Nainti Yia i Go Pinis Mi Kirap Tingim Man Bilong Wokim Mi

Stori bilong Edwin Ridgwell

LONG Novemba 11, 1918, ol pikinini long skul bilong mi ol i bung bilong selebretim pinis bilong Bikpela Woa em bihain ol i kolim Wol Woa 1. Mi gat 5-pela krismas tasol na mi no kliagut long as na ol i mekim selebresen. Tasol mi save long ol tok bilong God em papamama i bin skulim mi long en, olsem na mi no laik insait long dispela bung ol i mekim. Mi beten long God, tasol mi no inap long bosim bel na mi stat long krai. Tasol mi no insait liklik long dispela bung. Stat long dispela taim mi kirap tingim Man Bilong Wokim mi.​—Sav. 12:1.

Sampela mun paslain long dispela samting i kamap, famili bilong mi i bin go sindaun klostu long Glasgow, long Skotlan. Long dispela taim, Papa i go na harim pablik tok nem bilong en “Planti Milion Man i Stap Nau Ol i No Ken i Dai.” Dispela i senisim i stap bilong em. Papa na Mama i kirap stadi long Baibel na planti taim ol i save toktok long Kingdom Bilong God na ol gutpela samting bai kamap bihain. Mi tenkyu long God olsem kirap long dispela taim, papamama bilong mi i bin skulim mi long laikim tru God na bilip strong long em.​—Snd. 22:6.

Mi Kirap Autim Tok Fultaim

Taim mi gat 15 krismas, mi inap kisim bikpela skul, tasol mi gat laik tru long mekim wok autim tok fultaim. Papa i pilim olsem mi yangpela tumas, olsem na mi wok long ofis inap sampela taim. Tasol mi gat strongpela laik tru long mekim wok bilong Jehova fultaim, olsem na mi raitim pas i go long J. F. Rutherford, em long dispela taim em i lukautim wok bilong autim tok long olgeta hap bilong graun. Mi askim em long em i gat wanem tingting long samting mi laik mekim. Brata Rutherford i bekim pas bilong mi na i tok: “Sapos yu winim krismas inap long yu mekim wok, orait yu bikpela inap long insait long wok bilong Bikpela. . . . Mi save Bikpela bai blesim yu sapos yu wok strong long mekim laik bilong Em.” Famili bilong mi i pilim tru ol tok bilong dispela pas bilong Mas 10, 1928. I no longtaim, Papa, Mama, bikpela susa na mi, mipela i insait long fultaim sevis.

Long 1931 long wanpela kibung long London, Brata Rutherford i singaut long ol volantia bilong i go autim gutnius long ol narapela kantri. Mi orait long go, na ol i salim mi wantaim Andrew Jack i go long Kaunas, em biktaun bilong Lituenia long dispela taim. Em taim mi gat 18 krismas.

Autim Gutnius Bilong Kingdom Long Narapela Kantri

Long dispela taim, Lituenia i stap rabis long ol samting bilong mani, na i hatwok long autim tok long ol ples. I hatwok long painim ples slip, na mipela i no inap lusim tingting long sampela ples slip we mipela i bin stap long en. Olsem, wanpela nait mitupela Andrew i kirap long slip, long wanem, mipela “i pilim nogut.” Taim mipela i laitim lam, mipela i luksave olsem bet i pulap tru long ol musmus. Musmus i bin kaikaim mipela long het i go long lek! Long olgeta moning inap wanpela wik, mi save go long wanpela bikpela wara i stap klostu na sanap insait long wara na bai kol bilong wara i ken pinisim pen. Tasol mipela i tingting strong yet long autim tok. Bihain long en, mipela i no gat hevi moa long ples slip taim mipela i bungim tupela yangpela marit em ol i bin kisim tok i tru bilong Baibel. Ol i kisim mipela i go i stap wantaim ol, maski haus bilong ol i liklik, tasol em i klin. Mipela i amamas long slip long plua, dispela i winim bet i gat planti musmus long en.

Long dispela taim, Lituenia i gat planti pris pasto bilong Misin Katolik na Misin Otodoks bilong Rasia. Ol maniman tasol i gat Baibel. Astingting bilong mipela em long autim tok long planti hap na tilim planti buk na nius bilong Baibel long ol manmeri i gat laik long harim tok. Taim mipela i go long wanpela taun, pastaim mipela i painim ples slip. Bihain, mipela i was gut na autim tok long ol ples i stap klostu na bihain long en mipela i hariap long autim tok insait long taun yet. Long dispela rot, mipela i save pinisim wok bilong mipela paslain long ol pris inap kirapim ol man long mekim nogut long mipela.

