Pret Long Jehova na Bihainim Ol Lo Bilong Em
“Namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em.”—SAVEMAN 12:13.
1, 2. (a) Olsem wanem pasin bilong pret i ken lukautim yumi? (b) Bilong wanem ol papamama i gat gutpela tingting bai lainim pikinini bilong ol long pasin bilong pret?
LEONARDO DA VINCI i bin tok: ‘Strongpela bel inap mekim na laip bilong man i lus, tasol pasin bilong pret inap lukautim laip.’ Man i no tingting gut na em i no pret long wanpela samting, dispela man bai i no inap luksave long samting i laik bagarapim em, tasol pasin bilong pret bai kirapim em long was gut. Olsem: Sapos yumi sanap long arere bilong wanpela traipela maunten na lukluk i go daun long hap yumi inap pundaun long en, planti bilong yumi bai surik i go bek wantu. Olsem yumi lainim pinis long stori i kamap paslain long dispela, pasin bilong pret inap helpim man long pas gut wantaim God, tasol tu, pasin bilong pret inap helpim man long abrusim sampela bagarap.
2 Tasol i gat wok long lain long pret long planti samting bilong nau em inap bagarapim laip. Ol liklik pikinini i no save long hevi nogut bilong pawa o planti ka i raun long rot, olsem na em bai isi tru long ol i kisim sampela bikpela bagarap.a Ol papamama i gat gutpela tingting, ol bai wok long lainim pikinini long pasin bilong pret, ol bai tokim ol planti taim long ol samting ol inap kisim bagarap long en. Ol papamama i save pasin bilong pret long ol dispela samting inap lukautim laip bilong pikinini.
3. I gat wanem as na Jehova i tokaut long ol samting em inap bagarapim yumi long spirit, na em i mekim olsem wanem?
3 Olsem papamama i laik helpim pikinini bilong ol, Jehova tu i laik helpim yumi. Em i gutpela Papa bilong yumi, olsem na em i mekim wok long Baibel na oganaisesen bilong em long skulim yumi long mekim ol samting i helpim yumi. (Aisaia 48:17) Wanpela wok bilong dispela skul bilong God i bilong tokaut “planti taim” long ol samting em inap pundaunim yumi long samting bilong spirit, na ol dispela tokaut bai helpim yumi long kisim pasin bilong pret long ol dispela samting nogut. (2 Stori 36:15; 2 Pita 3:1) Kirap long bipo yet pasin bilong planti man long kisim bagarap long spirit na karim planti pen na hevi, dispela i no inap kamap sapos ol i bin ‘aninit [olsem pret] long God na bihainim olgeta lo bilong em.’ (Lo 5:29) Nau long dispela ‘taim bilong planti hevi,’ yumi ken mekim wanem bilong kisim pasin bilong pret long God na abrusim ol hevi bilong spirit?—2 Timoti 3:1.
Surik Long Ol Pasin Nogut
4. (a) Ol Kristen i mas kisim pasin bilong no laikim tru wanem samting? (b) Jehova i gat wanem tingting long ol pasin i gat sin? (Lukim sta.)
4 Baibel i tok “man i save aninit [olsem pret] long Bikpela, em i no save laikim tru ol pasin nogut.” (Sindaun 8:13) Wanpela dikseneri bilong Baibel i stori olsem dispela tok no laikim tru, em i makim ‘tingting bilong man long sampela lain o long sampela samting, olsem man i laik sakim, o em i les olgeta long en, o em i no laikim tru olsem pipia, na em i laik givim baksait olgeta long en.’ Olsem na pasin bilong pret long God i makim tu laik long sakim o no laikim tru ol samting Jehova i tok i no gutpela.b (Song 97:10) Dispela bai kirapim yumi long surik long ol pasin nogut wankain olsem yumi bai surik bek long arere bilong maunten taim pret i kirapim yumi long mekim olsem. Olsem Baibel i tok: “Sapos man i stap aninit [olsem pret] long Bikpela, orait dispela man inap abrusim pasin bilong sin.”—Sindaun 16:6.
5. (a) Yumi ken mekim wanem bilong strongim pasin bilong pret long God, na pasin bilong no laikim tru ol samting nogut? (b) Ol samting i bin painim ol Israel i givim wanem skul long yumi?
