Husat i Givim Glori Long God Long Nau?
“Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu.”—KTH 4:11.
1, 2. (a) Wanem sampela stori i soim klia olsem wanem ol man i save kopim ol samting bilong dispela graun? (b) Wanem askim i kamap, na wanem bekim bilong en?
WINIM 50 yia i go pinis, wanpela ensinia bilong Swiselan, George de Mestral, i kisim dok bilong em na wokabaut raun. Taim em i go bek long haus, em i lukim gras i gat mosong i karamapim klos bilong em na gras bilong dok. Em i glasim dispela mosong gras na em i kirap nogut long gras i gat ol liklik liklik huk i save holimpas ol samting. Bihain em i wokim samting i kain olsem, ol i kolim Velkro. I no de Mestral tasol i skelim samting bilong graun na wokim samting i kain olsem kopi bilong en. Long Amerika, tupela brata, Wilbur na Orville Wright, ol i bin skelim olsem wanem ol traipela pisin i flai na bihain ol i kamapim wanpela balus. Wanpela ensinia bilong Frans, Alexandre-Gustave Eiffel, i bin droim plen bilong wokim dispela taua long Paris ol i kolim Eiffel Taua. Em i skelim wok bilong lek long sapotim bodi na long dispela rot em i kamapim pasin bilong wokim dispela taua.
2 Ol dispela stori i soim klia tru olsem wanem ol man i save kopim ol samting bilong dispela graun. Tasol i stret long askim olsem: Ol man bilong wokim ol samting, ol i save litimapim nem bilong dispela Man husat i bin wokim dispela mosong gras, ol traipela pisin, na lek bilong man, na ol arapela nambawan gutpela samting em ol man bilong graun i kisim tingting long en bilong wokim ol samting? Sori tru, long nau, ol man i no save litimapim o givim glori long God olsem i stret long mekim.
3, 4. Wanem mining bilong tok Hibru ol i tanim olsem “glori”? Na i mas makim wanem samting taim ol i yusim bilong makim Jehova?
3 Ating sampela i laik save, ‘bilong wanem yumi mas givim glori long God? Em i gat glori pinis, a?’ Tru, glori bilong God i bikpela tru i winim olgeta narapela, tasol dispela i no makim olsem em i gat glori long ai bilong olgeta man, nogat. Long Baibel, tok Hibru ol i tanim olsem “glori” i makim olgeta kain samting i mekim na man i gat namba o i gat nem long ai bilong ol arapela. Taim ol i yusim dispela tok bilong makim God, em i makim ol samting i mekim na God i gat biknem long ai bilong ol man bilong graun.
4 Planti man long nau i no save tingim ol samting i mekim na God i gat biknem. (Song 10:4; 14:1) Maski sapos ol i bilip long God o nogat, planti taim ol bikman bilong graun i mekim ol samting i kirapim ol man long daunim nem bilong Man Bilong Wokim olgeta samting. Ol i mekim olsem wanem?
Ol i No Inap Tok “Mi No Gat Asua”
5. Planti saientis i tok ol gutpela samting long graun i kamap olsem wanem?
5 Planti saientis i strong olsem i no gat God. Orait, ol i stori olsem wanem long ol man na ol narapela samting bilong graun i bin kamap? Ol i tok ol dispela samting i kamap long rot bilong evolusen, olsem popaia nating bilong wanpela strong. Man i bilip long evolusen, Stephen Jay Gould i tok: “Yumi kamap, long wanem, pul bilong wanpela lain pis i narakain na inap senis na kamap lek bilong wokabaut long graun . . . Ating yumi laikim narapela kain bekim, i winim dispela, tasol i no gat.” Richard E. Leakey na Roger Lewin i mekim kain tok olsem, ol i tok: “Ating bikpela popaia tasol i mekim na ol man i kamap.” Sampela saientis i litimapim ol naispela na gutpela samting ol i lukim long graun, tasol ol i no givim glori long God long dispela samting.
6. Wanem samting i pretim planti man na ol i no litimapim nem bilong God olsem Man Bilong Wokim olgeta samting?
6 Taim ol man i gat bikpela skul i strong olsem evolusen em i wanpela tok tru, ol i mekim olsem ol man i no bilip long dispela tok em ol man i no gat save. Planti man i ting wanem long dispela samting? Long sampela yia i go pinis, wanpela man i save gut long evolusen i givim askim long ol lain i bilip long dispela samting. Em i tok: “Mi painimaut olsem planti ol man i bilip long evolusen bikos ol arapela i tokim ol olsem olgeta lain i gat save i bilip long dispela samting.” Yes, taim ol man i winim bikpela skul i autim tingting bilong ol olsem i no gat God, dispela i mekim ol arapela i pret long litimapim nem bilong God olsem Man Bilong Wokim olgeta samting.—Sindaun 14:15, 18.
