ol. Ol i bin beten olsem: “Bikpela, yu mas . . . helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.” Dispela beten i mekim wanem long ol? “Holi Spirit i pulap long ol, na ol i autim tok bilong God. Ol i tokaut strong na ol i no pret.” Bikpela inap strongim bel bilong yumi tu na bai yumi inap autim tok bilong em na yumi no pret.​—Aposel 4:​24-31.

14. Wanem samting i helpim yumi long autim tok na yumi no pret olsem Pol i bin mekim?

¹⁴ Sapos yumi tingim tru “tok tru” na ‘oltaim bihainim lo bilong God’ bai yumi gat strong long autim tok na yumi no sem. (Song 119:​43, 44) Taim yumi stadi gut long Tok Bilong God dispela i redim yumi long ‘tokim ol king long tok bilong em.’ (Song 119:46) Beten na spirit bilong Jehova bai helpim yumi long mekim ol tok i stret. (Matyu 10:​16-20; Kolosi 4:6) Pol i no bin pret long autim tok bilong God long ol bikman long taim bilong em. Olsem: Em i autim tok “long pasin bilong bilip long Krais Jisas” long Gavena Feliks bilong Rom. (Aposel 24:​24, 25) Na tu, Pol i bin autim tok long Gavena Festus na King Agripa. (Aposel 25:22–26:32) Jehova inap strongim yumi, na yumi tu i no inap pret long autim tok, na yumi no “sem long autim gutnius.”​—Rom 1:16.

Tok Bilong God i Mekim Isi Bel Bilong Yumi

15. Olsem wanem Tok Bilong God inap mekim isi bel bilong yumi taim ol narapela i mekim tok bilas long yumi?

¹⁵ Tok Bilong Jehova i save mekim isi bel bilong yumi. (Song 119:​49-56) Sampela taim yumi mas kisim tok bilong mekim isi bel bilong yumi. Yumi ol Witnes Bilong Jehova i no save pret long autim tok, tasol sampela taim i gat “ol bikhetman”​—em ol i bikhet long God​—ol i save ‘tok bilas nogut long yumi.’ (Song 119:51) Tasol taim yumi beten i stap, yumi inap tingim sampela gutpela tok i stap long Baibel na ‘dispela tok i givim strong long yumi.’ (Song 119:52) Taim yumi beten, yumi inap tingim wanpela lo o stiatok bilong Baibel em i mekim isi bel bilong yumi na i strongim bel bilong yumi long karim hevi i kamap long yumi.

16. Ol wokman bilong God i no bin mekim wanem, maski ol man i mekim nogut long ol?

¹⁶ Ol bikhetman i bin tok bilas long man bilong raitim song em ol Israel​—ol i bilong wanpela lain i dediket long God. Dispela i nogut tru! Yumi no laik bihainim pasin bilong ol, olsem na yumi pasim tok long bel olsem yumi no laik givim baksait long lo bilong God. (Song 119:51) Taim ol Natsi i mekim nogut long ol, na long ol narapela taim tu, planti tausen wokman bilong God i bin sakim pasin bilong givim baksait long ol lo na stiatok i stap insait long Baibel. (Jon 15:​18-21) Pasin bilong bihainim tok bilong Jehova i no givim hevi long yumi, long wanem, ol lo bilong em i kain olsem ol song i save mekim gut bel bilong yumi.​—Song 119:54; 1 Jon 5:3.

Tok Tenkyu Long Tok Bilong Jehova

17. Taim yumi tingim tru tok bilong God dispela i save kirapim yumi long mekim wanem?

¹⁷ Yumi soim olsem yumi tenkyu long tok bilong God taim yumi bihainim tok bilong em. (Song 119:​57-64) Man bilong raitim song i ‘promis long bihainim olgeta lo bilong God’ na ‘long biknait tru em i save kirap na litimapim nem bilong God long ol stretpela tok Em i mekim long kot.’ Sapos yumi kirap long nait, em i gutpela taim long tok tenkyu long God long rot bilong beten! (Song 119:​57, 62) Yumi tingim tru tok bilong God na dispela i kirapim yumi long kisim skul bilong em na yumi amamas long ‘wokabaut wantaim ol man i save mekim wok bilong God’​—em ol man i daun olgeta long God. (Song 119:​63, 64) Ol kain man olsem ol i gutpela poroman tru, a?

18. Olsem wanem Jehova i save bekim ol beten bilong yumi taim ‘ol man nogut i traim long pasim yumi bilong pulim yumi’?

¹⁸ Taim yumi kamapim tru bel bilong yumi long beten na long pasin daun yumi askim Jehova long skulim yumi, long dispela rot yumi ‘askim God strong long marimari long yumi’ na bai em i ken orait long yumi. Yumi mas beten moa yet taim ‘ol man nogut i traim long pasim yumi bilong pulim yumi.’ (Song 119:​58, 61) Jehova inap mekim ol samting bilong ol man nogut i no ken pasim yumi na bai yumi inap autim tok bilong Kingdom na kamapim ol disaipel. (Matyu 24:14; 28:​19, 20) Yumi lukim dispela samting i kamap long planti kantri we ol gavman i tambuim wok bilong yumi.

Bilip Long Tok Bilong God

19, 20. Olsem wanem em i gutpela tru ol man i mekim nogut long yumi?

