Givim Baksait Long ‘Ol Samting i No Inap Helpim’ Yu
“Man i no gat gutpela tingting, em i save hatwok nating long ol kain kain wok i no inap helpim em.”—SND. 12:11.
1. Wanem sampela gutpela samting yumi holim? Wanem nambawan gutpela rot long mekim wok long ol dispela samting?
YUMI olgeta Kristen i holim ol gutpela samting. Sampela bilong ol dispela samting em gutpela helt, strongpela skin, gutpela save long mekim sampela samting, o mani. Yumi laikim tru Jehova, olsem na yumi amamas long mekim wok long ol dispela samting bilong mekim wok bilong em, na long dispela rot yumi bihainim dispela tok: “Givim biknem long Jehova long ol gutpela samting bilong yu.”—Snd. 3:9, NW.
2. Baibel i tok wanem long ol samting i no inap helpim yumi? Wanem mining bilong dispela tok?
2 Tasol Baibel i stori tu long ol samting i no inap helpim yumi, na nogut yumi westim taim na strong bilong yumi long ol dispela samting. Sindaun 12:11 i tok: “Man i lukautim gut gaden bilong en, em bai i kisim planti kaikai. Tasol man i no gat gutpela tingting, em i save hatwok nating long ol kain kain wok i no inap helpim em.” I no hatwok long kliagut long dispela savetok. Sapos man i lusim bikpela hap taim na strong long lukautim famili bilong em, ating famili bilong em bai stap gut long ol samting bilong skin. (1 Ti. 5:8) Tasol sapos em i tromoi nating taim na strong bilong em long ol samting i no inap helpim em, em i kamapim olsem em i “no gat gutpela tingting,” em i no save skelim gut ol samting. Kain man olsem bai sot long ol samting bilong skin em i mas i gat.
3. Olsem wanem ol tok bilong Baibel long ol samting i no inap helpim yumi em i stret long lotu bilong yumi?
3 Tasol dispela savetok i stret tu long lotu bilong yumi. Olsem: Kristen i wok strong long mekim wok bilong Jehova, em i save stap bel isi tru. Em i ken bilip tru olsem God bai mekim gut long em long nau na em inap wetim gutpela samting i kamap bihain. (Mt. 6:33; 1 Ti. 4:10) Tasol sapos Kristen i larim ol samting i no inap helpim em i pulim tingting bilong em, dispela inap bagarapim pasin bilong em long pas gut wantaim Jehova na em inap lus long kisim laip oltaim. Yumi mas mekim wanem na bai dispela samting i no ken painim yumi? Yumi mas luksave long ol samting long laip bilong yumi “i no inap helpim” yumi na tingting strong long lusim.—Ritim Taitus 2:11, 12.
4. Wanem ol dispela samting i no inap helpim yumi?
4 Wanem ol dispela samting i no inap helpim yumi? Em ol samting inap pulim tingting bilong yumi na nau yumi no givim bel moa long mekim wok bilong Jehova. Wanpela samting olsem em pasin bilong painim amamas. Tru, i no gat rong long kisim amamas. Tasol taim yumi lusim bikpela hap taim tumas long painim amamas na nau yumi slek long mekim wok bilong lotu, orait nau pasin bilong kisim amamas inap kamap samting i no inap helpim yumi, em inap bagarapim pasin bilong yumi long pas gut wantaim God. (Sav. 2:24; 4:6) Bilong dispela samting i no ken kamap, Kristen i mas skelim gut ol samting em i save lusim taim long mekim. (Ritim Efesus 5:16.) Tasol i gat sampela samting i moa nogut, winim pasin bilong painim amamas. Wanpela samting olsem, em ol giaman god.
Givim Baksait Long Ol Giaman God
5. Long Baibel, planti taim dispela tok ‘ol samting i no inap helpim’ yumi i makim wanem samting?
5 Long tok Hibru ol i bin raitim Baibel long en, planti taim dispela tok ‘ol samting i no inap helpim’ yumi i makim ol giaman god. Jehova i tokim ol Israel: “Yupela i no ken kisim hap diwai na katim piksa long en o kisim bikpela ston na sanapim o kisim ston na katim makmak long en na mekim ol dispela kain samting i kamap giaman god bilong yupela i mekim lotu long en. Nogat.” (Wkp. 26:1) King Devit i tok: “Bikpela em i namba wan tru na yumi mas litimapim nem bilong em moa yet. Ol arapela god i no olsem Bikpela. Olsem na yumi mas aninit long Bikpela. Olgeta god bilong ol arapela lain manmeri, ol i giaman god tasol. Tasol Bikpela i bin wokim skai.”—1 Sto. 16:25, 26.
