Pasin Bilong Autim Rong i Save Oraitim Man
“GOD, taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta. Long san na long nait han bilong yu i mekim save long mi. Strong bilong mi i lus olgeta, olsem bikpela san i boinim graun na graun i drai.” (Song 32:3, 4) Ating dispela tok bilong King Devit bilong Israel i makim bikpela bel hevi em i kisim, tasol em asua bilong em yet na em i kisim hevi, long wanem, em i bin wok long haitim wanpela bikpela rong na em i no autim.
Devit i gat bikpela save long mekim kain kain wok. Em i strongpela man bilong pait, na wanpela bikman bilong gavman, na man bilong raitim ol stori na pilaim musik. Tasol em i no bilip long strong bilong em yet—em i bilip na wetim God i helpim em. (1 Samuel 17:45, 46) Em i givim bel olgeta long “bihainim tru” Jehova. (1 King 11:4) Tasol wanpela rong em i mekim na i gat bikpela asua tru long en, ating em dispela rong em i bin stori long en long Song 32. Sapos yumi skelim ol samting i kirapim em long mekim dispela rong, dispela bai givim sampela tingting long yumi. Bai yumi save long ol samting yumi mas abrusim na save tu olsem yumi mas autim ol rong bilong yumi bambai yumi ken kamap wanbel gen wantaim God.
Wanpela Gutpela King i Mekim Sin
Lain Israel i mekim pait long ol Amon, tasol Devit i stap long Jerusalem. Wanpela apinun Devit i go antap long rup bilong haus bilong em na em i wokabaut, na long wanpela haus klostu, em i lukim wanpela meri i waswas i stap. Skin bilong dispela meri i naispela tru. Devit i no bosim gut skin na bel bilong em i kirap—em i gat bikpela laik tru long slip wantaim em. Em i painimaut olsem dispela meri em Batseba, na em i meri bilong Uria, wanpela soldia long ami bilong em. Em i kisim Batseba i go long haus bilong em na slip wantaim em. Bihain Batseba i salim tok long Devit olsem em i gat bel.—2 Samuel 11:1-5.
Devit i tingting planti. Sapos rong bilong tupela i kamap ples klia, tupela i mas i dai—em pe bilong dispela kain rong. (Wok Pris 20:10) Olsem na em i kirap mekim samting bilong haitim dispela rong. Em i singautim man bilong Batseba, em Uria, long lusim pait na kam bek long Jerusalem. Em i givim planti askim long em long dispela pait. Orait nau Devit i tokim Uria long go long haus bilong en. Devit i laik bai ol man i ting Uria em i papa bilong dispela pikinini i stap long bel bilong Batseba.—2 Samuel 11:6-9.
Tasol Uria i no go long meri bilong em. Uria i tok em i no ken i go long haus bilong em taim ami i stap yet long pait. Taim ami bilong Israel i stap long pait, ol soldia i no save mekim maritpasin, maski em meri bilong ol. Ol i mas i stap klin long ol samting bilong lotu. (1 Samuel 21:5) Orait nau Devit i singautim Uria i kam kaikai wantaim em na i mekim em i dring longlong, tasol maski Devit i mekim olsem, Uria i no laik i go long meri bilong em. Gutpela pasin bilong Uria i kamapim long ples klia bikpela rong bilong Devit.—2 Samuel 11:10-13.
Orait nau rong bilong Devit i pulim em long mekim narapela rong. I luk olsem i gat wanpela rot tasol bilong haitim rong bilong em. Em i salim Uria i go bek long pait na tokim em long givim wanpela pas long Joap, kepten bilong ami. Pas i tok: “Putim Uria wantaim ol namba wan lain soldia long hap pait i kamap strong tumas long en. Na yupela olgeta i mas surik bek na larim ol birua i kilim Uria.” Long rot bilong dispela pas, Uria i dai na i luk olsem samting dispela strongpela king i mekim bilong haitim rong bilong em i wok gut.—2 Samuel 11:14-17.
Batseba i krai sori inap sampela de, na taim dispela i pinis Devit i maritim em. Bihain, Batseba i karim pikinini. Tasol Devit i no tokaut long rong bilong em. Ating em i wok long tingim sampela as na em i no gat asua long dispela rong, olsem: Uria i bin kisim biknem long dai long pait olsem ol narapela i bin mekim, a? Na tu, Uria i bin sakim tok bilong king na em i no laik go long meri bilong em. Tru tumas, ‘bel i save mekim pasin giaman’ na yumi inap ting i gat as na yumi mekim rong.—Jeremaia 17:9; 2 Samuel 11:25.