Hevi i Kamap na Olgeta Man i Save Long Mipela

Long 1934, ol i makim Andrew long i go wok long brens ofis long Kaunas, na John Semprey i kamap wanwok bilong mi. I gat sampela samting i painim mipela em mipela i tingim yet. Wanpela taim mi go long ofis bilong wanpela loya long wanpela liklik taun. Dispela man i belhat nogut tru, em i opim kabot na kisim pistol, na i tokim mi long lusim dispela ples. Mi beten long tingting na mi tingim dispela tok bilong Baibel: “Sapos man i belhat long yu, orait bekim tok isi long em, na bai belhat bilong en i dai.” (Snd. 15:1) Na mi tok, “Mi kam long hia olsem wanpela pren na mi bringim gutnius i kam, na mi tenkyu olsem yu no sutim mi.” Dispela man i rausim pinga bilong em long triga bilong pistol na isi tasol mi lusim ofis bilong em.

Taim mi bungim John, em i tokim mi long samting i bin painim em tu long dispela de. Wanpela meri em i bin autim tok long en i sutim tok long em olsem em i stilim mani bilong em na ol i kisim John i go long polis stesin. Long polis stesin, ol i rausim olgeta klos bilong em na sekim em. Tasol em i no bin stilim dispela mani. Bihain ol i kisim man husat i bin stilim mani.

Samting i painim mitupela, dispela i mekim na planti manmeri long dispela taun ol i save long tok mipela i autim.

Hait na Mekim Wok

Wanpela wok inap kamapim bagarap, em wok bilong kisim ol buk na nius bilong Baibel i go long Latvia, em hap we gavman i tambuim wok autim bilong yumi. Wanpela taim long mun, mipela i save kisim tren long nait na i go long Latvia. Taim mipela i lusim pinis ol buk na nius long hap, sampela taim mipela i save ron i go long Estonia, kisim sampela moa buk na nius long hap na bringim i kam lusim long Latvia taim mipela i kam bek.

Wanpela taim, wanpela ofisa bilong kastam i harim stori long wok bilong mipela na em i tokim mipela olsem mipela i mas lusim tren na bringim ol buk na nius i go long bos bilong em. Mitupela John i beten long Jehova long helpim mipela. Samting i kamap i olsem, dispela ofisa i no tokim bos bilong em long wanem samting mipela i karim, em i tok tasol olsem: “Ol dispela man i gat sampela samting ol i mas tokaut long en.” Mi “tokaut” olsem ol dispela buk na nius i bilong helpim ol manmeri long ol skul na ol kolis long kliagut long wanem samting i wok long kamap long graun bilong yumi. Dispela ofisa bilong kastam i larim mipela i go, na mipela i kisim ol buk na nius i go long hap mipela i laik bringim long en.

Taim wok politik bilong ol kantri bilong Boltik i go nogut, planti man moa i birua long ol Witnes, na tu, ol i tambuim wok autim tok bilong mipela long Lituenia. Gavman i rausim Andrew na John i go bek, na ol i tokim olgeta manmeri bilong Briten long lusim kantri, long wanem, Wol Woa 2 i laik kirap. Mi sori olsem mi tu i lusim dispela hap.

Ol Gutpela Wok na Blesing Long Noten Aialan

Long dispela taim, papamama bilong mi i go sindaun long Noten Aialan, na long 1937, mi go stap wantaim ol. Gavman i tambuim ol buk na nius bilong mipela long Noten Aialan, long wanem, ol man i pret na tingting planti long woa, tasol mipela i autim tok yet long taim bilong woa. Bihain long Wol Woa 2, gavman i tok orait long mipela i ken mekim gen wok bilong mipela na i no gat tambu long en. Harold King, wanpela painia em bihain em i mekim wok misineri long Saina, em i go pas long wok bilong mekim ol tok bilong Baibel long ol pablik ples. Em i tok: “Long dispela Sarere, bai mi mekim namba wan tok long pablik ples.” Em i lukluk long mi na i tok: “Neks wik Sarere, em taim bilong yu long mekim tok.” Mi kirap nogut tru.

Mi inap tingim klia tru namba wan tok mi bin givim. Planti handet manmeri i stap. Mi sanap antap long wanpela boks na toktok, na i no gat maikrofon samting mi inap yusim. Taim mi pinisim tok bilong mi, wanpela man i kam sekan long mi na i kolim nem bilong em olsem Bill Smith. Em i tok em i bin lukim planti manmeri i stap, olsem na em i kam bilong lukim wanem samting i kamap. Mi kisim save olsem papa bilong mi i bin autim tok long Bill, tasol Papa i no go lukim em moa taim Papa wantaim nupela mama i go sindaun long Dublin bilong mekim wok painia long hap. Mipela i kirap stadi long Baibel. Bihain, 9-pela manmeri long famili bilong Bill i kamap wokman bilong Jehova.