6. Wanem samting i soim olsem ol giaman god i no gat strong?
6 Olsem Devit i tok, i gat planti samting i soim olsem Jehova i nambawan tru. (Sng. 139:14; 148:1-10) Em i gutpela samting tru long ol Israel i ken insait long wanpela kontrak wantaim Jehova! Em longlong pasin stret taim ol i lusim Jehova na kirap lotuim ol imis ol man i bin wokim long diwai na ston! Long taim bilong bikpela hevi, ol dispela giaman god ol i no gat strong, ol i no inap helpim ol yet o ol man i lotu long ol.—Het. 10:14, 15; Ais. 46:5-7.
7, 8. Olsem wanem “mani” inap kamap olsem wanpela god?
7 Long planti kantri long nau, i gat pasin i stap yet we ol manmeri i save brukim skru na lotu long ol imis ol man i bin wokim, na olsem long bipo, ol dispela god i no inap helpim ol. (1 Jo. 5:21) Tasol i no ol imis tasol em Baibel i kolim olsem god. Tingim dispela tok bilong Jisas: “I no gat wanpela man inap i stap aninit long tupela bosman wantaim. Bai em i laikim wanpela na bel nogut long narapela. Bai em i harim tok bilong wanpela na givim baksait long narapela. Yupela i no inap i stap aninit long God na long mani wantaim.”—Mt. 6:24.
8 Olsem wanem “mani” inap kamap olsem wanpela god? Tingim wanpela ston i stap nating long graun bilong Israel long bipo. Ol Israel inap mekim gutpela wok long dispela ston na wokim haus o banis. Tasol sapos ol i “katim makmak” long en na sanapim olsem wanpela imis, orait nau em i kamap samting bilong pundaunim lain bilong Jehova. (Wkp. 26:1) Na olsem tasol, mani em samting yumi mas i gat na em inap mekim gutpela wok. Yumi mas i gat mani bilong kisim kaikai na klos samting, na em inap helpim yumi long mekim wok bilong Jehova. (Sav. 7:12; Lu. 16:9) Tasol sapos yumi putim pasin bilong kisim mani i go pas long mekim wok Kristen bilong yumi, orait nau mani inap kamap olsem wanpela god long yumi. (Ritim 1 Timoti 6:9, 10.) Nau long dispela taim we pasin bilong kisim planti mani em i bikpela samting long planti man, yumi mas holim stretpela tingting long mani.—1 Ti. 6:17-19.
9, 10. (a) Kristen i mas i gat wanem tingting long ediukesen? (b) Wanem wanpela samting em bikpela skul inap nogutim yumi long en?
9 Narapela eksampel we gutpela samting inap kamap samting i no inap helpim yumi, em ediukesen. Yumi laik bai ol pikinini bilong yumi i kisim gutpela ediukesen na bai ol i ken lukautim ol yet long bihain. Na bikpela samting moa, Kristen i kisim gutpela ediukesen em inap ritim Baibel na kliagut long ol tok em i ritim, na skelim gut ol hevi na rot bilong stretim, na taim em i skulim narapela long ol tok i tru bilong Baibel, em inap kamapim klia ol tok inap long man i ken bilip tru long en. Tru, yumi mas lusim bikpela hap taim liklik long kisim gutpela ediukesen, tasol dispela hap taim i no lus nating.
10 Tasol olsem wanem long pasin bilong kisim bikpela skul moa, olsem long yunivesiti? Planti man long olgeta hap ol i ting dispela em i rot tru bilong kisim gutpela sindaun. Tasol planti man i kisim kain ediukesen olsem, ol i lain tu long planti tingting bilong dispela graun em inap nogutim ol. Kain ediukesen olsem i save westim ol yia em ol yangpela inap yusim long mekim wok bilong Jehova. (Sav. 12:1) Yumi no kirap nogut olsem long ol kantri we planti i bin kisim bikpela skul, i no gat planti man i bilip long God. Ol Kristen i no ken bilip long bikpela skul olsem rot bilong helpim ol long stap gut, nogat, ol i mas bilip strong long Jehova.—Snd. 3:5.
No Ken Larim Ol Laik Bilong Bodi i Kamap Olsem Wanpela God Long Yu
11, 12. Bilong wanem Pol i mekim dispela tok long sampela: ‘Ol laik bilong bodi bilong ol i stap olsem god bilong ol’?
11 Long pas aposel Pol i raitim long ol Filipai, em i stori long narapela samting inap kamap olsem wanpela god. Em i tok long sampela em bipo ol i wanlotu bilong em na i tok: “Sori tumas, planti man i stap birua bilong diwai [pos] bilong Krais. Planti taim mi tokim yupela pinis long dispela pasin bilong ol, na nau mi tokim yupela gen, na wara i kamap long ai bilong mi. Ol i save bihainim ol laik bilong bodi bilong ol yet, na ol dispela laik i stap olsem god bilong ol. Oltaim ol i save tingting long ol samting bilong graun tasol.” (Fl. 3:18, 19) Olsem wanem ol laik bilong bodi inap kamap olsem wanpela god?
