Buk Bilong Baibel Namba 22—Song Bilong Solomon
Man Bilong Raitim: Solomon
Ples Em i Bin Raitim: Jerusalem
Raitim Pinis: 1020 B.C.E. samting
1. Olsem wanem dispela Song “i winim olgeta song”?
WANPELA “tisa” bilong lotu Juda long taim bilong ol aposel, nem bilong em Akiba, em i laikim tru Song Bilong Solomon,a na em i tok: “Dispela de ol Israel i kisim dispela nambawan Song em i gutpela de tru, na pasin bilong ol man bilong dispela graun i no inap long en.” Ol i kisim nem bilong buk long namba wan tok bilong en: “Dispela song em i gutpela song na i winim olgeta song. Solomon yet i bin raitim dispela song.” Long tok Hibru, ol i kolim olsem “Song i winim olgeta song,” na i makim song i gutpela moa yet, wankain olsem dispela tok “heven i winim olgeta heven” em i makim “heven i stap antap tru.” (Lo 10:14) Em i no planti song ol i bungim wantaim, nogat; em i wanpela song tasol. Em “nambawan gutpela song na i winim ol narapela gutpela song i bin i stap, o ol man i bin raitim.”b
2. (a) Husat i raitim Song Bilong Solomon? Olsem wanem em inap tru long raitim? Olsem wanem na yumi inap tok em i song bilong man i lus long kirapim meri long laikim em? (b) Em i raitim buk we na long wanem taim?
2 King Solomon bilong Jerusalem i raitim dispela song, olsem ves 1 i tok. Em inap tru long raitim dispela nambawan gutpela song Hibru. (1 Kin. 4:32) Dispela song em wanpela stori i makim planti samting na i gat ol gutpela tok piksa i stori long naispela skin. Man i ritim, sapos em i save long pasin na sindaun bilong ol man long hap sankamap, bai em i pilim moa yet ol dispela tok. (Sol. 4:11, 13; 5:11; 7:4) Narapela kain samting i kamap na i kirapim Solomon long raitim. Em i gat bikpela laik tru long yangpela meri bilong wanpela liklik ples, tasol maski Solomon em i bikpela king i gat bikpela save, na bikpela strong, na planti mani kago, na kwin bilong Seba i kirap nogut long en, dispela yangpela meri i no tingim. Em i givim bel tru long pren bilong em, em wasman bilong ol sipsip na meme, na king i lus. Olsem na yumi inap kolim buk olsem Song Bilong Solomon Taim Em i Lus Long Kirapim Meri Long Laikim Em. God Jehova i kirapim Solomon long raitim dispela song bilong helpim ol lain i kamap bihain na ol i ritim Baibel. Em i raitim long Jerusalem long yia 1020 C.E. samting, em sampela yia bihain long taim ol i wokim pinis tempel. Taim em i raitim dispela song, em i kisim pinis “60 [meri] i stap kwin, na 80 ol i namba 2 lain meri.” Tasol klostu long pinis bilong wok king bilong em, em i gat “700 meri na 300 namba 2 lain meri.”—Sol. 6:8; 1 Kin. 11:3.
3. Wanem ol samting i makim olsem Song Bilong Solomon em i hap tru bilong Baibel?
3 Long bipo, paslain tru long taim bilong Krais, olgeta man i wanbel long ting Song Bilong Solomon em i hap tru bilong Baibel Hibru em spirit bilong God i bin kamapim. Em i stap long Baibel Grik Septuagint. Josifas i putim long lista em i wokim bilong ol buk bilong Baibel. Olsem na i gat ol wankain samting i makim olsem dispela buk i hap tru bilong Baibel olsem ol narapela buk bilong Ol Skripsa Hibru.
4. (a) I no gat dispela tok “God” long Song Bilong Solomon, tasol yu ting dispela i makim olsem em i no hap tru bilong Baibel? (b) Wanem samting i makim olsem dispela buk em i hap tru bilong Baibel?