7. Olsem Rom 1:20 i tok, ol samting bilong graun i kamapim klia wanem samting? Bilong wanem i olsem?
7 Olsem wanem? Ol saientis i bilip long evolusen, long wanem, ol samting i kamapim klia ol samting i kamap olsem? Nogat tru! Yumi stap namel long ol samting i soim klia olsem wanpela Man Bilong Wokim olgeta samting i stap. Aposel Pol i tok long em olsem: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim. Olsem na i no gat man inap long tok olsem, ‘Mi no gat asua, long wanem, mi no bin save long God.’ ” (Rom 1:20) Hanmak bilong God i stap long olgeta samting em i bin wokim. Olsem na Pol i tok stat long taim ol man i kamap long graun, ol inap save olsem God i stap long rot bilong ol samting bilong graun ol inap lukim. Em wanem ol samting?
8. (a) Olsem wanem ples antap i kamapim klia strong na savetingting bilong God? (b) Wanem samting i soim olsem i gat samting i bin mekim na ol samting i kamap?
8 Ples antap bilong ol sta i soim yumi olsem God i stap. Song 19:1 i tok: “Skai i soim yumi olsem God em i nambawan tru.” “Skai”—em san, mun, na ol sta—ol i kamapim klia strong na savetingting bilong God. Ol sta i planti tru, dispela i mekim na yumi kirap nogut. Ol samting bilong ples antap i wokabaut, tasol ol i no go nabaut nabaut, nogat, ol i bihainim ol lo i bosim stret raun bilong ol.a (Aisaia 40:26) Olsem wanem? I stret long ting pasin bilong ol dispela samting long bihainim lo i kamap nating? Tingim, planti saientis i tok skai na graun i bin kamap wantu tasol. Wanpela profesa i stori long as na dispela em i bikpela samting, em i tok: “Sapos skai na graun i bin stap oltaim oltaim, dispela bai helpim tingting olsem i no gat God o i no gat rot long save long God. Olsem tasol, sapos skai na graun i gat kirap bilong en, dispela i soim olsem i mas i gat samting i mekim ol i kamap; husat inap ting kain samting olsem i ken kamap nating?”
9. Olsem wanem ol animal i kamapim klia savetingting bilong Jehova?
9 Long graun tu yumi lukim ol samting i soim olsem God i stap. Man bilong raitim song i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.” (Song 104:24) Ol samting Jehova i bin wokim, ol animal tu, ol i kamapim savetingting bilong em. Olsem kirap bilong stadi i kamapim, ol samting i gat laip i gutpela tru, olsem na planti taim ol saientis i laik kopim ol dispela samting. Tingim sampela arapela samting olsem. Ol saveman i wok long skelim kom bilong ol dia samting bilong wokim ol hat kapa i strong moa; bilong wokim gut moa liklik masin bilong helpim yaupas ol i skelim wanpela kain lang em yau bilong em i wok gut tru; ol i skelim wing bilong tarangau i flai long nait na bai ol i ken wokim gut moa balus bilong stap hait taim em i raun long ples antap. Maski man i wok strong long kopim ol dispela samting, em i no inap long wokim samting i gutpela olgeta olsem dispela samting bilong graun em i skelim. Wanpela buk (Biomimicry—Innovation Inspired by Nature) i tok: “Ol samting i gat laip i mekim pinis ol samting mipela i gat laik long mekim, tasol ol i no gat wok long bensin samting bilong graun, na i no mekim win na wara i doti, na i no bagarapim ol samting bilong bihain.” Dispela i makim savetingting tru!