5 Yumi inap strongim dispela pret na pasin bilong no laikim tru ol samting i nogut taim yumi tingim ol hevi sin i save kamapim. Baibel i tok yumi bai kisim pe long ol samting yumi mekim—maski yumi inapim ol laik nogut bilong skin o mekim ol wok bilong spirit, tupela pasin i gat pe bilong en. (Galesia 6:7, 8) Dispela em i as na Jehova i bin kamapim klia wanem ol samting bai kamap sapos man i givim baksait long ol lo bilong em na lusim trupela lotu. Sapos God i no lukautim liklik lain Israel, ol bai i no inap sakim ol strongpela lain i stap klostu. (Lo 28:15, 45-48) Bikpela stori long Baibel long ol hevi nogut pasin bikhet bilong ol Israel i kamapim i “bilong givim tingting” long yumi na skulim yumi long kisim pasin bilong pret long God.—1 Korin 10:11.
6. Wanem ol stori bilong Baibel i ken lainim yumi long pasin bilong pret long God? (Lukim sta.)
6 Baibel i stori long ol samting i bin kamap long lain Israel, na tu,em i kamapim stori bilong sampela man em pasin jeles, pasin pamuk, pasin mangal, na pasin antap i bin daunim ol.c Sampela bilong ol i bin lotuim Jehova inap planti yia, tasol i gat wanpela taim long laip bilong ol em pasin bilong ol long pret long God i no strong tumas, na ol i kisim pe nogut long samting ol i mekim. Pasin bilong tingim ol dispela stori i ken kirapim yumi long pasim tok long bel long yumi no ken popaia olsem. Sori tru long yumi sapos yumi wet inap long bikpela hevi i painim yumi na bihain tasol yumi givim bel long bihainim ol gutpela tok bilong God! Planti i ting ol samting i painim man i olsem nambawan rot bilong skulim em, tasol ol samting i painim man long wanem em i bihainim ol laik bilong em yet, dispela i no nambawan gutpela skul.—Song 19:7.
7. Jehova bai singautim husat long go insait long haus bilong em?
7 Narapela bikpela as na yumi laik kisim pasin bilong pret long God em yumi laik abrusim ol samting em bai pasim yumi long stap gut wantaim em. Yumi pret long mekim samting Jehova i no amamas long en, long wanem, yumi amamas em i stap pren bilong yumi. Husat man God bai i tingim olsem pren na singautim long i go insait long haus bilong em? Em man “i bihainim laik bilong God long olgeta samting, na i mekim stretpela pasin oltaim.” (Song 15:1, 2) Sapos yumi pilim olsem pasin bilong stap pren wantaim Man bilong wokim yumi em i bikpela samting, yumi bai was gut na wokabaut stret long ai bilong em.
8. Olsem wanem sampela Israel i mekim olsem pasin bilong stap pren bilong Jehova i samting nating?
8 Sori tru, sampela Israel long taim bilong Malakai ol i bin ting pasin bilong stap pren bilong God i samting nating. Ol i no pret long Jehova na givim biknem long em, nogat, ol i givim ol animal i gat sik o lek nogut olsem ofa long alta bilong em. Na tu, tingting bilong ol long marit i kamapim klia ol i no pret long God. Ol i laik maritim ol yangpela meri, olsem na ol i brukim marit na lusim nating meri ol i bin maritim taim ol i yangpela. Malakai i tokim ol olsem Jehova i no laikim tru pasin bilong “brukim marit,” na tingting nogut i stap long bel bilong ol i bin mekim ol i kamap birua bilong God. God i no inap amamas long ofa ol dispela man i mekim antap long alta, long wanem, i olsem aiwara i karamapim alta—em aiwara bilong ol meri ol i bin lusim. Pasin bilong ol long hambak long ol lo bilong Jehova i kirapim em long kamapim askim olsem: “Bilong wanem yupela i no save aninit [olsem pret] long mi?”—Malakai 1:6-8; 2:13-16.
9, 10. Yumi ken mekim wanem bilong soim olsem pasin bilong stap pren bilong Jehova i bikpela samting?
9 Long nau tu, Jehova i lukim bel hevi bilong planti marit na pikinini em ol yet i no gat asua tasol bikpela hevi i painim ol. Hevi i kamap, long wanem, man marit o papa bilong famili i tingim em yet na mekim pasin pamuk, sampela taim em meri marit o wanpela mama i mekim. Tru tumas Jehova i save bel hevi long dispela samting. Man i stap pren bilong God bai i wanbel long tingting bilong God na em bai givim bel long strongim marit bilong em, na em bai sakim tingting bilong dispela graun olsem marit i no bikpela samting, na em bai “stap longwe long pasin pamuk.”—1 Korin 6:18.