Sampela Popaia i Kirapim Man Long Mekim Rong
Tasol Devit i man bilong laikim tru stretpela pasin, olsem na wanem samting i kirapim em long trabel long meri bilong narapela man na kilim dispela man i dai? Em i no kirap wantu na mekim, nogat. Ating yumi laik save long as na Devit i no stap wantaim ol soldia na helpim ol long pait long ol birua bilong Jehova. I olsem: Devit i bin malolo long haus bilong em, olsem na em i no tingim tumas ol samting bilong dispela pait na bai em inap sakim dispela laik nogut, olsem mangal long meri bilong wanpela gutpela soldia. Long nau, sapos ol Kristen tru i wok strong wantaim kongrigesen bilong ol long autim tok na mekim ol samting bilong spirit, dispela bai lukautim gut ol.—1 Timoti 6:12.
Jehova i bin tokim king bilong Israel long kisim wanpela buk na raitim ol tok bilong Lo long en na ritim long olgeta de. Baibel i kamapim as bilong dispela olsem: “Bai em i ken aninit long Bikpela na bihainim tru olgeta lo na tok bilong God i stap long dispela buk. Olsem na bai em i no ken litimapim nem bilong em yet na daunim ol arapela Israel. Na tu, em i no ken kalapim liklik ol lo bilong Bikpela.” (Lo 17:18-20) I luk olsem taim Devit i mekim ol dispela bikpela rong, em i no bin bihainim dispela tok. Sapos yumi stadi oltaim long Baibel na tingim tingim ol dispela tok, dispela bai helpim yumi long abrusim pasin bilong mekim rong long dispela taim nogut yumi stap long en.—Sindaun 2:10-12.
Na tu, laspela bilong Tenpela Lo i tok klia: “Yupela i no ken aigris long meri bilong narapela man.” (Kisim Bek 20:17) Taim Devit i mekim dispela rong, em i gat planti meri na planti namba 2 lain meri. (2 Samuel 3:2-5) Tasol dispela i no pasim em long mangal long wanpela meri moa i gat gutpela skin. Dispela stori bilong Devit i kirapim yumi long tingim gut tok bilong Jisas: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Olsem na sapos wanpela laik nogut i kamap long bel na tingting bilong yumi, kwiktaim yumi mas rausim, nogut yumi wok long tingim tingim.
Tanim Bel na Pasin Bilong Marimari
Tasol dispela stori bilong rong bilong Devit i no stap long Baibel bilong inapim laik bilong man long mekim maritpasin, nogat. Stori hia i helpim yumi long save long wanpela gutpela pasin tru bilong Jehova, em pasin marimari bilong em.—Kisim Bek 34:6, 7.
Taim Batseba i karim pinis pikinini man, Jehova i salim profet Natan i go lukim Devit. Dispela em gutpela pasin marimari God i mekim. Sapos Natan i no bin go lukim Devit na Devit i no tokaut long rong bilong em, ating em bai mekim sin i go i go na bihain pasin bilong sin bai pas strong long em. (Hibru 3:13) Tasol Devit i pilim tru dispela marimari bilong God. Tok Natan i givim long Devit i sutim tru bel bilong em, na long pasin daun em i tokaut olsem em i bin mekim rong long God. Song 51, em i toktok long rong Devit i mekim wantaim Batseba, em i bin raitim taim em i tanim bel pinis na autim dispela bikpela rong. Olsem na sapos yumi yet i pundaun na mekim wanpela bikpela rong, yumi no ken larim bel i go strong tru na yumi no pilim rong bilong yumi.—2 Samuel 12:1-13.