12 I luk olsem ol dispela man, bipo ol i wanlotu bilong Pol, ol i bin larim ol laik bilong bodi i kamap nambawan samting long ol, winim pasin bilong mekim wok bilong Jehova wantaim Pol. Ating sampela i bin kaikai planti tumas o dring planti wain tumas na kamap spakman. (Snd. 23:20, 21; skelim Lo 21:18-21.) Na ating sampela i bin insait tru long ol wok na ol amamas bilong dispela graun na dispela i mekim na ol i no mekim moa wok bilong Jehova. Yumi no ken larim laik bilong kisim gutpela sindaun i mekim na nau yumi no wok strong moa long givim bel olgeta long mekim wok bilong Jehova.—Kl. 3:23, 24.
13. (a) Pasin mangal em wanem samting? Pol i tok wanem long en? (b) Olsem wanem yumi inap abrusim pasin bilong mangal?
13 Pol i stori long narapela samting tu bilong lotu giaman. Em i tok: “Yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man. Dispela pasin bilong mangal em i wankain olsem pasin bilong lotu long giaman god.” (Kl. 3:5) Pasin mangal em pasin we man i gat strongpela laik long kisim samting i no bilong em. Ating em i gat strongpela laik long kisim planti mani kago o em i aigris long meri bilong narapela man. (Kis. 20:17) Kain laik olsem i wankain olsem pasin bilong lotu long giaman god. Jisas i mekim wanpela tok piksa bilong kamapim klia olsem yumi mas wok strong tru long rausim ol laik nogut.—Ritim Mak 9:47; 1 Jo. 2:16.
Klia Long Ol Tok Giaman
14, 15. (a) Wanem samting i mekim na planti man long taim bilong Jeremaia ol i kisim bagarap? (b) Wanem samting i mekim na ol tok bilong Moses i gutpela?
14 Narapela samting i no inap helpim yumi, em ol tok giaman. Olsem: Jehova i tokim Jeremaia: “Ol dispela profet i save autim tok giaman long nem bilong mi. Mi no bin salim ol i kam, na tu mi no bin givim tok long ol. Dispela tok profet ol i autim long yupela, em i tok giaman i kamap long tingting bilong ol yet. Ol i tok, ol i bin lukim ol samting olsem driman, tasol ol i giaman. Na ol i tok long ol samting bai i kamap, tasol ol i mauswara nating.” (Jer. 14:14) Ol dispela profet giaman i tok ol i autim tok long nem bilong Jehova, tasol nogat, ol tok ol i autim i kamap long tingting bilong ol yet. Ol tok bilong ol i “giaman” tasol na inap nogutim lain bilong God long ol samting bilong lotu. Long 607 B.C.E., planti man husat i bihainim ol dispela tok, ol i dai long han bilong ol soldia bilong Babilon.
15 Tasol Moses i narapela kain. Em i tokim ol Israel: “Yupela i mas lukaut gut na bihainim olgeta dispela lo nau mi givim yupela. . . . Dispela tok bilong God i no toktok nating. Nogat. Em i as tru bilong yupela i ken i stap gut. Yupela i mas bihainim gut na bai yupela i stap longpela taim long graun long hapsait bilong wara Jordan, nau yupela i laik i go sindaun long en.” (Lo 32:46, 47) Yes, Moses i autim ol tok bilong God. Olsem na ol dispela tok i gutpela, em inap helpim tru dispela lain. Ol man i bihainim dispela tok ol i stap gut na i stap longpela taim. Em i gutpela sapos oltaim yumi givim baksait long ol tok giaman na bihainim ol gutpela tok tru.
16. Yumi gat wanem tingting long ol tok bilong ol saientis, em ol tok i no wankain long Tok Bilong God?
16 Olsem wanem? Ol man long nau i save autim ol tok i no inap helpim tru yumi? Yes. Olsem: Sampela saientis i tok olsem bilip bilong evolusen na ol save ol saientis i bin kisim, dispela i soim olsem i no gat wok moa long bilip long God, olgeta samting i bin kamap long narapela rot. Olsem wanem? Ol dispela tok hambak em samting yumi mas tingim? Nogat tru! Savetingting bilong ol man i narapela kain long savetingting bilong God. (1 Ko. 2:6, 7) Yumi save olsem taim save bilong man i pait wantaim save bilong God, long olgeta taim em dispela save bilong man i no stret. (Ritim Rom 3:4.) Maski save bilong ol saientis i wok long i go bikpela, dispela tok bilong Baibel i stret yet long save bilong ol: “Gutpela save bilong dispela graun em i olsem longlong pasin tasol long ai bilong God.” Taim yumi skelim tingting bilong ol saveman wantaim bikpela save bilong God, tingting bilong ol em longlong pasin tasol.—1 Ko. 3:18-20.