10. Bilong wanem em i tingting kranki long tok i no gat Man Bilong Tingim na Wokim olgeta samting? Stori long dispela.
10 Maski yu lukluk long ples antap o long ol samting i stap long graun, em i klia tru olsem wanpela Man Bilong Wokim olgeta samting i stap. (Jeremaia 10:12) Yumi mas wanbel tru wantaim ol lain bilong heven i singaut olsem: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting.” (KTH 4:11) Tasol planti saientis i no lukim long ai bilong tingting ol samting i soim klia olsem God i stap, maski ol i kirap nogut long ol samting ol i lukim long ai tru tru bilong ol. (Efesus 1:18) Olsem: I no stret long amamas long ol gutpela samting bilong graun na tok i no gat God wankain olsem em i no stret long amamas long wanpela naispela piksa na tok i no gat atis i bin droim. Olsem na yumi no kirap nogut long Baibel i tok ol man i no bilip long God ol i no inap tok ol i ‘no gat asua’!
“Ol Aipas” i Giamanim Planti Man
11, 12. Wanem tingting i as bilong bilip bilong pridestinesen? Wanem samting i soim olsem dispela bilip i no givim glori long God?
11 Planti man i gat lotu i bilip tru olsem lotu bilong ol i givim glori long God. (Rom 10:2, 3) Tasol lotu em i narapela samting bilong ol man i bin pasim rot bilong planti milion man long givim glori long God. Olsem wanem em i mekim olsem? Bai yumi skelim tupela rot.
12 Namba wan, ol lotu i daunim glori bilong God long rot bilong ol bilip giaman. Tingim bilip ol i kolim pridestinesen. As bilong dispela bilip i olsem God i gat strong long save long ol samting bilong bihain, olsem na paslain long olgeta samting i kamap God i mas save pinis long en. Dispela bilip i mekim na ol man i kisim tingting olsem God i makim pinis olgeta samting em bai painim ol man wan wan—ol gutpela samting na samting nogut wantaim. Dispela tingting i putim asua bilong olgeta pen na hevi bilong nau i go long God tasol. God i no kisim biknem taim ol man i sutim asua i go long em, tasol tru tru em i asua bilong Satan, em nambawan birua bilong God em Baibel i kolim olsem “hetman i save bosim dispela graun.”—Jon 14:30; 1 Jon 5:19.
13. Bilong wanem i no stret long ting God i no inap bosim dispela strong bilong em long save long ol samting bilong bihain? Stori long dispela.
13 Pridestinesen i no stret wantaim tok bilong Baibel na i bagarapim gutnem bilong God. Dispela bilip i paulim samting God inap mekim wantaim samting em i save mekim. Baibel i kamapim klia God inap save long ol samting bai kamap long bihain. (Aisaia 46:9, 10) Tasol i no stret long ting em i no inap bosim dispela strong bilong em long save long ol samting bilong bihain o long ting em i as bilong olgeta samting i kamap. Olsem: Sapos yu gat bikpela strong. Dispela bai kirapim yu long pilim olsem yu mas apim olgeta hevipela samting yu lukim? Nogat tru! Olsem tasol God inap save long ol samting bilong bihain, tasol em i no pilim olsem em i mas save long o makim olgeta samting bilong kamap long bihain. Em i mekim wok long dispela strong bilong em long taim i stret long mekim.b Olsem na ol bilip giaman, olsem pridestinesen i no givim glori long God.
14. Olsem wanem lotu i bin bagarapim nem bilong God?
14 Namba tu samting bilong lotu i bagarapim nem bilong God em ol pasin ol man bilong lotu i save mekim. Ol Kristen i mas bihainim ol tok bilong Jisas. Wanpela samting Jisas i lainim lain bilong em long mekim em long “laikim tru ol arapela” na “ol i no bilong dispela graun.” (Jon 15:12; 17:14-16) Olsem wanem long ol pris pasto bilong ol lotu i gat nem Kristen? Ol i bihainim dispela tok bilong Jisas?
15. (a) Planti taim ol pris pasto i mekim wanem long taim ol lain bilong graun i pait? (b) Pasin bilong ol pris pasto i mekim wanem long planti milion manmeri?
15 Tingim ol samting ol pris pasto i mekim long taim bilong pait. Ol i bin sapotim, orait long, na stap olsem go pas bilong planti ol bikpela pait bilong ol lain bilong graun. Ol i bin blesim ol lain insait long ami na mekim olsem i stret long kilim man i dai. Yumi laik save, ‘Ol pris pasto i save olsem ol wanlotu bilong ol i stap long narapela sait ol i mekim wankain samting?’ (Lukim blok “God i Stap Long Sait Bilong Husat?”) Ol pris pasto i no save givim glori long God taim ol i tok God i helpim ol long mekim pait. Na ol i no givim glori long God taim ol i tok ol lo bilong Baibel i olsem olpela pinis na ol i orait tasol long olgeta kain pasin pamuk. Pasin bilong ol i kirapim yumi long tingim ol hetman bilong lotu, em Jisas i bin kolim ol olsem “ol man bilong mekim pasin nogut” na ‘ol aipas i laik soim rot long ol arapela’! (Matyu 7:15-23; 15:14) Pasin bilong ol pris pasto i mekim na planti milion manmeri i no strong long laikim God olsem bipo.—Matyu 24:12.
