Ol Buk Samting Yu Ritim—Gutpela Savetok Bilong Solomon
“OL MAN i save raitim planti buk, na dispela kain wok i no gat pinis bilong en. Na sapos yu wok oltaim long stadi, bai skin bilong yu i les olgeta.” (Saveman 12:12) Taim saveman King Solomon bilong Israel i raitim dispela tok inap 3,000 yia i go pinis, em i no tok olsem pasin bilong ritim buk em i samting nogut, nogat. Tasol em i tok yumi mas skelim gut ol buk yumi ritim. Dispela tok i stret tru long nau, long wanem, ol masin bilong prinim ol buk i save prinim planti milion buk long olgeta yia!
Ol dispela “planti buk” Solomon i tok long en, em ol buk i no save strongim man o givim nupela strong long man. Olsem na em i tok sapos yu givim bel long ritim ol, ol i no inap helpim yu na givim gutpela samting long yu inap oltaim, nogat, ol bai mekim “skin bilong yu i les olgeta.”
Tasol olsem wanem? Solomon i tok i no gat ol buk i gat ol gutpela tok bilong stiaim gut ol man? Nogat! Solomon i tok moa: “Tok bilong ol saveman i olsem ol stik i gat sap, em ol wasman i holim bilong stiaim ol sipsip. Na sapos saveman i bungim ol gutpela tok long wanpela buk, bai dispela tok i stap longtaim, olsem ol nil i pas strong long plang. God, wasman bilong yumi olgeta, i bin givim ol dispela tok long yumi.” (Saveman 12:11) Tru tumas, i gat ol tok em ol i olsem “ol stik . . . bilong stiaim ol sipsip,” em ol inap givim gutpela tingting. Ol inap stiaim man i go long stretpela rot. Na tu, olsem “ol nil i pas strong long plang,” ol tok inap strongim tingting bilong yumi long samting yumi bin pasim tok long bel long mekim.
Yumi ken painim we ol kain gutpela tok olsem? Olsem Solomon i tok, ol nambawan buk namel long olgeta buk, em ol buk i kam long dispela wanpela Wasman, em Jehova. (Song 23:1) Olsem na, nambawan gutpela buk yu ken ritim em buk spirit bilong God i kamapim—em Baibel. Pasin bilong ritim dispela buk long olgeta taim inap helpim yumi long “kisim tru olgeta gutpela pasin, na em i mekim yumi i redi long mekim olgeta kain gutpela wok.”—2 Timoti 3:16, 17.