17. Yumi mas i gat wanem tingting long ol tok bilong ol hetman bilong Kristendom na ol apostet?
17 Narapela lain i autim ol tok i no inap helpim yumi, em ol hetman bilong lotu bilong Kristendom. Ol i tok ol i autim tok long nem bilong God, tasol planti tok ol i kamapim i no stret wantaim Baibel, na planti samting ol i toktok long en i no helpim lain bilong ol. Ol apostet tu ol i save autim tok giaman, ol i tok save bilong ol i winim save bilong “wokboi i gat gutpela tingting” em Jisas i bin makim. (Mt. 24:45-47) Tasol save ol apostet i kamapim em save bilong ol yet, na ol tok ol i mekim inap pundaunim ol man i harim tok bilong ol. (Lu. 17:1, 2) Yumi ken mekim wanem na bai ol tok bilong ol i no ken giamanim yumi?
Rot Bilong Givim Baksait Long Ol Tok i No Gutpela
18. Olsem wanem yumi ken bihainim tok bilong 1 Jon 4:1?
18 Lapun aposel Jon i kamapim dispela gutpela tok: “Ol pren tru, no ken bilipim olgeta tok, tasol yupela i mas traim ol dispela tok bilong save olsem ol i kam long God o nogat, long wanem, planti giaman profet i kamap pinis long dispela graun.” (1 Jon 4:1, NW.) Bilong bihainim dispela tok bilong Jon, yumi save kirapim ol man yumi bungim long wok autim tok long skelim ol tok ol i bin lainim, na bai ol i ken save, ol dispela tok i stret wantaim Baibel o nogat. Em samting yumi tu i mas mekim. Sapos yumi harim sampela tok i daunim tok i tru o i sutim tok long kongrigesen o ol elda o ol brata bilong yumi, yumi no ken kirap kwik na bilipim nating, nogat. Gutpela yumi askim yumi yet: “Man i kamapim dispela stori em i bihainim ol tok bilong Baibel? Ol dispela stori i helpim wok bilong Jehova? Ol dispela stori i helpim kongrigesen long stap wanbel?” Olgeta tok i daunim lain brata bilong yumi na i no bilong strongim ol, em ol tok i no gutpela.—2 Ko. 13:10, 11.
19. Olsem wanem ol elda inap givim baksait long ol tok i no gutpela?
19 Ol elda tu i mas givim baksait long ol tok i no gutpela. Taim ol i mas givim tok kaunsel, ol i mas tingim olsem save bilong ol i sot na nogut ol i givim tok kaunsel em save bilong ol yet tasol i as bilong en. Ol i mas kamapim ol tok bilong Baibel. Wanpela lo i gutpela long bihainim, em dispela tok bilong aposel Pol: “Bihainim pasin i stret olsem buk bilong God i tok long en, na yupela i no ken kalapim dispela tok.” (1 Ko. 4:6) Ol elda i no save kalapim ol tok bilong Baibel. Na tu, ol i no kalapim ol tok i stap long ol buk na nius bilong Baibel em wokboi i gat gutpela tingting i kamapim.
20. Wanem samting bai helpim yumi long givim baksait long ol samting i no gutpela na i no inap helpim yumi?
20 Ol samting i no gutpela na i no inap helpim yumi—maski em “ol god,” ol tok, o narapela samting—ol inap nogutim yumi. Long dispela as, yumi save beten askim Jehova long helpim yumi long luksave long ol dispela samting i no gutpela, na yumi laik bai em i soim yumi rot long givim baksait long ol. Taim yumi mekim olsem, i olsem yumi mekim wankain tok olsem man bilong raitim song: “Helpim mi long givim baksait long ol samting i no gutpela. Mekim gut long mi olsem yu bin promis long mi.” (Sng. 119:37) Long stadi i kamap bihain long dispela, bai yumi stori moa long pasin bilong larim Jehova i stiaim yumi.
Yu Inap Stori Long Dispela?
• Wanem sampela samting “i no inap helpim” yumi em yumi mas givim baksait long en?
• Yumi mas mekim wanem na bai mani i no ken kamap olsem wanpela god bilong yumi?
• Olsem wanem ol laik bilong bodi inap kamap olsem pasin bilong lotuim ol giaman god?
• Olsem wanem yumi inap givim baksait long ol tok giaman na ol tok i no gutpela?
[Piksa long pes 3]
God i tokim ol Israel long ‘lukautim gaden bilong ol,’ nogut ol i hatwok nating long ol samting i no inap helpim ol
[Piksa long pes 5]
No ken larim laik bilong kisim ol gutpela samting bilong skin i mekim na nau yu no wok strong moa long mekim wok bilong Jehova
[Piksa long pes 6]
Ol tok bilong ol elda inap helpim gut yumi