Husat i Givim Glori Tru Long God?
16. Bilong painimaut husat tru i givim glori long God, bilong wanem yumi mas skelim Baibel?
16 Sapos ol bikman na ol man i gat namba i no save givim glori long God, orait husat i mekim olsem? Bilong bekim dispela askim, yumi mas skelim Baibel. I stret long God i ken makim olsem wanem ol man i mas givim glori long em, na em i kamapim dispela long Tok bilong em, long Baibel. (Aisaia 42:8) Yumi laik skelim tripela rot bilong givim glori long God, na yumi laik save husat tru i mekim dispela tripela samting.
17. Olsem wanem Jehova i bin soim olsem em i bikpela samting long givim glori long nem bilong em? Husat long nau i litimapim nem bilong God long olgeta hap bilong graun?
17 Namba wan, yumi givim glori long God taim yumi litimapim nem bilong em. Dispela em i bikpela samting long laik bilong God olsem tok Jehova i givim long Jisas i kamapim. Sampela de paslain long em i dai, Jisas i beten olsem: “Papa, yu ken mekim nem bilong yu i kamap bikpela.” Na wanpela tok i kam daun long heven olsem: “Mi mekim nem bilong mi i kamap bikpela pinis, na bai mi mekim olsem gen.” (Jon 12:28) Man i toktok em Jehova yet. Bekim bilong em i soim klia olsem pasin bilong givim glori long nem bilong em i bikpela samting long em. Orait, husat long nau i save givim glori long Jehova long rot bilong autim na litimapim nem bilong em long olgeta hap bilong graun? Ol Witnes Bilong Jehova i mekim olsem, na ol i mekim long 235 kantri!—Song 86:11, 12.
18. Olsem wanem yumi inap save husat i lotu long God “long pasin i tru”? Wanem lain i bin skulim ol narapela long ol tok i tru bilong Baibel winim 100 yia?
18 Namba tu, yumi givim glori long God taim yumi autim tok tru long pasin bilong em. Jisas i tok ol man i lotu tru long God bai “lotu long em . . . long pasin i tru.” (Jon 4:24) Olsem wanem yumi inap save long man i lotu long God “long pasin i tru”? Ol i mas sakim ol bilip we Baibel i no as bilong en na i no tok tru long pasin bilong God na long laik bilong em. Ol i mas autim tok i tru bilong Baibel olsem: Jehova em i God Antap Tru, na em tasol i mas kisim glori olsem God Antap Tru (Song 83:18); Jisas em i Pikinini Bilong God na Man God i makim bilong bosim Kingdom Bilong Mesaia (1 Korin 15:27, 28); Kingdom Bilong God bai mekim nem bilong Jehova i stap holi na kamapim ol samting em i tingting pinis long mekim long graun na long ol manmeri i stap long en (Matyu 6:9, 10); ol i mas autim gutnius bilong Kingdom long olgeta hap bilong graun. (Matyu 24:14) Winim 100 yia i gat wanpela lain tasol i stap gut long wok bilong skulim ol man long ol gutpela tok i tru olsem—ol Witnes Bilong Jehova!
19, 20. (a) Olsem wanem gutpela pasin wanpela Kristen i bihainim inap givim glori long God? (b) Wanem ol askim i helpim yumi long save husat long nau i givim glori long God long rot bilong bihainim gutpela pasin?
19 Namba tri, yumi givim glori long God taim yumi bihainim ol lo bilong em. Aposel Pita i tok: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God long dispela de em bai i kam bilong kotim ol manmeri.” (1 Pita 2:12) Wokabaut bilong wanpela Kristen i soim ples klia bilip bilong em. Taim ol man i luksave long dispela samting—olsem bilip i as bilong gutpela pasin wanpela Kristen i bihainim—dispela i givim glori long God.