Bihain, mi autim tok long ol bikpela haus i stap klostu long taun long Belfast, we mi bungim wanpela meri Rasia husat i bin sindaun long Lituenia bipo. Taim mi soim em long sampela buk na nius, em i poinim wanpela buk na i tok: “Mi gat dispela buk. Ankol bilong mi em wanpela profesa long yunivesiti long Kaunas na em i givim mi.” Em i soim mi buk Creation long tok Polan. I gat planti rait i stap long sait sait bilong ol pes. Em i kirap nogut long kisim save olsem mi bin givim dispela buk long ankol bilong em taim mi bungim em long Kaunas!​—Sav. 11:1.

Taim John Sempey i harim olsem mi go long Noten Aialan, em i askim mi long go lukim liklik susa bilong em Nellie, husat i bin i gat laik long save long tok i tru bilong Baibel. Mi wantaim susa bilong mi Connie, mipela i stadi long Baibel wantaim em. Nellie i kamap strong hariap na i dediketim laip bilong em long Jehova. Bihain, mitupela i pren na mipela i marit.

Mitupela Nellie i lusim 56 yia wantaim long mekim wok bilong Jehova na mipela i bin amamas tru long helpim inap olsem 100 manmeri long kisim save long tok i tru bilong Baibel. Mipela i gat laik long i stap wantaim i go inap mipela i winim Armagedon na i go insait long nupela taim Jehova i laik kamapim, tasol dispela birua nogut tru em dai i painim em long 1998. Dispela i bagarapim tru bel bilong mi​—em wanpela bikpela traim tru long laip bilong mi.

Mi Go Bek Long Ol Kantri Bilong Boltik

Wanpela yia bihain long Nellie i dai, mi kisim wanpela gutpela blesing tru. Ol i singautim mi long i go visitim brens ofis long Talin, long Estonia. Wanpela pas i kam long ol brata long Estonia i tok: “Namel long ol 10-pela brata em ol i salim ol i go long ol kantri bilong Boltik namel long 1928 na 1932 samting, yu wanpela tasol i stap laip yet.” Pas i tok moa olsem ol i laik raitim stori long ol wok autim tok i bin kamap long Estonia, Latvia, na Lituenia na ol i askim: “Inap yu kam?”

Em i wanpela gutpela samting tru long stori long ol samting i bin painim mi na ol poroman bilong mi long ol dispela yia i go pinis. Long Latvia, mi soim ol brata long dispela namba wan haus mipela i bin mekim wok long en olsem brens ofis, na spes insait long rup em mipela i bin haitim ol buk na nius we i no gat wanpela taim polis i bin lukim. Long Lituenia, ol i kisim mi i go long wanpela liklik taun nem bilong en Šiauliai, we mi bin mekim wok painia. Long wanpela bung long hap, wanpela brata i tokim mi: “Planti yia i go pinis, mi na mama bilong mi, mipela i baim wanpela haus long taun. Mipela i klinim liklik rum antap long haus na mipela i painim buk The Divine Plan of the Ages na buk The Harp of God. Taim mi ritim ol dispela buk, mi luksave olsem mi painim pinis tok i tru. Ating em yu tasol i bin lusim ol dispela buk long dispela haus inap planti yia i go pinis!”

Mi go tu long kibung sekit long wanpela taun we mi bin mekim wok painia long en. Mi bin go kibung long dispela hap 65 yia i go pinis. Long dispela taim bipo, i gat 35 manmeri tasol i bin i kam bung. Tasol nau mi amamas tru long lukim bikpela lain i bung, namba bilong ol i winim 1,500! Tru tumas, Jehova i bin blesim tru dispela wok!

Jehova i No Lusim Mi

I no longtaim nau, mi kisim wanpela gutpela presen tru, wanpela gutpela sista i orait long maritim mi. Mipela i marit long Novemba 2006.

Mi ken tokim ol yangpela husat i no save long wanem samting ol bai mekim long i stap bilong ol olsem em i savetingting long bihainim dispela tok bilong Baibel: ‘Taim yupela i yangpela yet, yupela i mas tingim Man Bilong Wokim’ yupela. Mi ken amamas wankain olsem man bilong raitim song long Baibel: “God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim. Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.”​—Sng. 71:​17, 18.

[Mep long pes 25]

(Bilong save ol dispela rait i stap we long pes, lukim buk o magasin)

Wanpela wok i gat hatwok bilong en, em long kisim ol buk na nius i go long Latvia

ESTONIA

TALIN

Galf Bilong Riga

LATVIA

RIGA

LITUENIA

VILNIUS

Kaunas

[Piksa long pes 26]

Taim mi gat 15 krismas, mi kirap mekim wok painia long Skotlan

[Piksa long pes 26]

Mi na Nellie long weding bilong mipela long 1942