10 Long marit na long ol narapela samting long laip bilong yumi, pasin bilong no laikim tru ol samting Jehova i tok em i nogut, na pasin bilong amamas tru long stap pren bilong em, dispela bai mekim Jehova i amamas na orait long man. Aposel Pita i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Yumi gat planti stori long Baibel long ol man i gat kain kain traim, tasol pasin bilong pret long God i bin kirapim ol long mekim ol pasin i stret.
Tripela Man i Pret Long God
11. Abraham i mekim wanem na ensel i tokaut olsem em i man bilong pret long God?
11 I gat wanpela man long Baibel em Jehova i kolim olsem pren bilong em—em Abraham. (Aisaia 41:8) I gat traim long pasin bilong Abraham long pret long God taim God i askim em long givim dispela wanpela pikinini bilong em Aisak olsem ofa. Em long rot bilong Aisak God bai truim tok promis bilong em olsem lain bilong Abraham bai kamap bikpela tru. (Stat 12:2, 3; 17:19) Olsem wanem? Dispela “pren” bilong Jehova em bai i winim dispela bikpela traim o nogat? (Jems 2:23) Taim Abraham i apim han i gat naip bilong kilim i dai Aisak, ensel bilong Jehova i tok: “No ken kilim pikinini. Yu no ken mekim wanpela samting long em. Yu gat dispela wanpela pikinini tasol, na yu no pasim em. Nogat. Yu redi tasol long givim em long God. Olsem na mi save, yu man bilong aninit [olsem pret] long God.”—Stat 22:10-12.
12. Wanem samting i bin helpim Abraham long bihainim pasin bilong pret long God, na yumi ken mekim wanem bilong bihainim wankain pasin?
12 Paslain long dispela, Abraham i bin soim olsem em i man bilong pret long God, tasol taim em i laik givim Aisak olsem ofa, dispela em i bikpela samting tru i kamapim klia olsem em i man bilong pret long God. Abraham i laik bihainim tok bilong God na em i orait long givim Aisak olsem ofa, tasol i gat bikpela samting moa i kirapim em long mekim olsem. Abraham i bilip tru olsem Papa bilong em long heven bai truim tok promis bilong Em, maski em i mas kirapim bek Aisak bilong mekim olsem. Olsem Pol i tok: Abraham “em i save pinis olsem, God em inap mekim olsem em i bin promis long mekim.” (Rom 4:16-21) Olsem wanem? Yumi redi long mekim wok bilong God maski yumi mas lusim sampela bikpela samting bilong yumi long mekim olsem? Yumi bilip tru pasin bilong mekim olsem bai i helpim yumi long bihain, long wanem, yumi save “God i save mekim gut tru long ol man i wok long painim em”? (Hibru 11:6) Dispela i makim pasin bilong pret tru long God.—Song 115:11.
13. Bilong wanem i stret Josep i tok em i man bilong pret long God?
13 Yumi ken skelim stori bilong narapela man i pret long God—em Josep. Josep em i wanpela wokboi nating long haus bilong Potifar, na long olgeta de traim bilong mekim pasin pamuk i painim em. I luk olsem em i no gat rot long abrusim meri bilong bos bilong em, oltaim dispela meri i laik pulim em long mekim pasin i no stret. Bihain, dispela meri i “holimpas . . . Josep,” na Josep “i ranawe i go ausait.” Wanem samting i bin kirapim Josep long sakim pasin i no stret wantu? Nambawan samting i kirapim em long mekim olsem em pasin bilong pret long God, olsem em i gat laik long abrusim “dispela pasin nogut tru,” na em i no laik mekim “sin long ai bilong God.” (Stat 39:7-12) I stret Josep i tok em i wanpela “man bilong aninit [olsem pret] long God.”—Stat 42:18.