4 Sampela i tok em i no hap tru bilong Baibel, long wanem, em i no stori liklik long God. Tasol dispela i no makim olsem em i no hap tru bilong Baibel. Na olsem tasol, sapos dispela tok “God” i stap long en, dispela tu i no makim olsem em i hap tru bilong Baibel. Tasol long tok Hibru, nem bilong God ol i bin sotim, em i stap long sapta 8, ves 6, em ves i tok laik bilong meri i olsem “paia bilong Ja.” Tru tumas, dispela buk em hap bilong buk bilong God em Jisas Krais i orait long en taim em i tok: “Yupela i ting tok i stap long buk bilong God i save givim yupela laip i stap gut oltaim oltaim. Olsem na yupela i save wok long ritim na skelim olgeta tok i stap long buk bilong God.” (Jo. 5:39) Na tu, dispela buk i stori gut long strongpela laik namel long man na meri, na long samting bilong spirit dispela i olsem piksa bilong Krais i laikim tumas “meri” bilong em na “meri” i laikim tumas em. Dispela i makim Song Bilong Solomon em i hap tru bilong Baibel.—KTH 19:7, 8; 21:9.
HELPIM YUMI OLSEM WANEM?
16. Dispela song i skulim yumi long wanem ol bikpela samting?
16 Dispela song i stori long laik i stap namel long man na meri na em inap skulim ol manmeri bilong God long wanem ol samting bilong helpim ol long nau? Em i kamapim klia pasin bilong bihainim ol lo bilong God bilong stiaim tingting na holimpas na stap gut long en. Em i lainim yumi olsem sapos man i laikim tru meri na meri i laikim tru man, na tupela i stap gut na i stap stret, em gutpela samting tru. Na yumi ken save, pasin bilong laikim tru narapela, dispela i gat strong na yumi no inap daunim, o kilim i dai, o baim. Dispela song inap helpim ol yangpela man na meri Kristen, na ol man na meri marit, long sakim ol traim na ol samting i laik pulim ol.
17. (a) Pol i tok wanem na em i makim olsem dispela song em i bilong skulim lain Kristen? (b) Olsem wanem na yumi ken ting Pol i bin tingim dispela song taim em i raitim pas long ol Korin na ol Efesus? (c) Olsem wanem tok bilong en i stret wantaim ol tok em spirit bilong God i kirapim Jon long raitim?
17 Tasol dispela song em spirit bilong God i kamapim em inap helpim lain Kristen olgeta. Ol Kristen bilong pastaim i save dispela song em i hap bilong buk bilong God, na wanpela i raitim tok olsem: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Ro. 15:4) Man i raitim dispela tok em Pol, na ating em i tingim pasin bilong meri Sulam long stap gut long dispela wasman bilong sipsip em i laikim tumas, olsem na Pol i tokim ol Kristen: “Mi gat strongpela laik long yupela i mas bihainim tru Krais. Mi yet mi bin makim yupela bilong kamap ol lain bilong Krais, na mi laik givim yupela long Krais olsem mi bringim yangpela meri i stap klin tru i go long man em i laik maritim.” Na Pol i tok, Krais i laikim tumas lain bilong em, olsem man i laikim tumas meri bilong em. (2 Ko. 11:2; Ef. 5:23-27) Jisas Krais em i Gutpela Wasman bilong ol na King bilong ol, na em i tokim ol, bai ol inap kisim bikpela amamas bilong “marit” long em long heven.—KTH 19:9; Jo. 10:11.
18. Olsem wanem gutpela pasin bilong yangpela meri Sulam inap helpim ol disaipel bilong Krais em God i bin makim ol long spirit holi?
18 Gutpela pasin bilong meri Sulam inap skulim gut ol disaipel bilong Krais Jisas em God i bin makim ol long spirit holi. Ol tu i mas holim strong laik bilong ol long em, na ol i no ken aigris long ol samting bilong dispela graun; ol i mas holimpas ol lo bilong God i go inap long ol i kisim prais. Ol i putim tingting i go long ol samting bilong antap na ol i ‘wok pastaim long painim Kingdom.’ Ol i amamas long ol gutpela tok na pasin em Wasman bilong ol, Jisas Krais, i mekim long ol. Ol i amamas long save, maski ol i no inap lukim em, em i stap klostu long ol, na em i kirapim ol long strongim bel na winim strong bilong dispela graun. Ol i laikim moa yet Wasman na King bilong ol, “olsem paia i kirap bikpela tru,” olsem na bai ol inap win na pas gut wantaim em long Kingdom bilong heven. Dispela bai mekim holi nem bilong Jehova!—Mt. 6:33, Nupela Testamen na Ol Sam; Jo. 16:33.
[Ol Futnot]
b Buk Commentary, bilong Clarke, Vol. III, pes 841.