Bilong Wanem Ol Man i Save Mekim Ol Pasin Nogut?

WANPELA samting planti man i wanbel long en em olsem: Yumi no gutpela olgeta, olsem na yumi save popaia na mekim ol samting em bihain yumi save bel hevi long en. Tasol yu ting dispela samting i as bilong ol bikpela na ol liklik pasin nogut yumi lukim o harim stori bilong en long olgeta de long rot bilong ol man o nius samting?

Tru ol man i no gutpela olgeta, tasol planti man i save olsem i gat ol lo bilong stretpela pasin em ol man i no ken kalapim, na ol man inap makim olsem ol i no laik mekim ol pasin nogut. Planti man bai wanbel long tok olsem pasin bilong i no tingting gut na mekim tok i no stret, dispela i narapela kain long tok giaman na bagarapim gutnem bilong narapela, na pasin bilong kamapim wanpela bagarap long eksiden, dispela i narapela kain long pasin bilong tingting strong oltaim bilong kilim man i dai. Tasol yumi kirap nogut long lukim olsem planti taim ol man nating i stap long komiuniti ol i save mekim ol pasin nogut tru. Bilong wanem i olsem? Bilong wanem ol man i save mekim ol pasin nogut?

Baibel i mekim sampela tok long dispela samting. Em i tokaut stret long as na ol man i save mekim ol pasin em ol i save dispela ol pasin i nogut. Tingim tok Baibel i mekim.

▪ “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.”​—SAVEMAN 7:​7, NW.

Baibel i tok, sampela taim i gat sampela samting i kamap na i olsem dispela i subim ol man long mekim samting em bipo ol i no gat tingting liklik long mekim. Ating sampela bai mekim bikpela rong em ol i ting dispela em i rot bilong stretim hevi bilong ol man na pinisim ol pasin i no stret. Buk Urban Terrorism, i tok: “Planti taim nambawan bikpela samting i kirapim tingting bilong ol teroris long belhat, em ol wok politik, sindaun bilong ol man, na ol samting bilong mani.”

▪ “Pasin bilong laikim tumas mani em i as bilong olgeta pasin nogut.”​—1 TIMOTI 6:⁠10.

I gat wanpela olpela savetok olsem: Ol gutpela manmeri tu inap brukim lo bilong stretpela pasin sapos ol man i givim planti grismani long ol. Sampela man we i luk olsem ol i gat pasin isi na gutpela pasin, ol i save senisim pasin bilong ol taim i gat rot bilong kisim mani o lusim mani, na ol i kamap man nogut tru. Pasin mangal em i as bilong planti pasin nogut tru i stap long nau, olsem pasin bilong pretim o subim man bilong karamapim rong, pasin stil, stilim man na askim long mani olsem pe bilong larim em i go fri, na pasin bilong kilim man i dai.

▪ “Ol man i no kisim bekim [strafe] kwiktaim long rong bilong ol, olsem na dispela i kirapim tingting bilong ol manmeri na ol i strong long mekim pasin nogut.”​—SAVEMAN 8:⁠11.

Dispela skripsa i kamapim klia tingting bilong planti man olsem ol i ken mekim yet pasin nogut sapos ol man i gat wok bos i no lukim ol. Dispela em i tru long ol man i save draivim ka na spit tumas long haiwe, lukstil long ol eksem, stilim mani long gavman, na sampela narapela pasin i nogut moa yet. Taim polis o gavman samting i no strong long karimaut lo, na ol man i no pret long narapela i lukim ol, orait long kain taim olsem ol man husat i save bihainim lo inap mekim pasin nogut em bipo ol i no inap mekim. Nius Arguements and Facts, i tok: “Planti taim ol man nogut i no kisim strafe long pasin nogut bilong ol, na dispela i save kirapim ol man nating long mekim pasin nogut tru.”

▪ “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap . . . bihain em i save kamapim sin.”​—JEMS 1:​14, 15.

Olgeta man inap kisim tingting kranki. Long olgeta de, planti samting i save kamap na i traim yumi long mekim pasin nogut. Ol Kristen bilong pastaim i kisim tok olsem: “Ol traim i bin kamap long yupela, ol i no ol narakain traim. Nogat. Ol i wankain olsem ol traim i save kamap long olgeta man.” (1 Korin 10:13) Maski i olsem, disisen man i mekim inap kamapim gutpela samting o samting nogut​—⁠olsem em i ken sakim tingting nogut kwiktaim o em i ken holim strong long tingting na dispela tingting i go nogut moa. Tok bilong Jems i stap antap, em holi spirit i bin kirapim em long raitim, i givim tok lukaut olsem sapos man i holim strong tingting nogut, orait em inap kamapim pasin nogut.

▪ “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”​—SINDAUN 13:⁠20.

Man yumi poromanim inap mekim bikpela samting long pasin bilong yumi​—⁠yumi inap kamapim ol gutpela pasin o pasin nogut. Planti taim ol man i save mekim samting em ol i no gat tingting liklik long mekim. Ol i mekim olsem, long wanem, ol wanlain i pulim ol, o ol i bihainim ol poroman nogut, na dispela i save kamapim samting nogut tru. Long Baibel, dispela tok “ol man i no gat gutpela tingting,” i no makim ol man i no gat save, nogat, em i makim ol man i save sakim ol gutpela tok bilong Baibel. Maski yumi yangpela o lapun, sapos yumi no kisim ol gutpela poroman, em ol man i save bihainim ol stretpela lo bilong Baibel, orait yumi ken save olsem “trabel bai i painim” yumi.

Ol dispela ves na planti narapela ves bilong Baibel i kamapim klia as na ol manmeri i save mekim ol pasin nogut, na moa yet ol pasin i nogut tru. Tru, tok bilong Baibel i helpim yumi long save long ol samting i pulim ol man long mekim ol pasin nogut tru, tasol yu ting dispela inap senis na ol gutpela samting bai kamap? Yes, Baibel i kamapim klia as na man i save mekim ol pasin nogut, na i no dispela tasol, Baibel i tok promis tu olsem ol dispela pasin nogut bai i no stap moa. Orait wanem ol dispela promis? Tru tru olgeta pasin nogut bilong dispela graun bai pinis? Stori i kamap bihain long dispela bai bekim ol dispela askim.