Pasin Bilong Putim Gut Yau
“TENKYU long putim yau.” Olsem wanem? Wanpela i bin mekim dispela tok long yu i no longtaim i go pinis? Sapos olsem, em wanpela gutpela tok amamas yu bin kisim! Klostu olgeta manmeri i save laikim man bilong putim gut yau. Taim yumi putim gut yau, yumi inap long givim nupela strong long ol man em ol hevi i daunim ol. Na tu, pasin bilong putim gut yau i save helpim yumi long tingim tru ol narapela manmeri. Long kongrigesen Kristen, pasin bilong putim gut yau em i wanpela bikpela samting bilong helpim yumi long ‘tingim ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol.’—Hibru 10:24.
Tasol planti manmeri ol i no gat pasin bilong putim gut yau. Ol i laik givim tok long narapela, stori long ol samting i bin painim ol na kamapim tingting bilong ol, na ol i no save putim yau long tok narapela i laik mekim. Olsem na pasin bilong putim gut yau em wanpela pasin yumi mas lain long mekim. Olsem wanem yumi inap lain long putim gut yau?
Wanpela Rot
Jehova em i Nambawan Tisa bilong yumi. (Aisaia 30:20) Em inap skulim yumi long pasin bilong putim gut yau. Tingim pasin Jehova i mekim bilong helpim profet Elaija. Elaija i pret long Kwin Jesebel i laik kilim em, na em i ranawe i go long ples drai nating na em i askim God long larim em i dai. Long dispela ples, ensel bilong God i toktok long em. Elaija i kamapim pret bilong em long Jehova na Jehova i putim yau, na bihain Em i kamapim bikpela strong bilong em. Wanem samting i kamap? Elaija i no pret moa, na em i go bek long wok bilong em. (1 King 19:2-15) Bilong wanem Jehova i save lusim haptaim long putim yau long ol wari bilong ol wokboi bilong em? Long wanem em i tingim tru ol. (1 Pita 5:7) Em hia wanpela rot bilong kamap man bilong putim gut yau: Yumi mas tingim tru narapela.
Taim wanpela man long Bolivia i mekim wanpela bikpela rong, em i pilim tru pasin bilong narapela wanbilip long tingim tru em. Dispela man i tok: “Mi bin pilim nogut tru. Sapos dispela brata i no bin lusim haptaim long putim yau long mi, ating bai mi les na lusim wok bilong Jehova. Em i no bin mekim planti toktok, tasol mi save olsem em i tingim mi na putim yau long mi, na dispela i bin strongim mi tru. Mi no laik bai em i tokim mi long samting mi mas mekim; mi save long samting mi mas mekim. Mi laik save tasol olsem wanpela i pilim tingting bilong mi. Pasin bilong em long putim yau long mi i helpim mi long daunim bel hevi.”
Man i stap nambawan piksa long pasin bilong laikim na putim gut yau long narapela, em Jisas Krais. Bihain liklik long taim Jisas i dai, tupela disaipel bilong em i lusim Jerusalem na i laik i go long wanpela ples i stap 11-pela kilomita longwe. Tupela i bel hevi. Olsem na Jisas Krais, em i bin kirap bek pinis, i wokabaut wantaim ol. Jisas i tingting gut na givim ol askim i stret long ol na bai em i ken painimaut long bel hevi bilong ol. Ol i tokim em long samting ol i bin wet long en tasol i no bin kamap, na nau ol i paul na tingting planti. Jisas i tingim tru ol, na pasin laikim i kirapim em long putim gut yau long ol na dispela i redim ol disaipel long putim yau long em. Orait Jisas “i skulim tupela long as bilong olgeta hap bilong buk bilong God i toktok long em yet.”—Luk 24:13-27.
Pasin bilong putim yau pastaim long narapela, em i wanpela gutpela rot bilong kirapim ol narapela long putim yau long yumi. Wanpela meri Bolivia i tok: “Papamama bilong mi na tupela tambu i no laikim pasin bilong mi long mekim bikpela long ol pikinini bilong mi. Mi les long harim tok bilong ol, tasol mi yet mi no save long samting mi mas mekim olsem wanpela mama. Long dispela taim, wanpela Witnes Bilong Jehova i kam lukim mi. Em i toktok wantaim mi long ol tok promis bilong God. Tasol pasin bilong em long kamapim ol askim bilong kisim tingting bilong mi, i helpim mi long luksave olsem em i gat laik long harim tingting bilong mi. Mi tokim em long kam insait long haus, na liklik taim bihain mi tokim em long ol hevi bilong mi. Em i stap isi na putim yau long mi. Em i askim mi long mi laik bai ol pikinini bilong mi i kamap olsem wanem, na man bilong mi i ting olsem wanem long dispela. Em gutpela samting long stap wantaim wanpela i gat laik long pilim tingting bilong mi. Taim em i soim mi long tok bilong Baibel long famili, mi save olsem mi toktok wantaim wanpela em i tingim tru sindaun bilong mi.”
Baibel i tok: “Man i save givim bel bilong en [“laikim tru,” NW ] long ol arapela, . . . em i no save tingting tumas long em yet.” (1 Korin 13:4, 5) Taim pasin laikim i kirapim yumi long putim yau long narapela, dispela i makim olsem yumi mas putim laik bilong yumi yet i stap namba tu. Bilong mekim olsem, ating yumi mas pasim televisen, no ken ritim niuspepa, na pasim mobail fon taim ol narapela i toktok wantaim yumi long sampela bikpela samting. Pasin bilong putim gut yau i makim olsem yumi gat laik tru long save long tingting bilong narapela. Na long kain taim olsem, yumi no ken tingim yumi yet na mekim kain tok olsem, “Wankain samting i bin painim mi sampela taim i go pinis.” I no gat rong long mekim kain tok olsem taim yumi toktok nating wantaim wanpela pren, tasol taim wanpela i toktok long sampela bikpela samting, yumi no ken toktok long ol samting bilong yumi yet. I gat narapela rot tu yumi ken soim olsem yumi tingim tru narapela.