Tru, Jehova i lusim tingting long dispela rong bilong Devit, tasol dispela i no mekim na Devit i abrusim ol tok bilong stretim em na ol samting nogut dispela rong i kamapim, nogat. (Sindaun 6:27) I stret Devit i kisim sampela tok bilong stretim em, a? Long wanem, sapos God i no mekim wanpela samting bilong stretim man i mekim rong, ating dispela inap mekim na nau ol lo bilong em i no gat strong moa. Bai em i olsem Hetpris Eli—em i gat wok long stretim tupela pikinini nogut bilong em, tasol em i krosim ol liklik tasol long pasin isi na larim tupela i mekim yet ol pasin nogut bilong ol. (1 Samuel 2:22-25) Tasol taim man i tanim bel, Jehova i no save pasim sori bilong Em, nogat. Marimari bilong em, olsem gutpela kolwara bilong dring, bai helpim man long karim ol hevi i kamap long rong bilong em. Taim man i pilim olsem Jehova i lusim tingting long rong bilong em na em i kirap bung wantaim ol wanlotu bilong em, dispela i save helpim em long kamap strong gen long ol samting bilong spirit. Tru tumas, long rot bilong ofa bilong Krais, man i tanim bel em inap pilim “marimari bilong God.”—Efesus 1:7.
“Klinpela Bel” na “Nupela Spirit”
Taim Devit i autim rong pinis, em i no pilim olsem em i nogut tasol na em i no inap mekim wanpela gutpela wok, nogat. Ol tok em i raitim long Buk Song long pasin bilong autim rong, i makim olsem nau bel bilong em i stap isi na em i gat strongpela tingting long stap gut long wok bilong God. Lukim Song 32. Ves 1 i tok: “Sapos God i lusim pinis rong bilong wanpela man, na i rausim sin bilong em, dispela man i ken amamas.” Olsem na maski rong i bikpela, sapos man i tanim bel tru, orait em inap amamas gen. Wanpela samting man i ken mekim bilong kamapim olsem em i tanim bel tru, em i mas putim asua i go long em yet, wankain olsem Devit i bin mekim. (2 Samuel 12:13) Devit i no tokim Jehova olsem i gat as na em i mekim dispela rong, na em i no wok long putim asua i go long ol narapela, nogat. Ves 5 i tok: “Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu lusim asua bilong mi na sin bilong mi tu.” Taim man i autim rong, dispela i mekim bel i stap isi, na nau asua bilong ol rong em i mekim bipo i no bagarapim moa bel bilong em.
Taim Devit i askim Jehova pinis long lusim rong bilong em, bihain em i tok: “God, yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Taim Devit i askim Jehova long givim “klinpela bel” na “nupela spirit” long em, dispela i makim olsem Devit i save em i gat pasin bilong sin na God i mas helpim em long stretim bel bilong em na mekim pasin i stret. Na tu, Devit i no wok long tingim tingim dispela hevi bilong em, nogat; em i tingting strong long mekim yet wok bilong God. Em i beten olsem: “Bikpela, yu ken helpim mi long tokaut stret, na long litimapim nem bilong yu.”—Song 51:15.
Taim Devit i tanim bel tru na tingting strong long mekim wok bilong God, Jehova i mekim wanem? Em i mekim gut bel bilong Devit, olsem: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Song 32:8) Em nau, dispela i makim olsem Jehova i save pilim tru tingting na laik bilong man i tanim bel na Em i laik helpim em. Jehova i kirap helpim Devit long kisim gut pasin bilong skelim gut ol samting. Olsem na sapos bihain wanpela samting i kamap na i laik traim em, bai em inap tingim samting pasin bilong em inap mekim long em yet na ol narapela, na dispela bai kirapim em long bihainim stretpela tingting long ol samting em i mekim.
Dispela samting i bin painim Devit, em inap strongim bel bilong ol man i bin mekim bikpela rong. Sapos yumi autim rong bilong yumi na tanim bel tru, yumi inap kisim bek samting i nambawan tru, em pasin bilong stap gut wantaim God Jehova. Tru, ating inap liklik hap taim bai yumi bel hevi na sem, tasol sapos yumi pasim maus, bel hevi yumi kisim long dispela bai nogut moa yet, na sapos yumi larim bel bilong yumi i go strong na yumi bihainim pasin bilong bikhet, bikpela hevi tru bai painim yumi. (Song 32:9) Taim yumi autim rong bilong yumi, bel bilong yumi bai pilim tru olsem gutpela God bilong marimari i lusim rong bilong yumi, em dispela God em i “papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.”—2 Korin 1:3.
[Piksa long pes 31]
Devit i wokim rot na bai Uria i dai long pait, na long dispela pasin em i ting em bai abrusim ol hevi em inap kisim long rong bilong em