14. Olsem wanem pasin marimari bilong Josep i kamapim klia em i man bilong pret long God?
14 Planti yia bihain Josep i bungim ol brata bilong em, bipo ol i bin mekim hatpela pasin long em na larim ol man i baim em bilong wok kalabus. Tasol long dispela taim ol i sot tru long kaikai, olsem na em bai isi long Josep long ting rot i op bilong bekim bek rong ol i bin mekim long em long bipo. Tasol man i hambak long namba bilong em na givim hevi long narapela, dispela man i no save pret long God. (Wok Pris 25:43) Olsem na taim Josep i luksave olsem tru tru pasin bilong ol brata bilong em i senis, em i bihainim pasin marimari na lusim tingting long rong bilong ol. Olsem Josep, pasin bilong yumi long pret long God bai kirapim yumi long mekim gutpela pasin long man i mekim pasin nogut, na em bai helpim yumi long winim ol traim.—Stat 45:1-11; Song 130:3, 4; Rom 12:17-21.
15. I gat wanem as na wokabaut bilong Jop i givim amamas long Jehova?
15 Jop em i narapela man i gutpela piksa tru long pasin bilong pret long God. Jehova i tokim Satan: “Yu lukim tu wokboi bilong mi, Jop, o nogat? Jop em i gutpela man tru na i no gat asua long ai bilong mi. Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut. Long olgeta hap bilong graun i no gat wanpela man i olsem em.” (Jop 1:8) Inap planti yia pinis, pasin bilong Jop long wokabaut stret i bin amamasim Papa bilong em long heven. Jop i pret long God, long wanem, dispela em i stretpela pasin na i nambawan gutpela rot long bihainim. Jop i tok: “Man i save aninit [olsem pret] long . . . Bikpela, na i save givim baksait long ol pasin nogut, dispela man i gat gutpela tingting na save.” (Jop 28:28) Jop em i man marit, em i no bin mekim sampela pasin i no stret long ol yangpela meri, na em i no tingting long painim rot long mekim pasin pamuk. Maski em i wanpela maniman, Jop i no bilip olsem mani bai lukautim em, na em i sakim olgeta kain pasin bilong lotuim giaman god.—Jop 31:1, 9-11, 24-28.
16. (a) Jop i bin mekim wanem bilong soim olsem em i sori long ol man? (b) Olsem wanem Jop i kamapim klia em i man bilong lusim tingting long rong bilong narapela?
16 Pasin bilong pret long God i makim olsem man bai givim baksait long ol pasin nogut, na tu, i makim olsem em bai mekim pasin sori long ol narapela. Olsem na Jop i save helpim ol man i aipas, lek nogut, na ol man i stap rabis. (Wok Pris 19:14; Jop 29:15, 16) Jop i save “sapos man i no mekim pasin sori long narapela man, em bai lusim pasin bilong pret long Man i Gat Olgeta Strong.” (Jop 6:14, NW ) Taim man i no lusim tingting long rong bilong narapela, o em i bel nogut long em, dispela i olsem em i no sori long em. God i tokim Jop long beten long tripela pren bilong em, em ol pren i bin givim bikpela hevi long em. (Jop 42:7-10) Olsem wanem? Yumi inap mekim wankain pasin long ol wanbilip husat i bin bagarapim bel bilong yumi? Sapos yumi beten long man i bin mekim yumi bel hevi, dispela i bikpela samting bilong helpim yumi long daunim pasin bilong bel nogut long em. Jop i kisim ol blesing, long wanem, em i man bilong pret long God, na dispela i helpim yumi long tingim ol gutpela samting Jehova bai ‘mekim bilong helpim ol man i aninit long em.’—Song 31:19; Jems 5:11.
Pret Long God o Pret Long Man
17. Pasin bilong pret long man i ken mekim wanem long yumi? Bilong wanem dispela pret i makim olsem man i tingim ol samting bilong nau tasol?
17 Pasin bilong pret long God inap kirapim yumi long bihainim stretpela pasin, tasol pasin bilong pret long man inap bagarapim bilip bilong yumi. Olsem na taim Jisas i laik strongim ol aposel long givim bel long autim tok, em i tok: “Yupela i no ken pret long ol man i save kilim i dai bodi, tasol ol i no inap kilim spirit bilong yupela. Nogat. Yupela i mas pret long God tasol. Em inap bagarapim spirit na bodi tu long hel [olsem Gehena].” (Matyu 10:28) Ol man i no inap bagarapim laip yumi laik kisim long bihain, olsem na pasin bilong pret long man i makim olsem man i tingim ol samting bilong nau tasol. Na tu, yumi pret long God, long wanem, yumi save em i gat bikpela strong tru, na taim yumi tingim dispela i olsem strong bilong olgeta gavman i samting nating. (Aisaia 40:15) Olsem Abraham, yumi bilip tru long strong bilong Jehova long kirapim bek ol wokboi i stap gut long em. (KTH 2:10) Olsem na yumi ken tok: “Sapos God i helpim yumi, orait husat bai i birua long yumi?”—Rom 8:31.