20 Husat long nau i givim glori long God long rot bilong gutpela pasin bilong ol? Orait, wanem lain bilong lotu em planti gavman i litimapim pasin bilong ol long stap wanbel wantaim ol arapela, bihainim ol lo, na baim ol takis bilong ol? (Rom 13:1, 3, 6, 7) Wanem lain i gat nem long olgeta hap olsem lain i stap wanbel wantaim ol wanbilip—pasin wanbel bilong ol i stap maski ol i bilong narapela narapela lain, kantri, o ples samting? (Song 133:1; Aposel 10:34, 35) Wanem lain i gat nem long olgeta hap long ol i skulim ol narapela long ol tok bilong Baibel i helpim ol man long rispek long lo, famili, na stretpela pasin olsem Baibel i kamapim? I gat wanpela lain tasol em gutpela pasin bilong ol long ol dispela samting na sampela arapela samting i bekim stret ol dispela askim—em ol Witnes Bilong Jehova!
Yu Save Givim Glori Long God?
21. Bilong wanem yumi mas skelim gut olsem yumi yet i givim glori long Jehova o nogat?
21 I gutpela yumi wan wan i askim yumi yet: ‘Mi yet mi givim glori long Jehova?’ Olsem Song 148 i tok, planti samting God i wokim i givim glori long em. Ol ensel, ples antap, graun na ol animal i stap long en—olgeta i litimapim nem bilong Jehova. (Ves 1-10) Sori tru planti man long nau i no mekim olsem! Taim wokabaut bilong yu i givim glori long God, yu litimapim nem bilong Jehova na kamap wanbel wantaim ol arapela samting God i wokim em ol i mekim olsem. (Ves 11-13) I no gat wanpela samting i gutpela moa long mekim long laip bilong yu olsem dispela.
22. Yu kisim wanem ol blesing taim yu givim glori long God? Yu mas strong long mekim wanem?
22 Yu kisim planti blesing long rot bilong givim glori long God. Taim yu bilip long ofa bilong Krais long baim bek ol man, yu kamap wanbel wantaim God na stap bel isi na kisim ol gutpela helpim long Papa bilong yu long heven. (Rom 5:10) Taim yu wok long tingim ol samting olsem rot bilong yu long givim glori long God, bai yu amamas moa yet long ol samting, na tenkyu long en. (Jeremaia 31:12) Na long dispela rot yu inap helpim ol arapela long stap amamas na mekim ol gutpela wok, dispela bai mekim amamas bilong yu i go bikpela moa. (Aposel 20:35) Yu mas i stap namel long ol man i strong long givim glori long God—long nau na oltaim oltaim!
[Ol Futnot]
a Bilong kisim sampela save moa long olsem wanem ples antap i kamapim strong na savetingting bilong God, lukim sapta 5 na sapta 17 bilong buk Go Klostu Long Jehova, em ol Witnes Bilong Jehova i wokim.
b Lukim Volium 1, pes 853, bilong buk Insight on the Scriptures, em ol Witnes Bilong Jehova i wokim.
Yu Inap Tingim?
• Bilong wanem yumi ken tok planti taim ol saientis i no helpim ol man long givim glori long God?
• Long wanem tupela rot lotu i pasim ol man long givim glori long God?
• Yumi ken mekim wanem ol samting bilong givim glori long God?
• Bilong wanem yu yet i mas tingim olsem yu givim glori long Jehova o nogat?
[Blok long pes 12]
“God i Stap Long Sait Bilong Husat?”
Wanpela man i bin insait long ami bilong Jemani long Wol Woa 2 na bihain em i kamap wanpela Witnes Bilong Jehova, em i tok:
“Samting i bin bagarapim bel bilong mi long taim bilong pait . . . em mi lukim ol pris pasto bilong klostu olgeta lotu—Katolik, Luteran, Episkopal, wantaim sampela arapela—ol i blesim ol balus bilong pait wantaim boskru bilong en taim ol i redi long i go antap na tromoi bom long ol birua. Planti taim mi tingting, ‘God i stap long sait bilong husat?’
“Ol ami bilong Jemani i pasim wanpela let na long hap ain bilong en i gat rait olsem Gott mit uns (God i stap wantaim mipela). Tasol mi tingting, ‘Olsem wanem na God i no ken i stap wantaim ol soldia i stap long sait bilong ol birua, em ol i gat wankain lotu olsem mipela na ol i beten long dispela God mipela tu i beten long em?’ ”
[Piksa long pes 10]
Long olgeta hap bilong graun, ol Witnes Bilong Jehova i wok long givim glori long God