¹⁹ Taim yumi bilip long God na tok bilong em, dispela i helpim yumi long karim ol hevi na mekim laik bilong em. (Song 119:​65-72) Maski ol bikhetman ‘i bin mekim planti tok giaman long em,’ man bilong raitim song i tok: “I gutpela tru ol man i mekim nogut long mi.” (Song 119:​66, 69, 71; NW ) Olsem wanem em i gutpela tru long ol man i mekim nogut long wanpela wokman bilong Jehova?

²⁰ Taim ol man i mekim nogut long yumi, long kain taim olsem yumi beten strong long Jehova, na dispela i mekim na yumi go klostu moa long em. Ating yumi lusim bikpela haptaim moa long stadi long Baibel na wok strong moa long bihainim tok bilong en. Long dispela rot yumi amamas moa long sindaun bilong yumi. Tasol olsem wanem sapos pasin yumi mekim taim ol man i mekim nogut long yumi i soim olsem yumi gat sampela pasin i no gutpela tumas, olsem yumi save les kwik na yumi gat pasin antap? Sapos yumi beten strong na kisim helpim long Tok Bilong God na spirit bilong Em, orait yumi inap winim ol dispela pasin kranki na “kamap nupela man.” (Kolosi 3:​9-14) Na tu, bilip bilong yumi i kamap strong moa taim yumi karim hevi. (1 Pita 1:​6, 7) Ol hevi i painim Pol i bin helpim em, long wanem, ol i mekim na em i save olsem em i mas kisim helpim long Jehova. (2 Korin 1:​8-10) Olsem wanem? Yumi larim ol hevi i helpim yumi?

Oltaim Bilip Long Jehova

21. Wanem samting bai kamap taim God i semim ol bikhetman?

²¹ Tok bilong God i kamapim as tru na yumi ken bilip strong long Jehova. (Song 119:​73-80) Sapos yumi bilip tru long Man Bilong Wokim yumi, bai yumi no inap pilim sem. Tasol long ol samting ol narapela i mekim, yumi mas kisim tok bilong mekim isi bel bilong yumi na yumi inap pilim olsem yumi mas beten olsem: “Ol bikhetman i save tok giaman na kotim mi nating. Mekim ol i sem tru long dispela pasin bilong ol.” (Song 119:​76-78) Taim Jehova i semim ol kain man olsem, em bai kamapim long ples klia pasin nogut bilong ol na em bai mekim holi nem bilong em. Yumi save olsem ol man i mekim nogut long ol manmeri bilong God ol i no kisim wanpela gutpela samting. Olsem: I no gat wanpela taim we ol i bin pinisim ol Witnes Bilong Jehova, em ol i bilip tru long God long bel olgeta, na bihain tu ol birua i no inap pinisim ol.​—Sindaun 3:​5, 6.

22. Olsem wanem man bilong raitim song i olsem “skin meme bilong pulimapim wara samting em smok i kisim pinis”?

²² Taim ol man i mekim nogut long yumi, tok bilong God i save strongim bilip bilong yumi long Em. (Song 119:​81-88) Ol bikhetman i mekim nogut long em, so man bilong raitim song i pilim olsem em i bagarap olsem “skin meme bilong pulimapim wara samting em smok i kisim pinis.” (Song 119:​83, 86, NW ) Long taim bilong ol man i bin raitim Baibel ol i save yusim skin bilong animal olsem botol bilong pulimapim wara o wain samting. Sapos ol i hangamapim kain botol klostu long paia na smok i kisim em, orait botol inap go liklik. Olsem wanem? Yu save pilim olsem yu wanpela ‘skin meme em smok i kisim pinis’ taim yu karim hevi o man i mekim nogut long yu? Sapos olsem, bilip long Jehova na prea: “Yu lukautim mi gut, long wanem, yu save laikim mi oltaim. Olsem na mi ken bihainim olgeta lo bilong yu.”​—Song 119:88.

23. Yumi bin kisim wanem save taim yumi skelim Song 119:​1-88? Em i gutpela yumi givim wanem askim long yumi yet taim yumi laik kirap mekim stadi long Song 119:​89-176?

²³ Ol tok yumi bin skelim long namba wan hap bilong Song 119 i soim yumi olsem Jehova i save mekim gutpela-pasin-sori long ol wokman bilong em, long wanem, ol i bilip long tok bilong em na ol i laikim tumas ol lo bilong em. (Song 119:​16, 47, 64, 70, 77, 88) Em i amamas long ol man i givim bel tru long bihainim tok bilong em. (Song 119:​9, 17, 41, 42) Taim yu tingting long mekim stadi long narapela hap bilong dispela gutpela song, em i gutpela sapos yu askim yu yet olsem, ‘Tru tru mi larim tok bilong Jehova i stap olsem lait bilong soim rot long mi?’

[Futnot]

Bai Yu Bekim Olsem Wanem?

• Bilong i stap amamas tru man i mas mekim wanem?

• Olsem wanem tok bilong Jehova i mekim yumi i stap klin long samting bilong spirit?

• Long wanem ol rot tok bilong God i save strongim bel bilong yumi na mekim isi bel bilong yumi?

• Bilong wanem yumi mas bilip long Jehova na ol tok bilong em?

[Ol Piksa long pes 11]

Rut, Rahap, na ol yangpela Hibru i bin kalabus long Babilon ol i bin ‘bihainim tok bilong God’

[Piksa long pes 12]

Pol i no bin pret long ‘tokim ol king long tok bilong God’