18. Olsem wanem Jehova i tingim ol man i pret long em?
18 Maski wanpela bilong famili o wanpela wanskul i givim hevi long yumi, yumi inap save olsem “man i aninit long Bikpela, em bai i sanap strong na i no ken pret long wanpela samting.” (Sindaun 14:26) Yumi ken askim God long givim strong long yumi, na yumi save em bai harim beten bilong yumi. (Song 145:19) I no gat wanpela taim Jehova bai lusim tingting long ol man i pret long em. Long rot bilong profet Malakai, Jehova i strongim bel bilong yumi olsem: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit [olsem pret] long Bikpela na i tingting long em oltaim.”—Malakai 3:16.
19. Wanem ol pret bai pinis, tasol wanem kain pret bai stap oltaim oltaim?
19 I no longtaim na olgeta man i stap long graun bai lotuim Jehova na pasin bilong pret long man bai pinis. (Aisaia 11:9) Na tu, pret long bikpela hangre, sik, pasin raskol, na woa, dispela tu bai pinis. Tasol pasin bilong pret long God bai stap oltaim oltaim, long wanem, ol wokboi i stap gut long em long heven na graun, oltaim ol bai rispek long em, harim tok bilong em, na givim biknem long em. (KTH 15:4) Tasol inap long dispela taim i kamap, yumi olgeta i ken tingim tok bilong Solomon: “Yu no ken laikim tumas pasin bilong ol man bilong mekim sin. Nogat. Oltaim yu mas strong long i stap aninit [olsem pret] long Bikpela. Sapos yu mekim olsem, bai yu painim gutpela taim bihain, na yu no inap i dai kwik.”—Sindaun 23:17, 18.
[Ol Futnot]
a Long ples wok sampela manmeri i lusim pasin bilong pret long ol samting ol inap kisim bagarap long en, long wanem, oltaim ol i mekim wok long ol dispela samting. Taim ol i askim wanpela wokman bilong wanem wanpela pinga bilong planti kamda i lus, em i tok: “Ol i lusim pasin bilong pret long holim pawa-so.”
b Jehova yet i no laikim tru ol dispela samting. Olsem: Efesus 4:29 i stori long sampela tok i olsem “tok nogut.” Mining bilong tok Grik ol i tanim olsem “nogut” i makim samting i sting, olsem stingpela prut o pis o abus. Dispela tok i kamapim gut tingting yumi yet i mas holim long ol tok nogut o tok doti, olsem yumi les olgeta long en. Na tu, planti taim Baibel i tok ol giaman god ol i samting nogut tru, kain olsem pekpek. (Lo 29:17, NW; Esekiel 6:9, NW ) Strongpela tingting bilong yumi long les tru na surik long pekpek i helpim yumi long save long tingting bilong God long les tru long olkain pasin bilong lotuim giaman god.
c Bilong kisim skul, tingim stori bilong ol dispela man i stap long Baibel: Kein (Stat 4:3-12); Devit (2 Samuel 11:2–12:14); Gehasi (2 King 5:20-27); na Usia (2 Stori 26:16-21).
Yu Tingim Yet?
• Olsem wanem bai yumi lain long no laikim tru ol pasin nogut?
• Olsem wanem sampela Israel long taim bilong Malakai i mekim olsem pasin bilong stap pren bilong Jehova i samting nating?
• Olsem wanem Abraham, Josep, na Jop i ken lainim yumi long pasin bilong pret long God?
• Wanem kain pret bai i no inap pinis na bilong wanem?
[Piksa long pes 19]
Ol papamama i gat gutpela tingting, ol bai lainim pikinini long pret long ol samting em inap bagarapim ol
[Piksa long pes 20]
Pret i helpim yumi long abrusim birua, na olsem tasol pasin bilong pret long God i helpim yumi long abrusim pasin nogut
[Piksa long pes 23]
Jop i no bin lusim pasin bilong pret long God maski tripela pren giaman i traim em
[Kredit Lain]
From the Bible translation Vulgata Latina, 1795