Putim Yau Bilong Pilim Tingting
Ol pren bilong Jop i bin harim 10-pela narapela narapela tok em i bin mekim. Maski i olsem, Jop i tok: “Sori tumas, mi laik bai wanpela man i stap bilong putim yau long tok bilong mi.” (Jop 31:35) Bilong wanem Jop i tok olsem? Long wanem, pasin bilong ol pren bilong em long putim yau long em i no mekim gut bel bilong em. Ol i no tingim tru Jop na ol i no laik pilim tingting bilong em. Ol i no gat pasin bilong sori, olsem na ol i no pilim bel hevi bilong em taim ol i harim toktok bilong em. Tasol aposel Pita i tok: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet.” (1 Pita 3:8) Olsem wanem yumi ken soim olsem yumi sori long narapela? Wanpela rot em yumi mas pilim tingting bilong em. Yumi ken mekim kain tok olsem, “sori, ating dispela i bin bagarapim bel bilong yu stret,” o “ating ol i no kisimgut tok bilong yu.” Narapela rot em yumi ken kamapim gen tok bilong em na mekim long toktok bilong yumi yet, na dispela bai soim olsem yumi klia long tok bilong em. Pasin bilong putim gut yau i makim olsem yumi putim yau long toktok bilong narapela na yumi pilim bel hevi bilong em.
Roberta em i wanpela Witnes Bilong Jehova i save autim tok fultaim. Em i tok: “Wanpela taim mi bin bel hevi long wok autim tok bilong mi. Olsem na mi toktok wantaim wasman raun. Em i putim gut yau na em i traim long kisimgut tingting bilong mi. Mi pret olsem nogut em bai sutim tok long pasin bilong mi, na i luk olsem em i luksave long dispela tingting bilong mi. Em i tokim mi olsem em i save long ol samting mi pilim, long wanem, em yet i bin pilim wankain olsem long bipo. Dispela i bin helpim mi long mekim yet wok.”
Yu ting yumi mas wanbel long ol tok narapela i mekim bilong soim olsem yumi putim yau long em? Yu ting i stret yumi ken tokim narapela olsem yumi amamas long ol i tokim yumi long tingting bilong ol? Yes, yumi ken mekim olsem. Olsem wanem sapos wanpela pikinini man i insait long pait i kamap long skul, o pikinini meri i kam long haus na tok em i laikim tru wanpela mangi? Em i gutpela moa sapos papa o mama i putim gut yau na traim long save gut long samting i stap long tingting bilong pikinini paslain long tokim em long wanem pasin i stret na wanem pasin i no stret.
Sindaun 20:5 i tok: “Tingting bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.” Sapos wanpela man i gat save long mekim ol samting, em i no gat laik long givim sampela tingting bilong helpim yu, ating yu yet i mas pulim tingting bilong em i kam antap bilong kisim sampela save long em. Dispela i wankain long taim yumi putim yau long narapela. Yumi mas i gat gutpela save bilong pulim tingting bilong man i kam antap. Em i gutpela long givim askim, tasol yumi mas was gut nogut yumi askim long ol samting yumi no gat wok long save long en. Ating em i gutpela long man o meri i toktok i ken kirapim tok long ol samting em i no pilim sem long en. Olsem: Sapos wanpela meri marit i laik toktok long ol hevi bilong em long marit, ating em i ken kirapim stori long olsem wanem em i bin bungim man bilong em na ol i marit. Ating wanpela husat i bin lusim wok autim tok longtaim pinis em i ken kirapim stori long olsem wanem em i bin kisim tok i tru.
Putim Gut Yau—Em Hatwok
Taim wanpela i kros long yumi, i hatwok long putim gut yau long em, long wanem, em pasin bilong yumi man long mekim ol tok bilong helpim yumi yet. Olsem wanem yumi ken putim yau long kain taim olsem? Sindaun 15:1 i tok: “Sapos man i belhat long yu, orait bekim tok isi long em, na bai belhat bilong en i dai.” Wanpela rot bilong bekim tok isi em olsem: Yumi larim narapela i toktok na kamapim bel hevi bilong em na yumi stap isi na putim yau long em.
Taim tupela man i tok pait, tupela i save kolim kolim gen ol tok ol i mekim pinis. Narapela i pilim olsem narapela i no putim gut yau long em. Em i gutpela moa sapos wanpela i pasim maus na harim narapela i toktok. Na em i bikpela samting long bosim gut skin na kamapim tingting long gutpela pasin. Baibel i tokim yumi olsem: “Man i no mekim planti toktok, em i gat gutpela tingting.”—Sindaun 10:19.
Pasin bilong putim gut yau em i hatwok. Tasol yumi inap mekim sapos yumi wok strong long lainim. Em i wanpela gutpela pasin yumi mas wok long kisim. Tru tumas, pasin bilong putim gut yau taim narapela i toktok em wanpela rot yumi kamapim olsem yumi laikim narapela. Na tu em i givim amamas long yumi. Olsem na em i savepasin long lain long kisim dispela pasin bilong putim gut yau!
[Futnot]
a Mipela i bin senisim nem.
[Piksa long pes 11]
Taim yumi putim yau, yumi mas putim ol laik bilong yumi yet i stap namba tu
[Piksa long pes 12]
Taim wanpela i kros long yumi, i hatwok long putim yau long em